Eastern Tamang Language Bible
ठुङ् 2
चुह्रङ् लसी परमेश्वरसे मुरी मुबा जम्मान सार सुक्रगदे, जम्बुलिङदेन थेरी मुबा जम्मान स्हे स्होसी जिन्ना लजी। परमेश्वरसे ह्राङसे लबा जम्मान गे ढुरे न्हङ्री जिन्ना लजी ओच्छे निसरेला धिनकुनु चा जम्मान गेग्याम परमेश्वरसे ब्लप्बा न्हजी। ओच्छे परमेश्वरसे निसरेलाकुनुदा मोलम पिन्जी। ओच्छे थे धिनदा चोखो स्होजी, तिग्दा भिसम परमेश्वरसे ह्राङसे लबा जम्मान गेगदे जिन्माहेन्से ब्लप्बा न्हजी। चुह्रङ् लसी परमेश्वरसे मुदेन जम्बुलिङ स्होजी।
अदन भिबा बगैँचा
परमप्रभु परमेश्वरसे मुदेन जम्बुलिङ स्होबा धुइरी जम्बुलिङरी दोङगदे आरेमुबा ओच्छे खजिबै ब्लु फुइबा आरेमुबा। तिग्दा भिसम थे धुइधोना परमप्रभु परमेश्वरसे जम्बुलिङरी नाम पुइखबा आरेमुबा। ओच्छे ख्वबा मोइबा लबारी खालै म्हिएनोन आरेमुबा। तर जम्बुलिङग्याम क्युइ प्योःसी जम्मान स बम्ना लमुबा। जमाहेन्से परमप्रभु परमेश्वरसे सग्याम साप्रा किन्जी ओच्छे थे साप्राग्याम म्हि गिक स्होजी ओच्छे थेला नाग्याम जुनी पिन्बा सा फुइसी पिन्जी, चुह्रङ् लसी म्हि छोन्बो दोजी।
जमाहेन्से परमप्रभु परमेश्वरसे स्यारपट्टि अदन भिबा ग्लारी बगैँचा गिक स्होजी ओच्छे परमेश्वरसे ह्राङसे स्होबा म्हिदा थेनोन बगैँचारी थान्जी। परमप्रभु परमेश्वरसे थे बगैँचारी च्यामा ज्यबादेन चमा ब्रोइ खबा ल्हानान थरीला रो रोबा दोङगदे फुइना लजी। थे बगैँचाला गुङ्री जुनी पिन्बा दोङ ओच्छे ज्यबादेन आज्यबा ताम फेबारी खम्बा ज्ञान बुद्धि पिन्बा दोङएनोन फुइना लबा मुबा।
बगैँचादा बम्ना लबारी अदनग्याम स्योङ् गिक थोन्बा मुबा, थे स्योङ् चा पट्टि ब्लिग्यामसेन बगब तमुबा। स्योङ् गिकला मिन चा पीशोन हिन्ना, चु स्योङ् चा हवीला य्हुल्साला जम्मान ग्लाग्याम बगब तमुला, थे स्योङ्री म्हार याङ्मुला। थे य्हुल्साला म्हार चा ज्यबा मुला, थेरी ज्यबा बास्ना खबा छ्युगुदेन आनिक्स भिबा महङ्गो युङ्बागदे याङ्मुला। अर्गु स्योङ् चा गीहोन हिन्ना, चु स्योङ् कूश य्हुल्साला जम्मान ग्लाग्याम बगब तमुला। अर्गु स्योङ् चा टाइग्रिस हिन्ना, चु स्योङ् अश्शूर य्हुल्साला स्यारपट्टि बगब तमुला, ओच्छे अर्गु स्योङ् चा यूफ्रेटिस हिन्ना।
जमाहेन्से परमप्रभु परमेश्वरसे म्हिदा अदन भिबा बगैँचा क्वाबादेन च्याबारी बगैँचारी थान्जी। ओच्छे परमप्रभु परमेश्वरसे म्हिदा चुह्रङ् भिसी कुल्जी, “एसे चु बगैँचारी मुबा जम्मान दोङला रो तिगै आम्हन्ना चउ, तर ज्यबादेन आज्यबा ताम फेबारी खम्बा ज्ञान बुद्धि पिन्बा दोङला रो चा आचउ, तिग्दा भिसम जुन धिनकुनु एसे थे दोङला रो चला ए सिनोन सिला।”
दोःसी परमप्रभु परमेश्वरसे चुह्रङ् भिसी सुङ्जी, “म्हि गिक जे चिबा ज्यबा आहिन, ङाइ थेला लागिरी थेदा ह्रो लबा जेःबा ह्रो गिक स्होला।”
परमप्रभु परमेश्वरसे जम्मान जन्तुगदेदेन मुरी फ्याङ्बा जम्मान चरागदेदा साप्राग्याम स्होसी म्हिसे तिग तिग मिन थान्बा चिम भिसी च्याबाला लागिरी म्हि मुबा ग्लारी भजी, ओच्छे म्हिसे जम्मान जन्तुगदेदा जुन जुन मिन थान्जी थेनोन थेनीगदेला मिन तजी। म्हिसेन जम्मान दिमरी न्हबा जन्तु, मुरी फ्याङ्बा चरागदेदेन ह्रिरी चिबा जन्तुगदेला मिन थान्जी। तर म्हिदा ह्रो लबा जेःबा ह्रो खालैनोन आयाङ्नी।
थेतबासेलमा परमप्रभु परमेश्वरसे म्हिदा ल्हानान म्हेर्बा खना लजी, ओच्छे थे म्हेर्बा धुइरी थेला राइगदे न्हङ्ला राइ गिक तेःसी थे ग्लारी स्यासे प्लिङ्ना लजी। जुन राइ परमप्रभु परमेश्वरसे म्हिग्याम तेःबा मुबा, थे राइग्याम परमप्रभु परमेश्वरसे म्रिङ्कोला गिक स्होसी म्हि मुबा ग्लारी भजी।
जमाहेन्से म्हिसे चुह्रङ् भिसी पाङ्जी,
“चु मि ङा ह्रङ्बान चिम।
चु मि ङाला नख्रुला नख्रुन ओच्छे स्याला स्यान हिन्ना,
थेदा म्रिङ्कोला1 भिसी पाङ्ला
तिग्दा भिसम थेदा ह्रेम्बोकोलाग्याम तेःबा मुबा।”
थेतबासेलमा ह्रेम्बोकोलासे ह्राङला आबा आमादा ख्लासी ह्राङला म्रिङ्देन छ्याम ढिक्सी चिमुला। थेनी ल्हुइ न्ही आहिन ल्हुइ गिक ह्रङ्बान हिन्ना।
म्हिदेन थेला म्रिङ् लिगन्डीन मुबा, तसैनोन थे न्ही आपेःमुबा।
Source notes (1)
- Footnote हिब्रू ग्योइरी ह्रेम्बोकोलादा “इश” म्रिङ्कोलादा “इशाह” भिसी पाङ्मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.