Eastern Tamang Language Bible
ठुङ् 3
परमेश्वरसे कुल्बा ताम आङ्यन्बा
परमप्रभु परमेश्वरसे स्होबा ह्रि जन्तुगदे न्हङ्री पुख्री चा जम्मान भन्दा चलाख मुबा। पुख्रीसे म्रिङ्म्हेमेदा चुह्रङ् भिसी ङ्योइजी, “तिग परमेश्वरसे एनीगदेदा बगैँचारी मुबा खजिबै दोङला रो आचउ भिसी सुङ्बा मुला?”
जमाहेन्से म्रिङ्म्हेमेसे पुख्रीदा चुह्रङ् भिसी जोहाब पिन्जी, “ङन्से बगैँचारी मुबा जम्मान दोङला रो चबारी खम्ला। तर बगैँचाला गुङ्री मुबा दोङला रो चा आचउ ओच्छे आथुर्गो, चजी भिसम एनीगदे सिला भिसी परमेश्वरसे सुङ्बा मुला।”
जमाहेन्से पुख्रीसे चुह्रङ् भिसी पाङ्जी, “थे ताम सत्य आहिन, एनीगदे सिनोन आसि। थे दोङला रो चजी भिसम एनीगदे परमेश्वर ह्रङ्बान दोला ओच्छे ज्यबादेन आज्यबा ताम फेबारी खम्बा ज्ञान बुद्धि याङ्ला भिबा ताम परमेश्वरदा था मुला। थेतबासेलमा परमेश्वरसे एनीगदेदा थेह्रङ् सुङ्बा हिन्ना।”
थे दोङ च्यामा ल्हानान ज्यबादेन थेला रो चइ चइ म्हन्बा खाल्ला मुबा। चु म्राङ्सी थेसे ज्ञान बुद्धि याङ्बाला लागिरी चु दोङला रो चतोःनम भिसी म्हन्जी। जमाहेन्से थेसे थे दोङला रो थुसी चजी ओच्छे ह्राङला ह्रेम्बोदाएनोन पिन्जी, थेला ह्रेम्बोसेनोन चजी। थे चमैछ्याम थे न्हीसे मी म्राङ्जी ओच्छे ह्राङ लिगन्डीन चिम भिबा ताम था याङ्जी। जमाहेन्से अञ्जीरला भागदे थुइसी ह्राङला लागिरी क्वान स्होजी।
थेकुनु ङ्यसे परमप्रभु परमेश्वर बगैँचारी कोर्बान मुबा। थे धुइरी थेनीगदेसे परमप्रभु परमेश्वरला काइ थेःजी। ओच्छे थे न्हीनोन परमप्रभु परमेश्वरसे म्राङ्ला भिसी दोङगदेला गुङ्री लाजी। तर परमप्रभु परमेश्वरसे “ए खानङ् मुला?” भिसी म्हिदा ङ्योइजी।
जमाहेन्से थेसे चुह्रङ् भिसी पाङ्जी, “ङाइ बगैँचारी ह्राङला काइ थेःजी ओच्छे ङा लोङ्जी। तिग्दा भिसम ङा लिगन्डीन मुबा, थेतबासेलमा ङा लाजी।”
परमेश्वरसे थेदा चुह्रङ् भिसी ङ्योइजी, “ए लिगन्डीन मुला भिसी खाल्से पाङ्जी? जुन दोङला रो आचउ भिसी ङाइ एदा कुल्बा मुबा तिग एसे थे दोङला रो चजी?”
म्हिसे चुह्रङ् भिसी पाङ्जी, “जुन म्रिङ्कोला ह्राङसे ङादेन छ्याम चिगै भिसी ङादा पिन्बा मुबा थेसेन ङादा थे रो पिन्जी, जमाहेन्से ङाइ चजी।”
ओच्छे परमप्रभु परमेश्वरसे म्रिङ्कोलादा “एसे तिग्दा चुह्रङ् लबा?” भिसी सुङ्मा, म्रिङ्कोलासे “पुख्रीसे ङादा जाल लजी, ओच्छे ङाइ चजी” भिसी पाङ्जी।
म्हिसे याङ्बा सजाय
जमाहेन्से परमप्रभु परमेश्वरसे पुख्रीदा चुह्रङ् भिसी सुङ्जी,
“एसे चुह्रङ् लबासेलमा
दिमरी न्हबा जम्मान जन्तुगदेदेन
ह्रिला जम्मान जन्तुगदे न्हङ्री जम्मान भन्दा ल्हाना
सजाय नातोःबा एनोन हिन्ना।
दाहेन्से ए फोला भरसे सुल्सी भ्रतोःला।
ओच्छे सोदेधोना साप्रा चतोःला।
ङाइ एदेन म्रिङ्कोलाला गुङ्री
ओच्छे एला सन्तानदेन म्रिङ्कोलाला सन्तानना
गुङ्री शत्रु स्होसी पिन्ना।
म्रिङ्कोलाला सन्तानसे एला थोबो छ्याकछिक निना लला
एसे म्रिङ्कोलाला सन्तानना काङ् तेज्यारी छ्वाला।”
परमेश्वरसे म्रिङ्कोलादा चुह्रङ् भिसी सुङ्जी,
“एसे कोला न्हबा धुइरी याङ्बा दुख ङाइ बढब लसी पिन्ना,
दुख लसी एसे कोला न्हला।
तसैनोन एसे ह्राङला ह्रेम्बोदा म्हाइला,
ओच्छे थेला तहरी चिला।”
जमाहेन्से परमेश्वरसे म्हिदा चुह्रङ् भिसी सुङ्जी,
“एसे एला म्रिङ्ला ताम ङ्यन्सी
ङाइ आचउ भिसी पाङ्बा
दोङला रो चबासेलमा
भु व्हाराथोरी सराप खबा मुला,
सोदेधोना एसे दुख लसी
कमाइ लसी चतोःला।
भु व्हारासे एला लागिरी पुजुदेन
गेआखेल्बा म्रागदे फुइना लला,
एसे ह्रिला ढापढुप चला।
साप्रारी दोःसी आनिदेधोना
एसे ह्राङला ङ्होग्याम टूला धारा पुइसी
लबा कमाइग्याम चतोःला।
तिग्दा भिसम ए साप्राग्यामसेन स्होबा मुबा।
ए साप्रान हिन्ना
ओच्छे साप्रारीन दोःसी निला।”
थे म्हि आदमसे ह्राङला म्रिङ्ला मिन हव्वा थान्जी। तिग्दा भिसम जम्मान म्हि य्हुल्ला आमा थेनोन हिन्ना। ओच्छे परमप्रभु परमेश्वरसे आदमदेन थेला म्रिङ्ला लागिरी जन्तुला ढिग्याम क्वान स्होजी ओच्छे क्वान्सी पिन्जी।
आदमदेन हव्वादा बगैँचाग्याम तेःबा
जमाहेन्से परमप्रभु परमेश्वरसे चुह्रङ् भिसी सुङ्जी, “दाहेन्से म्हि य्हाङ ह्रङ्बान तबा मुला। ओच्छे थेसे ज्यबादेन आज्यबा ताम फेबारी खम्बा ज्ञान याङ्बा मुला। दाहेन्से थेसे जुनी पिन्बा दोङला रो थुसी चआम्याङ्गै, चजी भिसम थे सदन सोसी चिला।” थेतबासेलमा परमप्रभु परमेश्वरसे थेदा अदन भिबा बगैँचाग्याम तेःजी ओच्छे जुन साप्राग्याम थेदा स्होबा मुबा थेदा थेनोन साप्रारी गे लपुङ्जी। जमाहेन्से परमेश्वरसे जुनी पिन्बा दोङपट्टि खालै निबारी आखम्गै भिसी परमेश्वरसे अदन भिबा बगैँचाला स्यारपट्टि करूबगदेदेन1 पट्टि ब्लिनोन क्युर्सी चिबा मे लुङ्बा तरवार थान्सी पिन्जी।
Source notes (1)
- Footnote करूबगदे भिबा चा परमेश्वरसे अदनना बगैँचा ख्रुङ्बाला लागिरी थान्बा स्वर्गदूतगदे हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.