Eastern Tamang Language Bible
कल 3
परमेश्वरदा सेम निबा बानीबेहोर
एनीगदे ख्रीष्टदेन छ्यामनोन सिबाग्याम सोबा मुला। थेतबासेलमा स्वर्गरी मुबा स्हेगदे म्हाइगो। थेनोन स्वर्गरी परमेश्वरला दाहिने छ्यापट्टि मूल ठिरी ख्रीष्ट धन्छ्याबा मुला।1 एनीगदेसे जम्बुलिङरी मुबा तामगदेला बारेरी आहिन, तर स्वर्गरी मुबा तामगदेला बारेरी म्हन्गो। तिग्दा भिसम एनीगदे ख्रीष्टदेन छ्यामनोन सिबा मुला, ओच्छे एनीगदेला जुनी परमेश्वर न्हङ्री ख्रीष्टदेन छ्यामनोन छुम्सी थान्बा मुला। ओच्छे एनीगदेला जुनी ख्रीष्टनोन हिन्ना, थेतबासेलमा ख्रीष्ट दोःसी फेप्खबा धुइरी थेला घ्रेन य्हालदेन शक्तिरी एनीगदेएनोन थेदेन छ्यामनोन तला।
थेतबासेलमा एनीगदेसे जम्बुलिङरी लबा आज्यबा बानीबेहोर ख्लागो। थेह्रङ्बा आज्यबा बानीबेहोर भिबा चा स्य्हान्दोदेन छ्याम ब्रेल्सी भ्रबा, स्य्हान्दोदेन छ्याम ब्रेल्बा सेम लबा, पापी सेम थोबा, आज्यबा ताम म्हन्बादेन लोभ लबा हिन्ना। लोभ लबा चा मूर्तिदा तेन्बा हिन्ना। थेह्रङ्बा गेगदेसे लमान परमेश्वर थेनीगदे म्राङ्सी बोमो खबा मुला, ओच्छे परमेश्वरसे कुल्बा ताम आङ्यन्बा2 थेह्रङ्बा म्हिगदेदा थेसे सजाय पिन्ना। ङाच्छा मि एनीगदेएनोन थेह्रङ्बा तामला लिच्छा भ्रमुबा।
तर दाहेन्से एनीगदेसे म्हिदा बोमो लबा, म्हिदा बिरोध लबा, स्य्हान्दोला बेइज्जत लबा, नाइबा ताम लबा चु जम्मान आज्यबा ताम ख्लागो। ओच्छे खालैदेन छ्याम एनीगदेसे लुसीला ताम आलउ। तिग्दा भिसम एनीगदेसे ङाच्छाला जम्मान आज्यबा बानीबेहोर ख्लासी जिन्बा मुला।3 दाहेन्से परमेश्वरसे एनीगदेदा छार जुनी पिन्बासेलमा एनीगदेसे परमेश्वरदा ज्यना लसी ङोसेगै भिसी अझन परमेश्वरसे एनीगदेदा ह्राङ ह्रङ्बान स्होबान मुला।4 छार म्हि दोमाहेन्से अर्गु य्हुल्ला म्हि मुसै, यहूदी मुसै, खतना लसै आलसै, पढब लबारी आसेसै, बानीबेहोर आरेसै, घ्याबा हिन्सै, घ्याबा आहिन्सै तिगै घ्रेन ताम आहिन। तर ख्रीष्टसे जम्मानथोरी शासन लबादेन ख्रीष्ट य्हाङ जम्मानदेन छ्याम तबा चा घ्रेन ताम हिन्ना।
ह्राङलान म्हिगदे स्होबारी परमेश्वरसे माया लसी एनीगदेदा धम्बा हिन्ना। थेतबासेलमा एनीगदे सेमहेन्सेन दया लबा, दुख नाखम्बादेन घ्रेन म्हि आदोना सोझो म्हि दोसी भ्रउ।5 ओच्छे एनीगदे ह्राङ ह्राङ न्हङ्री सेम नासी चिउ। खालैसे एनीगदेदा बिरोध लसम प्रभुसे एनीगदेदा माफ लबा ह्रङ् लसी थेनीगदेदाएनोन माफ लउ।6 चु जम्मान तामगदे भन्दा घ्रेन चा एनीगदे न्हङ्री लबा माया हिन्ना। तिग्दा भिसम जम्मान स्हेदा गिक स्होबा चा माया हिन्ना। ओच्छे ख्रीष्टसे पिन्बा शान्तिसे एनीगदेला सेम न्हङ्री सदन गे लगै। चुनोन शान्तिला लागिरी परमेश्वरसे एनीगदेदा ख्रीष्टग्याम ल्हुइ गिक ह्रङ्बान स्होसी ङ्योइबा हिन्ना। ओच्छे सदन परमेश्वरदा धन्यवाद पिन्गो। एनीगदेला सेम सदन ख्रीष्टला बचनसे प्लिङ्सी गिकसेम गिकदा ह्राङला जम्मान ज्ञान बुद्धिसे लोप्गो। ओच्छे परमेश्वरला आत्मासे पिन्बा व्हाइ सेमहेन्से गोसी परमेश्वरदा धन्यवाद पिन्गो। एनीगदेसे खजिबै गेदेन ताम लसै प्रभु येशूला मिनग्यामसेन लउ। ओच्छे प्रभु येशूग्यामसेन परमेश्वर आबादा धन्यवाद पिन्गो।7
ख्रीष्टदा विश्वास लबागदेसे लतोःबा ताम
जम्मान म्रिङ्म्हेमेगदे ह्राङ ह्राङला ह्रेम्बोला तहरी चिउ। तिग्दा भिसम चु प्रभुदा सेम निबा ताम हिन्ना।8 ओच्छे जम्मान ह्रेम्फेबेगदेसेनोन ह्राङ ह्राङला म्रिङदा आज्यबा व्यवहार आलना माया लउ।9
कोलागदे, एनीगदेसे ह्राङला आबा आमासे कुल्बा जम्मान ताम ङ्यन्गो। चुह्रङ् लसम परमेश्वर ताङ्ला।10
थेह्रङ् लसीन आबागदेसेनोन ह्राङ ह्राङला कोलागदेदा बोमो खना आलउ। बोमो खना लजी भिसम थेनीगदेला सेम स्हु खला।11
घ्याबागदे, एनीगदेसे जम्बुलिङरी मुबा ह्राङ ह्राङला मालिकगदेदा ताङ्ना लबारी थेनीगदेला ङाच्छा जे गे लबा आहिन, तर प्रभुदा मान लबा ह्रङ् लसी एनीगदेला मालिकदाएनोन मान लउ। ओच्छे एनीगदेसे सदन थेनीगदेसे कुल्बा ताम ङ्यन्गो। ओच्छे ह्राङला सेमहेन्से गे लउ।12 ओच्छे एनीगदेसे जुन गे लसै म्हिला लागिरी गे लबा ह्रङ् लसी आहिन, तर प्रभुला लागिरी गे लबा ह्रङ् लसी सेमहेन्सेन झन्सी गे लउ। तिग्दा भिसम प्रभुसे ह्राङला म्हिगदेदा इनाम पिन्ना भिसी लबा कबुल एनीगदेदा थानोन मुला। ओच्छे एनीगदेसे तेन्बा प्रभु चा ख्रीष्टनोन हिन्ना। जुन म्हिसे आज्यबा गे लला, थेसे लबा आज्यबा गेला सजाय याङ्नोन याङ्ला। तिग्दा भिसम परमेश्वरसे खालैला ली आच्याना निसाफ लला।13
Source notes (13)
- Cross-reference व्हाइ ११०:१
- Footnote “परमेश्वरसे कुल्बा ताम आङ्यन्बा” भिबा ताम चा कोइ कोइ ग्रीक बाइबलरी आरे।
- Cross-reference एफि ४:२२
- Cross-reference ठुङ् १:२६; एफि ४:२४
- Cross-reference एफि ४:२
- Cross-reference एफि ४:३२
- Cross-reference एफि ५:१९-२०
- Cross-reference एफि ५:२२; १ पत्रु ३:१
- Cross-reference एफि ५:२५; १ पत्रु ३:७
- Cross-reference एफि ६:१
- Cross-reference एफि ६:४
- Cross-reference एफि ६:५-८
- Cross-reference ठिम १०:१७; एफि ६:९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.