Eastern Tamang Language Bible
यशै 41:10
Verse 10 is marked below, with the whole chapter around it. Read from the start
आँट पिन्बा परमप्रभु
“समुद्र क्यारक्युरला थारेङ् थारेङ्ला य्हुल्सागदे, ङाला ङाच्छापट्टि कुटिसी चिउ।
य्हुल य्हुल्ला म्हिसे छार भङ् याङ्गै।
थेनीगदे ङाम्री खसी ताम पाङ्गै।
य्हाङ छ्यामनोन अदालतरी ह्रुप ताइ।
“जम्मादान ब्रेना लबा म्हिदा स्यारग्याम खाल्से ङ्योइसी भजी?
परमप्रभुसेन य्हुल य्हुल्ला म्हिगदेदा थेला तहरी थान्ना,
ओच्छे थेला ओन्छाङ्री ग्लेगदेदा परमप्रभुसे ह्राङला तहरी भला।
थेनीगदेदा थेसे तरवारसे ताम्सी धुलु ह्रङ्नोन तना लला,
ओच्छे थेसे ह्राङला म्यादलीसे रेःना लबा भुस ह्रङ्नोन तना लला।
थेसे थेनीगदेदा ताप्मुला,
ओच्छे ङाच्छा खाइमै आभ्रबादेन ङोआसेबा
ग्यामगदेरीनोन थेदा तिगैनोन आतमुला।
शुरूहेन्सेन वंश वंशदा ङ्योइसी चु गे पूरा लबा खाला हिन्ना?
तिग ङानोन आहिन? ङा थेनोन हिन्ना,
ङा ङाच्छाएनोन मुबा, दन्देनोन मुला।
ओच्छे ङा जुकजुकधोनान तला।”
समुद्र क्यारक्युरला थारेङ् थारेङ्ला य्हुल्सागदे ङाला गे म्राङ्सी लोङ्सी ल्हिग ल्हिग तजी।
ओच्छे जम्बुलिङला कुनी गिकहेन्से अर्गु कुनीधोनाला य्हुल्सागदे ल्हिग ल्हिग तजी।
थेतबासेलमा थेनीगदेदेन छ्यामनोन खमुला।
गिकसे अर्गुदा ह्रो लमुला,
ओच्छे ह्राङला आलेदा “आँट लउ” भिसी पाङ्मुला।
ज्यना लसी गे लबारी सेबा म्हिसे बाँडादा आँट पिन्मुला,
ओच्छे मूर्ति स्होबारी हम्बरसे छेक्सी पाता च्युल्च्युल तना लबा म्हिसे मूर्ति स्होबा म्हिदा आँट पिन्मुला।
थेसे “चु रसन ज्यबा मुला” भिसी पाङ्मुला।
ओच्छे मूर्ति आकोगै भिसी खिल ठोक्सी कोङ्ना लमुला।
“तर ङाला गे लबा म्हि इस्राएल,
ङाला ह्रो अब्राहामला सन्तान,
ङाइ एदा धम्बा मुला,
एदा ङाइ जम्बुलिङला धिग्याम भजी,
ओच्छे ङाइ एदा जम्बुलिङला अर्गु कुनीग्याम ङ्योइजी।
ओच्छे ङाइ एदा चुह्रङ् भिसी पाङ्बा मुला,
‘ए ङाला गे लबा म्हि हिन्ना,
ङाइ एदा धम्बा मुला,
ङाइ एदा ख्लाबा आरे।’
थेतबासेलमा आलोङ्गो,
तिग्दा भिसम ङा एदेन छ्याम मुला,
सेमरी दुख आम्हन्गो,
तिग्दा भिसम ङा एला परमेश्वर हिन्ना।
ङाइ एदा शक्ति पिन्ना।
ङाइ एदा ह्रो लला।
ङाला शक्तिशाली दाहिने यासे ङाइ एदा जोगब लला।
“एदेन छ्याम बोमो खबागदे पेःसी लीनोन उन्बारी आखम्बाधोना तला।
एदा बिरोध लबागदे तिगै गेआखेल्बा तला ओच्छे नाश तला।
एसे एला शत्रुगदेदा म्हाइसैनोन आस्याप।
एदा बिरोध लसी एदेन छ्याम छेबारी खबागदेएनोन
तिगै गेआखेल्बा तसी नाश तला।
तिग्दा भिसम ङा परमप्रभु एला परमेश्वर हिन्ना,
ङाइ एदा आँट पिन्बान चु ताम पाङ्ला,
‘ए आलोङ्गो, ङाइ एदा ह्रो लला।’
बुलुङ् ह्रङ्बान जजाबा याकूब,
कमजोर इस्राएल, आलोङ्गो!
तिग्दा भिसम ङाइनोन एदा ह्रो लला।”
चु ताम एदा जोगब लबा इस्राएलला तिगै दोष आरेबा परमप्रभुसेन सुङ्बा हिन्ना।
“च्यागो, ङाइ एदा म्युङ्म्युङ्बा स्वा मुबा अन्न तोबा हतियार स्होला।
एसे गङ्गदेदा मेना लला
ओच्छे छेक्सी छेक्सी नाश लला।
ओच्छे गङ्गदेदा छ्याकछिक निना लसी धुलु तना लला।
एसे थेनीगदेदा य्हाप्ला,
ओच्छे थेनीगदेदा लाबासे भोर्ला,
ओच्छे थेनीगदेदा लाबालुङ्सरसे भोर्ला।
तर ए चा परमप्रभुदेन छ्याम ताङ्ला।
एसे इस्राएलला परमप्रभुला जयजयकार लला।
“प्राङ्बोदेन खाँचोरी परब तबा ङाला म्हिगदेसे क्युइ म्हाइला,
तर थोपा गिक क्युइएनोन आत, क्युइ फुइसी थेनीगदेला सुङ्नोन खार्ला।
तर ङा परमप्रभुसेन थेनीगदेसे लबा बिन्तीला जोहाब पिन्ना।
ङा इस्राएलला परमेश्वरसे थेनीगदेदा खाइमै आख्ला।
तोङ्तोङ्बा गङ्ला जोग्याम ङाइ स्योङ् बगब तना लला,
ओच्छे ब्याँसीरी क्युइला मूलगदे तेःला।
ङाइ तोङ्तोङ्बा ग्लारी क्युइला ग्योइ ओच्छे सोङ्सोङ् खर्बा ग्लारी क्युइला मूल स्होला।
ङाइ तोङ्तोङ्बा ग्लारी स्युक्पादेन
बबुल दोङगदे, मेहदीदेन
जैतूनना दोङगदे फुइना लला।
तिगै आतबा सरी ङाइ थाङ्सिङदेन
स्युक्पाला दोङगदे फुइना लला।
थेतबासेलमा चु गे ङा परमप्रभुसे लबा हिन्ना भिसी म्हिगदेसे म्राङ्खम्गै।
ओच्छे इस्राएलला तिगै दोष आरेबा ङा परमेश्वरसेन चुह्रङ् लबा हिन्ना भिसी म्हिगदेसे पूरन घोबारी खम्गै।”
परमप्रभुदेन ल लुगदे
परमप्रभुसे चुह्रङ् भिसी सुङ्बा मुला,
“ल लुगदे, एनीगदेला तिग तिग मुद्दा मुला भसी खउ,”
याकूबला जम्मान भन्दा घ्रेन ग्लेसे चुह्रङ् भिसी सुङ्बा मुला,
“एनीगदेला तिग तिग प्रमाण मुला पाङ्गो।”
मूर्तिगदे, एनीगदे चुरी खउ,
ओच्छे लिच्छा तिग तसेला मुला थे ताम पाङ्गो।
होह्रङ् लसीन तसी जिन्बा ताम ङन्दा पाङ्सी पिन्गो,
ओच्छे एनीगदेला ताम ठीक हिन्ना कि आहिन ङन्से च्यागे,
ओच्छे थे ताम अन्छार पूरा तला कि आत ङन्से था याङ्ला।
ओच्छे लिच्छा तिग तसेला मुला थे ताम ङन्दा पाङ्सी पिन्गो।
दाहेन्से लिच्छा तिग तसेला मुला थे ताम ङन्दा पाङ्गो,
जमाहेन्से एनीगदे सत्य ईश्वर हिन्ना चिम भिसी ङन्से था याङ्खम्ला।
ज्यबा तसै आज्यबा तसै तिगै गे लउ,
ओच्छे ङन्ना सेम सिना लसी ङन्दा लोङ्ना लउ।
तर एनीगदे मि गेनोन आखेल्बा तबा मुला,
ओच्छे एनीगदेसे लबा गे तिगै गेआखेल्बा तबा मुला।
जुन म्हिसे एनीगदेदा मान लमुला थेनीगदेसे हेला नातोःमुला।
“ङाइ झ्याङ्ग्याम ङादेन छ्याम बिन्ती लबा म्हि गिकदा धम्बा मुला,
थे धिनी फेबा ग्लापट्टिग्याम खला।
हिलोदा नाङ्बा ह्रङ्नोन ओच्छे कुमालेसे साप्रादा नाङ्बा ह्रङ्नोन लसी थेसे शासन लबागदेदा नाङ्ला।
एनीगदे न्हङ्ला खाल्से चा चु ताम तला भिसी ङान्छान पाङ्बा मुबा? खालैसेन आपाङ्नी।
एनीगदेसे पाङ्बा तामनोन ठीक हिन्ना भिसी ङन्से खाह्रङ् लसी था याङ्से?
चु तामला बारेरी एनीगदेसे ताम गिकएनोन आपाङ्नी।
एनीगदेला ताम ङ्यन्बा म्हि खालैनोन आरेमुबा।
इस्राएलला म्हिगदेदा तिग तला भिसी जम्मान भन्दा ङाच्छा पाङ्बा ङा परमप्रभुन हिन्ना।
च्यागो, थेनीगदे चुरीन मुला।
यरुशलेमदा ज्यबा समाचार थेःना लबारी समाचार भोर्बा म्हि गिकदा पुइबा ङानोन हिन्ना।
ङाइ ला लुगदेग्याम चु ताम म्हाइजी,
तर थेनीगदे खालैसेन तिगै आपाङ्नी।
थेनीगदेला गुङ्री थेनीगदेदा सल्लाह पिन्बा म्हि खालैनोन आरेमुबा।
ङाइ ङ्योइबा तामला जोहाब थेनीगदे खालैसेन पिन्बारी आखम्नी।
च्यागो, चु ल लुगदे जम्मान फट्टा हिन्ना।
थेनीगदेसे लबा गे चा तिगै गेआखेल्बा मुला।
थेनीगदेला मूर्तिगदे चा अलमल तना लबा बिथाला स्हे जे हिन्ना।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.