Eastern Tamang Language Bible
१ शमू 15
अमालेकीगदेदेन छ्याम लडाइ लबा
शमूएलसे शाऊलदा चुह्रङ् भिसी पाङ्जी, “परमप्रभुसे ह्राङदा इस्राएलला ग्ले स्होउ भिसी ङादा पुइखबा मुला। दाहेन्से ह्राङसे परमप्रभुला बचन सेम लसी ङ्यन्गो1। जम्मान भन्दा शक्तिशाली परमप्रभुसे चुह्रङ् भिसी सुङ्बा मुला, ‘इस्राएलीगदे मिश्र य्हुल्साग्याम थोन्सी तोर खमा अमालेकीगदेसे इस्राएलदेन छ्याम लडाइ लजी। थेतबासेलमा ङाइ अमालेकीगदेदा सजाय पिन्बारी पक्का लबा मुला2। दाहेन्से अमालेकीगदेदेन छ्याम लडाइ लसी थेनीगदेदा नाश लउ, ओच्छे थेनीगदेला धन सम्पत्ति नाश लउ, तिगैनोन आख्लागो, पूरन नाश लउ। थेनीगदेला ह्रेम्बोकोला, म्रिङ्कोला, कोलागदे, ङ्हे थुङ्बा लैनु कोलागदे, म्हेमुइ, राग्यु, ऊँटदेन गधा जम्मादान नाश लउ।’”
थेतबासेलमा शाऊलसे जम्मान सिपाहीगदेदा ङ्योइसी तेलैम भिबा ग्लारी ह्रुप लजी। थेरी भ्रसीन लडाइ लबा सिपाहीगदे लाख न्ही मुबा ओच्छे हजार च्युइ यहूदाला म्हिगदे मुबा। शाऊल अमालेकला सहररी निजी, ओच्छे थेरी जजाबा खोँचरी तिगै धुइधोना लासी चिजी। जमाहेन्से शाऊलसे केनीगदेदा चुह्रङ् भिसी पाङ्जी, “एनीगदे अमालेकीगदेदा ख्लासी निउ, तिग्दा भिसम एनीगदे थेनीगदेदेन छ्यामनोन नाश आतगै। तिग्दा भिसम इस्राएलीगदे मिश्र य्हुल्साग्याम तोर खबा धुइरी एनीगदेसे इस्राएलीगदेदेन छ्याम ज्यबा व्यवहार लबा मुबा।” थेतबासेलमा केनीगदेसे अमालेकीगदेदा ख्लासी निजी।
जमाहेन्से हवीलाहेन्से मिश्र य्हुल्साला स्यारपट्टिला साँधरी परब तबा शूरधोनान शाऊलसे अमालेकीगदेदेन छ्याम लडाइ लजी। थेसे अमालेकीगदेला ग्ले अगागदा छोन्बोन चुङ्जी, ओच्छे अगागला जम्मान म्हिगदेदा तरवारसे ताम्सी साइजी। तर शाऊलदेन थेला सिपाहीगदेसे अगागदेन ज्यबा ज्यबा ग्यु, म्हेमुइ, छोबा छोबा म्हेला कोलादेन ग्युला कोला ओच्छे ज्यबा ज्यबा जम्मान स्हेगदे जोगब लसी थान्जी। थेनीगदेसे थे स्हेगदे नाश लबा सेम आलनी। तर गेआखेल्बादेन तिगै सयनोन आरेबा स्हेगदे जे थेनीगदेसे नाश लजी।
शाऊलसे परमप्रभुसे कुल्बा तामदा वास्ता आलबा
जमाहेन्से परमप्रभुसे शमूएलदा चुह्रङ् भिसी सुङ्जी, “शाऊलदा ग्ले स्होबासेलमा ङादा दुख म्हन्बा मुला, तिग्दा भिसम थेसे ह्राङला ली ङाग्याम अर्गुपट्टि दोःबा मुला, ओच्छे ङाइ कुल्बा ताम अन्छार थे भ्रबा आरे।” शमूएल ल्हानान बोमो खजी, ओच्छे थेसे म्हुन गिक परमप्रभुदा बिन्ती लजी। थे न्हङ्गरदाङ स्य्होरीन शाऊलदा स्याप्बारी निजी। तर “शाऊल कर्मेलरी निसी ह्राङदा ढन्बाला लागिरी थेरी युङ्बाला थाम गिक क्यासी थान्जी, जमाहेन्से थे गिलगालरीन दोःसी जिन्बा मुला” भिसी शमूएलदा थेःना लजी। शमूएलसे शाऊलदा थेरीन स्याप्जी, ओच्छे शाऊलसे थेदा फ्या लबान चुह्रङ् भिसी पाङ्जी, “ह्राङदा परमप्रभुला मोलम तगै। ङाइ परमप्रभुसे कुल्बा अन्छार लजी।”
तर शमूएलसे चुह्रङ् भिसी पाङ्जी, “थेह्रङ् भिसम ङाइ म्हेमुइ, ग्यु ङ्याबा चा खाह्रङ् लसी थेःजी?”
शाऊलसे थेदा चुह्रङ् भिसी जोहाब पिन्जी, “थे सिपाहीगदेसे अमालेकीगदेग्याम किन्बा हिन्ना। ज्यबा ज्यबा ग्युदेन म्हेमुइ परमप्रभु ह्राङला परमेश्वरदा बलि फुल्बाला लागिरी थेनीगदेसे जोगब लसी थान्बा हिन्ना। अर्गु मि ङन्से जम्मान नाश लजी।”
शमूएलसे शाऊलदा चुह्रङ् भिसी पाङ्जी, “लु, तजी! तिला म्हुनङ् परमप्रभुसे ङादा तिग सुङ्बा मुबा थे ताम ङाइ ह्राङदा पाङ्ला।” शाऊलसे “सुङ्गो” भिसी पाङ्जी।
शमूएलसे चुह्रङ् भिसी पाङ्जी, “चुह्रङ्बा धुइएनोन मुबा, थे धुइरी ह्राङसे ह्राङदान तिगै गेआखेल्बा म्हि भिसी ह्राङसे म्हन्मुबा, तर दन्दे ह्राङ इस्राएलला वंशगदेला मूल म्हि हिन्ना। परमप्रभुसे ह्राङदा इस्राएलथोरी ग्ले स्होजी। ओच्छे परमप्रभुसे ह्राङदा चुह्रङ् भिसी कुल्सी पुइबा मुबा, ‘थे नाइबा गे लबा य्हुल अमालेकीगदेदा पूरन नाश लउ।’ थेनीगदेदा पूरन नाश आलदेधोना ह्राङसे थेनीगदेदेन छ्याम लडाइ लबाला लबान लतोःमुबा। तिग्दा ह्राङसे परमप्रभुसे कुल्बा ह्रङ् आलनी? तिग्दा ह्राङसे ब्यन्बा सामान किन्जी, ओच्छे परमप्रभुला ङाच्छा जुन ताम नाइबा मुबा थेनोन लजी?”
शाऊलसे शमूएलदा चुह्रङ् भिसी जोहाब पिन्जी, “तर ङाइ मि परमप्रभुसे कुल्बा अन्छारनोन लजी। ङा परमप्रभुसे पुइबा ग्लारी निजी, ओच्छे अमालेकीगदेला ग्ले अगागदा चुङ्सी भजी। थेनीगदे न्हङ्ला अर्गु जम्मादान ङाइ नाश लजी। ब्यन्सी भबा जम्मान भन्दा ज्यबा ज्यबा स्हे, ग्युदेन म्हेमुइ चा गिलगालरी परमप्रभु ह्राङला परमेश्वरला लागिरी बलि फुल्बारी थान्बा मुला।”
तर शमूएलसे चुह्रङ् भिसी पाङ्जी,
“मेरी ख्राङ्सी फुल्बा बलिदेन अर्गु बलि भन्दाएनोन
परमप्रभुदा ह्राङसे कुल्बा अन्छार भ्रबा चा सेम निमुला।
कुल्बा अन्छार भ्रबा चा बलि फुल्बा भन्दा ल्हानान ज्यबा हिन्ना,
ओच्छे थेला बचन ङ्यन्बा चा ग्युला छि भन्दा ज्यबा हिन्ना।
थेसे कुल्बा ताम आङ्यन्बा चा टुनामुनाला पाप ह्रङ्बान हिन्ना।
ओच्छे अटेरी तबा चा मूर्ति पूजा लबा ह्रङ्बान नाइबा गे हिन्ना।
ह्राङसे परमप्रभुला बचनदा वास्ता आलनी,
थेतबासेलमा परमप्रभुसेनोन ह्राङदा ग्लेला ठिग्याम तेःबा मुला।”
शाऊलसे शमूएलदा चुह्रङ् भिसी पाङ्जी, “ङाइ पाप लजी। परमप्रभुदेन ह्राङसे कुल्बा तामदा ङाइ वास्ता आलनी। ङा म्हिगदेदेन छ्याम लोङ्जी, ओच्छे ङाइ थेनीगदेला ताम ङ्यन्जी। दाहेन्से ङाला चु बिन्ती मुला, ङाला पाप माफ लसी पिन्गो, ओच्छे ङादेन छ्याम फेप्खउ, ङाइ परमप्रभुदा फ्या लबारी खम्गै।”
तर शमूएलसे चुह्रङ् भिसी जोहाब पिन्जी, “ङा ह्राङदेन छ्याम आनी। ह्राङसे परमप्रभुला बचनदा वास्ता आलनी, ओच्छे परमप्रभुसेनोन ह्राङदा इस्राएलला ग्लेला ठिग्याम तेःसी जिन्बा मुला।”
शमूएल थेग्याम निबारी छ्याइजी, तर शाऊलसे थेला गला कुनीरी चुङ्जी, ओच्छे थे ग ढेजी3। शमूएलसे थेदा चुह्रङ् भिसी पाङ्जी, “तिनी परमप्रभुसे ह्राङला छ्याग्याम इस्राएल य्हुल्सादा ढेसी अर्गु म्हिदा पिन्ना, थे म्हि चा ह्राङ भन्दा ज्यबा मुला। परमप्रभु चा इस्राएलला शक्ति हिन्ना, थेसे फट्टा ताम आलमुला, ओच्छे थेसे ह्राङला सेमएनोन आपोमुला। ह्राङला सेम पोबारी थे म्हिएनोन आहिन।”
शाऊलसे चुह्रङ् भिसी पाङ्जी, “ङाइ पाप लजी। तसैनोन दया लसी ङाला म्हिगदेला गन्बागदेदेन इस्राएलला ङाच्छा तिरेम जे ङाला मान थान्सी पिन्गो, ओच्छे ङादेन छ्याम फेप्खउ। ङाइ परमप्रभु ह्राङला परमेश्वरदा फ्या लखम्गै।” थेतबासेलमा शमूएल शाऊलदेन छ्याम दोःसी निजी, ओच्छे शाऊलसे परमप्रभुदा फ्या लजी।
जमाहेन्से शमूएलसे चुह्रङ् भिसी पाङ्जी, “अमालेकीगदेला ग्ले अगागदा चुरी भउ।” अगाग आलोङ्ना ढुक्क तसी खेन्बान खजी, “कालग्याम पक्कान जोगब तजी।”
तर शमूएलसे चुह्रङ् भिसी पाङ्जी, “एला तरवारसे म्रिङ्म्हेमेगदेदा सन्ताननोन आरेबा दोना लबा मुला। थेतबासेलमा एलान आमाएनोन जम्मान म्रिङ्म्हेमेगदेला गुङ्री सन्ताननोन आरेबा म्रिङ्म्हेमे दोला।” ओच्छे शमूएलसे परमप्रभुला ओन्छाङ्री अगागदा गिलगालरी टोगल टोगल लसी साइजी।
जमाहेन्से शमूएल चा रामारी निजी, तर शाऊल ह्राङलान दिम गिबारी निजी। शमूएल ह्राङ सोदेधोनान शाऊलदा दोःसी खाइमै ह्रुप तबारी आनिनी, तर शाऊलला लागिरी सुर्दा लसी चिजी। ओच्छे शाऊलदा इस्राएलथोरी ग्ले स्होबासेलमा परमप्रभुसे दुख म्हन्जी।
Source notes (3)
- Cross-reference १ शमू १०:१
- Cross-reference थोन्बा १७:८-१४; ठिम २५:१७-१९
- Cross-reference १ शमू २८:१७; १ ग्ले ११:३०-३१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.