Eastern Tamang Language Bible
१ शमू 11
शाऊलसे अम्मोनीगदेदा ब्रेना लबा
अम्मोनी नाहाश याबेश-गिलादरी खसी थेदा घेरब लजी। याबेशला म्हिगदेसे नाहाशदा चुह्रङ् भिसी पाङ्जी, “ङन्देन छ्याम ढिक्गो, ङनी ह्राङला य्हुल्साला म्हि दोला।”
तर नाहाशसे थेनीगदेदा चुह्रङ् भिसी जोहाब पिन्जी, “चु ताम ङ्यन्जी भिसम जे ङा एनीगदेदेन छ्याम ढिक्ला। ङाइ एनीगदे जम्मालान दाहिने मी तेःला, चुह्रङ् लसी इस्राएलला बेइज्जत लला।”
जमाहेन्से याबेश-गिलादला गन्बागदेसे चुह्रङ् भिसी पाङ्जी, “चु समाचार इस्राएल नाङ्नोन दोना लबारी ङन्दा निसरेला धुइ पिन्गो, जमाहेन्से ङन्दा ह्राङला याग्याम खालैसेन जोगब आलनी भिसम ङन्से ह्राङसे ह्राङदान ह्राङला यारी जिम्मा पिन्ना।”
समाचार भबा म्हिगदे गिबारी शाऊल मुबा ग्लारी खसी समाचार पाङ्जी, जमाहेन्से जम्मान म्हिगदे क्राबा क्रिङ्बा लबारी छ्याइजी। थे धुइरी शाऊल म्हे धङ्बान धङ्बान भुग्याम दिमरी खबान मुबा, ओच्छे थेसे “म्हिगदेदा तिग तजी? तिग्दा म्हिगदे क्राबा क्रिङ्बा लबा?” भिसी ङ्योइजी। ओच्छे थेनीगदेसे याबेश-गिलादला म्हिगदेसे पाङ्बा ताम थेदा पाङ्जी।
चु ताम थेःमा शाऊलथोरी परमप्रभुला आत्मा शक्तिरी फेप्खजी, ओच्छे थे बोमोसे मे दोजी। जमाहेन्से थेसे हल गिक म्हे घ्लाब थासी टोगोल टोगोल लजी, ओच्छे समाचार भबा म्हिगदेदा थे स्याला दुम्बु पिन्सी इस्राएलला जम्मान ग्लारी चुह्रङ् भिसी पाङ्गो भिसी पुइजी, “जुन जुन म्हि लडाइ लबारी निबाला लागिरी शाऊलदेन शमूएलला लिच्छा आख थेला थेनीगदेदाएनोन चु म्हे घ्लाबगदेदा ह्रङ्नोन लला।” जमाहेन्से जम्मान म्हिगदे परमप्रभुदेन छ्याम लोङ्जी, ओच्छे थेनीगदे जम्मान म्हि गिक तेबान तसी खजी। लडाइरी निबाला लागिरी शाऊलसे थेनीगदेदा बेजेकरी ह्रुप लजी। थेरी इस्राएलला म्हिगदे ३,००००० ओच्छे यहूदाला म्हिगदे ३०,००० मुबा।
थेनीगदेसे समाचार भबा म्हिगदेदा चुह्रङ् भिसी पाङ्जी, “याबेश-गिलादला म्हिगदेदा चुह्रङ् भिसी पाङ्गो, ‘धिनी गङ्सलरी क्यारनोन एनीगदेदा थेनीगदेला याग्याम जोगब लला।’” समाचार भबा म्हिगदेला ताम थेःमाहेन्से याबेश-गिलादला म्हिगदेदा आँट खजी। जमाहेन्से थेनीगदेसे अम्मोनीगदेदा चुह्रङ् भिसी पाङ्जी, “ङन्से ह्राङसे ह्राङदान ह्राङला यारी जिम्मा पिन्ना, ओच्छे ह्राङसे ङन्दा जे लइ म्हन्बा थेनोन लउ।”
न्हङ्गरदाङ शाऊलसे ह्राङला म्हिगदेदा समूह सोम स्होजी। थेनीगदे स्य्होरीन अम्मोनीगदेला पाल न्हङ्री वाङ्जी ओच्छे धिनी गङ्सलधोना थेनीगदेदा नाश लजी। जमाहेन्से सोबागदेएनोन ग्ला गिकरीन ह्रुप तबारी आखम्बाधोना छरपष्ट तजी।
जमाहेन्से म्हिगदेसे शमूएलदा चुह्रङ् भिसी पाङ्जी, “ङनीथोरी शाऊलसे शासन आलगै भिसी पाङ्बा म्हि खाला हिन्ना? थेनीगदेदा ङन्ना यारी जिम्मा पिन्गो, थेनीगदेदा ङन्से साइला।”
तर शाऊलसे चुह्रङ् भिसी पाङ्जी, “आहिन, इस्राएलदा परमप्रभुसे चुह्रङ् लसी ढाना लबा धिनकुनु खालैदान आसाइ।”
जमाहेन्से शमूएलसे म्हिगदेदा चुह्रङ् भिसी पाङ्जी, “य्हाङ गिलगालरी निसी चु ग्लेसे लबा शासनदा सेमहेन्सेन मान लइ।” थेतबासेलमा थेनीगदे जम्मान गिलगालरी निसी परमप्रभुला ङाच्छा ढिक्ना लबा बलि फुल्जी, ओच्छे परमप्रभुलान ङाच्छा शाऊलदा ग्ले स्होजी। शाऊलदेन जम्मान इस्राएलीगदे ल्हानान ताङ्सी थेरी भोज लजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.