Eastern Tamang Language Bible
दानि 6
दानिएलदा सिंहला खोररी झाङ्बा
दारा ग्लेसे ह्राङला पूरन य्हुल्साला अञ्चल अञ्चलथोरी शासन लबाला लागिरी ग्यार्जा गिकसे बोगल गिक घ्रेन घ्रेन हाकिमगदे धम्बा सेम लजी। ओच्छे अञ्चल अञ्चलथोरी शासन लबा घ्रेन घ्रेन हाकिमगदेला गेदेन ग्लेदा आज्यबा तबा गे आलगै भिसी च्याबाला लागिरी दारा ग्लेसे दानिएलदेन अर्गु म्हि न्हीदा मन्त्री स्होजी। अर्गु मन्त्री न्हीदेन अञ्चल अञ्चलथोरी शासन लबा घ्रेन घ्रेन हाकिमगदेसे भन्दा दानिएलसे झन ज्यबा गे लबा म्राङ्सी ग्लेसे दानिएलदा य्हुल्सा नाङ्नोन शासन लबा म्हि स्होबा सेम लजी। जमाहेन्से मन्त्री न्हीदेन अञ्चल अञ्चलथोरी शासन लबा घ्रेन घ्रेन हाकिमगदेसे दानिएलसे लबा सरकारी गेगदे न्हङ्री आज्यबा गे म्हाइबारी छ्याइजी। तर थेनीगदेसे दानिएलदा दोष लबारी तिगै गल्ती आस्याप्नी। तिग्दा भिसम दानिएल विश्वास लखम्बा गे लबा म्हि मुबा, थेसे तिग लइ म्हन्जी थेनोन लसी खाइमै ठगब लसी गे लबा आरेमुबा। लिच्छा निसी थे म्हिगदेसे चुह्रङ् भिसी पाङ्जी, “ङन्से चु दानिएलला बिरोध लसी दोष लबाला लागिरी थेला परमेश्वरला ठिमला बारेरी बाहेक खजिबै दोष लबा ताम खाइमै स्याप्बारी आखम।”
थेतबासेलमा मन्त्री न्हीदेन अञ्चल अञ्चलथोरी शासन लबा घ्रेन घ्रेन हाकिमगदे निसी ग्लेदा चुह्रङ् भिसी पाङ्जी, “दारा ग्ले, ह्राङला छे ह्रेङ्गै! ह्राङसे ह्राङला य्हुल्सारी शासन लबारी धम्बा ङनी मन्त्रीगदे, अञ्चल अञ्चलथोरी शासन लबा घ्रेन घ्रेन हाकिमगदे, नाम्सा नाम्साला हाकिमगदे, ग्लेदा सल्लाह पिन्बा म्हिगदेदेन य्हुल्सादा च्याबा म्हिगदे जम्मान सेम गिक तसी खबा मुला। दाहेन्से बोगल गिकसे च्युइ धिनधोना चा ह्राङदा बाहेक अर्गु खजिबै लादेन म्हिदा तेःआम्याङ् भिसी ह्राङसे ठिम गिक स्होसी थे अन्छार जम्मासेन लनोन तोःला भिसी जम्मादान कुल्गो। ओच्छे थे ठिम अन्छार आलबा म्हिदा चा सिंहला खोररी झाङ्गो। ङाला ग्ले, दाहेन्से ह्राङसे तुरून्तन चु ठिम भ्रिसी ह्राङला छाप ठोक्सी तेःगो। जमाहेन्से चु ठिम खालैसेन पोबारी आखम्बा मादीदेन फारसीगदेला ठिम ह्रङ्बान दोला।” थेतबासेलमा दारा ग्लेसे चु ठिम भ्रिसी छाप ठोक्सी तेःजी।
ग्लेसे थेह्रङ्बा ठिम तेःजी भिसी दानिएलसे था याङ्माहेन्से दानिएल ह्राङ चिबा दिमरी निजी। थेला दिमला तालथोला कोठाला झ्यालगदे चा यरूशलेमपट्टि दोःबा मुबा। थेसे ङाच्छाला ह्रङ्नोन लसी यरूशलेमपट्टि दोःबा झ्यालपट्टि दोःसी पुइ जूसी धिनना सोमरेम परमेश्वरदा धन्यवाद पिन्बान प्रार्थना लजी। जमाहेन्से दानिएलदा बिरोध लबा म्हिगदे हुल गिक तसी दानिएल मुबा ग्लारी निजी। थेरी दोमा दानिएलसे ह्रो याङ्बाला लागिरी परमेश्वरदेन छ्याम प्रार्थना लबान लबा थेनीगदेसे स्याप्जी। जमाहेन्से थेनीगदे तुरून्तन ग्ले मुबा ग्लारी निसी ग्लेसे स्होबा छार ठिमला बारेरी ग्लेदेन छ्याम चुह्रङ् लसी ताम लजी, “ङन्ना ग्ले, ह्राङसे बोगल गिकसे च्युइ धिनधोना ह्राङदा बाहेक अर्गु खजिबै लादेन म्हिदा तेन्जी भिसम थे म्हिदा सिंहला खोररी झाङ्ला भिसी ठिम स्होबा मुबा आहिन?”
ग्लेसे थेनीगदेदा चुह्रङ् भिसी जोहाब पिन्जी, “हिन्ना, थे ताम चा पोबारीन आखम्बा मादीगदेदेन फारसीगदेला ठिम हिन्ना।”
जमाहेन्से थेनीगदेसे ग्लेदा चुह्रङ् भिसी पाङ्जी, “ङन्ना ग्ले, यहूदा य्हुल्साग्याम चुङ्सी जबरजस्ती लसी भबा म्हिगदे न्हङ्ला दानिएल भिबा म्हि चा ह्राङसे भ्रिसी छाप ठोक्सी तेःबा ठिम अन्छार भ्रबा आरे। थेसे दन्देनोन धिनना सोमरेम प्रार्थना लमुला।” चु ताम थेःमाहेन्से ग्लेसे ल्हानान दुख म्हन्जी। ओच्छे दानिएलदा जोगब लबाला लागिरी ग्लेसे ल्हानान ताम खेन्जी। थेसे धिनी घल्बा धुइधोनान खेन्बाला खेन्बान लजी।
जमाहेन्से दानिएलदा बिरोध लबा म्हिगदे हुल गिक तसी दोःसी ग्ले मुबा ग्लारी निजी। ओच्छे थेनीगदेसे ग्लेदा “ङन्ना ग्ले, चु ताम ह्राङदा थानोन मुला, मादीगदेदेन फारसीगदेला ठिम अन्छार ग्लेसे कुल्बा खजिबै ताम खाइमै आपोमुला” भिसी पाङ्जी।
थेतबासेलमा ग्लेसे दानिएलदा चुङ्गो भिसी कुल्जी। जमाहेन्से थेनीगदेसे दानिएलदा चुङ्सी सिंहला खोर न्हङ्री झाङ्जी। ओच्छे ग्लेसे दानिएलदा “एसे सदन ह्राङला सेमहेन्से तेन्बा परमेश्वरसेन एदा जोगब लगै” भिसी पाङ्जी। सिंहला खोरला म्रापरी घ्रेन युङ्बा गिक भसी थान्जी। ओच्छे खालैसेन दानिएलदा जोगब लबारी आखम्गै भिसी थे युङ्बाथोरी लाहा फोर्सी ग्लेसे ह्राङला च्यापला छाप ठोक्जी, ओच्छे य्हुल्साला मूल म्हिगदेला च्यापलाएनोन छाप ठोक्जी। जमाहेन्से ग्ले ह्राङला ग्लेखाङ्री दोःसी निजी। थेकुनु ग्लेसे चबा थुङ्बा तिगैनोन आलनी, ओच्छे ह्राङ ताङ्बाला लागिरी ग्लेसे खालैदान ह्राङला ङाच्छा स्याबा, व्हाइ गोबा लआपुङ्नी। थेकुनु ग्ले म्हुन गिकनोन आम्हेर्ना चिजी।
स्य्होरी रामरामरिमरिम तबा धुइरीन ग्ले रेःसी हतार हतार सिंहला खोररी निजी। सिंहला खोर ङाम्री दोमाहेन्से ल्हानान दुख म्हन्बान ग्लेसे दानिएलदा चुह्रङ् भिसी ङ्योइजी, “छोन्बो परमेश्वरला गे लबा म्हि दानिएल, तिग एसे सदन सेमहेन्से तेन्बा एला परमेश्वरसे एदा सिंहगदेग्याम जोगब लबा मुला?”
जमाहेन्से दानिएलसे ग्लेदा चुह्रङ् भिसी जोहाब पिन्जी, “ग्लेला छे ह्रेङ्गै! सिंहगदेसे ङादा तिगै आलगै भिसी ङाला परमेश्वरसे ह्राङला दूत पुइखसी सिंहगदेला सुङ् बन्द लसी पिन्जी। तिग्दा भिसम ङाला तिगै दोष आरे भिबा ताम ङाला परमेश्वरदा था मुबा। ओच्छे ङाला ग्ले, ह्राङला ओन्छाङ्रीनोन ङाइ तिगै नाइबा गे लबा आरेमुबा।”
जमाहेन्से ल्हानान ताङ्बान ग्लेसे दानिएलदा सिंहला खोरग्याम तेःगो भिसी कुल्जी। थेतबासेलमा दानिएलदा सिंहला खोरग्याम मङ्ग्यार तेःजी। मङ्ग्यार तेःसी च्यामा दानिएलदा तिगै चोट तबा आरेमुबा। तिग्दा भिसम दानिएलसे ह्राङला परमेश्वरथोरी भर लबा मुबा। जमाहेन्से फट्टा ताम पाङ्सी दानिएलदा दोष लबा म्हिगदेदा चुङ्सी भउ भिसी ग्लेसे कुल्जी। ओच्छे थेनीगदेदेन थेनीगदेला म्रिङ्देन कोलागदेदा छ्यामनोन सिंहला खोररी भ्याङ्जी। थेनीगदे सिंहला खोरला सरी आताइमान सिंहगदेसे व्हासी थेनीगदेला नख्रु सुत्तै बाँकी आथान्ना कराबकुरुब चजी।
जमाहेन्से दारा ग्लेसे जम्मान य्हुल्साला य्हुल य्हुल्ला म्हिगदेदेन थरीथरीला ग्योइ पाङ्बा म्हिगदेदा चु ताम भ्रिसी पुइजी,
“एनीगदेदा ज्यबा तगै! ङाइ शासन लबा जम्मान य्हुल्साला म्हिगदे, दानिएलला परमेश्वर म्राङ्सी लोङ्गो, ओच्छे थेला परमेश्वरदा मान लउ भिसी ङाइ एनीगदेदा कुल्बा मुला,
“तिग्दा भिसम थे छोन्बो परमेश्वर हिन्ना,
ओच्छे परमेश्वर चा जुकजुकधोनालान परमेश्वर हिन्ना।
थेला य्हुल्सा खाइमै नाश आत,
ओच्छे थेला शक्तिएनोन खाइमै आम्ह।
थेनोन परमेश्वरसे म्हिगदेदा दुखग्याम फेसी जोगब लमुला,
थेसे स्वर्गदेन जम्बुलिङरी उदेकला गेगदे लमुला।
थेसेन दानिएलदा सिंहगदेला सुङ्ग्याम जोगब लबा मुला।”
थेतबासेलमा दारा ग्लेसे शासन लबा धुइरीदेन फारसला ग्लेसे कोरेसरी शासन लबा धुइरी दानिएलदा फलिफाप तजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.