Mga Salmo 77

Awit na isinulat ni Asaf para sa direktor ng mga mang-aawit na si Jedutun.

1Tumawag ako nang malakas sa Diyos.

Tumawag ako sa kanya

upang akoʼy kanyang pakinggan.

2Kapag akoʼy nagdurusa,

akoʼy nananalangin sa Panginoon.

Sa gabi ay nakataas ang aking mga kamay

sa pagdarasal,

at hindi ako napapagod,

ngunit wala pa rin akong kaaliwan.

3Naalala ko kayo, O Diyos, at akoʼy dumaing;

akoʼy nagmuni-muni at para bang akoʼy nawalan na ng pag-asa.

4Hindi ninyo ako pinatutulog,

hindi ko na alam ang aking sasabihin,

dahil balisang-balisa ako.

5Naaalala ko ang mga araw at taong lumipas.

6Naaalala ko ang mga panahong //umaawit ako1 sa gabi.

Nagbubulay-bulay ako

at tinatanong ang aking sarili:

7“Habang buhay na ba akong

itatakwil ng Panginoon?

Hindi na ba siya malulugod sa akin?

8Nawala na ba talaga

ang pag-ibig niya para sa akin?

Ang kanyang pangako ba

ay hindi na niya tutuparin?

9Nakalimutan na ba niyang maging maawain?

Dahil ba sa kanyang galit

ay nawala na ang kanyang habag?”

10At sinabi ko, “Ang pinakamasakit para sa akin

ay ang malamang hindi na tumutulong

ang Kataas-taasang Diyos.”

11Panginoon, aalalahanin ko ang inyong //mga gawa.

Gugunitain ko ang mga himalang

ginawa nʼyo noon.

12Iisipin ko at pagbubulay-bulayan

ang lahat ng inyong mga dakilang gawa.

13O Diyos, ibang-iba ang inyong

mga pamamaraan.

Wala nang ibang Diyos

na kasindakila ninyo.

14Kayo ang Diyos na gumagawa ng mga himala.

Ipinapakita nʼyo sa mga tao

ang inyong kapangyarihan.

15Sa pamamagitan ng inyong kapangyarihan,

iniligtas nʼyo ang inyong

mga mamamayan

na mula sa lahi nina Jacob at Jose.

16Ang mga tubig, O Diyos

ay natakot at nanginig,

pagkakita sa inyo.

17Mula sa mga ulap ay bumuhos ang ulan,

kumulog sa langit at kumidlat

kung saan-saan.

18Narinig ang kulog mula sa napakalakas //na hangin;

ang mga kidlat ay nagbigay-liwanag //sa mundo,

at nayanig ang buong daigdig.

19Tinawid nʼyo ang karagatang

may malalaking alon,

ngunit kahit mga bakas ng paa nʼyo

ay hindi nakita.

20Pinatnubayan ninyo ang inyong mga mamamayan

na parang kawan,

sa pamamagitan nina Moises at Aaron.