Eastern Tamang Language Bible
१ शमू 14
जोनाथनसे लबा घ्रेन गे
तिरेकुनु शाऊलला झा जोनाथनसे ह्राङला हतियार पुइबा भ्योन म्हिदा चुह्रङ् भिसी पाङ्जी, “खउ, य्हाङ थे गङ्ला क्याम्सङ्पट्टि मुबा पलिश्तीगदेला चौकीरी क्यार निइ।” तर चु ताम थेसे ह्राङला आबादा आपाङ्नी।
थे धुइरी शाऊल गिबा ङाम्ला मिग्रोनरी मुबा अनार दोङ टारी ह्राङला पाल फ्रेङ्सी चिबा मुबा। थेदेन छ्याम ओस्पन ग्यार्जा ढु ते म्हिगदे मुबा। थेनीगदे न्हङ्री एपोद क्वान्बा पूजाहारी चा अहियाह मुबा। थे पीनहासला झा ईकाबोदला आले अहीतूबला झा मुबा। अहीतूब चा पीनहास झा ओच्छे शीलोरी चिबा परमप्रभुला पूजाहारी एलीला छाया मुबा। जोनाथन निबा थेनीगदे खालैदान था आरेमुबा।
जोनाथन खोँचग्याम पलिश्तीगदेला चौकीरी निबारी म्हाइबा मुबा। थे खोँचला पट्टि न्हीरी बोसेसदेन सेनेह भिबा युङ्बान युङ्बाला म्युङ्म्युङ्बा गङ् मुबा। थे गङ् गिक मिकमाशपट्टि झ्याङ्री ओच्छे अर्गु गेबापट्टि लोरी परब तमुबा।
जोनाथनसे ह्राङला हतियार पुइबा म्हिदा चुह्रङ् भिसी पाङ्जी, “खउ, य्हाङ थे खतना आलबागदेला चौकी च्याबारी निइ। परमप्रभुसे य्हाङदा ह्रो लला तला। य्हाङ ल्हानान मुसै च्याङ्ना मुसै य्हाङदा जोगब लबाला लागिरी परमप्रभुदा तिगै तामसेन रोगब लबारी आखम।”
थेला हतियार पुइबा म्हिसे चुह्रङ् भिसी जोहाब पिन्जी, “ह्राङदा जुन ताम ठीक छोर्बा मुला, थे लउ। ह्राङसे जुन गे लला ङाइ ह्राङदा सेमहेन्से ह्रो लला।”
जोनाथनसे चुह्रङ् भिसी पाङ्जी, “खउ, य्हाङ चु गङ् वाइसी निइ, थेनीगदेसे य्हाङदा म्राङ्गै। चुदे थेनीगदेसे य्हाङदा ‘ङनी आखदेधोना एनीगदे थेरीन चिउ’ भिसी पाङ्जी भिसम य्हाङ थेनीगदे मुबा ग्लारी आनिना य्हाङ जुन ग्लारी दोबा मुला थेरीन चिइ। तर चुदे थेनीगदेसे ‘ङनीगदे मुबा ग्लारी तोर खउ’ भिसी पाङ्जी भिसम य्हाङ तोर निइ, तिग्दा भिसम थे चा परमप्रभुसे थेनीगदेदा य्हाङला यारी जिम्मा पिन्जीम भिबा तामला चिनु गिक तला।”
थेतबासेलमा थेनीगदे पलिश्तीगदे मुबा ग्लारी निजी। ओच्छे पलिश्तीगदेसे चुह्रङ् भिसी पाङ्जी, “च्यागो, हिब्रूगदे ह्राङ लाबा ऊगदेग्याम थोन्बान मुला।” थेनीगदेसे जोनाथनदेन थेला हतियार पुइबा म्हिदा चुह्रङ् भिसी पाङ्जी, “ङनी मुबा ग्लारी तोर खउ। एनीगदेसे तिग लतोःबा थे ङन्से एनीगदेदा लोप्ला।” जोनाथनसे ह्राङला हतियार पुइबादा चुह्रङ् भिसी पाङ्जी, “ङाला लिच्छा लिच्छा खउ। परमप्रभुसे थेनीगदेदा इस्राएलला यारी जिम्मा पिन्जीम।”
जमाहेन्से जोनाथन या काङ जुसी भाम्बान तोर निजी, ओच्छे थेला हतियार पुइबा म्हिएनोन थेला लिच्छा लिच्छा निजी। जोनाथनसे पुङ्मा थे पलिश्तीगदे ह्रिल्जी, ओच्छे थेला लिच्छा लिच्छा खबा हतियार थोबा म्हिसे थेनीगदेदा साइजी। शुरूरी लडाइ लमा ओस्पन रोपनी ब्लितेला ग्लारी जोनाथनदेन थेला हतियार पुइबा म्हिसे ओस्पन बोगल गिक ते पलिश्तीगदेदा साइजी। जमाहेन्से पालदेन लडाइ लबा ग्लारी मुबा जम्मान सिपाहीगदे लोङ्जी। चौकीरी मुबागदेदेन लडाइ लबारी ठीक तसी चिबा सिपाहीगदेला समूहएनोन लोङ्जी। सनोन ल्हिकल्हिक तजी, ओच्छे थेनीगदे ल्हानान लोङ्जी।
पलिश्तीगदेसे ब्रेबा
बेन्यामीनना गिबारी पाले चिबा शाऊलला म्हिगदेसे पलिश्तीगदेला समूह न्हङ्री हल्लीखल्ली लबान खानङ्दामन य्हार्बान लबा म्राङ्जी। जमाहेन्से शाऊलसे खाल खाल आरे भिसी था याङ्बाला लागिरी झ्यापुङ्मा जोनाथनदेन थेला हतियार पुइबा म्हि थेरी आरेबा ताम था याङ्जी।
शाऊलसे पूजाहारी अहियाहदा चुह्रङ् भिसी पाङ्जी, “परमेश्वरला सन्दोस चुरी भउ।” थे धुइरी सन्दोस इस्राएलदेन छ्यामनोन मुबा। शाऊल पूजाहारी अहियाहदेन छ्याम ताम लबान मुबा, पलिश्तीगदेला पालग्याम झन झन हल्लीखल्लीला काइ थोन्जी, ओच्छे शाऊलसे अहियाहदा “तजी, भआतोः” भिसी पाङ्जी।
जमाहेन्से शाऊलदेन थेला जम्मान म्हिगदे लडाइ तबा ग्लारी निजी, थेरी थेनीगदेसे पलिश्तीगदे छरपष्ट तसी ह्राङ ह्राङ न्हङ्रीन लडाइ लसी चिबा म्राङ्जी। थे धुइधोना पलिश्तीगदेला तहरी मुबा हिब्रूगदे थेनीगदेला पालरी निबा आरेबा। थे हिब्रूगदेसे पलिश्तीगदेदा ख्लासी शाऊल ओच्छे जोनाथनदेन छ्याम मुबा इस्राएलीगदेदेन छ्याम ढिक्बारी खजी। एफ्राइमला गङ्पट्टि लासी चिबा जम्मान इस्राएलीगदेसेनोन पलिश्तीगदे य्हार्जी भिबा ताम थेःजी, जमाहेन्से थेनीगदेएनोन ढिक्सी पलिश्तीगदेदा ल्हानान ताप्बारी छ्याइजी। थे धिनकुनु परमप्रभुसे इस्राएलदा दुखग्याम फेजी, ओच्छे बेथ-आवनना क्याम्सङ्धोनान लडाइ तजी।
लडाइ जिन्माहेन्सेला तामगदे
थे धिनकुनु इस्राएलीगदे ल्हानान ब्लप्बा मुबा, तिग्दा भिसम शाऊलसे चु तामगदे पाङ्सी म्हिगदेदा घ्रान चपुङ्मुबा, “ङाइ ङाला शत्रुगदेदा नाङ फासी जिन्बा भन्दा ङाच्छान जुन म्हिसे ङ्यसे तबा भन्दा ङाच्छान तिगै स्हे चला थे म्हिसे सराप याङ्गै।” थेतबासेलमा खालैसेन तिगै स्हे आचनी।
जम्मान म्हिगदे ह्रिरी दोजी, ओच्छे थेरी सरीन सिङ्सुरला खुदु स्याप्जी। तर घ्रान चबासेलमा थेरी म्हिगदेसे सिङ्सुरला जङग्याम खुदु ताइबा म्राङ्सैनोन खालैसेन खुदु थुर्नोन आथुर्नी। तर म्हिगदेदा ह्राङला आबासे घ्रान चपुङ्सी तिगै स्हे आचउ भिसी पाङ्बा ताम जोनाथनसे थेःबान आरेमुबा। थेसे ह्राङला यारी मुबा कडीसे थे सिङ्सुरला जङरी भ्लोसी खुदु चजी, ओच्छे थेदा भङ् खजी। तर म्हिगदे न्हङ्ला गिकसे जोनाथनदा चुह्रङ् भिसी पाङ्जी, “ह्राङला आबासे चुह्रङ् लनोन आलउ भिसी सुङ्बा मुला। थेसे चुह्रङ् भिसी सुङ्बा मुला, ‘तिनीला धिनकुनु चबा थुङ्बा लबा म्हिसे सराप याङ्गै।’ थेतबासेलमा म्हिगदे चा फोख्रेन्सी सिला ह्रङ्नोन तबा मुला।”
जोनाथनसे चुह्रङ् भिसी पाङ्जी, “ङाला आबासे य्हुल्सादा न्होङ्ना लबा गे लबा मुला। च्यागो, ङाइ चु खुदु म्याङ् जे म्याङ्मा ङादा गादे भङ् खबा मुला। तिनी शत्रुगदेग्याम ब्यन्बा स्हे म्हिगदेसे चम्याङ्बा हिन्सम गादे ज्यबा तसेला मुबा। पाङ्नोन तोःमा पलिश्तीगदेएनोन ल्हानान नाश तसेला मुबा।”
थे धिनकुनु थेनीगदेसे पलिश्तीगदेदा मिकमाशहेन्से अय्यालोनधोनान ताप्सी साइजी। ओच्छे म्हिगदे फोख्रेन्सी सिला ह्रङ्नोन तजी। थेनीगदेसे पलिश्तीगदेला सामान ब्यन्बारी छ्याइजी, ओच्छे ग्युदेन म्हेमुइगदे चुङ्जी, ओच्छे सरीन साइसी कादेन छ्यामनोन स्या चजी। “म्हिगदेसे स्यादेन कानोन चसी परमप्रभुला बिरोधरी पाप लबान मुला” भिसी शाऊलदा खालै म्हिसे पाङ्जी। शाऊल क्रिङ्बान चुह्रङ् भिसी पाङ्जी, “एनीगदेसे धोका पिन्जी। तुरून्तन घ्रेन युङ्बा गिक ब्लिङ्बान चुरी भउ1।” थेसे दोःसी चुह्रङ् भिसी पाङ्जी, “म्हिगदे मुबा ग्लारी निसी चुह्रङ् पाङ्गो, ‘एनीगदेसे ह्राङला म्हेमुइदेन ग्यु चुरी भसी साइसी चउ, ओच्छे एनीगदे चुह्रङ् लसी कादेन छ्यामनोन स्या चसी परमप्रभुला बिरोधरी पाप आलउ।’” थेतबासेलमा म्हुन तमाहेन्से जम्मान म्हिगदेसे ह्राङ ह्राङला म्हेमुइ धङ्बान भसी खजी, ओच्छे थे म्हेमुइदा थेरीन साइजी। जमाहेन्से शाऊलसे परमप्रभुला लागिरी बलि फुल्बा ग्ला स्होजी। थे बलि फुल्बा ग्ला चा परमप्रभुला लागिरी शाऊलसे ङाच्छारेम स्होबा मुबा।
जमाहेन्से शाऊलसे चुह्रङ् भिसी पाङ्जी, “य्हाङ तिनी म्हुनङ्एनोन मार निसी पलिश्तीगदेदेन छ्याम लडाइ लइ ओच्छे रामरामरिमरिम तबा धुइधोनान थेनीगदेला सामान ब्यन्गे। थेनीगदेला म्हि गिकदाएनोन बाँकी आथान्गे।” म्हिगदेसे चुह्रङ् भिसी जोहाब पिन्जी, “ह्राङदा तिग जम्मान भन्दा ज्यबा छोर्मुला थेनोन लउ।” तर पूजाहारीसे चा चुह्रङ् भिसी पाङ्जी, “ङाच्छा य्हाङसे परमेश्वरदेन छ्याम सल्लाह किन्गे।”
थेतबासेलमा शाऊलसे परमप्रभुदेन छ्याम चुह्रङ् भिसी ङ्योइजी, “तिग ङाइ पलिश्तीगदेदा ताप्गो? तिग ह्राङसे थेनीगदेदा इस्राएलला यारी जिम्मा पिन्ना?” तर थे धिनकुनु परमेश्वरसे शाऊलदा तिगै जोहाब आपिन्नी।
थेतबासेलमा शाऊलसे चुह्रङ् भिसी पाङ्जी, “सिपाहीगदेला जम्मान हाकिमगदे ङाच्छापट्टि खउ, तिनीला धिनकुनु तिग पाप लबा मुला, थे म्हाइगे। ङाइ इस्राएलदा थार्बा पिन्बा छोन्बो परमप्रभुला मिन किन्सी पाङ्ला, थे पाप ङाला झा जोनाथनसेन लबा मुसैनोन थेदा साइला।” तर थेदा खालैसे तिगै आपाङ्नी।
जमाहेन्से शाऊलसे इस्राएलीगदेदा चुह्रङ् भिसी पाङ्जी, “एनीगदे जम्मान पट्टिगिक चिउ, ङादेन ङाला झा जोनाथन अर्गु पट्टि चिला।” ओच्छे म्हिगदेसे चुह्रङ् भिसी जोहाब पिन्जी, “ह्राङदा तिग जम्मान भन्दा ज्यबा छोर्मुला थेनोन लउ।”
जमाहेन्से शाऊलसे परमप्रभु इस्राएलला परमेश्वरदा चुह्रङ् भिसी प्रार्थना लजी, “तिग्दा तिनी ह्राङसे ह्राङला गे लबा म्हिदा जोहाब आपिन्बा? परमप्रभु इस्राएलला परमेश्वर, चुदे ङाला अथवा ङाला झा जोनाथनना दोष हिन्सम चिट्ठा युमा ऊरीम2 परब तगै। चुदे ह्राङला म्हि इस्राएलला दोष हिन्सम तुम्मीम3 परब तगै।” चिट्ठा युमा जोनाथनदेन शाऊल फेतोःजी, ओच्छे म्हिगदे थेनीगदेग्याम फेजी4। जमाहेन्से शाऊलसे चुह्रङ् भिसी पाङ्जी, “ङादेन ङाला झा जोनाथनना मिनरी चिट्ठा युगो।” ओच्छे चिट्ठा जोनाथनना मिनरी परब तजी।
जमाहेन्से शाऊलसे जोनाथनदा “एसे तिग लजी? ङादा पाङ्गो” भिसी पाङ्जी। जोनाथनसे चुह्रङ् भिसी पाङ्जी, “ङाइ ङाला कडीला जोसे जजाकी खुदु म्याङ्बा जे हिन्ना। चुदे ङा सितोःबा हिन्सम सिबारी तयार मुला।”
शाऊलसे चुह्रङ् भिसी पाङ्जी, “जोनाथन, एदा आसाइनी भिसम ङादा परमेश्वरसे चु भन्दा आज्यबा व्यवहार लगै।”
तर म्हिगदेसे शाऊलदा चुह्रङ् भिसी पाङ्जी, “तिग जोनाथनदा साइबा? चुनोन जोनाथनसे इस्राएलदा ढाना लबा मुला। चुह्रङ् आलउ। छोन्बो परमप्रभुला मिन किन्सी पाङ्ला जोनाथनना क्रा गिकएनोन सरी ताइआम्याङ्, तिग्दा भिसम तिनी थेसे परमेश्वरग्याम ह्रो याङ्सी गे लबा मुला।” चुह्रङ् लसी जोनाथनदा म्हिगदेसे जोगब लजी, ओच्छे जोनाथनदा आसाइनी।
जमाहेन्से शाऊलसे पलिश्तीगदेदा ताप्बारी ख्लाजी, ओच्छे थेनीगदे ह्राङलान य्हुल्सारी दोःसी निजी।
शाऊलसे लबा शासनदेन थेला म्हेमे
शाऊलसे इस्राएलरी शासन लमाहेन्से मोआबीगदे, अम्मोनीगदे, एदोमीगदे, सोबाला ग्लेगदेदेन पलिश्तीगदे, ह्राङला क्युर्सीन मुबा शत्रुगदेदेन छ्याम लडाइ लजी। थे जुन जुन ग्लारी निजी, थे ग्लारी थेसे थेनीगदेदा ब्रेना लजी। थेसे अमालेकीगदेदाएनोन ब्रेना लजी, ओच्छे मालसामान ब्यन्बा म्हिगदेला याग्याम थेसे इस्राएलीगदेदा जोगब लसी ह्राङला शक्ति उन्जी।
शाऊलला झा जोनाथन, यिश्वीदेन मल्कीशूअ मुबा। थेला घ्रेन झामेला मिन मेराब ओच्छे झामे कान्छीला मिन मीकल मुबा। अहीमासला झामे अहीनोम चा थेला म्रिङ मुबा। ओच्छे थेला सिपाहीगदेला हाकिम चा थेला अगु नेरला झा अबनेर मुबा। शाऊलला आबा कीशदेन अबनेरला आबा नेर चा अबीएलला झागदे मुबा।
ह्राङ सोदेधोना शाऊलसे पलिश्तीगदेदेन छ्याम लडाइ लसीन चितोःजी। ओच्छे शाऊलसे खजिबै भङ्बा अथवा लडाइ लखम्बा म्हि स्याप्जी भिसम ह्राङला गे लबारी धम्नोन धम्मुबा।
Source notes (4)
- Cross-reference ठुङ् ९:४; लेवी ७:२६-२७; १७:१०-१४; १९:२६; ठिम १२:१६,२३; १५:२३
- Footnote ऊरीम भिबा चा परमेश्वरला सेमला ताम था याङ्बाला लागिरी पूजाहारीसे चिट्ठा युमा चलब लबा गोर गिक जजाबा युङ्बा हिन्ना।
- Footnote तुम्मीम भिबा चा परमेश्वरला सेमला ताम था याङ्बाला लागिरी पूजाहारीसे चिट्ठा युमा चलब लबा गोर गिक जजाबा युङ्बा हिन्ना।
- Cross-reference झ्याबा २७:२१; १ शमू २८:६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.