Eastern Tamang Language Bible
ठिम 31:8
Verse 8 is marked below, with the whole chapter around it. Read from the start
मोशाला साटोरी यहोशू मूल म्हि दोबा
जमाहेन्से मङ्ग्यार निसी मोशासे इस्राएलीगदेदा चुह्रङ् भिसी पाङ्जी, “दाहेन्से ङा एनीगदेला मूल म्हि दोसी एनीगदेदा थोबारी आखम। दाहेन्से ङा ग्यार्जा गिकसे बोगल गिक दिङ्एनोन तसी जिन्जी। चुदे जे आहिन, परमप्रभुसे ङादा ‘ए यर्दन स्योङ् क्याम्सङ् निआम्याङ्’ भिसीएनोन सुङ्बा मुला।1 तर परमप्रभु एनीगदेला परमेश्वरनोन एनीगदेला ङाच्छा ङाच्छा यर्दन स्योङ् क्याम्सङ् फेप्ला, ओच्छे थेरी चिबा अर्गु य्हुल्ला म्हिगदेदा परमप्रभुसेन नाश लला। ओच्छे थेनीगदेला य्हुल्सादा एनीगदेसे ह्राङला यारी किन्ना। अर्गु ताम चा परमप्रभुसे सुङ्बा अन्छार दाहेन्से यहोशू एनीगदेला मूल म्हि दोला। परमप्रभुसे एमोरीगदेला सीहोन ग्लेदेन ओग ग्लेदा ब्रेना लसी थेनीगदेला य्हुल्सादा नाश लबा ह्रङ्नोन लसी थेरी चिबा म्हिगदेदाएनोन नाश लला।2 परमप्रभुसे एनीगदेदा थेनीगदेथोरी ढाना लला, ओच्छे एनीगदेसे थेनीगदेदेन छ्याम व्यवहार लमा ङाइ पाङ्बा अन्छार लउ। सेम कोङ्ना लउ, ओच्छे आँट लउ, एनीगदे थेनीगदेदा म्राङ्सी आलोङ्गो। तिग्दा भिसम परमप्रभु एनीगदेला परमेश्वर एनीगदेदेन छ्याम फेप्ला। परमेश्वरसे एनीगदेदा खाइमै आम्लेः, ओच्छे खाइमै आख्ला।”
जमाहेन्से मोशासे जम्मान इस्राएलीगदेला ङाच्छापट्टि यहोशूदा ङ्योइसी चुह्रङ् भिसी पाङ्जी, “सेम कोङ्ना लउ, ओच्छे आँट लउ, तिग्दा भिसम परमप्रभुसे चुगदेला आखेम्हेमेगदेदा पिन्ना भिसी कबुल लबा य्हुल्सारी चुगदेदा भोर्सी निबा म्हि एनोन हिन्ना। एसेन थे य्हुल्सा चुगदेदा भो लसी पिन्तोःला। परमप्रभु ह्राङनोन एदेन छ्याम छ्याम फेप्ला, ओच्छे एदा ग्याम उन्ना परमप्रभुसे एदा खाइमै आम्लेः ओच्छे खाइमै आख्ला। थेतबासेलमा आलोङ्गो, आँट लउ।”3
मोशासे परमप्रभुला ठिम जिम्मा पिन्बा
जमाहेन्से मोशासे परमप्रभुसे पिन्बा ठिम भ्रिजी। ओच्छे परमप्रभुला कबुल थान्बा सन्दोस पुइबा लेवी वंशला पूजाहारीगदेदेन इस्राएलला जम्मान गन्बागदेदा जिम्मा पिन्जी। जमाहेन्से मोशासे थेनीगदेदा चुह्रङ् भिसी कुल्जी, “निस निस दिङ्ला थुम्री छे ख्लासी पिन्बा धुइरी, छाप्रोरी चिसी धङ्बा चाडला धुइरी,4 इस्राएलीगदे परमप्रभु ह्राङला परमेश्वरला जयजयकार लबाला लागिरी परमप्रभुसे धम्बा ग्लारी खमा, ठिमला चु किताब घ्रेन काइरी पढब लसी थेनीगदेदा थेःना लउ। थे धुइरी एनीगदेसे जम्मान ह्रेम्फेबे, म्रिङ्म्हेमे, कोलागदेदेन एनीगदेला सहरगदेरी चिबा विदेशीगदेदा ग्ला गिकरी ह्रुप लउ। ओच्छे थेनीगदे जम्मासेन ङ्यन्सी परमप्रभु एनीगदेला परमेश्वरदा मान लगै। ओच्छे चु ठिमरी मुबा जम्मान ताम अन्छार होशियार तसी भ्रगै।5 होह्रङ् लसीन परमप्रभु एनीगदेला परमेश्वरला ठिमला बारेरी खाइमै था आरेबा एनीगदेला सन्तानगदेसेनोन चु ठिम थेःला। ओच्छे एनीगदेसे ह्राङला यारी किन्सी शासन लबारी छ्याइबा यर्दन स्योङ् क्याम्सङ्ला य्हुल्सारी चिदेधोना थेनीगदेसे परमप्रभुला बचन अन्छार भ्रबारी लोप्ला।”
परमप्रभुसे मोशादेन यहोशूदा कुल्बा ताम
ओच्छे परमप्रभुसे मोशादा चुह्रङ् भिसी सुङ्जी, “च्यागो, दाहेन्से ए ल्हाना धिन आसो। थेतबासेलमा यहोशूदा ङ्योइसी एनी न्हीनोन ङा चिबा चोखो पालरी खउ। थेरी ङाइ यहोशूदा थेसे लतोःबा गे जिम्मा पिन्ना।” जमाहेन्से मोशादेन यहोशू परमेश्वर धन्छ्याबा चोखो पालरी निजी। ओच्छे परमेश्वर धन्छ्याबा थे चोखो पालला म्रापरी परमप्रभु खसुदेन छ्यामनोन थे न्ही मुबा ग्लारी फेप्खजी।
जमाहेन्से परमप्रभुसे मोशादा चुह्रङ् भिसी सुङ्जी, “दाहेन्से ए सिबा धुइ तसी जिन्बा मुला। ए सिमाहेन्से चु म्हिगदेसे ङाथोरी भर लबारी ख्लाला, ओच्छे ङाइ थेनीगदेदेन छ्याम लबा कबुल थेनीगदेसे म्लेःला। ओच्छे थेनीगदे निबारी छ्याइबा य्हुल्सारी दोमाहेन्से थेनीगदेसे ङादा ख्लासी थे य्हुल्साला लागदेदा तेन्ना। थे धुइरी बोमोसे मे दोसी ङाइ थेनीगदेदा ख्लाला। जमाहेन्से थेनीगदे नाश तला, ओच्छे थेनीगदेथोरी ल्हानान आपत विपत खला। तसैनोन ङाइ थेनीगदेदा ह्रो आल। थे धुइरी थेनीगदेसे ‘परमप्रभु य्हाङला परमेश्वर य्हाङदेन छ्याम आरेबासेलमान य्हाङथोरी चुह्रङ्बा आपत विपत खबा हिन्ना’ भिसी पाङ्ला। थेनीगदेसे अर्गु लागदेदा तेन्सी नाइबा गे लबासेलमा थे धुइरी ङाइ थेनीगदेदा ह्रो आल।
“थेतबासेलमा एनीगदेसे चु व्हाइ भ्रिउ, ओच्छे इस्राएलीगदेदा गोबारी लोप्गो। चु व्हाइसेन थेनीगदेला बिरोधरी रेःसी साक्षी पिन्ना। ङाइ थेनीगदेला आखेम्हेमेगदेदा पिन्ना भिसी कबुल लबा अन्छार थेनीगदेदा ङ्हेदेन सिङ्सुरला खुदु भ्योङ्बा य्हुल्सारी भोर्ला। थे य्हुल्सारी थेनीगदेसे ह्राङदा तोःबा स्हे जम्मान याङ्ला। तर थेनीगदेसे ङादा म्लेःसी अर्गु लागदेदा पूजा लला। ओच्छे ङाइ थेनीगदेदेन छ्याम लबा कबुलदा म्लेःसी थेनीगदेसे ङाथोरी भर आल। ओच्छे थेनीगदेथोरी दुखदेन घ्रेन आपत विपत खला। जमाहेन्से चु व्हाइ थेनीगदेला बिरोधरी रेःबा साक्षी दोला। तिग्दा भिसम चु व्हाइ थेनीगदेला सन्तानगदेसे खाइमै आम्लेः। थेनीगदेदा पिन्ना भिसी कबुल लबा य्हुल्सारी दोना लबा भन्दा ङाच्छान ङाइ थेनीगदेला सेमला ताम था याङ्सी जिन्बा मुला।” थेनोन धिनकुनु मोशासे चु व्हाइ भ्रिसी इस्राएलीगदेदा गोबारी लोप्जी।
जमाहेन्से नूनना झा यहोशूदा परमप्रभुसे चुह्रङ् भिसी सुङ्जी, “सेम कोङ्ना लउ, ओच्छे आँट लउ। तिग्दा भिसम ङाइ पिन्ना भिसी कबुल लबा य्हुल्सारी इस्राएलीगदेदा एसेन भोर्ला, ओच्छे ङा एदेन छ्यामनोन तला।”6
परमप्रभुसे सुङ्बा चु ठिमला ताम गिकएनोन आख्लाना मोशासे जम्मान ताम होशियार लसी भ्रिजी। जमाहेन्से परमप्रभुला कबुल थान्बा सन्दोस पुइबा लेवीगदेदा मोशासे चुह्रङ् भिसी पाङ्जी, “परमप्रभुला ठिमला चु किताब परमप्रभु य्हाङला परमेश्वरला कबुल थान्बा सन्दोस ङाम्री थान्गो, चु किताब चा परमप्रभुदेन चु म्हिगदेला गुङ्री साक्षी तला। तिग्दा भिसम एनीगदे गादे अटेरीदेन सेम कोङ्बा म्हि हिन्ना भिबा ताम ङादा था मुला। ङा सोबा धुइरी मि एनीगदेसे परमप्रभुला बिरोध लमुला भिसम ङा सिमाहेन्से झन गादे ल्हाना बिरोध लला तला। एनीगदेला वंश वंशला गन्बागदेदेन एनीगदेला सिपाहीगदेला जम्मान मूल म्हिगदेदा ङ्योइसी ङा मुबा ग्लारी भउ। ङाइ थेनीगदेदा चु बचन थेःना लला, ओच्छे ङाइ थेनीगदेला लागिरी स्वर्गदेन जम्बुलिङदा साक्षी थान्ना। तिग्दा भिसम ङा सिमाहेन्से ङाइ कुल्बा अन्छार आभ्रना एनीगदेसे ल्हानान नाइबा गे लला भिबा ताम ङादा था मुला। परमप्रभुसे लबारी आत भिसी सुङ्बा थेह्रङ्बा नाइबा गे लसी एनीगदेसे परमप्रभुदा बोमो रेःना लला, ओच्छे लिच्छा खबा धुइरी एनीगदेथोरी घ्रेन आपत विपत खला।”
जमाहेन्से मोशासे चु व्हाइ इस्राएलीगदेदा पूरन थेःना लजी।
Source notes (6)
- Cross-reference झ्याबा २०:१२
- Cross-reference झ्याबा २१:२१-३५
- Cross-reference यहो १:५
- Cross-reference ठिम १५:१; १६:१३-१५
- Cross-reference ठिम १७:१९-२०
- Cross-reference झ्याबा २७:२३; यहो १:६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.