Eastern Tamang Language Bible
यशै 42
परमप्रभुला गे लबा म्हि
“ङाला गे लबा म्हि चुरी मुला,
थेदा ङाइ भङ् पिन्ना,
ङाइ धम्बा म्हिदेन छ्याम ङा ताङ्बा मुला।
थेदा ङाइ ङाला आत्मासे प्लिङ्ना लबा मुला।
थेसे य्हुल य्हुल्ला म्हिगदेला निसाफ लला।
थे खाइमै आक्रिङ्, थेसे घ्रेन काइ आतेः,
थे ग्याम ग्यामरी ताम लसी आभ्र।
थेसे क्युइबारी छ्याइबा मादा आक्युइ,
ओच्छे थेसे सिबारी छ्याइबा नाङ्सलदाएनोन आसाइ।
थेसे जम्मालान ठीक निसाफ लला।
थेसे जम्बुलिङला ठीक निसाफ आलदेधोना थे कमजोर आत, ओच्छे थेला सेमएनोन आसि।
समुद्र क्यारक्युरला थारेङ् थारेङ्ला य्हुल्सागदेसेनोन थेला ठिमथोरी आश लला।”
परमेश्वरसे मु स्होसी पाल फ्रेङ्बा ह्रङ् लसी फ्रेङ्जी,
थेसे जम्बुलिङदेन जम्बुलिङरी मुबा जम्मादान स्होजी,
ओच्छे जम्बुलिङरी मुबा जम्मान म्हिगदेदा सादेन आत्मा युसी पिन्जी।
दाहेन्से परमप्रभु परमेश्वरसे ह्राङला गे लबा म्हिदा चुह्रङ् भिसी सुङ्बा मुला,
“ङा परमप्रभुसे सदन ठीक गे लमुला भिसी उन्बाला लागिरीन ङाइ एदा धम्बा मुला।
ङाइ एला यारी चुङ्सी एदा जोगब लला।
एग्यामसेन ङाइ य्हुल य्हुल्ला म्हिगदेदेन छ्याम कबुल लला,
ओच्छे ङाइ एदा अर्गु य्हुल्ला म्हिगदेला लागिरी नाङ्सल स्होला।1
एसे मी आम्राङ्बागदेला मी म्राङ्ना लला,
झ्याल्खानरी मुबागदेदा झ्याल्खानग्याम तेःला,
ओच्छे धोपधोपला तहरी मुबागदेदा धोपधोपग्याम फेला।
“ङा परमप्रभु हिन्ना, ङाला मिन चुनोन हिन्ना,
ङाइ याङ्तोःबा मान ङाइ स्य्हान्दोदा आपिन।
ङादा लतोःबा जयजयकार मूर्तिगदेदा आपिन।
च्यागो, ङाइ ङाच्छान पाङ्बा तामगदे दन्दे पूरा तबा मुला।
दाहेन्से तबा भन्दा ङान्छान ङाइ एनीगदेदा छार ताम पाङ्ला।”
परमप्रभुला जयजयकार लबा
परमप्रभुला लागिरी छार व्हाइ गिक गोउ,
जम्बुलिङला जम्मासेन थेला जयजयकार लउ,
समुद्रग्याम भ्रबागदेसे थेला जयजयकार लउ,
समुद्ररी मुबा जम्मान स्हेगदे, थेला जयजयकार लउ,
समुद्र क्यारक्युरला थारेङ् थारेङ्ला य्हुल्सागदेदेन थेरी चिबा जम्मान म्हिगदे, थेला जयजयकार लउ!
तोङ्तोङ्बा ग्लादेन थेरी मुबा सहरगदेला म्हिगदेसे परमप्रभुला जयजयकार लगै,
केदारला म्हिगदेसे परमप्रभुला जयजयकार लगै,
सेलाला म्हिगदेसे ताङ्सी ताङ्सी व्हाइ गोगै,
थेनीगदे ताङ्सी ताङ्सी गङ्ला जोग्याम क्रिङ्गै।
थेनीगदेसे परमप्रभुदा मान लगै,
ओच्छे समुद्र क्यारक्युरला थारेङ् थारेङ्ला य्हुल्सागदेसे परमप्रभुला जयजयकार लगै।
परमप्रभु शक्तिशाली ह्रेम्बोकोला ह्रङ् लसी थोन्ना।
लडाइ लबा म्हिसे ह्रङ्नोन थेसे ह्राङला भङ् उन्ना।
थे क्रिङ्ला, ओच्छे लडाइ तबान मुला भिसी घ्रेन काइसे पाङ्ला।
थेसे ह्राङला शत्रुगदेदा ब्रेना लला।
ह्राङला म्हिगदेदा ह्रो लला भिसी कबुल लबा
परमेश्वरसे चुह्रङ् भिसी सुङ्बा मुला,
“ङा ल्हानान धुइहेन्से कुटिसी चिजी,
ङाला म्हिगदेदा तिगै आपाङ्ना ङाइ नासी चिजी।
तर दाहेन्से ङाला म्हिगदेदा दुखग्याम फेबारी ङा तयार तबा मुला।
दाहेन्से कोला न्हबारी छ्याइबा म्रिङ्म्हेमे क्रिङ्बा ह्रङ् लसी ङा क्रिङ्ला।
ङाइ नोबा नोबा गङ्देन जजाबा गङ्गदे जम्मादान तोङ्तोङ् तना लला,
ओच्छे थेरी मुबा जम्मान छेदेन दोङगदे सोङ्सोङ् खार्ना लला।
ङाइ स्योङ्गदेदा सोङ्सोङ् खार्बा ग्ला दोना लला,
ओच्छे ङाइ घ्योइगदेला क्युइ ङार्ना लला।
मी आम्राङ्बा म्हिगदेदा ङाइ थेनीगदेसे ङोआसेबा ग्यामरी थोला।
थेनीगदेसे ङोआसेबा ग्यामरी ङाइ थेनीगदेदा ग्याम उन्बान भोर्ला।
ङाइ थेनीगदेला लागिरी धोपधोपदा य्हाल तना लला,
ओच्छे थेनीगदेला लागिरी खाल्टाखुल्टी ग्लादा सम्म तना लला।
चु गेगदे ङाइनोन लला, ङाइ थेनीगदेदा खाइमै आख्ला।
तर ला लुथोरी भर लबागदेदेन
मूर्तिगदेदा ‘ह्राङनोन ङन्ना ईश्वर हिन्ना’ भिसी पाङ्बा म्हिगदे ल्हानान पेःतोःला।
इस्राएलसे तिगै ताम घोबारी आखम
“नाब्यङ् आथेःबागदे, ङ्यन्गो।
मी आम्राङ्बागदे, च्यागो।
ङाला गे लबा म्हि बाहेक मी आम्राङ्बा अर्गु म्हि खाला मुला?
ङाइ पुइबा समाचार भोर्बा म्हि बाहेक नाब्यङ् आथेःबा अर्गु म्हि खाला मुला?
ङाथोरी पूरन भर लबा म्हि बाहेक मी आम्राङ्बा अर्गु म्हि खाला मुला?
ङादा तेन्बा म्हि बाहेक मी आम्राङ्बा अर्गु म्हि खाला मुला?
इस्राएलीगदे, एनीगदेसे ल्हानान तामगदे म्राङ्बा मुला,
तर तिगै तामदा वास्ता आलमुला।
एनीगदेला नाब्यङ् मि ज्यबान मुला,
तर एनीगदेसे तिगै ताम आथेःमुला।
परमप्रभु चा तिगै दोष आरेबा परमेश्वर हिन्ना।
थेतबासेलमा परमप्रभुसे ह्राङला ठिमदा जम्मान घ्रेनदेन मान याङ्बा ताम स्होबारी म्हाइबा मुला।
तर चु य्हुल्दा ठगब लबा मुला,
ओच्छे थेनीगदेदेन छ्याम मुबा जम्मान स्हे ब्यन्बा मुला।
थेनीगदे जम्मान व्हाङ्री ताइबा मुला,
थेनीगदेदा झ्याल्खानरी च्युप्बा मुला।
थेनीगदेला जम्मान स्हे ब्यन्बा मुला,
तर थेनीगदेदा थेग्याम तेःबा म्हि खालैनोन आरे।
थेनीगदेदा ब्यन्सी भोर्बा स्हे ह्रङ्बान स्होबा मुला,
थेनीगदेदा निपुङ्गो भिसी पाङ्बा म्हि खालैनोन आरे।
चु तामदा ज्यना लसी ङ्यन्बा म्हि एनीगदे न्हङ्री खाला मुला?
ओच्छे दाहेन्से वास्ता लबा म्हि खाला मुला?
खाल्से इस्राएलदा ब्यन्बा स्हे दोना लजी?
खाल्से य्होगदेला यारी परब तना लजी?
थेनोन परमप्रभुसे आहिन?
जुन परमप्रभुला बिरोध लसी य्हाङसे पाप लबा मुबा,
य्हाङ परमप्रभुला ग्यामरी आभ्रनी,
ओच्छे य्हाङसे परमप्रभुसे कुल्बा तामएनोन आङ्यन्नी।
थेतबासेलमा परमप्रभुसे य्हाङथोरी बोमो ल्हुजी,
ओच्छे लडाइ तबा धुइरी तबा दुख नापुङ्जी।
थेतबासेलमा य्हाङथोरी लुङ्बा मे ह्रङ्बान परमप्रभुला बोमो ल्हुजी,
तसैनोन य्हाङसे आघोनी।
परमप्रभुला बोमोसे य्हाङदा नाश लजी,
तसैनोन य्हाङसे चु तामदा खाइमै वास्ता आलनी।”
Source notes (1)
- Cross-reference यशै ४९:६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.