Eastern Tamang Language Bible
ठुङ् 33
याकूबदेन एसाव ह्रुप तबा
याकूबसे ओसो च्यामा एसावदेन छ्याम ४०० म्हिगदे खबान लबा म्राङ्जी। जमाहेन्से याकूबसे लेआ, राहेलदेन घ्याबास्या न्हीदा ह्राङला झा झामेगदे भो लसी जिम्मा पिन्जी। याकूबसे ह्राङला घ्याबास्या न्हीदेन थे न्हीला कोलागदेदा जम्मान भन्दा ङाच्छा थान्जी, जमाहेन्से लेआदेन थेला कोलागदेदा थान्जी, ओच्छे राहेलदेन योसेफदा जम्मान भन्दा लिच्छा थान्जी। याकूब ह्राङनोन चा थेनीगदे जम्मालान ङाच्छा ङाच्छा ह्राङला ज्योज्योला ङाम्री आदोदेधोना निस रेमधोना फ्या लबान निजी। तर एसाव थे मुबा ग्लारी य्हार्बान खसी थेदा हापख्वाइजी, ओच्छे कुरी लेब लसी च्योक लजी, ओच्छे थे न्ही क्राजी। जमाहेन्से एसावसे ओसो च्यामा म्रिङ्कोलागदेदेन कोलागदेदा म्राङ्सी चुह्रङ् भिसी पाङ्जी, “एदेन छ्याम मुबा चुगदे खाला हिन्ना?” याकूबसे थेदा “ह्राङला गे लबा म्हिदा परमेश्वरसे दयामाया लसी पिन्बा कोलागदे हिन्ना” भिसी पाङ्जी। जमाहेन्से घ्याबास्यादेन थेला कोलागदे ङाम्रीन खसी एसावदा फ्या लजी। जमाहेन्से लेआदेन थेला कोलागदे खसी फ्या लजी, जम्मान भन्दा लिच्छा योसेफदेन राहेल खजी, थेनीगदेसेनोन फ्या लजी।
एसावसे याकूबदा चुह्रङ् भिसी ङ्योइजी, “ङाइ स्याप्बा चु जम्मान बथानगदेला अर्थ चा तिग हिन्ना?” याकूबसे थेदा चुह्रङ् भिसी जोहाब पिन्जी, “ङाइ ह्राङग्याम दया याङ्बाला लागिरी हिन्ना।”
तर एसावसे याकूबदा चुह्रङ् भिसी पाङ्जी, “ङाला आले, ङादेन छ्याम ल्हानान मुला। एदेन छ्याम जुन मुला एदेन छ्यामनोन थान्गो।”
याकूबसे एसावदा चुह्रङ् भिसी पाङ्जी, “आहिन, ङाथोरी ह्राङला दया मुसम ङाला याग्याम चु उपहार किन्गो। तिग्दा भिसम ह्राङसे ङादा ह्राङलान म्हन्सी दया उन्जी। पाङ्नोन तोःमा ह्राङदेन छ्याम ह्रुप तम्याङ्मा परमेश्वरदेन छ्याम ह्रुप तबा तेबान तजी। ङाला चु बिन्ती मुला, ह्राङला लागिरी भिसी ङाइ भबा चु उपहार ह्राङसे किन्गो। तिग्दा भिसम परमेश्वरला दयामाया ङाथोरी मुबासेलमा ङादेन छ्याम ल्हानान मुला।” चुह्रङ् लसी याकूबसे कर लबासेलमा एसावसे थे उपहार किन्जी।
जमाहेन्से एसावसे याकूबदा चुह्रङ् भिसी पाङ्जी, “दाहेन्से भ्रउ, य्हाङ निइ। ङा एला ङाच्छा ङाच्छा निला।”
याकूबसे थेदा चुह्रङ् भिसी पाङ्जी, “ह्राङदा थानोन मुला, ङाला कोलागदे ल्हानान जजा मुला, ङाइ चु दुहुनो बथानगदेदाएनोन वास्ता लतोःला। थेनीगदेदा तिरे जे ल्हाना भ्रपुङ्जी भिसम जम्मान बथान सिबारी खम्ला। थेतबासेलमा ह्राङदा ङाला चु बिन्ती मुला, ह्राङ ङा भन्दा ङाच्छा फेप्गो, ङा चा चु बथानगदेदेन चु कोलागदेदेन छ्याम ह्राङ मुबा ग्ला सेइररी आदोखदेधोना गोल्से गोल्से खला।”
जमाहेन्से एसावसे चुह्रङ् भिसी पाङ्जी, “ङादेन छ्याम मुबा म्हिगदे न्हङ्री कोइ कोइदा एदेन छ्यामनोन ख्लासी थान्ना।” तर याकूबसे चुह्रङ् भिसी पाङ्जी, “ह्राङसे थेह्रङ् लआतोः, ङाइ ह्राङला दया जे याङ्सम तला।” थेतबासेलमा एसाव थेकुनुन सेइरपट्टि दोःसी निजी। तर याकूब चा सुक्कोतपट्टि निजी। ओच्छे थेरी ह्राङ चिबाला लागिरी दिम, ओच्छे ह्राङदेन छ्याम मुबा बथानना लागिरी गोठेगदे स्होजी। थेतबासेलमा थे ग्लाला मिन सुक्कोत थान्जी।
याकूब पद्दन-आरामग्याम थोन्सी खमाहेन्से कनान य्हुल्साला शकेम सहररी ज्यना लसी दोखजी। ओच्छे याकूब थे सहरला ङाम्री ह्राङला पाल फ्रेङ्सी बास चिजी। याकूबसे ह्राङसे पाल फ्रेङ्सी चिबा ग्ला शकेमला आबा हमोरला झागदेदा १०० म्हुइला टोगल पिन्सी ग्लुजी। याकूबसे थे ग्लारी बलि फुल्बा ग्ला गिक स्होसी थे ग्लाला मिन एल-एलोहे-इस्राएल1 थान्जी।
Source notes (1)
- Footnote एल-एलोहे-इस्राएल भिबा चा “परमेश्वर इस्राएलला परमेश्वर” हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.