Eastern Tamang Language Bible
अय्यू 2
दोःसी शैतानसे अय्यूबला सेम च्याबा
अर्गु धिनकुनु स्वर्गदूतगदे परमप्रभुला ङाच्छा ह्रुप तबा धुइरी शैतानएनोन परमप्रभुदा ह्रुप तबारी थेनीगदेदेन छ्यामनोन निजी। ओच्छे परमप्रभुसे शैतानदा “ए खानङ्ग्याम खबा?” भिसी ङ्योइमा, शैतानसे “ङा जम्बुलिङ नाङ्नोन कोर्सी खबा हिन्ना” भिसी पाङ्जी। जमाहेन्से परमप्रभुसे शैतानदा चुह्रङ् भिसी सुङ्जी, “तिग एसे ङाला गे लबा म्हि अय्यूबदा म्राङ्जी? ङादा मान लबादेन नाइबा गेग्याम थारेङ् चिबा थे ह्रङ्बा तिगै दोष आरेबादेन सोझो म्हि जम्बुलिङरी अर्गु खालैनोन आरे। होह्रङ्नोन एसे थेदा नाश लबारी ङादा थीजी। तर थेला विश्वास दन्देधोना य्हाङ्य्होङ् तबा आरे।” शैतानसे परमप्रभुदा चुह्रङ् भिसी जोहाब पिन्जी, “म्हिसे ह्राङला ल्हुइदा ल्हानान वास्ता लमुला, थेसे ह्राङला ज्यान जोगब लबारी जम्मान ताम लमुला। तर ह्राङसे थेला ल्हुइरी चोट तना लजी भिसम थेसे ह्राङला ओन्छाङ्रीन ह्राङदा केःला।”
जमाहेन्से परमप्रभुसे शैतानदा चुह्रङ् भिसी सुङ्जी, “लु, थेह्रङ् भिसम थे एला यारी मुला। तर एसे थेला ज्यान चा किन्आम्याङ्।”
जमाहेन्से शैतान परमप्रभु मुबा ग्लाग्याम थोन्सी निजी। ओच्छे थेसे अय्यूबला काङहेन्से थोबोधोना ल्हुइ नाङ्नोन पोरनोन पोर खना लजी। अय्यूब मेफ्राला उमरी निसी चिजी, ओच्छे पोर रीबाला लागिरी साप्राला थिबा ताङ्ला टोगोल गिक यारी थोजी। थेला म्रिङ्से थेदा चुह्रङ् भिसी पाङ्जी, “तिग ह्राङसे ङाच्छा ह्रङ् लसी अझै परमेश्वरथोरी भर लसीन स्य्हूबा मुला? बरू परमेश्वरदा केःसी सिउ।” अय्यूबसे चुह्रङ् भिसी जोहाब पिन्जी, “एसे मूर्ख म्रिङ्म्हेमे गिकसे लबा ह्रङ्बान ताम लबा मुला। परमेश्वरग्याम सुख याङ्मा चा य्हाङ ताङ्बा ओच्छे दुख याङ्मा चा आताङ्बा?” चुह्रङ्बा दुख तसैनोन अय्यूबसे परमेश्वरदा दोष लसी पाप आलनी।
अय्यूबला ह्रोगदे खबा
अय्यूबला गोर सोम ह्रोगदे मुबा, थेनीगदे चा तेमान सहररी चिबा एलीपज, शुही य्हुल्सारी चिबा बिल्दद, नामा य्हुल्सारी चिबा सोपर मुबा। थेनीगदेसे अय्यूबथोरी तबा आपत विपतला बारेरी थेःमाहेन्से अय्यूबदा आँट पिन्बाला लागिरी थेनीगदे ह्राङ ह्राङला दिमग्याम छ्यामनोन ढिक्सी खजी। थेनीगदेसे अय्यूबदा थारेङ्ग्यामनोन म्राङ्जी, तर थेनीगदेसे अय्यूबदा ङोसेआखम्नी। अय्यूबदा ङोसेमाहेन्से दुख म्हन्सी क्राबा क्रिङ्बा लबान थेनीगदेसे ह्राङला क्वान ढेसी ह्राङला थोबोरी धुलु युजी। जमाहेन्से थेनीगदेएनोन धिन निस म्हुन निसधोना अय्यूबदेन छ्यामनोन सरी चिजी। थेनीगदे न्हङ्ला खालैसेन ताम गिकएनोन पाङ्बारी आखम्नी। तिग्दा भिसम अय्यूबसे गादे घ्रेन दुख नाबान मुला भिबा ताम थेनीगदेसे घोबा मुबा।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.