Eastern Tamang Language Bible
यशै 53:5
Verse 5 is marked below, with the whole chapter around it. Read from the start
“ङन्से पाङ्बा समाचार खाल्से विश्वास लला?
चु ताम परमप्रभुसेन लबा हिन्ना भिसी खाल्से म्राङ्बा मुला?
थे परमप्रभुला ङाच्छा सोङ्सोङ् खार्बा सरी फुइबा कलिलो दोङ ह्रङ् लसी घ्रेन तबान निजी।
य्हाङला सेम ढाबारी थेदेन छ्याम तिगै ज्यबा ताम आरेमुबा,
थेला लीएनोन जेःबा आरेमुबा,
ओच्छे थेदा य्हाङसे वास्ताएनोन आलनी,
थेदेन छ्याम य्हाङदा सेम निबा ताम तिगैनोन आरेमुबा।
थेदा म्हिगदेसे हेला लमुबा, ओच्छे थेदा वास्ता आलमुबा,
थेसे ल्हानान दुख नाजी,
म्हिगदेसे थेदा म्राङ्सैनोन आम्राङ्बा सो लमुबा।
थेदा जम्मासेन हेला लमुबा,
ओच्छे य्हाङसे थेदा तिगै गेआखेल्बा म्हि हिन्ना भिसी म्हन्जी।
“पाङ्नोन तोःमा य्हाङला कमजोर तामगदे थेसेन किन्जी,
ओच्छे य्हाङसे नातोःबा दुख नाजी।
तसैनोन थेसे परमेश्वरग्याम सजाय नातोःजी,
ओच्छे परमेश्वरसे थेदा छेक्जी भिसी य्हाङसे म्हन्जी।
तर य्हाङला पापला लागिरी थेसे दुख नाजी।
य्हाङला नाइबा बानीबेहोरला लागिरी थेसे तोबा ग्याङ्बा नाजी।
थेसे सजाय नाबासेलमा य्हाङसे शान्ति याङ्जी,
ओच्छे थेसे ताबा कोर्राला चोटग्याम य्हाङ खम्जी।
य्हाङ ग्याम थोर्बा ग्यु ह्रङ्बान तबा मुबा,
य्हाङ ह्राङ ह्राङलान तोसोरी भ्रबा मुबा,
तर य्हाङसे नातोःबा पापला सजाय परमप्रभुसे थेदा नापुङ्जी।
थेदा म्हिगदेसे नाङ्बाझ्याक्बा लजी,
ओच्छे थेसे दुख नातोःजी,
तसैनोन थे तिगै आपाङ्ना कुटिसी चिजी।
साइबारी छ्याइबा ग्यु बोको ह्रङ्नोन लसी
ओच्छे ह्राङला क्रा थाबा म्हिला ङाच्छा ग्यु कुटिसी चिबा ह्रङ्नोन लसी थेएनोन कुटिसी चिजी।
थेदा नाङ्बाझ्याक्बा लजी,
ओच्छे थेदा सजाय पिन्सी साइबारी भोर्जी।
थेला सन्तानना बारेरी खाल्से खेन्बा मुला?
तिग्दा भिसम थेदा सोबागदेला य्हुल्साग्याम तेःजी,
ओच्छे ङाला म्हिगदेला पापला लागिरी थेसे तोबा ग्याङ्बा नाजी।
थेला धुर्सा नाइबा गे लबा म्हिगदेला धुर्सादेन छ्याम ग्ला गिकरीन स्होजी,
तर थेला लाश चा फ्युक्पो म्हिगदेला धुर्सारी ल्हुबा मुबा।
तिग्दा भिसम थेसे तिगै आज्यबा गे लबा आरेमुबा,
ओच्छे तिगै फट्टा तामएनोन लबा आरेमुबा।
“तसैनोन थेदा दुखदेन सजाय नापुङ्बा परमप्रभुला सेम मुबा,
परमप्रभुसे थेदा दोषबलि ह्रङ्बान स्होजी,
तसैनोन थेसे ह्राङला सन्तानगदेदा म्राङ्ला।
ओच्छे थे जुकजुकधोनान स्होला,
ओच्छे परमप्रभुसे म्हन्बा गे थेग्याम पूरा तला।
थेसे दुख नासी जिन्माहेन्से जुनी पिन्बा य्हाल म्राङ्ला, ओच्छे ताङ्ला,
तिगै दोष आरेबा ङाला गे लबा म्हिसे ल्हानान म्हिगदेसे नातोःबा पापला सजाय नाला,
ओच्छे थेसे थेनीगदेला पाप माफ लला।
थेतबासेलमा ङाइ थेदा मान याङ्बा ग्लारी थान्ना,
ओच्छे थेसे ब्यन्बा सामानगदे भङ्बा म्हिगदेदेन छ्याम भो लला,
थेसे ताङ्सी ताङ्सी ह्राङला ज्याननोन पिन्जी।
ओच्छे थेदा नाइबा गे लबा म्हिगदेदेन छ्यामनोन झ्याजी।
थेसे ल्हानान म्हिगदेला पापला धोइ पुइजी,
ओच्छे नाइबा गे लबा म्हिगदेदा थेसे परमेश्वरदेन छ्याम ढिक्ना लजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.