ಯೊಹಾನ 20

ಕ್ಹಾಲಿ ಮಜಾರ

1ಐತ್ವಾರ ಪಾಟೆ ಮಗ್ದಲನಿ ಮರಿಯಳ ಯೆಸುನಾ ಅಂಗ ರ‍್ಹಯಲ ಮಜಾರ ಕನ ಐ. ತೆಳಾಮಾ ಹಜು಼ನ ಅಂದಾರು ವ್ಹತ್ತು. ಮಜಾರನಾ ಬಾಕಲನೆ ಝಾಕಲ ಮ್ಹೊಟೊ ದಗ್ಡೊ ತ್ಯಾಂತೊ ಸರಕಾಯಲ ದೆಕಿನ ಮರಿಯಳ 2ಸಿಮೊನ ಪೆತ್ರಾ ವರಿ ಯೆಸು ಮಯಾ ಕರಾನಾ ವರಿಯಕ್ಲಾ ಶಿಷ್ಯಾ ಕನ ನ್ಹಾಟಿನ ಐನ"ತ್ಯುನೆ ಮಜಾರಮಾತಾ ಪ್ರಭುನೆ ಲಿನ ಗಯಾಸ, ತಿನೆ ಕಿಜಾ಼ ಮ್ಹೆಲ್ಯಾಸ ಕವಾನು ಹಮೊನೆ ಗ್ವತ್ತ ನತ್ತಿ" ಕೈನ ಕದಿ. 3ತಿನಾಹುತಿ ಪೆತ್ರಾ ವರಿಯಕ್ಕ ಶಿಷ್ಯೊ ಮಜಾರ ಕನ ಗಯಾ. 4ತ್ಯುನೆ ಭಂಬಿ ಜ಼ನಾ ನ್ಹಾಟತಾ ಗಯಾ. ತೆನೈಸೊ ತೆ ವರಿಯಕ್ಕ ಬಿಜೊ ಶಿಷ್ಯೊ ಪೆತ್ರಾತಿಬಿ ಜೊ಼ರ ನ್ಹಾಟತೊ ಮಜಾರ ಕನ ಗೈನ ಪೈಲಾ ಮುಟ್ಯೊ. 5ತೆ ಶಿಷ್ಯೊ ಡೊಗ್ಗಿನ ಮ್ಹೈ ದೆಕ್ಯೊ. ತ್ಯಾ ಫಡಕಾನಾ ತುಕ್ಡಾ ಪಡ್ಯಾತಾ ತೆನೈಸೊ ತೆ ಮ್ಹೈ ಗಯೊ ನೈ. 6ಪಾಚಲ್ತೊ ಆಯಲ ಪೆತ್ರಾ ಸಿದಾ ಮಜಾರನಾ ಮ್ಹೈ ಹೊಕ್ಯೊ. ಖಾದಿನಾ ಫಡಕಾ ತ್ಯಾ ಪಡಲ ತೆ ದೆಕ್ಯೊ. 7ಪಸ್ಟ ನ್ಹಾಟಿನ ಗಯಲ ತೆ ಶಿಷ್ಯೊಬಿ ಮ್ಹೈ ಗಯೊ. ವರಿ ದೆಕ್ಯೊ, ವರಿ ಬರೊಕ್ಹೊ ಕರ‍್ಯೊ. ತೆ ಪ್ಹಡಕು ಸುತ್ತಲ ರ‍್ಹೈನ, ಬಿಜಾ಼ ಖಾದಿನಾ ಫಡಕಾವೊತಿ ಜ಼ುದು ಥೈನ ಪಡ್ಯುತು. 8ಪಾಚಲ್ತೊ ತೆ ವರಿಯಕ್ಕ ಶಿಷ್ಯೊ ಮ್ಹೈ ಗಯೊ. ಮಜಾರ ಪೈಲಾ ಗೈನ ಮುಟ್ಯಲವಾಲೊ ತೆ ಶಿಷ್ಯೊ ವ್ಹೈ. ತೆ ಥಯಲ ಕ್ಹಾರು ದೆಕಿನ ಬರೊಕ್ಹೊ ಕರ‍್ಯೊ. 9ತೆ ಮರಿನ ವರಿ ಜಿವ್ತೊ ಥೈನ ಆವಸ ಕವಾನು ಪವಿತ್ರ ಗ್ರಂಥಮಾ ಬರ್ದಲ ಎ ಶಿಷ್ಯಾವೊನೆ ಹಜು಼ನ ಗ್ವತ್ತ ನ್ಹೊತು.

ಮರಿಯಳನೆ ಯೆಸು ದರ್ಶನ ದಿದಲ

10ಪಾಚಾ಼ತಾ ಶಿಷ್ಯಾ ಪಾಚಾ಼ ಫರಿನ ಘರೆ ಗಯಾ. 11ತೆನೈಸೊ ಮರಿಯಳ ರೊತಿ ಮಜಾರನಾ ಭಾರಿ ಹುಬ್ರೈತಿ. ತೆ ರೊತಿ ಡೊಗ್ಗಿನ ಮಜಾರಮಾ ದೆಕ್ತಾಮಾ, 12ಧೊಳಾ ವಣ್ಣಾ ಘಾಲ್ಲಿದಲ ಬೆ ಕ್ಹುದಾನಾ ದುತೊ ದೆಕಿ. ಯೆಸುನು ಅಂಗ ಮ್ಹೆಲಲ ಜ಼ಗಾ ಕನ ತ್ಯುನೊಮಾ ಯಕ್ಲೊ ಯೆಸುನಾ ಮಾತಾ ಕನ ವರಿ ಯಕ್ಲೊ ಪಗೊ ರ‍್ಹಯಲ ಜ಼ಗಾ ಕನ ಬೈಟ್ಯೊತೊ. 13ಕ್ಹುದಾನಾ ದುತೊ ಮರಿಯಳನೆ"ಬೈ, ಕಾ ರವಾಡಿಸ? ಕೈನ ಪುಚ್ಯಾ. ಮರಿಯಳ"ಮಾರಾ ಪ್ರಭುನು ಅಂಗ ದಕ್ಹಾ ಜ಼ನಾ ಲಿನ ಗಯಾಸ. ತ್ಯುನೆ ತಿನೆ ಕಿಜಾ಼ ಮ್ಹೆಲ್ಯಾಸ ಕವಾನು ಮನೆ ಗ್ವತ್ತ ನತ್ತಿ" ಕೈನ ಉತ್ತರ ದಿದಿ. 14ಮರಿಯಳ ಇಮ್ಮ ಕೈನ ಪಾಚಿ ಫರತಾಮಾ ಯೆಸು ತ್ಯಾಜ ಹುಬ್ರಯಲ ದೆಕಿ. ತೆನೈಸೊ ತೆ ಯೆಸುಜ ವ್ಹೈ ಕವಾನು ತಿನೆ ಗ್ವತ್ತ ನ್ಹೊತು. 15ಯೆಸು ತಿನೆ"ಬೈ, ಕಾ ರವಾಡಿಸ? ತು ಕಿನೆ ಹುಡಕಾಡಿಸ? ಕೈನ ಪುಚ್ಚೊ. ತೆ ಕ್ಹೆತರ ದೆಕಿಲಿವಾಲೊ ವಸೆ ಕೈನ ಮರಿಯಳ ತಿಳ್ದಿಲಿನ ತಿನೆ"ಬಾ, ತು ಯೆಸುನೆ ಲಿನ ಗಯೊಸ ಸು? ತಿನೆ ಕಿಜಾ಼ ಮ್ಹೆಲ್ಯೊಸ, ಮನೆ ಕೆ. ಮಿ ಗೈನ ತಿನೆ ಲಿನ ಔಸ" ಕೈನ ಕದಿ. 16ಯೆಸು ತಿನೆ"ಮರಿಯಳ" ಕದ್ಯೊ. ಮರಿಯಳ ಯೆಸು ಕನ ಫರಿನ, ಇಬ್ರಿಯ ಭಾಶಾಮಾ "ರಬ್ಬುನಿ" ಕದಿ. ರಬ್ಬುನಿ ಕದ್ಯಾಮ "ಗುರು ವ್ಹೈ" 17ಯೆಸು ತಿನೆ ಮನೆ ಮುಟ್ಟು ನಕೊ. ಮಿ ಬಾಕನ ಹಜು಼ನ ಫರಿನ ಗಯೊ ನತ್ತಿ. ತೆನೈಸೊ ಮಾರಾ ಭಾಯೊಕನ (ಶಿಷ್ಯಾ) ಗೈನ ಮಾರೊ ಬಾ ತುಮಾರೊ ಬಾ ಮಾರೊ ಕ್ಹುದಾ ತುಮಾರೊ ಕ್ಹುದಾ ಥಯಲವಾಲೊ ಮಿ ಫರಿನ ಚಾಲ್ಯೊಸ. ಕವಾನು ತ್ಯುನೊಕನ ಕೆ ಕೈನ ಕದ್ಯೊ. 18ಮಗ್ದಲನಿ ಮರಿಯಳ ಶಿಷ್ಯಾವೊಕನ ಗೈನ ಮಿ ಪ್ರಭುನೆ ದೆಕಿಶಿ ಕೈನ ಕದಿ ತೆ ಕ್ಹಾರಿಯೊ ಸಂಗತಿಯೊ ಕದಿ.

ಶಿಷ್ಯಾವೊನೆ ಯೆಸು ದರ್ಶನ ದಿದಲ

19ತೆ ದಿನ್ನ ಐತ್ವಾರ ವ್ಹತ್ತೊ. ತೆ ದಿನ್ನಾ ಕ್ಹಾಂಜೆ ಶಿಷ್ಯಾ ಕುಡಿನ ವ್ಹತ್ತಾ. ಯೆಹುದಿಯೊನಾ ಅದಿಕಾರಿಯೊನೆ ಭುಚಿ಼ಕಿನ ಬಾಕಲೊ ಘಾಲ್ಲಿನ ಘರನಾ ಮ್ಹೈ ವ್ಹತ್ತಾ. ತೆಳಾಮಾ ಯೆಸು ತ್ಯುನಾ ವಚ್ಮಾ ಐನ ಹುಬ್ರೈನ ತ್ಯುನೊನೆ ಶಾಂತಿ ತುಮೊಮಾ ರ‍್ಹವಾದೆ ಕೈನ ಕದ್ಯೊ. 20ಯೆಸು ಇಮ್ಮ ಕದಲ್ಪರ ತಿನಾ ಹತೊ ವರಿ ಪಾಕ್ಹಳಿ ದೆಕಾಡ್ಯೊ. ಪ್ರಭುನೆ ದೆಕಿನ ತ್ಯುನೆ ಘನ್ನಾ ಖುಶಿ ಥಯಾ. 21ಪಾಚಲ್ತೊ ಯೆಸು ವರಿ ಶಾಂತಿ ತುಮೊಮಾ ರ‍್ಹವಾದೆ ಬಾ ಮನೆ ಮೊಕಲ್ಯೊ. ತಿನಾ ಲಿಂಗತಜ ಮಿ ತುಮೊನೆ ಮೊಕಲಾಡೊಸ. ಕೈನ ಕದ್ಯೊ. 22ಯೆಸು ಇಮ್ಮ ಕದಲ್ಪರ ಶಿಷ್ಯಾವೊಪರ ಯೆಸು ಪ್ಹುಕ್ಕಿನ ಪವಿತ್ರ ಆತ್ಮಾನೆ ಸ್ವಿಕಾರ ಕರೊ. 23ತುಮೆ ಕಿನಾ ಪಾಪ ಮಾಫ ಕರೊಶಿ ತ್ಯುನಾ ಪಾಪೊ ಮಾಫ ಕರಸ. ತುಮೆ ಕಿನಾ ಪಾಪೊ ಮಾಫ ನೈ ಕರತಾ ತ್ಯುನಾ ಪಾಪೊ ಮಾಫ ನೈ ಕರತಾ. ತ್ಯುನಾ ಪಾಪೊನೆ ಮಾಫಿ ನೈ ಮಳ್ತಿ ಕೈನ ಕದ್ಯೊ.

ತೊಮಾನೆ ಯೆಸು ದರ್ಶನ ದಿದಲ

24ಯೆಸು ಆತಾಮಾ ಔಳಿ ಜೌಳಿ ಕವಾಲೊ ತೊಮ ಶಿಷ್ಯಾವೊನಾ ಕ್ಹಾತೆ ನ್ಹೊತೊ. ಬಾರಾ ಶಿಷ್ಯಾವೊಮಾನಾ ತೊಮ ಕವಾಲೊ ಯಕ್ಲೊ ವ್ಹತ್ತೊ. 25ಉಗ್ರಲ ಶಿಷ್ಯಾ ತೊಮಾನೆ ಹಮೆ ಪ್ರಭುನೆ ದೆಕ್ಯಾ ಕೈನ ಕದ್ಯಾ. ವರಿಬಿ ತೊಮಾ ತಿನಾ ಹತೊಮಾ ರ‍್ಹಯಲ ಮೊಳಾ ಮಾರಲ ದುಕಪರ ವರಿ ಪಾಕ್ಹಳಿಯೊನು ದುಖಪರ ಹತ ಮ್ಹೆಲಿನ ದೆಕೆ ಲಕ್ಕಾ ಮಿ ನಂಬತೊ ನೈ ಕೈನ ಕದ್ಯೊ. 26ಯಕ್ಕ ಹಪ್ತೊ ಥಯಲಪರ ಕ್ಹಾರಾ ಶಿಷ್ಯಾ ಯಕ್ಕ ಘರಮಾ ಮಳ್ಯಾತಾ. ತೊಮಾ ತ್ಯುನ ಕ್ಹಾತೆ ವ್ಹತ್ತೊ. ಪುರಾ ಬಾಕಲೊ ಘಾಲ್ಯಾತಾ ತೆಳಾಮಾ ಯೆಸು ಐನ ತ್ಯುನಾ ವಚ್ಮಾ ಹುಬ್ರೈನ ತ್ಯುನೊನೆ ಶಾಂತಿ ತುಮೊಮಾ ರ‍್ಹವಾದೆ ಕೈನ ಕದ್ಯೊ. 27ಪಾಚಲ್ತೊ ಯೆಸು ತೊಮಾನೆ ತಾರೊ ಬೊಟ ಘಾಲಿನ ಮಾರಾ ಹತೊ ದೆಕ. ತಾರೊ ಹತ ಮಾರಿಯೊ ಪಾಕ್ಹಳಿಮಾ ಘಾಲ ಸಂಶೊ ಕರ‍್ಯಾವಾಚಿ ಮನೆ ನಂಬಾಲೊ ಥಾ. ಕೈನ ಕದ್ಯೊ. 28ತೊಮಾ ಯೆಸುನೆ "ಮಾರಾ ಪ್ರಭು ಮಾರಾ ಕ್ಹುದಾ "ಕೈನ ಕದ್ಯೊ. 29ಯೆಸು ತುತೊ ಮನೆ ತು ದೆಕಿನ ನಂಬ್ಯೊ ಮನೆ ದೆಕ್ಯಾವಾಚಿ ನಂಬಾಲಾ ‍ಕ್ಹರಿಮಾಜ಼ ಧನೈ ವ್ಹೈ. ಕೈನ ಕದ್ಯೊ.

ಎ ಬುಕ್ಕ ಬರ್ದಲ ಉದ್ದೆಶ

30ಯೆಸು ಹಜು಼ನ ತಿನಾ ಶಿಷ್ಯಾವೊನಾ ಕ್ಹಾಮೊ ಅದ್ಭುತ ಕಾಮೊ ಕರ‍್ಯೊ. ಎ ಅದ್ಭುತ ಕಾಮೊ ಪುಸ್ತಕಮಾ ಬರ್ದ್ಯಾ ನತ್ತಿ. 31ಯೆಸು ಹಜು಼ನ ಬಿಜಾ಼ ಅದ್ಭುತ ಕಾಮೊ ತಿನಾ ಶಿಷ್ಯಾನಾ ಕ್ಹಾಮೊ ಕರ‍್ಯೊಸ. ತೆನೈಸೊ ಎ ಬುಕ್ಮಾ ನತ್ತಿ ಬರ್ದ್ಯಾ. ವರಿ ಅಕ್ಲು ಕ್ಹಾರು ಬರ್ದಲ ಛೆ. ಕಾಕದ್ಯಾಮ ತುಮೆ ತಿಪರ ಬರೊಕ್ಹೊ ಮ್ಹೆಲು ಕೈನ ಎ ಕ್ಹಾರು ಬರ್ದಲ ವ್ಹೈ.