Eastern Tamang Language Bible
थोन्बा 12
चाड स्होबा
मिश्र य्हुल्सारी परमप्रभुसे मोशादेन हारूनदा चुह्रङ् भिसी सुङ्जी, “चु ल चा एनीगदेला लागिरी दिङ्ला शुरूला ल तला। इस्राएलला जम्मान म्हिगदेदा चुह्रङ् भिसी पाङ्गो, चु लला च्युइरेकुनु थेनीगदे जम्मासेन ह्राङ ह्राङला म्हेमे अन्छार ग्यु बोको गिक गिक भसी थान्गो। साक्लोन ग्यु बोको गिकला स्या चबारी आखम्बा जजा म्हेमे मुजी भिसम थे चा ह्राङला दिम ङाम्लान खिम्जेमदेन छ्याम म्हि झ्यासी ढिक्गो, जम्मान म्हिसे गादे चखम्मुला थे च्यासी भो लसी चउ। थे रा बोको मुसै ग्यु बोको मुसै तला, थे तिदिङ् तबा तिगै चोट आरेबा ततोःला। थे बोको एनीगदेसे चु लला च्युक ब्लि धिनधोना थान्गो। ओच्छे जम्मान इस्राएलीगदेसे च्युक ब्लि धिनकुनु ङ्यसे थे बोको साइगो। जमाहेन्से थेनीगदेसे थे बोकोला का किन्सी जुन जुन दिमरी थे बोकोला स्या चला थे दिमला म्रापला दाहिनेदेन देब्रे ओच्छे थोपट्टिला चौकोसरी फोर्गै। थेकुनु म्हुनङ् थेनीगदेसे थे बोकोला स्या ख्राङ्सी खमिर आयुबा गेङ ओच्छे कम्बा ढापदेन छ्याम चगै। थे बोकोला स्या छिङ्गै आचउ, ओच्छे ब्लोसीनोन आचउ, तर थे बोकोला थोबो, काङ्, ग्रुङ फोदेन जम्मान स्या मेरी ख्राङ्सी चउ। थे बोकोला स्या जजाकीएनोन स्य्होधोना लेङ्ना लसी आथान्गो, चुदे स्य्होधोना चिजी भिसम थे लेङ्बा स्या मेरी ख्राङ्गो। के खीसी, लखम क्वान्सी, यारी कडी थोसी हतार हतार लसी एनीगदेसे थे स्या चउ। चु मिश्र य्हुल्साग्याम फेसी खबा धिनकुनु धङ्बा परमप्रभुला चाड हिन्ना।
“थेकुनु म्हुनङ् ङा मिश्र य्हुल्साग्याम निला, ओच्छे मिश्र य्हुल्सारी मुबा म्हिदेन जन्तु न्हीलान ङाच्छा न्हबा कोलागदेदा साइला। ओच्छे मिश्र य्हुल्सारी मुबा जम्मान लागदेला बिरोध लसी ङाइ निसाफ लला। ङा परमप्रभु हिन्ना। एनीगदे चिबा दिमगदेरी थे का एनीगदेला लागिरी चिनु तला। ङाइ थे का म्राङ्माहेन्से एनीगदेदा चा तिगै आलना ख्लाला, ओच्छे ङाइ मिश्र य्हुल्साथोरी छेक्मा नाश लबा खजिबै आपत विपतसे एनीगदेदा आथुर। थे धिन एनीगदेला लागिरी खाइमै म्लेःआखम्बा धिन तला, ओच्छे एनीगदेसे थे धिनकुनु परमप्रभुला लागिरी चाड धङ्ला। एनीगदेसे चु चाड पुस्ता पुस्ताधोना धङ्गो।”
खमिर आयुना गेङ चसी धङ्बा चाड
“निसरेधोना एनीगदेसे खमिर आयुना गेङ चउ। शुरूला धिनकुनुन एनीगदेसे ह्राङ ह्राङला दिमग्याम खमिर तेःसी भ्याङ्गो। तिग्दा भिसम जुन म्हिसे शुरूला धिनहेन्से निसरेधोनान खमिर युबा गेङ चला थे म्हिदा इस्राएलीगदेला गुङ्ग्याम तेःला। शुरूला धिनकुनुदेन निसरेकुनु ङाला जयजयकार लबारी एनीगदे ग्ला गिकरी पोप तउ। थे धिनकुनु तिगै गे आलउ, एनीगदेसे धाइबा मिन्बा गे बाहेक अर्गु तिगै गे आलउ।
“एनीगदेसे खमिर आयुना गेङ चसी चाड धङ्गो, तिग्दा भिसम चुनोन धिनकुनु एनीगदेला समूह समूहदा मिश्र य्हुल्साग्याम तेःसी भबा हिन्ना। थेतबासेलमा एनीगदेसे पुस्ता पुस्ताधोना थे धिनकुनु चु चाड धङ्गो। शुरूला लला च्युक ब्लि धिनकुनु ङ्यसेहेन्से बोगल गिकसे गिक धिनकुनु ङ्यसेधोना खमिर आयुबा गेङ चउ। निसरेधोना एनीगदेला दिमरी जजाकीएनोन खमिर आतगै। खालै म्हिसे खमिर युबा स्हे चजी भिसम विदेशी मुसै स्वदेशी मुसै थेदा इस्राएलीगदेला गुङ्ग्याम तेःला। एनीगदेसे खमिर युबा तिगै स्हे आचउ, जुन ग्लारी चिसैनोन एनीगदेसे खमिर आयुबा गेङ चउ।”
मिश्र य्हुल्साग्याम फेसी खबा धिनकुनु धङ्बा चाड
जमाहेन्से मोशासे इस्राएलला जम्मान गन्बागदेदा ङ्योइबारी पुइजी, ओच्छे चुह्रङ् भिसी पाङ्जी, “निसी ह्राङ ह्राङला म्हेमे अन्छार ग्यु बोको गिक गिक ठीक लउ, ओच्छे मिश्र य्हुल्साग्याम फेसी खबा धिनना चाडला लागिरी बलि लउ। हिसप भिबा दोङला हाँगा ताङ्री मुबा कारी ब्लुम्सी म्रापला दाहिनेपट्टिदेन देब्रेपट्टि ओच्छे थोपट्टि चौकोसरी फोर्गो। एनीगदे न्हङ्ला खालैनोन स्य्होधोना दिमग्याम मङ्ग्यार आथोन्गो। परमप्रभु मिश्रीगदेदा तोबारी मिश्रग्याम तसी फेप्मा, परमप्रभुसे जुन दिमला म्रापला चौकोसरी दाहिने देब्रेदेन थोपट्टि का म्राङ्ला थे दिमदा ख्लाला। ओच्छे नाश लबा दूतदा एनीगदेला दिमरी एनीगदेदा साइबारी वाङ्आपुङ्। एनीगदेसे चु चाड सदनना लागिरी चिबा ठिम गिकला रुपरी ह्राङदेन ह्राङला लिच्छाला सन्तानना लागिरी धङ्गो। परमप्रभुसे एनीगदेदा पिन्ना भिसी कबुल लबा य्हुल्सारी वाङ्माहेन्सेनोन एनीगदेसे चु चाड धङ्गो। एनीगदेला झा झामेसे ‘चु चाडला अर्थ तिग हिन्ना?’ भिसी ङ्योइजी भिसम एनीगदेसे चुह्रङ् भिसी पाङ्गो, ‘चु मिश्र य्हुल्साग्याम फेसी खबा धिनकुनु धङ्बा परमप्रभुला चाडला बलि हिन्ना। परमप्रभु मिश्ररी इस्राएलीगदेला दिमगदेग्याम तसी फेप्जी, ओच्छे थेसे मिश्रीगदेदा तोबा धुइरी य्हाङला दिमगदेदा चा तिगै आलना ख्लाबा मुबा।’” जमाहेन्से म्हिगदेसे थोबो कू लसी परमप्रभुला जयजयकार लजी। ओच्छे मोशादेन हारूनदा परमप्रभुसे कुल्बा ह्रङ्नोन इस्राएलीगदेसे लजी।
जम्मान भन्दा ङाच्छा न्हबागदे सिबा
ठिरी चिबा फारो ग्लेला थेबा झाहेन्से झ्याल्खानरी मुबा म्हिला थेबा झाधोना ओच्छे जम्मान म्हेमुइगदेला ङाच्छा न्हबा कोलागदेदेन मिश्र य्हुल्सारी जम्मान भन्दा ङाच्छा न्हबागदे जम्मादान परमप्रभुसे म्हुन गुङ्री साइजी। फारो ग्लेदेन थेला जम्मान सिपाहीगदे ओच्छे जम्मान मिश्रीगदे म्हुनङ्एनोन रेःजी। मिश्ररी ल्हानान क्राबा क्रिङ्बा तजी, तिग्दा भिसम थेरी म्हि आसिबा दिम गिकनोन आरेमुबा।
मिश्र य्हुल्साग्याम थोन्बा
थेह्रङ् तमाहेन्से फारो ग्लेसे म्हुनङ्एनोन मोशादेन हारूनदा ङ्योइबारी पुइजी, ओच्छे चुह्रङ् भिसी पाङ्जी, “एनीगदेदेन जम्मान इस्राएलीगदे ङाला म्हिगदेला गुङ्ग्याम थोन्सी निउ, ओच्छे एनीगदेसे पाङ्बा ह्रङ्नोन परमप्रभुला जयजयकार लउ। एनीगदेसे पाङ्बा ह्रङ्नोन ह्राङ ह्राङला राग्युदेन म्हेमुइगदे भोर्सी निउ। ओच्छे ङादाएनोन मोलम ह्रीसी पिन्गो।”
मिश्रीगदेसे इस्राएलीगदेदा ह्राङला य्हुल्साग्याम तुरून्तन पुइबारी हतार लजी, “तिग्दा भिसम ङनी जम्मान सिला” भिसी थेनीगदेसे पाङ्जी। थेतबासेलमा इस्राएलीगदेसे ह्राङ ह्राङला झ्योप्बा भ्रारी खमिर युबा भन्दा ङाच्छान दुइजी, ओच्छे थेनीगदेसे ह्राङ ह्राङला भ्रा झ्योप्बा ताङ्गदे क्वानरी पोको लसी बमरी पुइजी। इस्राएलीगदेसे मोशासे पाङ्बा ह्रङ्नोन लजी, ओच्छे थेनीगदेसे मिश्रीगदेदेन छ्याम म्हार म्हुइला गहनादेन क्वान ह्रीजी। परमप्रभुसे मिश्रीगदेदा इस्राएलीगदेथोरी दया लबा सेम पिन्बा मुबा, ओच्छे मिश्रीगदेसे इस्राएलीगदेसे ह्रीबा अन्छार जम्मान स्हे पिन्जी। चुह्रङ् लसी थेनीगदेसे मिश्रीगदेला जम्मान स्हे किन्जी।
इस्राएलीगदेसे मिश्र य्हुल्सा ख्लाबा
इस्राएलीगदे रामसेसग्याम भ्रसी सुक्कोतरी निजी। म्रिङ्म्हेमेदेन कोलागदे आझ्याना ओस्पन लाख ढु म्हिगदे मुबा। चु बाहेक थेनीगदेसे ह्राङदेन छ्याम अर्गु म्हिगदे1देन ल्हानान राग्यु ओच्छे म्हेमुइगदेएनोन भोर्जी। थेनीगदेसे मिश्र य्हुल्साग्याम थोन्बा धुइरी भबा खमिर आयुना झ्योप्बा भ्राला गेङ स्होजी। थे झ्योप्बा भ्रा चा खमिर दोबा आरेमुबा, तिग्दा भिसम थेनीगदेदा मिश्र य्हुल्साग्याम तप्पा धुइरी थेनीगदेसे ह्राङला लागिरी चबा स्हे स्होबा धुइएनोन आयाङ्नी। थे धुइधोनारी इस्राएलीगदे मिश्र य्हुल्सारी चिबा चा ४३० दिङ् तबा मुबा। ४३० दिङ् तबा धिनकुनुन परमप्रभुला जम्मान म्हिगदे मिश्र य्हुल्साग्याम थोन्जी। थेनीगदेदा मिश्र य्हुल्साग्याम तेःसी भबाला लागिरी थेकुनु परमप्रभुसे म्हुन गिकनोन वास्ता लबा मुबा, थेतबासेलमा थेनीगदेसेनोन थेकुनु म्हुन गिकनोन आम्हेर्ना पुस्ता पुस्तासे परमप्रभुदा मान लगै।
मिश्र य्हुल्साग्याम फेसी खबा धिनकुनु धङ्बा चाडला ठिमगदे
परमप्रभुसे मोशादेन हारूनदा चुह्रङ् भिसी सुङ्जी, “मिश्र य्हुल्साग्याम फेसी खबा धिनकुनु धङ्बा चाडला ठिमगदे चुनोन हिन्ना। चु चाडला भोज खालै विदेशीसे आचगै। तर ग्लुसी भबा जम्मान घ्याबासेनोन खतना लमाहेन्से जे चगै। तर विदेशीदेन ज्यालारी गे लबा घ्याबासे चा थे आचगै। थे दिम गिकरीन चगै, थेला स्या जजाकीएनोन दिमग्याम मङ्ग्यार आभोर्गो, ओच्छे थेला नख्रु गिकएनोन आक्युइगो। इस्राएलला जम्मान म्हिगदेसे चु अन्छार लगै। एदेन छ्याम चिबा खालै विदेशीसे परमप्रभुसे इस्राएलीगदेदा मिश्र य्हुल्साग्याम फेसी खबा धिनकुनु धङ्बा चाड धङ्बा सेम लजी भिसम थेला दिमरी मुबा जम्मान ह्रेम्फेबेसे खतना लगै। जमाहेन्से थे म्हिसे थे य्हुल्सारीन न्हबा म्हिसे ह्रङ् लसीन थे चाड धङ्खम्ला। खतना आलबा खालै म्हिसेन थे भोज आचगै। स्वदेशीदेन एनीगदेला गुङ्री चिबा विदेशीगदेला लागिरी ठिम गिकनोन तला।”
परमप्रभुसे मोशादेन हारूनदा कुल्बा अन्छार जम्मान इस्राएलीगदेसे लजी। थेनोन धिनकुनु थेनीगदेला समूह समूह स्होसी परमप्रभुसे मिश्र य्हुल्साग्याम तेःसी भजी।
Source notes (1)
- Footnote अर्गु म्हिगदे चु म्हिगदे चा इस्राएलीगदे आहिन्मुबा।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.