Eastern Tamang Language Bible
१ शमू 24
दाऊदसे शाऊलदा आसाइना ख्लाबा
पलिश्तीगदेदा ताप्सी दोःमाहेन्से दाऊद एन-गदीला तोङ्तोङ्बा ग्लारी मुला भिबा ताम शाऊलसे था याङ्जी। थेतबासेलमा शाऊलसे जम्मान इस्राएलरी धम्बा हजार सोम म्हिगदेदा भोर्सी दाऊददेन थेला म्हिगदेदा म्हाइबारी ताङ्सार पहराला ङाम ङाम्री भ्रजी।
थेनोन ग्यामला कुनीरी ग्युला गोठेगदे मुबा, थे ङाम्रीन ऊ गिकएनोन मुबा। थेनोन ऊला क्याच कुनीरी दाऊददेन थेला म्हिगदे लासी चिबा मुबा। शाऊल थेनोन ऊ न्हङ्री क्लि स्योर्बारी निजी1। दाऊदला म्हिगदेसे दाऊददा चुह्रङ् भिसी पाङ्जी, “परमप्रभुसे ह्राङला शत्रुगदेदा ह्राङला छ्यारी जिम्मा पिन्ना भिसी कबुल लबा धिन चुनोन हिन्ना, ह्राङदा जे लइ म्हन्बा मुला थेनोन लखम्ला।” जमाहेन्से गोल्से गोल्से निसी दाऊदसे शाऊलला गला टोगल गिक थाजी।
तर थेला गला टोगल गिक थाबासेलमा दाऊददा ल्हानान आज्यबा छोर्जी। दाऊदसे ह्राङला म्हिगदेदा चुह्रङ् भिसी पाङ्जी, “परमप्रभुसे धम्बा म्हि ङाला मालिकदा नाश लबा ताम ङाग्याम थारेङ्नोन तगै। तिग्दा भिसम थे परमप्रभुसे धम्बा म्हि हिन्ना2।” थेतबासेलमा ग्लेदा तिगै आज्यबा आलउ भिसी दाऊदसे ह्राङला म्हिगदेदा घोना लजी। ओच्छे शाऊल चा रेःसी उग्याम थोन्सी ह्राङला ग्यामसे निजी।
जमाहेन्से दाऊद उग्याम मङ्ग्यार थोन्सी शाऊलदा चुह्रङ् भिसी पाङ्जी, “ङाला मालिक ङाला ग्ले!” शाऊलसे फ्लिक दोःसी च्याजी, जमाहेन्से दाऊदसे शाऊलदा फ्या लजी। दाऊदसे चुह्रङ् भिसी पाङ्जी, “दाऊदसे ह्राङदा नाश लबारी म्हाइबा मुला भिसी म्हिगदेसे पाङ्मा तिग्दा ह्राङसे थेनीगदेला ताम ङ्यन्बा? तिनी ह्राङसेन म्राङ्बा मुला उ न्हङ्री परमप्रभुसे ह्राङदा ङाला यारी जिम्मा पिन्बा मुबा। ह्राङदा साइबाला लागिरी ङादा गादेसे आँट पिन्बा मुबा, तर ङाइ ह्राङदा तिगै आलना ख्लाजी, ओच्छे ङाइ चुह्रङ् भिसी पाङ्जी, ‘ङाइ ङाला मालिकला बिरोधरी या थीबारी आखम, तिग्दा भिसम थे परमप्रभुसे धम्बा म्हि हिन्ना।’ स्हीगो, ङाला आबा, ङाला यारी मुबा चु क्वान्ना टालो! ङाइ चु थाजी, तर ह्राङदा आसाइनी। चुग्यामसेन था तगै ङाइ ह्राङला बिरोध लसी आतोःबा गे अथवा धोका पिन्बा सेम थोबा आरे। ङाइ ह्राङला तिगैनोन न्होङ्ना लबा आरे, तसैनोन ह्राङसे मि ङाला ज्यान किन्बारी ङादा ताप्सी भ्रमुला। य्हाङ न्हीला गुङ्री परमप्रभुसे निसाफ लगै। ङाला लागिरी थेसेन ह्राङदा नाङ फागै। तर ङाइ खाइमै ङाला या ह्राङला बिरोधरी आथी। ‘आज्यबा तामग्याम आज्यबान ताम थोन्मुला’ भिबा उखान ओन्माहेन्सेन पाङ्सी खबा मुला। थेतबासेलमा ङाइ खाइमै ह्राङला बिरोध लसी ङाला या आथी।
“खाल्ला बिरोध लबारी इस्राएलला ग्ले फेप्खबा मुला? ह्राङसे खाल्दा ताप्बान मुला? सिबा नगी गिकदा आहिन? तङ्लीङ् गिकदा आहिन3? य्हाङला निसाफ लबा परमप्रभुन हिन्ना, थेसेन य्हाङ न्हीला गुङ्री निसाफ लसी पिन्गै। ङा तिग्दा य्हार्सी भ्रबान मुला भिसी परमप्रभुसेन स्हीगै। परमप्रभुसेन ङाला लागिरी निसाफ लसी ङादा ह्राङला याग्याम फेसी पिन्गै।”
दाऊदसे पाङ्सी जिन्माहेन्से शाऊलसे चुह्रङ् भिसी पाङ्जी, “दाऊद, ङाला झा, तिग ए दाऊदनोन हिन्ना?” ओच्छे शाऊल क्राजी। जमाहेन्से शाऊलसे चुह्रङ् भिसी पाङ्जी, “ए ङा भन्दा ल्हानान ज्यबा म्हि चिम। ङाइ एदा आज्यबा व्यवहार लजी, तसैनोन एसे ङादा ज्यबा व्यवहार लजी। एसे ङाथोरी दया लबा तामला बारेरी भर्खर पाङ्जी। ङादा परमप्रभुसे एला यारी जिम्मा पिन्बा मुला। तर एसे ङादा आसाइनी। ह्राङला शत्रुदा स्याप्सीनोन खालै म्हिसे थेदा ज्यना लसी निपुङ्ला? थेतबासेलमा तिनी एसे ङाला लागिरी लबा गेला लागिरी परमप्रभुसे एदा ज्यबा इनाम पिन्गै। ए पक्का ग्ले दोला भिबा ताम दाहेन्से ङाइ था याङ्जी। एसे शासन लबा धुइरी इस्राएल य्हुल्साला फलिफाप तला। थेतबासेलमा ङाला सन्तानदा नाश आल, ओच्छे ङाला मिन ङाला आबाला वंशग्याम मेटब आल भिसी परमप्रभुला मिन किन्सी घ्रान चसी पाङ्गो।”
दाऊदसे शाऊलदेन छ्याम घ्रान चजी, ओच्छे शाऊल ह्राङला दिमरी निजी। दाऊददेन थेला म्हिगदे चा ह्राङ चिबा ग्लारी निजी।
Source notes (3)
- Cross-reference व्हाइ ५७; व्हाइ १४२
- Cross-reference १ शमू २६:११
- Cross-reference १ शमू २६:२०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.