Eastern Tamang Language Bible
१ शमू 12
बिदा तबारी छ्याइमा शमूएलसे पाङ्बा ताम
जमाहेन्से थेरी ह्रुप तबा जम्मान इस्राएलीगदेदा शमूएलसे चुह्रङ् भिसी पाङ्जी, “एनीगदेसे पाङ्बा जम्मान ताम ङाइ थेःजी, ओच्छे एनीगदेथोरी शासन लबाला लागिरी ङाइ ग्ले धम्जी। दाहेन्से चुनोन ग्ले एनीगदेदा ग्याम उन्बा म्हि दोबा मुला। ङा चा खेप्पा दोसी क्रा सार्सी जिन्बा मुला। ङाला झागदे एनीगदेदेन छ्यामनोन मुला। ङा चा जजाहेन्से एनीगदेदा ग्याम उन्बा म्हि दोबा हिन्ना। ङा चुरीन मुबा धुइरी एनीगदेला सेमरी ङाला बिरोधरी तिगै ताम मुसम चुरीन परमप्रभुदेन थेसे धम्बा म्हिला ओन्छाङ्रीन पाङ्गो। ङाइ खाल्ला म्हे घ्लाब किन्बा मुला? ङाइ खाल्ला गधा किन्बा मुला? ङाइ खाल्दा ठगब लबा मुला? ङाइ खाल्दा नाङ्बाझ्याक्बा लजी? खाल्ला गल्ती छुम्बारी ङाइ घूस किन्जी? ङादा पाङ्गो, ङाइ थेला हर्जना फाला।”
थेनीगदेसे चुह्रङ् भिसी जोहाब पिन्जी, “ह्राङसे ङन्दा ठगब लबा आरे। ङनीथोरी ह्राङसे तिगै नाङ्बाझ्याक्बा लबा आरे। ह्राङसे खालै म्हिग्यामएनोन तिगै स्हे किन्बा आरे।”
जमाहेन्से शमूएलसे थेनीगदेदा चुह्रङ् भिसी पाङ्जी, “तिनी एनीगदेसे ङाला तिगै गल्ती आरे भिसी पाङ्बा तामला साक्षी परमप्रभु मुला, ओच्छे परमप्रभुसेन धम्बा म्हि साक्षी मुला।” ओच्छे थेनीगदेसेनोन “परमप्रभुन साक्षी मुला” भिसी पाङ्जी।
शमूएलसे म्हिगदेदा चुह्रङ् भिसी पाङ्जी, “एनीगदेला लागिरी परमप्रभुसेन मोशादेन हारूनदा धम्जी, ओच्छे एनीगदेला आखेम्हेमेदा मिश्र य्हुल्साग्याम तेःसी भजी।1 दाहेन्से चुरी राप्सी चिउ, तिग्दा भिसम परमप्रभुला ओन्छाङ्री ङाइ एनीगदेला ङाच्छा ताम गिक थान्ना, ओच्छे एनीगदेदेन एनीगदेला आखेम्हेमेगदेला लागिरी परमप्रभुसे लबा जम्मान शक्तिशाली गेगदेला बारेरी ङाइ पाङ्ला।
“मिश्र य्हुल्सारी निमाहेन्से याकूबसे ह्रो याङ्बाला लागिरी परमप्रभुदेन छ्याम बिन्ती लजी, ओच्छे परमप्रभुसे मोशादेन हारूनदा पुइजी, थे न्हीसेन एनीगदेला आखेम्हेमे याकूबदा मिश्र य्हुल्साग्याम तेःसी भजी, ओच्छे चु ग्लारी थान्जी।2
“तर थेनीगदेसे परमप्रभु ह्राङला परमेश्वरदा म्लेःजी, ओच्छे परमप्रभुसे थेनीगदेदा ख्लाजी, ओच्छे हासोरला सिपाहीगदेला हाकिम सीसरा, पलिश्तीगदेदेन मोआबला ग्लेला यारी जिम्मा पिन्जी। थेनीगदेसे एनीगदेला आखेम्हेमेगदेदा बिरोध लसी लडाइ लजी।3 जमाहेन्से एनीगदेला आखेम्हेमेगदेसे ह्रो याङ्बाला लागिरी परमप्रभुदेन छ्याम चुह्रङ् लसी बिन्ती लजी, ‘ङन्से पाप लजी। ङन्से परमप्रभुदा ख्लाजी, ओच्छे बाल लादेन अश्तोरेत लुला मूर्तिगदेदा तेन्जी। तर दाहेन्से ङन्दा ङन्ना शत्रुगदेला याग्याम फेगो, ओच्छे ङन्से ह्राङदा जे तेन्ना।’4 ओच्छे एनीगदेला क्युर्सीन मुबा शत्रुगदेला याग्याम एनीगदेदा फेबाला लागिरी परमप्रभुसे यरूब-बालदेन बाराक, यिप्तादेन ङादा पुइजी, ओच्छे एनीगदे ज्यना लसी शान्तिरी चिबारी छ्याइजी।
“तर अम्मोनीगदेला ग्ले नाहाश एनीगदेला बिरोध लबान खबा म्राङ्सी परमप्रभु एनीगदेला परमेश्वरनोन एनीगदेला ग्ले मुबा, तसैनोन एनीगदेसे ङादा चुह्रङ् भिसी पाङ्जी, ‘आहिन, ङन्दा ङनीथोरी शासन लबा ग्ले तोःला।’5 दाहेन्से एनीगदेसे ह्रीबा ग्ले चुरीन मुला। एनीगदेसे थेदा धम्जी, ओच्छे परमप्रभुसे एनीगदेला लागिरी ग्ले गिक धम्जी। चुदे एनीगदेसे परमप्रभुदा मान लजी ओच्छे सेमहेन्से थेदा तेन्जी भिसम, चुदे एनीगदे थेसे कुल्बा तामला बिरोध आलना भ्रजी भिसम, चुदे एनीगदेदेन एनीगदेला ग्लेसे परमप्रभु परमेश्वरदेन छ्याम विश्वासला गे लजी भिसम ज्यबान हिन्ना। तर चुदे एनीगदे परमप्रभुसे कुल्बा अन्छार आभ्रनी ओच्छे थेसे कुल्बा तामदा एनीगदेसे बिरोध लजी भिसम खाह्रङ् लसी एनीगदेला आखेम्हेमेला बिरोधरी परमप्रभु रेःबा मुबा, थेह्रङ् लसीन परमप्रभु एनीगदेला बिरोधरी रेःला।
“दाहेन्से कुटिसी राप्सी चिउ, ओच्छे एनीगदेलान ओन्छाङ्री परमप्रभुसे लबा ल्हानान उदेकला गे च्यागो। दन्दे ग्वा खान्बा धुइ तबा मुला, आहिन? ङाइ परमप्रभुदेन छ्याम बिन्ती लला, ओच्छे थेसे मु गुडुङ्ना लबान नाम पुइखला। जमाहेन्से परमप्रभुला ओन्छाङ्री एनीगदेसे ग्ले ह्रीसी गादे आज्यबा गे लजी भिबा ताम म्राङ्ला ओच्छे था याङ्ला।”
जमाहेन्से शमूएलसे परमप्रभुदेन छ्याम बिन्ती लजी, ओच्छे परमप्रभुसे थे धिनकुनुन मु गुडुङ्ना लबान घ्रेन नाम पुइखजी। परमप्रभुदेन शमूएलला ङाच्छापट्टि जम्मान म्हिगदे लोङ्जी।
थेनीगदेसे शमूएलदा चुह्रङ् भिसी पाङ्जी, “ङनी कालग्याम जोगब तगै भिसी ह्राङसे परमप्रभु ह्राङला परमेश्वरदेन छ्याम ङनी ह्राङला गे लबा म्हिगदेला लागिरी प्रार्थना लसी पिन्गो। तिग्दा भिसम ङन्से ग्ले ह्रीसी ल्हानान आज्यबा गे लसी पापथोरी पाप लबा मुला।”
शमूएलसे म्हिगदेदा चुह्रङ् भिसी पाङ्जी, “आलोङ्गो, एनीगदे चुह्रङ्बा पापी मुसैनोन परमप्रभुला जयजयकार लबारी आख्लागो, तर ह्राङला पूरन सेमसे थेला गे लउ। तिगै गेआखेल्बा लागदेला लिच्छा आभ्रउ, थेसे ह्रो लबारीएनोन आखम्मुला, जोगब लबारीएनोन आखम्मुला, तिग्दा भिसम थेनीगदे तिगै गेआखेल्बा मुला। ह्राङला जम्मान भन्दा घ्रेन मिनसे लमा परमप्रभुसे एनीगदेदा आख्ला, तिग्दा भिसम एनीगदेदा परमप्रभुसे ह्राङलान म्हि स्होबारी पक्का लसी जिन्बा मुला। एनीगदेला लागिरी प्रार्थना लबारी ख्लासी परमप्रभुला ओन्छाङ्री पाप लबा धिन चा ङाला लागिरी खाइमै आखगै। जुन ताम ज्यबादेन ठीक मुला ङाइ एनीगदेदा थेनोन ताम उन्ना। एनीगदेसे परमप्रभुदा मान लउ ओच्छे सोझो तसी एनीगदेला सेमहेन्सेन थेला गे लउ। एनीगदेला लागिरी थेसे गादे घ्रेन गे लबा मुला, थे गेला बारेरी खेन्गो। तर एनीगदे सदन नाइबा गेनोन लसी चिजी भिसम एनीगदेदेन एनीगदेला ग्ले नाश तला।”
Source notes (5)
- Cross-reference थोन्बा ६:२६
- Cross-reference थोन्बा २:२३
- Cross-reference निसाफ ३:१२; १३:१
- Cross-reference निसाफ १०:१०-१५
- Cross-reference १ शमू ८:१९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.