Sikkiligar Bible
ಮತ್ತಾಯ 22
ಹಿವಾನು ಔತಣನು ಸಾಮ್ಯ
(ಲುಕ 14:15-24)
ಯೆಸು ವರಿ ತ್ಯುನಾ ಕ್ಹಾತೆ ಬೊಲ್ತೊ ಸಾಮ್ಯ ಲಿನ ತ್ಯುನೊನೆ ಸು ಕದ್ಯೊ ಕದ್ಯಾಮ, ಸ್ವರ್ಗನೊ ರಾಜ್ಯ ತಿನಾ ದಿಕ್ರಾನಾ ಹಿವಾನು ಖಾವಾನು ಅನ್ನ ತಯ್ಯಾರ ಕರಲ ಯಕ್ಕ ರಾಜಾ಼ನೆ ಹೊಲಿಕೆ ಥೈಸ. ತೆ ಹಿವಾಮಾ ಆಯಲವಾಲಾವೊನೆ ಬಲಾವಾನಾಹುತಿ ತಿನಾ ಆಳೊನೆ ಮೊಕಲ್ಯೊ, ತೆಕ್ಲು ರ್ಹೈತಬಿ ತ್ಯುನೊನೆ ಆವಾನೆ ಮನಸ ನ್ಹೊತು.
ತೆ ರಾಜೊ಼ ಬಿಜಾ಼ ಆಳೊನೆ ಬಲೈನ, ತುಮೆ ಹಿವಾನು ಅನ್ನ ಖಾವಾನೆ ಆಯಲ ಮನಕ್ಹೊಕನ ಗೈನ ದೆಕೊ, ಖಾವಾನು ಅನ್ನ ತಯ್ಯಾರ ಥಯುಸ; ಮಾರಿಯೊ ಬೈಲೊ, ಚ಼ರಬಿಯೊ ರ್ಹಯಲ ಹೊರಿಯೊನೆ ಕತರ್ಯೊಸ; ಕ್ಹಾರುಜ಼ ತಯ್ಯಾರ ಛೆ; ಹಿವಾನು ಅನ್ನ ಖಾವಾನೆ ಆವೊ ಕೈನ ತ್ಯುನೊನೆ ಕವೊ ಕೈನ ಮೊಕಲ್ಯೊ. ವರಿಬಿ ತ್ಯುನೆ ಮಿ ಬಲಾಯಲನೆ ಠುಕರೈನ ಯಕ್ಲೊ ತಿನಾ ಖೆತ್ರೆ ಯಕ್ಲೊ ವ್ಯಾಪಾರ ಕರಾನಾಹುತಿ ಗೈ ಪಡ್ಯೊ. ಉಗ್ರಲವಾಲಾ ತಿನಾ ಆಳೊನೆ ಧರಿನ ಮರಿಯಾದಿ ಕಾಡಿನ ಖಲಾಸ ಕರಿಪಾಡ್ಯಾ. ರಾಜೊ಼ ಎ ಕ್ಹಾರು ಐಕಿನ, ತಿನಾ ಸೈನಿಕೊನೆ ಮೊಕ್ಲಿನ ಖಲಾಸ ಕರಲವಾಲಾವೊನೆ ತ್ಯುನೆ ಖಲಾಸ ಕರಿನ ತ್ಯುನು ಗಾಮ ಬಾಳಿಪಾಡ್ಯಾ.
ತೆಳಾಮಾ ತಿನಾ ಆಳೊನೆ, ಹಿವಾನು ಅನ್ನ ತಯ್ಯಾರ ಛೆ ತೆನೈಸೊ ತೆ ಅನ್ನ ಖಾವಾನೆ ತೆ ಮನಕ್ಹೊ ಯೊಗ್ಯ ನತ್ತಿ. ತಿನಾಹುತಿ ತುಮೆ ಹಮ್ನಾ ಖಾಸ ರ್ಹಯಲ ರಸ್ತೆ ಗೈನ ದಿಕ್ಹಲ ಕ್ಹಾರಾ ಮನಕ್ಹೊನೆ ಹಿವಾನು ಅನ್ನ ಖಾವಾನೆ ಬಲಾವೊ. ತಿನಾನಿಂಗತಜ಼ ಆಳೊ ಗೈನ ಕೆಟ್ಟ ರ್ಹೈನೆಕಾ ಚೊ಼ಕಾ ರ್ಹೈನೆಕಾ ಕಿನೆಜ಼ ದೆಕ್ಯಾವಾಚಿ. ಕ್ಹಾರಾವೊನೆ ಮಳೈನ ಕ್ಹಾರಾವೊನೆ ಬಲೈಲಾಯಾ. ಇನಾನಿಂಗತ ಹಿವಾನು ಘರ ಮನಕ್ಹೊಕ್ಹು ಭರಿಗಯು. ತೆಳಾಮಾ ರಾಜೊ಼ ಹಿವಾಮಾ ಆಯಲ ಮನಕ್ಹೊನೆ ದೆಕಾನಾಹುತಿ ಮ್ಹೈ ಆಯೊ, ಹಿವಾಮಾ ತಿನಾ ತಕ್ಕ ವಣ್ಣಾ ನೈ ಘಾಲ್ಲಿದಲ ಯಕ್ಕ ಮನಕ್ಹನೆ ರಾಜೊ಼ ದೆಕ್ಯೊ. ತಿನೆ ದೊಸ್ತ, ಹಿವಾನಾ ಚೊ಼ಕಾ ವಣ್ಣಾ ನೈಸೊ ತು ಕಿಮ್ಮ ಮ್ಹೈ ಆಯೊ? ಕೈನ ಪುಚ಼ತಾಮಾ ತೆ ಗಪ್ಪಜ಼ ವ್ಹತೊ. ತೆಳಾಮಾ ರಾಜೊ಼ ಆಳೊನೆ ಬಲೈನ, ತಿನಾ ಹತೊ ಪಗೊ ಭಾಂದಿನ ಭಾರಾ ಅಂದಾರಾಮಾ ನಾಕೊ ಕೈನ ಕದ್ಯೊ. ತ್ಯಾ ರವಾನು ಕಟ್ಟ ಕಟ್ಟ ದಾತೊ ಖಾವಾನು ರ್ಹವಸ. ಇಮ್ಮ ಬಲಾಯವಾಲಾವೊಮಾ ಘನ್ನಾ ಜ಼ನಾ, ಇನಿಲಿದಲವಾಲಾ ದಕ್ಹಾಜ಼ ಜ಼ನಾ ವ್ಹೈ.
ಭು ಭಾಡಾನಾಹುತಿ ಸವಾಲ ಕರಲ
(ಮಾರ್ಕ 12:13-37; ಲುಕ 20:20-44)
ತೆ ಥಯಲ್ಪರ ಫರಿಸಾಯರೊ ಗೈನ ಯೆಸುನೆ ವಾತೊಮಾ ಕಿಮ್ಮ ಧರಿಯೆ ಕೈನ ವಿಚಾರ ಕರತಾ ತಿಕನ ತ್ಯುನಾ ಶಿಷ್ಯಾವೊನೆ ಯಹುದಿಯೊನಾ ಕ್ಹಾತೆ ಮಳೈನ ಮೊಕಲ್ಯಾ. ತ್ಯುನೆ ಯೆಸುನೆ, ಗುರು, ತು ಕ್ಹರಿನೊ ವ್ಹೈ ಕ್ಹುದಾನಿ ವಾಟ ದೆಕಾಡಾಲೊ ವ್ಹೈ, ಕಿನೆಜ಼ ಭುಚ಼ಕ್ತೊ ನೈ; ತು ಮನಕ್ಹೊನಾ ಮ್ಹೊಡಾ ದೆಕಿನ ಬೊಲಾಲೊ ನ್ಹವೈ ಕೈನ ಹಮೊನೆ ಗ್ವತ್ತ ಛೆ. ಇಮ್ಮ ರ್ಹಯುಮ ಕೈಸರನೆ ಭು ಭಾಡೊ ದಿವಾನು ಪದ್ದತ ವ್ಹೈ ಸು? ತುನೆ ಕಿಮ್ಮ ದಿಕ್ಹಸ? ಹಮೊನೆ ಕೆ ಕೈನ ಕದ್ಯೊ. ಯೆಸು ತ್ಯುನೆ ಕವಾನು ಕ್ಹಾರು ಕೆಟ್ಟ ತಿಳದಿಲಿನ ಕಪಟಿಯೊ, ಮನೆ ಕಾ ಪರಿಕ್ಷಾ ಕರಾಡಾಸ? ಟ್ಯಾಕ್ಸನೆ ದಿವಾನೊ ಬಿಲ್ಲೊ ಮನೆ ದೆಕಾಡೊ ಕತಾಮಾ ತ್ಯುನೆ ತಿನೆ ಯಕ್ಕ ಬಿಲ್ಲೊ ಲೈನ ದಿದ್ಯಾ. ತೆಳಾಮಾ ತೆ, ಬಿಲ್ಲಾನೊ ಶಿಕ್ಕೊ ಕಿನೊ ವ್ಹೈ? ಕೈನ ಪುಚ಼ಲಕ್ಹು ತ್ಯುನೆ, ಕೈಸರನೊ ವ್ಹೈ ಕೈನ ಕದ್ಯಾ. ತೆಳಾಮಾ ತೆ ತ್ಯುನೊನೆ, ಕೈಸರನೆ ರ್ಹಯಲ ಕೈಸರನೆ ದಿವೊ; ಕ್ಹುದಾನು ರ್ಹಯಲ ಕ್ಹುದಾನೆ ದಿವೊ ಕೈನ ಕದ್ಯೊ. ತ್ಯುನೆ ಎ ವಾತೊ ಐಕಿನ ಘಾಬ್ರಾ ಥೈನ ತಿಕಂತಾ ಗೈಪಡ್ಯಾ.
ಪುನರುತ್ಥಾನನಾಹುತಿ ಸವಾಲ ಕರಲ
ತೆಜ಼ ದಿನ್ನಮಾ ಪುನರುತ್ಥಾನ ನತ್ತಿ ಕೈನ ಕವಾಲಾ ದಕ್ಹಾ ಸದ್ದು ಕಾಯರೊ ತಿಕನ ಆಯಾ. ಇವ್ನೆ ತಿನೆ, ಗುರು, ಯಕ್ಲೊ ಬಚ್ಚಾ಼ ನೈಸೊ ಮರ್ಯೊಮ ತಿನಿ ಬೈಕೊನೆ ತಿನೊ ನ್ಹಾನೊ ಭೈ ಹಿವಾ ಕರಿಲಿದ್ಯೊಮ ತಿನಾ ಮ್ಹೊಟಾ ಬೈನಾ ಬಚ್ಚಾ಼ ಪಡ್ದಿಲ್ಯು ಕೈನ ಮೊಶೆ ಕದ್ಯೊಸ. ತೆನೈಸೊ ಹಮೊಮಾ ಕ್ಹಾತ ಭಾಯೊ ವ್ಹತಾ. ಪೈಲಾನೊ ಹಿವಾ ಕರಿಲಿನ ಮರಿಗಯೊ. ತಿನೆ ಬಚ್ಚಾ಼ ನೈಸೊಕ್ಹು ಬೈಕೊನೆ ತಿನಾ ಭೈನೆ ಛೊಡಿನ ದಿದ್ಯೊ;
ತಿನಾನಿಂಗತಜ಼ ಬೆವಾವಾಲೊ ತನ್ವಾವಾಲೊ ತಿನಾನಿಂಗತಜ಼ ಕ್ಹಾತ್ವಾಲಕ್ಕಾ ಕರ್ಯಾ. ತ್ಯುನೆ ಕ್ಹಾರಾ ಮರಲ್ಪರ ತೆ ಬಾಕ್ಡಿಬಿ ಮರಿಗೈ. ತಿಮ್ಮ ರ್ಹಯುಮ ಪುನರುತ್ಥಾನಮಾ ತೆ ಕ್ಹಾತ ಜ಼ನಾವೊಮಾ ಕಿನಿ ಬೈಕೊ ಥೈನ ರ್ಹವಸ? ತೆ ಕ್ಹಾತೆ ಜ಼ನಾವೊನೆ ಹಿವಾ ಕರಿಲಿದಿಸ ಕೈನ ಪುಚ್ಯಾ.
ತೆ ವಾತೆ ಯೆಸು ತ್ಯುನೊನೆ, ತುಮೆ ಕ್ಹುದಾನಿ ವಾಕ್ಯಾ ವರಿ ಕ್ಹುದಾನಿ ತಾಕತನೆ ಕ್ಹರಿಮಾಜ಼ ನೈ ತಿಳದಿಲಿದ್ಯಾವಾಚಿ ತಪ್ಪ ಅಬಿಪ್ರಾಯಮಾ ಛೆ. ಪುನರುತ್ಥಾನ ಥಯಲ್ಪರ ಹಿವಾ ಕರಿಲೆತಾ ನೈ, ಹಿವಾ ಕರಿನ ದೆತಾಬಿ ನೈ; ಪರಲೊಕಮಾ ದೆವದುತೊ ನಿಂಗತ ರ್ಹವಸ. ಮರಲವಾಲಾವೊನಾಹುತಿ ಪುನರುತ್ಥಾನಾಹುತಿ ಕೌ ಕದ್ಯಾಮ, ಮಿ ಅಬ್ರಹಾಮನೊ ಕ್ಹುದಾ, ಇಸಾಕನು ಕ್ಹುದಾ, ಯಾಕೊಬನೊ ಕ್ಹುದಾ, ಕೈನ ಕ್ಹುದಾ ತುಮೊನೆ ಕದ್ಯೊಸ ಕೈನ ತುಮೆ ಒದ್ಯಾ ನತ್ತಿಸು? ತೆ ಮರಲವಾಲಾವೊನೆ ಕ್ಹುದಾ ನ್ಹವೈ. ತೆನೈಸೊ ಜಿವ್ತಾರ್ಹಯಲವಾಲಾವೊನೆ ಕ್ಹುದಾ ವ್ಹೈ ಕೈನ ಕದ್ಯೊ. ಮನಕ್ಹೊನು ಗುಂಪ ತೆ ಕ್ಹಾರು ಐಕಿನ ಘಾಬ್ರಾ ಥಯಾ.
ಕ್ಹಾಸ ರ್ಹಯಲ ಆಗನ್ಯಾ
ಯೆಸು ಸದ್ದುಕಾಯರೊನೆ ಮ್ಹೊಡುಜ಼ ಬಂದ ಕರಾಯೊಸ ಕೈನ ಫರಿಸಾಯರೊ ಐಕಿನ ತ್ಯಾ ಮಳಿನ ಆಯಾ. ತ್ಯುನೊಮಾನೊ ಯಕ್ಲೊ ಧರ್ಮ ಉಪದೆಶಕ ತಿನೆ ಪರಿಕ್ಷಾ ಲ್ಯು ಕೈನ, ಗುರು, ಧರ್ಮನಾ ನಿಯಮಮಾ ಕಯು ಆಗನ್ಯಾ ಖಾಸ ವ್ಹೈ ತಿನೆ ಪುಚ಼ಲಹುತಿ ಯೆಸು ತಿನೆ, ತಾರೊ ಕ್ಹುದಾ ಥಯಲ ಕರ್ತಾನೆ ತಾರಾ ಪುರಾ ಮನಸಕ್ಹು ತಾರಾ ಪುರಾ ಜ಼ಲಮಕ್ಹು ಮಯಾ ಕರು, ಕವಾನಿ ಆಗನ್ಯಾ ಖಾಸ ವ್ಹೈ ವರಿ ಪೈಲಾ ವ್ಹೈ. ಇನೆ ಸರಿ ಸಮಾನ ಬೆವಾ ಆಗನ್ಯಾ ಕೈ ವ್ಹೈ ಕದ್ಯಾಮ, ತಾರಾ ಆಜು಼ ಬಾಜು಼ವಾಲಾನೆ ಖುದ್ದನಾನಿಂಗತ ಮಯಾಕರು ಕವಾನುಜ಼ ವ್ಹೈ. ಎ ಬೆ ಅಗನ್ಯಾ ಕ್ಹಾರಾ ಧರ್ಮ ನಿಯೊಮೊನಾ ಪ್ರವಾದಿಯೊನಾ ಗ್ರಂಥೊನೆ ಆಧಾರ ಥೈನ ಛೆ.
ಮೆಸ್ಸಿಯಾನಾಹುತಿ ಸವಾಲ
ಫರಿಸಾಯರೊ ಮಳಿನ ಆಯಲಹುತಿ ಯೆಸು ತ್ಯುನೊನೆ, ಆವಾನೊ ರ್ಹಯಲ ಕ್ರಿಸ್ತಾನಾಹುತಿ ತುಮೊನೆ ಕಿಮ್ಮ ದಿಕ್ಹಸ? ತೆ ಕಿನೊ ದಿಕ್ರೊ ವ್ಹೈ? ಕೈನ ಪುಚ಼ಕ್ಹು
ತ್ಯುನೆ ತಿನೆ, ದಾವಿದನೊ ದಿಕ್ರೊ ವ್ಹೈ ಕೈನ ಕದ್ಯಾ.
ತೆ ವಾತೆ ತೆ, ತಿಮ್ಮ ರ್ಹಯುಮ ದಾವಿದಜ಼,
ಪವಿತ್ರ ಆತ್ಮಾನಿ ಪ್ರೆರಣಾಕ್ಹು ತಿನೆ ಕರ್ತಾ
ಕೈನ ಕದ್ಯೊಸ್ತೊ ಎ ಕಿಮ್ಮ ವ್ಹೈ?
ಮಿ ತಾರಾ ವಿರೊದಿಯೊನೆ ತಾರಾ ಪಗಮಾ
ಘಾಲೆಲಕ್ಕಾ ತು ಮಾರಾ ಶಿದಾ ಹತ್ತ ಬಗಲ ಬೈಟ,
ಕೈನ ಕರ್ತಾನೆ ಮಾರೊ ಮಾಲಕನೆ ಕದ್ಯೊ.
ಎ ವಾತಮಾ ದಾವಿದಜ಼ ತಿನೆ ಕರ್ತಾ ವ್ಹೈ ಕೈನ, ಕದಲ್ಪರ ತೆ ತಿನೊ ದಿಕ್ರೊ ಕಿಮ್ಮ ವ್ಹೈ? ಕದ್ಯೊ. ತೆ ವಾತೆ ಯಕ್ಲೊಬಿ ತಿನೆ ಯಕ್ಕ ವಾತಬಿ ಪುಚ್ಯಾವಾಚಿ ಗಯಾ. ತೆಳಾಮಾತಾ ತಿನೆ ಕುನ್ನಸ ಸುಜ಼ ಪುಚ಼ಾನೆ ಧೈರ್ಯ ಥೈ ನೈ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.