Eastern Tamang Language Bible
१ शमू 23
दाऊदसे कीलाह सहरदा जोगब लबा
पलिश्तीगदे कीलाह सहरला बिरोधरी रेःसी लडाइ लबान खलारी मुबा अन्न ब्यन्बान मुबा। चु ताम थेःमाहेन्से दाऊदसे चुह्रङ् भिसी परमप्रभुदेन छ्याम सल्लाह ह्रीजी, “ङा निसी थे पलिश्तीगदेदेन छ्याम लडाइ लउ की आलउ?” ओच्छे परमप्रभुसे चुह्रङ् भिसी जोहाब पिन्जी, “निसी थेनीगदेदेन छ्याम लडाइ लउ, ओच्छे कीलाह सहरदा जोगब लउ।”
तर दाऊददा ह्राङला म्हिगदेसे चुह्रङ् भिसी पाङ्जी, “ओह्रङ्नोन मि य्हाङ चु यहूदारी लोङ्तोःबा मुला, झन थेथोरी कीलाह सहररी निसी पलिश्ती सिपाहीगदेदेन छ्याम लडाइ लजी भिसम य्हाङला गति खाह्रङ्बा तला?”
दाऊदसे दोःसी तिरेम परमप्रभुदेन छ्याम सल्लाह ह्रीजी। ओच्छे परमप्रभुसे चुह्रङ् भिसी जोहाब पिन्जी, “कीलाह सहररी निउ। ङाइ पलिश्तीगदेदा एला यारी जिम्मा पिन्ना।” थेतबासेलमा दाऊददेन थेला म्हिगदे कीलाह सहररी निसी पलिश्तीगदेदेन छ्याम लडाइ लजी। थेनीगदेसे ल्हानान पलिश्तीगदेदा साइसी थेनीगदेला म्हेमुइगदे भोर्जी, ओच्छे कीलाह सहररी चिबा म्हिगदेदा जोगब लजी। अहीमेलेकला झा अबियाथार य्हार्सी कीलाह सहररी दाऊद मुबा ग्लारी खबा धुइरी थेसे एपोद ह्राङदेन छ्यामनोन भसी खबा मुबा।
शाऊलदा खालै म्हिसे दाऊद कीलाह सहररी निबा मुला भिसी पाङ्जी, चु ताम थेःसी शाऊलसे चुह्रङ् भिसी पाङ्जी, “थेदा परमेश्वरसे ङाला यारी जिम्मा पिन्जीम, तिग्दा भिसम थेसे ह्राङसे ह्राङदान क्युर्सीन पर्खाल मुबादेन म्रापरी किलिङ्गदे कार्बा सहर न्हङ्री च्युप्बा मुला।” ओच्छे शाऊलसे ह्राङला जम्मान सिपाहीगदेदा कीलाह सहरदेन छ्याम लडाइ लउ, ओच्छे दाऊददेन थेला जम्मान म्हिगदेदा चुङ्गो भिसी कुल्जी।
शाऊलसे ह्राङला बिरोध लसी जाल लबा ताम घोमाहेन्से दाऊदसे पूजाहारी अबियाथारदा एपोद भउ भिसी कुल्जी। जमाहेन्से दाऊदसे चुह्रङ् भिसी प्रार्थना लजी, “परमप्रभु इस्राएलला परमेश्वर, ङा चिबासेलमा शाऊल खसी कीलाह सहरदा नाश लबारी म्हाइबा मुला भिबा समाचार ङा ह्राङला गे लबा म्हिसे थेःबा मुला। तिग कीलाह सहरला म्हिगदेसे ङादा थेला यारी जिम्मा पिन्ना? तिग ङाइ थेःबा ह्रङ्नोन शाऊल खला? परमप्रभु इस्राएलला परमेश्वर, ङाला चु बिन्ती मुला, ङा ह्राङला गे लबा म्हिदा सुङ्सी पिन्गो।” परमप्रभुसे चुह्रङ् भिसी जोहाब पिन्जी, “थे पक्कान खला।”
दाऊदसे दोःसी चुह्रङ् भिसी ङ्योइजी, “तिग कीलाह सहरला म्हिगदेसे ङादेन ङाला म्हिगदेदा शाऊलला यारी जिम्मा पिन्ना?” परमप्रभुसे चुह्रङ् भिसी जोहाब पिन्जी, “पक्कान थेनीगदेसे एनीगदेदा थेह्रङ्नोन लला।”
थेतबासेलमा दाऊदसे ह्राङदेन छ्याम मुबा ओस्पन ग्यार्जा ढु ते म्हिगदेदा भोर्सी तुरून्तन कीलाह सहरग्याम थोन्जी, ओच्छे ग्ला गिकग्याम अर्गु ग्लारी निबारी छ्याइजी। दाऊद कीलाह सहरग्याम य्हार्जी भिबा समाचार थेःमाहेन्से शाऊल थेरी आनिनी।
दाऊद जोगब तबारी लासी जीप भिबा ग्लाला तोङ्तोङ्बा ग्लाला गङ्गदेरी क्यार चिबारी छ्याइजी, ओच्छे शाऊलसे चा थेदा धिन धिननोन म्हाइमुबा। तर दाऊददा परमेश्वरसे शाऊलला यारी जिम्मा आपिन्नी।
शाऊल ह्राङला ज्यान किन्बाला लागिरी खबा मुला भिबा ताम दाऊदसे था याङ्जी। थे धुइरी दाऊद जीपला तोङ्तोङ्बा ग्लाला होरेश भिबा ग्लारी मुबा। जमाहेन्से थेरी शाऊलला झा जोनाथन दाऊद मुबा ग्लारी खजी, ओच्छे परमेश्वरग्याम भङ् याङ्बाला लागिरी थेसे दाऊददा आँट पिन्जी। थेसे चुह्रङ् भिसी पाङ्जी, “आलोङ्गो, ह्राङदा ङाला आबा शाऊलला यासे आथुर। ह्राङ इस्राएलला ग्ले दोला, ओच्छे ङा चा ह्राङ भन्दा धिरी चिसी गे लबा म्हि दोला। चु ताम ङाला आबा शाऊलदाएनोन था मुला।” थे न्हीसे परमप्रभुला ओन्छाङ्री कबुल लजी। जमाहेन्से जोनाथन चा ह्राङला दिमरी निजी, तर दाऊद चा होरेशरीन चिजी1।
शाऊल गिबारी मुबा धुइरी जीपीगदेसे शाऊल मुबा ग्लारी चुह्रङ् भिसी समाचार भसी खजी, “ङन्से चुह्रङ्बा ताम थेःबा मुला, दाऊद यशीमोनना लोपट्टि मुबा हकीलाला होरेशरी लासी चिबा मुला2। दाहेन्से ह्राङदा खाइमा फेप्खाइ म्हन्बा थे धुइरी मार फेप्खउ, थेदा ह्राङला यारी जिम्मा पिन्बा गे ङन्से लला।”
शाऊलसे चुह्रङ् भिसी पाङ्जी, “एनीगदेदा परमप्रभुसे मोलम पिन्गै, तिग्दा भिसम एनीगदेसे ङादा वास्ता लमुला। दाहेन्से निसी अर्गु ताम ठीक लउ, ओच्छे थे खानङ् मुला, थेदा खाल्से म्राङ्बा हिन्ना ज्यना लसी पत्ता लउ। थे चन्डाल मुला रो। थे खजिबा ग्लारी लासी चिबा मुला पत्ता लउ, ओच्छे पक्का खबर भसी ङा मुबा ग्लारी खउ। जमाहेन्से ङा एनीगदेदेन छ्याम निला। थे चु य्हुल्सारी मुदेधोना यहूदाला खलकला दिम दिमरी नितोःसै निसी ङाइ थेदा म्हाइसी तेःला।”
थेनीगदे शाऊल भन्दा ङाच्छा योना योना लसी जीप भिबा ग्लारी क्यार निजी। दाऊददेन थेला म्हिगदे यशीमोनना लोपट्टि अराबाला माओन भिबा ग्लाला तोङ्तोङ्बा ग्लारी मुबा। शाऊलदेन थेला म्हिगदेसे म्हाइबारी छ्याइबा मुला भिबा ताम था याङ्माहेन्से दाऊद पहरारी क्यार निजी। ओच्छे यशीमोनना लोपट्टि माओनना तोङ्तोङ्बा ग्लारी चिबारी छ्याइजी। चु ताम था याङ्सी शाऊल दाऊददा म्हाइबारी माओनना तोङ्तोङ्बा ग्लारी क्यार निजी।
गङ्ला पट्टि गिकरी शाऊलदेन थेला म्हिगदे मुबा, ओच्छे गङ्ला अर्गुपट्टि चा दाऊददेन थेला म्हिगदे मुबा। दाऊददेन थेला म्हिगदे खम्देधोना य्हार्बारी म्हाइबान मुबा। शाऊलदेन थेला लिच्छा लिच्छा भ्रबा म्हिगदे चा दाऊददा चुङ्बारी ङाम ङाम्री खबान मुबा। थेनोन धुइरी समाचार भबा म्हि गिक खसी शाऊलदा चु समाचार पाङ्जी, “तुरून्तन फेप्खउ। तिग्दा भिसम पलिश्तीगदेसे य्हुल्सारी तोबा ग्याङ्बादेन मालसामान ब्यन्बान मुला।” थेतबासेलमा शाऊल दाऊददा ताप्बा ख्लासी पलिश्तीगदेदेन छ्याम लडाइ लबारी दोःसी निजी। थेतबासेलमा थे ग्लादा सेला-हामालेकोथ भिसी पाङ्मुला। थेग्याम दाऊद तोर निसी एन-गदीला ग्लागदेरी क्यार चिबारी छ्याइजी।
Source notes (2)
- Cross-reference १ शमू १८:३
- Cross-reference व्हाइ ५४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.