ಯೊಹಾನ 19

1ಪಾಚಾ಼ತಾ, ಯೆಸುನೆ ಧರಿನ ಲಿನ ಗೈನ, ಬಾರಕೊಲ ಕ್ಹು ಮಾರು ಕೈನ ಪಿಲಾತನ ಆಗನ್ಯಾ ದಿದ್ಯೊ. 2ಸೈನಿಕೊ ಕಾಟಾವೊನಾ ಝಾಕ್ರಾಕ್ಹು ಯಕ್ಕ ಕಿರಿಟ ಕರಿನ ಯೆಸುನಾ ಮಾತಾ ಪರ ಮ್ಹೆಲ್ಯಾ. ಪಾಚಾ಼ತಾ ಸೈನಿಕೊ ಯೆಸುನೆ ಜಾಂಬಳಾನು ಕಲರ ರ‍್ಹಯಲ ಮ್ಹೊಟು ಅಂಗ್ಡು ಘಾಲ್ಯಾ. 3ಸೈನಿಕೊ ಹಗ್ಲೆಲ್ಲಾ ಯೆಸು ಕನ ಐನ"ಯಹುದ್ಯೊನಾ ರಾಜಾ಼ ತು ಘನ್ನಾ ಕಾಲ ಜಿವ್ತೊ ರ‍್ಹವಾದೆ" ಕೈನ ಕತಾ ತಿನಾ ಗಾಲೊಪರ ಮಾರ‍್ಯಾ. 4ಪಿಲಾತನ ವರಿ ಭಾರೊ ಐನ, ಯಹುದಿಯೊನೆ"ದೆಕೊ ಮಿ ಯೆಸುನೆ ತುಮೊಕನ ಲಾವಾಡ್ಯೊಸ. ಮನೆ ತಿಮಾ ಕಯುಜ಼ ಅಪರಾದ ದಿಕ್ಹ್ಯು ನೈ ಕವಾನು ತುಮೊನೆ ಗ್ವತ್ತ ರ‍್ಹವಾದೆ ಕೈನ ಕದ್ಯೊ. 5ತೆಳಾಮಾ ಯೆಸು ಭಾರೊ ಆಯೊ. ತಿನಾ ಮಾತಾಪರ ಕಾಟಾನು ಕಿರಿಟ ಘಾಲ್ಯಾತಾ ವರಿ ಜಾಂಬಳಾನು ಕಲರನು ಅಂಗ್ಡು ತಿನೆ ಘಾಲ್ಯಾ. ಪಿಲಾತನ ಯಹುದಿಯೊನೆ"ದೆಕೊ, ಎಜ಼ ಮನಕ್ಹ ವ್ಹೈ" ಕೈನ ಕದ್ಯೊ. 6ಖಾಸ ಯಾಜಕೊ ಯಹುದಿಯೊನೆ ದೆವಾಲಯ ಕೈದಾಲಾ ಯೆಸುನೆ ದೆಕಿನ"ತಿನೆ ಶಿಲುಬಿಪರ ಘಾಲ ತಿನೆ ಶಿಲುಬಿಪರ ಗಾಲ" ಕೈನ ವದ್ರ್ಯಾ. ತೆನೈಸೊ ಪಿಲಾತನ"ತುಮೆಜ಼ ತಿನೆ ಲಿನ ಗೈನ ಶಿಲುಬೆಪರ ಘಾಲೊ ಮನೆ ತಿಮಾ ಕಯುಜ಼ ಅಪರಾದ ದಿಕ್ಹ್ಯು ನೈ ಕೈನ ಕದ್ಯೊ. 7ಯೆಹುದಿಯೊ "ಹಮೊನೆ ಯಕ್ಕ ನಿಯಮ ಛೆ ತಿನಾಲಿಂಗತ ಇನಿ ಮರವಾನಿ ಶಿಕ್ಷಾ ಥೌಜ. ಕಾಕದ್ಯಾಮ ಎ ತಿನೆ ಕ್ಹುದಾನೊ ದಿಕ್ರೊ ವ್ಹೈ ಕೈನ ಕೈಲಿದ್ಯೊಸ ಕೈನ ಕದ್ಯೊ. 8ಎ ಕವಾನು ಪಿಲಾತನ ಐಕಿನ ಘನ್ನೊ ಭುಚಿ಼ಕಿನ, 9ವರಿ ಭವನಮಾ ಗೈನ ಯೆಸುನೆ"ತು ಕಿಜಾತೊ ಆಯೊಸ? ಕೈನ ಪುಚ್ಯೊ. ತೆನೈಸೊ ಯೆಸು ಸುಜ಼ ಕದ್ಯೊ ನೈ? 10ಪಿಲಾತನ"ಮಾರಾ ಕ್ಹಾತೆ ಬೊಲ್ತೊ ನೈಸು? ತುನೆ ಛೊಡಾವಾನೆ ಅದಿಕಾರ ತುನೆ ಶಿಲುಬಿ ಪರ ಘಾಲಾನು ಅದಿಕಾರಬಿ ಮನೆ ಛೆ ಕವಾನು ತುನೆ ಗ್ವತ್ತ ಛೆ ಸು? ಕೈನ ಕದ್ಯೊ. 11ಯೆಸು ತಿನೆ "ಮಪರ ತುನೆ ರ‍್ಹಯಲ ಅದಿಕಾರ ಛೆ. ತೆ ಕ್ಹುದಾಜ ತುನೆ ದಿದಲ ಅದಿಕಾರ ವ್ಹೈ. ತಿನಾಹುತಿ ಮನೆ ತಾರಾ ಹತ್ಮಾ ದಿದಲವಾಲಾವೊನೆ ಘನ್ನು ಪಾಪ ದೊಶ ರ‍್ಹವಸ ಕೈನ ಕದ್ಯೊ. 12ಎ ಥಯಲ್ಪರ ಯೆಸುನೆ ಬಿಡುಗಡೆ ಕರಾನೆ ಪಿಲಾತನ ಕೊಶಿಶ ಕರ‍್ಯೊ. ತೆನೈಸೊ ಯೆಹುದಿಯೊ"ತಿನಾಕ್ಹು ತಿನೆ ರಾಜೊ಼ ವ್ಹೈ ಕೈನ ಕೈಲಿವಾನು ಕಯೊಬಿ ಮನಕ್ಹ ರ‍್ಹೈನಕಾ ಸಿಸರನೊ ವಿರೊಧಿ ವ್ಹೈ. ತಿನಾಹುತಿ ತು ಎ ಮನಕ್ಹನೆ ಬಿಡುಗಡೆ ಕರ‍್ಯೊಮ ತು ಸಿಸರನೊ ದೊಸ್ತ ನ್ಹವೈ ಕೈನ ತಿನೊ ಮತ್ಲಬ ವ್ಹೈ ಕೈನ ವದ್ರ್ಯಾ. 13ಯಹುದಿಯೊ ಕದಲ ಐಕಿನ ಪಿಲಾತನ ಯೆಸುನೆ ಭಾರೊ ಬಲೈನ ಹಾಸುಗಲ್ಲ ಕವಾನು ಕಟ್ಟಾಕನ. ರ‍್ಹಯಲ ಫೈಸಲಾನಿ ಜ಼ಗಾಪರ ಬೈಟ್ಯೊ. ಇಬ್ರಿಯ ವಾತೊಮಾ ತಿನು ನಾಮ ಗಬ್ಬಥ ವ್ಹೈ 14ತೆ ಪಸ್ಕ ಸನ್ನನು ತಯ್ಯಾರನೊ ದಿನ್ನ ವ್ಹೈ. ವರಿ ತೆಳಾಮಾಜ಼ ದುಪಾರ ಥೈಗೈತಿ ಪಿಲಾತನ ಯೆಹುದಿಯೊನೆ"ದೆಕೊ, ತುಮಾರೊ ರಾಜೊ಼" ಕೈನ ಕದ್ಯೊ. 15ಯಹುದಿಯೊನೆ"ಲಿವೊ, ತಿನೆ ಶಿಲುಬಿಪರ ಘಾಲೊ" ಕೈನ ವದ್ರ್ಯಾ. ಪಿಲಾತನ ಯಹುದಿಯೊನೆ"ತುಮಾರಾ ರಾಜಾ಼ನೆ ಶಿಲುಬಿಪರ ಘಾಲು ಕೈನ ಆಸ ಕರೊಶಿ ಸು? ಕೈನ ಕದ್ಯೊ. ಖಾಸ ಯಾಜಕ"ಹಮೊನೆ ಸಿಸರನೆ ಛೊಡಿನ ಬಿಜೊ ಕಯೊ ರಾಜೊ಼ ನತ್ತಿ" ಕೈನ ಕದ್ಯಾ. 16ತೆಳಾಮಾ ಪಿಲಾತನ ಯೆಸುನೆ ಶಿಲುಬಿಪರ ಘಾಲಾನೆ ತಿವ್ನಾ ಹತ್ಮಾ ದಿದ್ಯೊ. ಸೈನಿಕೊ ಯೆಸುನೆ ಬಲೈಲಿನ ಗಯಾ.

ಯೆಸುನೆ ಶಿಲುಬಿಪರ ಘಾಲ್ಯಲ

17ಯೆಸು ತಿನಿ ಸ್ವಂತ ಶಿಲುಬಿ ಉಚೈಲಿನ ಭಾರೊ ಆಯೊ. ಕಪಾಲ ಕವಾನಿ ಜ಼ಗಾಪರ ಗಯೊ. ಯಹುದಿಯೊನಿ ವಾತೊಮಾ ಎ ಜ಼ಗಾನು ನಾಮ ಗೊಲ್ಗೊಥಾ" ವ್ಹೈ. 18ತ್ಯುನೆ ತ್ಯಾ ಯೆಸುನಿ ತಿನಾ ಕ್ಹಾತೆ ಬಿಜಕ್ಲಾ ಬೆ ಜ಼ನಾವೊನೆ ಶಿಲುಬಿಪರ ಘಾಲ್ಯಾ. ತ್ಯುನೆ ಭಂಬಿಜ಼ನಾ ಆಜು಼ ಬಾಜು಼ಮಾ ಘಾಲಿನ, ಯೆಸುನೆ ತ್ಯುನಾ ವಚ್ಮಾ ಘಾಲ್ಯಾ. 19ಪಿಲಾತನ ಯಕ್ಕ ಫಳಿಪರ ಬರ್ದಿನ ಶಿಲುಬೆನಾ ಉಪ್ಪರ ಲಗಾಡ್ಯೊ. ತೆ ಫಳಿಪರ"ನಜರೆತನೊ ಯೆಸು ಯಹುದಿಯೊನಾ ರಾಜ಼ೊ ಕವಾನು ಬರ್ದ್ಯೊತೊ. 20ತೆ ಫಳಿಪರ ಇಬ್ರಿಯ ವಾತೊಮಾ ಲ್ಯಾಟಿನ ವರಿ ಗ್ರಿಕ ವಾತೊಮಾ ಬರ್ದಲ ವ್ಹತ್ತು. ಫಳಿಪರ ಬರ್ದಲ ಘನ್ನಾ-ಘನ್ನಾ ಮನಕ್ಹೊ ಒದ್ಯಾ. ಕಾಕದ್ಯಾಮ ಯೆಸು ಶಿಲುಬಿಪರ ಘಾಲ್ಯಾತಾ ತೆ ಜ಼ಗಾ ಗಾಮನಾ ನಜಿಕ ವ್ಹತ್ತು. 21ಖಾಸ ಯಾಜಕೊ ಪಿಲಾತನನೆ ತೆ ಯಹುದಿಯೊನೊ ರಾಜ಼ೊ ವ್ಹೈ ಕೈನ ಬರ್ದೊ ನಕೊ. ತೆನೈಸೊ"ಎ ತಿನೆ ಯಹುದಿಯೊನೊ ರಾಜೊ಼ ಕೈನ ಕೈಲಿದ್ಯೊಸ "ಬರ್ದೊ. 22ಪಿಲಾತನ"ಮಿ ಬರ್ದಾಯಲ ಬದಲಿ ಕರಾನೆ ಥಾತು ನೈ ಕೈನ ಕದ್ಯಾ. 23ಸೈನಿಕೊ ಯೆಸುನೆ ಶಿಲುಬಿಪರ ಘಾಲ್ಯಲಪರ ತಿನಾ ವಣ್ಣಾ ಚಾರ ಭಾಗ ಕರಿನ ಯಕೆಕ್ಲೊ ಯಕೆಕ ಭಾಗ ವಾಟಿಲಿದ್ಯಾ. ತ್ಯಾಂತಾ ತೆನೈಸೊ ತಿನು ಮ್ಹೈನು ಅಂಗ್ಡುಬಿ ಕಾಡಿಲಿದ್ಯಾ. ತೆ ಹೊಲಗಿ ನೈಸೊ ಉಪ್ಪರತಾ ಶಿಯಲ ವ್ಹತ್ತು. 24ತಿನಾಹುತಿ ಸೈನಿಕೊ"ಅಪೆ ಅನೆ ಫಾಡಿನ ಪಾಲ ಕರು ನೈ. ಅಪೆ ಚಿಟಿ ಘಾಲಿನ ತೆ ಕಿನೆ ಆವಸ ದೆಕೆ" ಕೈನ ಬೊಲಿನ ಅಮ್ಮ ಕರ‍್ಯಾ" ತ್ಯುನೆ ಮಾರಾ ವಣ್ಣಾ ತ್ಯುನಾಮಾ ಪಾಲ ಕರಿಲಿದ್ಯಾ" ಮಾರಾ ಅಂಗ್ಡಾನಾ ಹುತಿ ಚಿಟಿ ಘಾಲ್ಯಾ" ಕಿರ್ತನೆ 22:18 ಕೈನ ಪವಿತ್ರ ಗ್ರಂಥಮಾ ಬರ್ದಲ ವಾತ ಅಮ್ಮ ಪುರಾ ಥೈ. 25ಯೆಸುನಿ ಯಾ, ಯಾನಿ ಭೆನ, ಕ್ಲೊಪನನಿ ಬೈಕೊ ಥಯಲ ಮರಿಯಳ ವರಿ ಮಗ್ದಲನಿ ಮರಿಯಳ ಶಿಲುಬಿ ಕನ ಹುಬ್ರಯಾತಾ. 26ಯೆಸು ತಿನಿ ಯಾನೆ ತ್ಯಾ ಹುಬ್ರಯಲ ತಿನಾ ಮಯಾನೊ ಶಿಷ್ಯಾನೆ ದೆಕಿನ ತಿನಿ ಯಾನೆ"ಯಾ ದೆಕ, ತಾರೊ ದಿಕ್ರೊ" ಕೈನ ಕದ್ಯೊ. 27ಪಾಚಲ್ತೊ ಯೆಸು ತೆ ಶಿಷ್ಯಾನೆ"ದೆಕ, ತಾರಿ ಯಾ" ಕದ್ಯೊ. ತೆ ದಿನ್ನತೊ ತೆ ಶಿಷ್ಯೊ ತಿನೆ ಬಲೈಲಿನ ಗೈನ ತಿನಾ ಘರಮಾ ಮ್ಹೆಲಿದ್ಯೊ.

ಯೆಸುನು ಮರಣ

28ಎ ಥಯಲ್ಪರ ಕ್ಹಾರು ಪುರಾ ಥಯು ಕೈನ ತಿಳ್ದಿಲಿನ ಪವಿತ್ರ ಗ್ರಂಥನಿ ವಾತ ಪುರಾ ಕರಾನಾ ಹುತಿ ತೆ"ಮನೆ ತರಕ್ಹ ಲಾಗಿಸ" ಕೈನ ಕದ್ಯೊ. 29ತ್ಯಾ ಖಾಟು ರಕ್ಹ ಭರಲ ಹಂಡೊ ವ್ಹತ್ತು. ಸೈನಿಕೊ ಸ್ಪಂಜ ಖಾಟಾ ರಕ್ಹಮಾ ಡುಬೈನ ಹಿಸ್ಸೊಪ್ ಕವಾನಾ ಝಾಡನಿ ಲಾಕ್ಡಿನೆ ಟಂಗೈನ ತಿನೆ ಉಪ್ಪರ ಉಚೈನ ಯೆಸುನಾ ಮ್ಹೊಡಾನೆ ಲಗಾಡ್ಯಾ. 30ಯೆಸು ಖಾಟು ರಕ್ಹನೆ ಸುರ್ಕಿನ"ಪುರಾ ಥಯು" ಕೈನ ಮಾತು ಜು಼ಕೈನ ಜ಼ಲಮ ಛೊಡ್ಯೊ.

ಯೆಸುನಾ ಪಾಕ್ಹಳಿಮಾ ಬರ್ಚಿ

31ತೆ ದಿನ್ನ ತಯ್ಯಾರಿನು ದಿನ್ನ ವ್ಹತ್ತು. ಮರ್ನಾ ದಿನ್ನೆ ಖಾಸ ಸಬ್ಬತ ದಿನ್ನ ವ್ಹತ್ತು. ಸಬ್ಬತ ದಿನ್ನೆ ಅಂಗೊ ಶಿಲುಬಿ ಪರ ಚಡಾನು ಯಹುದಿಯೊನೆ ಪಸಂದ ನ್ಹೊತು. ತಿನಾಹುತಿ ತ್ಯುನಾ ಪಗೊನೆ ತೊಡಿನ ಜಲ್ದಿ ಖಲಾಸ ಕರಾನು ಆಜ್ಞಾ ದಿವ ಕೈನ ತ್ಯುನೆ ಪಿಲಾತನ ಕನ ಮಾಂಗಿಲಿದ್ಯಾ. 32ತಿನಾಹುತಿ ಸೈನಿಕೊ ಐನ ಯೆಸುನಾ ಕ್ಹಾತೆ ಶಿಲುಬಿ ಪರ ಚ಼ಡಾಯಲ ಬೆ ಜ಼ನಾವೊನಾ ಪಗೊ ಭಾಗಿ ಪಾಡ್ಯಾ. 33ಪಾಚಾ಼ತಾ ತ್ಯುನೆ ಯೆಸುನಾ ನಜಿಕ ಆಯಲ ಪರ ತೆ ತೆಳಾಮಾಜ಼ ಮರ‍್ಯಲ ದೆಕಿನ ತಿನಾ ಪಗೊ ತೊಡ್ಯಾ ನೈ. 34ತೆನೈಸೊ ಸೈನಿಕೊಮಾನೊ ಯಕ್ಲೊ ತಿನಿ ಬರ್ಚಿಕ್ಹು ಯೆಸುನಾ ಪಾಖಳಿಮಾ ಚೊಟ್ಯೊ. ಪಾಖಳಿಮಾತು ರಗತ ವರಿ ಪಾನಿ ಭಾರು ಐಯು. 35ಎ ದೆಕಲವಾಲೊ ಇನಾಹುತಿ ಕದ್ಯೊಸ. ತುಮೆಬಿ ಬರೊಕ್ಹೊ ಕರು ಕೈನ ತೆ ತುಮೊನೆ ಎ ತಿಳ್ಸಾಯೊಸ. ತೆ ಕವಾನಿ ಸಂಗತಿಯೊ ಕ್ಹರಿಜ ವ್ಹೈ. ತೆ ಕವಾನು ಕ್ಹರಿ ವ್ಹೈ ಕೈನ ತಿನೆ ಗ್ವತ್ತ ಛೆ. 36ಪವಿತ್ರ ಗ್ರಂಥಮಾ ಬರ್ದಲ"ತಿನಾ ಹಡಕಾವೊಮಾ ಯಕ್ಕಬಿ ನೈ ತೊಡಸಕ್ತಾ" ಕವಾನಿ ವಾತ ಇಮ್ಮ ಪುರಾ ಥೈ. 37ಪವಿತ್ರ ಗ್ರಂಥನಾ ವರಿ ಯಕ್ಕ ಜ಼ಗಾ"ಮನಕ್ಹೊ ತ್ಯುನೆ ಬರ್ಚಿಕ್ಹು ಚೊಟೈ ಲಿದ್ಯಲಕ್ಹು ತಿನೆಜ ಡೊಳಾ ಫಾಡಿನ ದೆಕಸ" ಕೈನ ಬರ್ದಲ ಛೆ.

ಯೆಸುನು ಸಿದ್ಕಿ ಭಾಂದಾನು

38ಪಾಚಾ಼ತಾ, ಅರಿಮಥಾಯ ಗಾಮನೊ ಯೊಸೆಫ ಕವಾಲೊ ಯೆಸುನು ಅಂಗ ತಿನೆ ದೆ ಕೈನ ಪಿಲಾತನ ಕನ ಮಾಂಗಿಲಿದ್ಯೊ. ಯೊಸೆಫ ಯೆಸುನೊ ಯಕ್ಕ ಅನುಯಾಯಿ ವ್ಹತ್ತೊ. ತೆನೈಸೊ ತೆ ಯೆಹುದಿಯೊನಾ ಅದಿಕಾರಿಯೊನೆ ಭುಚಿ಼ಕಿನ ರ‍್ಹಯಲಕ್ಹು ತಿನಾ ಹುತಿ ಮನಕ್ಹೊನೆ ಕದ್ಯೊ ನ್ಹೊತೊ. ಯೆಸುನು ಅಂಗ ಲಿನ ಜಾ಼ವಾನೆ ಪಿಲಾತನ ತಿನೆ ಅಪ್ಪಣೆ ದಿದ್ಯೊ. ತಿನಾಹುತಿ ತೆ ಐನ ಯೆಸುನು ಅಂಗ ಲಿನ ಗಯೊ. 39ನಿಕೊದೆಮ ಯೊಸೆಫನಾ ಕ್ಹಾತೆ ಗಯೊ. ಪಾಚೊ಼ ಯಕ್ಕೆಮ, ರಾತೆ ಯೆಸು ಕನ ಐನ ತಿನಾ ಕ್ಹಾತೆ ಬೊಲಲವಾಲೊಜ ನಿಕೊದೆಮ ವ್ಹೈ. ತೆ ಮುವತ್ತ ಕಿಲೊ ತೆಕ್ಲು ಬಾಸನು ತೆಲ ಲಿನ ಆಯೊ. ತೆ ಬಾಸನು ತೆಲ ರಕ್ತಬೊಳ ವರಿ ಅಗರು ಮಳೈನ ಕರಲ ವ್ಹೈ. 40ಎ ಭಂಬಿ ಜ಼ನಾ ಯೆಸುನು ಅಂಗ ಲಿನ ತಿನೆ ಬಾಸನು ತೆಲ ಲಗಾಡಿನ ಖಾದಿನಾ ಫಡಕಾಕ್ಹು ಸುತ್ಯಾ. ಯಹುದ್ಯೊ ಪದ್ದತ ಲಿಂಗತಜ ಸಮಾದಿ ಕರಾನೆ ತಯ್ಯಾರ ಕರ‍್ಯಾ. 41ಯೆಸುನೆ ಶಿಲುವಿ ಪರ ಘಾಲ್ಯಲ ಜ಼ಗಾ ಯಕ್ಕ ಕ್ಹೆತರ ವ್ಹತ್ತು. ತೆ ಕ್ಹೆತರಮಾ ಯಕ್ಕ ನಯಿ ಮಜಾರ ವ್ಹತ್ತಿ. ತಿಮಾ ಕೆಳಾಮಾಜ ಕಿನೆ ಸಮಾದಿ ಕರ‍್ಯಾ ನ್ಹೊತಾ. 42ತೆ ಸಬ್ಬತನು ತಯ್ಯಾರನು ದಿನ್ನ ಶುಕ್ರಾರ ವ್ಹತ್ತು. ವರಿ ಸಮಾದಿ ಘನ್ನಿ ನಜಿಕ ವ್ಹತ್ತಿ. ತಿನಾಹುತಿ ತ್ಯುನೆ ಯೆಸುನೆ ತಿಮಾ ಮ್ಹೆಲ್ಯಾ.