Sikkiligar Bible
ಫಿಲಿಪ್ಪಿ 4
ಸುಚನೆ
ಇಮ್ಮ ರ‍್ಹತಾಮಾ ಮಾರಾ ಮಯಾನಾ ಭಾಯೊ ವರಿ ಮನೆ ಕ್ಹುಶಿಬಿ ಕಿರಿಟಬಿ ಥಯಲವಾಲಾ, ಮಿ ಕದಲನಿಂಗತ ಕರ್ತಾಮಾ ಘಟ್ಟ ಥೈನ ಹುಬ್ರಯೊ, ಮಯಾನಾ ಭಾಯೊ,
ಪ್ರಭುಮಾ ಯಕ್ಕಜ಼ ಮನಸವಾಲಾ ಥೈನ ಮಿ ಯುವೊದ್ಯಳನೆ ವರಿ ಸಂತುಕೆನೆ ಸಮಾಧಾನಕ್ಹು ಮಾಂಗಿಲ್ಯುಸ. ಮಾರಾ ಕ್ಹರಿನಾ ಕ್ಹಾತೆ ರ‍್ಹಯಲ ಸೆವಕ, ತೆ ಹೆಣ್ಣ ಮನಕ್ಹೊನೆ ಮದತ ಕರಾಲೊ ಥೌ ಕೈನ ಮಿ ತುಕನ ಮಾಂಗಿಲ್ಯುಸ. ತ್ಯುನೆ ಕ್ಲೆಮೆನ್ಸ್ ವರಿ ಮರಾ ಕ್ಹಾತೆ ರ‍್ಹಯಲ ಸೆವಕೊ ಮಾರಾ ಕ್ಹಾತೆ ಸುವಾರ್ತೆನಾಹುತಿ ಕೊಶಿಶ ಕರ‍್ಯಾ. ತ್ಯುನಾ ನಾಮೊ ಜಿವಭಾದ್ಯ ಬುಕ್ಕಮ್ಮಾ ಬರ್ದಲ ಛೆ.
ಹಮೆಶಾಬಿ ಪ್ರಭುಮಾ ಖುಶಿ ಕರೊ ಖುಶಿ ಕರೊ ಕೈನ ವರಿ ಕೌಸ.
ತುಮಾರು ಮೃದು ಸ್ವಭಾವ ಮರಗಾ ಕ್ಹಾರಾ ಮನಕ್ಹೊನೆ ಗ್ವತ್ತ ಥಾವಾದೆ, ಪ್ರಭು ಭೆಗಿನ ಆವಸ. ಕಯಾಜ ಸಂಬಂಧನಾಹುತಿ ಚಿಂತಾ ಕರ‍್ಯಾವಾಚಿ಼ ಹರಿಯಕ್ಕ ವಿಷಯಮಾ ಕ್ಹುದಾನಾ ಕ್ಹಾಮಾ ಕೃತಜ್ಞತಾ ಸ್ತುತಿ ಪ್ರಾರ್ಥನಾ ಕರ್ತಾಮಾತುಮೊನೆ ಚಾ಼ಯೆ ಥಯಲ ಕ್ಹುದಾಕನ ಮಾಂಗಿಲಿವೊ. ತೆಳಾಮಾ ಹರಿಯಕ್ಕ ತಿಳವಳಕಿನೆ ಮಿರಾನಿ ದಿವ್ಯಶಾಂತಿ ತುಮಾರಾ ಮನಸೊನೆ, ವಿಚಾ಼ರೊನೆ ಕ್ರಿಸ್ತ ಯೆಸುಮಾ ವಚ಼ಾಡಸ.
ಲಾಸ್ಟಮಾ, ಭಾಯೊ ಭೆನೊ ಕಯು ಕ್ಹರಿ ವ್ಹೈ ಕಯು ಚೊ಼ಕು ವ್ಹೈ ನ್ಯಾಯ ವ್ಹೈ,ಶುದ್ಧ ವ್ಹೈ ಮಯಾನಾ ಕಾಬಿಲ ವ್ಹೈ ಕಯು ಚೊ಼ಕು ದಿಕ್ಹಸ ಕಯಾ ಚೊ಼ಕಿಯೊ ಚಾಳಿಯೊ ವ್ಹೈ ವರಿ ಕಯು ಮರ್ಯಾದಿನೆ ಕಾಬಿಲ ವ್ಹೈ, ತೆ ಕ್ಹಾರಾವೊನಾಹುತಿ ಚಿಂತಾಕರಾಲಾ ಥಾವೊ. ತುಮೆ ಮಾರಾಕ್ಹು ಶಿಕ್ಕಲ ಕ್ಹಾರು. ಹೊಂದಿಲಿದಲ ವರಿ ಸು ಮಾರಾಮಾ ಐಕಿನ ದೆಕಲ ತೆಜ಼ ಕರ್ತಾ ಆವೊ. ಅಮ್ಮ ಕರ‍್ಯಾರೆ ಶಾಂತಿ ರ‍್ಹಯಲ ಕ್ಹುದಾ ತುಮಾರಾ ಕ್ಹಾತೆ ರ‍್ಹವಸ.
ಮಾರಾ ವಿಷಯಮಾ ತುಮೊನೆ ರ‍್ಹವಾನಿ ಕಾಳಜಿ಼ನೆ ಅಕ್ಲಾ ದಿನ್ನ ಥಯಲ್ಪರ ವರಿ ಚಿ಼ಗರಲಕ್ಹು ಮಿ ಕರ್ತಾಮಾ ಹಚ್ಕಿ಼ ಕುಶಿ ಥೌಸ. ಹೈ ವಿಚಾ಼ರ ತುಮಾರಾಮಾ ಪೈಲಾಜ಼ ರ್ಹೈತಬಿ, ಮದತ ಕರಾನೆ ಕರೆಟ್ಟ ಟೈಮ ಆಯೊ ನ್ಹೊತೊ. ಮನೆ ಚ಼ಾಯೆ ಥಯಲ ಮಿ ಎ ಕವಾಡೊ ನತ್ತಿ, ಮಿತೊ ರ‍್ಹಯಲ ಸ್ಥಿತಿಮಾಜ಼ ತೃಪ್ತಿ ಥಾವಾನು ಸಿಕ್ಕಿಲಿದ್ಯೊಸ. ಗರಿಬ ರ‍್ಹತಾಮಾ ಸಮೃದ್ದಿ ರ‍್ಹತಾಮಾ. ಮಿ ತೃಪ್ತಿಮಾ ರ‍್ಹತಾಮಾ, ಭುಕ್ಕೊ ರ್ಹೈತಬಿ, ಸಮೃದಿವಾಲೊ ರ್ಹೈತಬಿ, ಕೊರತೆವಾಲೊ ರ್ಹೈತಬಿ ಕಯಿ ತರಾನಿ ಸ್ಥಿತಿಮಾ ರ‍್ಹವಾಲೊ ರ್ಹೈತಬಿ ತಿನು ಗುಟ್ಟ ಮನೆಜ಼ ಗೊತ್ತ ಛೆ. ಮನೆ ತಾಕತ ದಿವಾಲಾನಾ ಮುಕಾಂತರ ಮಿ ಕ್ಹಾರುಜ಼ ಕರಾನೆ ತಾಕತವಾಲೊ ಥಯೊಸ.
ಇಮ್ಮ ರ‍್ಹತಾಮಾ ತುಮೆ ಮಾರಾ ತ್ರಾಸಮಾ ಕ್ಹಾತೆ ರ‍್ಯಲ ಚ಼ೊಕು ಥಯು. ಪಿಲಿಪ್ಪಿವಾಲಾವೊನೆ, ಮಿ ಶುರವಾತಮಾ ತುಮಾರಾಮಾ ಸುವಾರ್ತೆ ಕೈನ ಮೆಕೆದೊನ್ಯತೊ ಗಯಲ್ಪರ ದಿವಾನಾ, ಲಿವಾನಾ ವಿಷಯಮಾ ತುಮೊನೆ ಛೊಡಿನ ಬಿಜಾ಼ ಕಯಾಜ಼ ಸಬೆ ಮನೆ ಮದತ ಕರ‍್ಯಾ ನೈ ಕವಾನು ತುಮೊನೆ ಗೊತ್ತ ಛೆ. ಮಿ ಥಸಲೊನೊಕಮಾ ರ‍್ಹತಾಮಾ ತುಮೆ ಬೆ ತನ್ನ ಸಲಾ ಮಾರಿ ಕೊರತೆ ಪೂರಾ ಥಾವಾನಾಹುತಿ ಮದತ ಕರಾನೆ ವಳಾಯಾಸತೊ. ಮಿ ತುಮೊಕ್ಹು ದಾನ ಲಿವು ಕೈನ ಮಾರಿ ಆಸ ನ್ಹವೈ. ತುಮಾರೊ ದಾಖಲೊ ಅಬಿವೃದ್ದಿ ಥಾವಾನೆಜ಼ ಆಸ ಕರಸ. ಚಾ಼ಯೆ ಥಯಲ ಕ್ಹಾರು ಮನೆ ಛೆ. ಸಮೃದಿ ಹೊಂದಿಲಿದ್ಯೊಸ. ಎಪೆಫ್ರೊದಿತನಾ ಹತ್ತಕ್ಹು ತುಮೆ ದಿನ ವಳಾಯಲ ಮನೆ ಮುಟ್ತಾಮಾ ಮಿ ಫುಲ್ಲ ಭರಿನ ಜಾ಼ವಾಲೊ ಥಯೊಸ. ತೆ ಕ್ಹುದಾನೆ ಮೆಚ್ಚಿ಼ಕೆ ಥಯಲ ವ್ಹೈ, ಚ಼ೊಕಿ ಬಾಸಬಿ ಪಸಂದ ಥೈಸ. ಮಾರೊ ಕ್ಹುದಾ ಕ್ರಿಸ್ತ ಯೆಸುನಾ ಮುಲಕ ತಿನಿ ಪ್ರಭಾವನೆ ಸೌಕಾರತನಾ ತಾರಿ ಹರಯಕ್ಕ ಕೊರತೆನೆ ನಿಗಸಸ. ಅಪ್ನೊ ಬಾ ಥಯಲ ಕ್ಹುದಾನೆ ಹಮೆಶಾಬಿ "ಮಹಿಮಾ "ಥಾವಾದೆ ಆಮೆನ.
ನಮಸ್ಕಾರ
ಕ್ರಿಸ್ತ ಯೆಸುಮಾ ಹರಯಕ್ಲೊ ಭಕ್ತೊನೆ ಮಾರಿ ನಮಸ್ಕಾರ ಕವೊ. ಮಾರಾ ಕ್ಹಾತೆರ‍್ಹಯಲ ಭಾಯೊ ತುನೆ ನಮಸ್ಕಾರ ಕರಸ. ನ್ಹ್ಯಾ ರ‍್ಹವಾನಾ ಕ್ಹುದಾನಾ ಮನಕ್ಹೊ ತುಮೊನೆ ನಮಸ್ಕಾರ ಕರಸ. ವಿಶೆಷಥೈನ ಕೈಸರನಾ ಮಹಲನೆ ಸೆರಲವಾಲಾ ತುಮೊನೆ ನಮಸ್ಕಾರ ಕರ‍್ಯಾಸ.
ಪ್ರಭು ಯೆಸು ಕ್ರಿಸ್ತನಿ ಮರ್ಗಾ ತುಮಾರಾ ಆತ್ಮಾನಾಕ್ಹಾತೆ ರ‍್ಹವಾದೆ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.