Skip to content
BibleKenya

Sikkiligar Bible

ಮತ್ತಾಯ 21

ಯೆಸು ರಾಜಾ಼ ಲಿಂಗತ ಯೆರುಸಲೆಮಮಾ ಪ್ರವೆಶ ಕರ‍ಲ

(ಮಾರ್ಕ 11:1-11; ಲುಕ 19:28-40; ಯೊಹಾನ 12:12-19)

ಯೆಸು ವರಿ ತಿನಾ ಶಿಷ್ಯಾ ಯೆರುಸಲೆಮನಾ ನಜಿಕ ಗೈನ ಒಲಿವ ತೆಲನಾ ಝಾಡೊನಾ ಡೊಂಗರನಾ ಬಾಜು಼ಮಾ ರ‍್ಹಯಲ ಬೆತ್ಫೆನೆ ಆಯಲ್ಪರ ಯೆಸು ಬೆ ಶಿಷ್ಯಾವೊನೆ ಬಲೈನ, ತುಮಾರಾ ಕ್ಹಾಮಾ ರ‍್ಹಯಲ ಖೆಡಾ ಗಾಮೊನೆ ಜಾ಼ವೊ; ಗಯಲ ಬರೊಬ್ಬರ ತ್ಯಾ ಭಾಂದಲ ಗದ್ಡಾನೆ ತಿನಾ ಕ್ಹಾತೆ ರ‍್ಹಯಲ ಗದ್ಡಾನು ಬಚ಼್ಚು ದೆಕೊಶಿ; ತ್ಯುನೊನೆ ಛೊಡೈನ ಮಕನ ಲಿನ ಆವೊ. ಕುನ್ನತಬಿ ತುಮೊನೆ ಸುತಬಿ ಕದ್ಯಾಮ, ‘ಎ ಹಮಾರಾ ಪ್ರಭುನೆ ಚಾ಼ಯೆ ಥಯಾಸ’ ಕೈನ ತುಮೆ ಕವೊ; ತೆ ತೆಳಾಮಾಜ಼ ತ್ಯುನೊನೆ ಛೊಡಿನ ದಿವಸ ಕೈನ ವಳಾಯೊ.

ಪ್ರವಾದಿ ಕದಲ ವಾತ ಪುರಾ ಥಾವಾನಾಹುತಿ

ಇಮ್ಮ ಥಯು; ತೆ ಸುವೈ ಕದ್ಯಾಮ,

ಚಿಯೊನ ದಿಕ್ರಿ, ದೆಕ, ತಾರೊ ರಾಜೊ಼

ತುಕನ ಆವಾಡೊಸ; ತೆ ಚೊ಼ಕಿ ಗುಣಾ

ರ‍್ಹಯಲವಾಲೊ ಥೈನ ಗದ್ಡಾನೆ, ಹೊ ಗದ್ಡಾನಾ

ಬಚ್ಚಾ಼ಪರ ಚ಼ಡಿನ ಆವಾಡೊಸ ಕೈನ ಕವೊ ಕವಾನುಜ಼ ವ್ಹೈ.

ತೆಳಾಮಾ ಶಿಶ್ಯಾ ಗೈನ ಯೆಸು ತ್ಯುನೊನೆ ಅಪ್ಪಣೆ ದಿದಲ ತಿಮ್ಮ ಕರ‍್ಯಾ. ಗದ್ಡಾನೆ ವರಿ ತಿನಾ ಬಚ್ಚಾ಼ನೆ ಲಿನ ಐನ ತ್ಯುನಾ ಉಪ್ಪರ ತ್ಯುನಾ ವಣ್ಣಾ ಘಾಲಲ್ಪರ ಯೆಸು ಚ಼ಡಿನ ಬೈಟ್ಯೊ. ತೆಳಾಮಾ ಮನ್ಹೊನಾ ಗುಂಪಮಾ ಘನ್ನಾ ಜ಼ನಾ ತ್ಯುನಾ ವಣ್ಣಾ ವಾಟಮಾ ವಚ್ಚಾ಼ಯಾ ಬಿಜಾ಼ ದಕ್ಹಾಜ಼ನಾ ಝಾಡೊಕ್ಹು ಟೊಂಗಿಯೊ ವಾಟಮಾ ವಚ್ಚಾ಼ಯಾ. ತಿನಾ ಅಗಾ ಪಾಚಾ಼ ಜಾವಾಲಾ ಮನಕ್ಹೊ, ದಾವಿದನಾ ದಿಕ್ರಾ ಹೊಸನ್ನಾ! ಕರ್ತಾನಾ ನಾಮಪರ ಆವಾಲೊ ಧನ್ಯ ವ್ಹೈ! ಉಪ್ಪರಲ್ಯಾ ಲೊಕಮಾ ಹೊಸನ್ನಾ ಕೈನ ವದ್ರ್ಯಾ. ಯೆಸು ಯೆರುಸಲೆಮನಾ ಮ್ಹೈ ಜಾ಼ತಾಮಾ ಗಾಮಾ ಕ್ಹಾರಾ ಗದ್ದಲ ಥೈನ, ಆಂ ಕುನ್ನ ವ್ಹೈ? ಪುಚ್ಯಾ಼. ತೆನೈಸೊ ತೆ ಗುಂಪನಾ ಮನಕ್ಹೊ, ಎ ಗಲಿಲಾಯನೊ ನಜರೆತನೊ ಯೆಸು ವ್ಹೈ ಕೈನ ಕದ್ಯಾ.

ಯೆಸು ದೆವಾಲಯಮಾ ಗಯಲ

(ಮಾರ್ಕ 8:11-13; ಲುಕ 12:54-56)

ಪಾಚಾ಼ತೊ ಯೆಸು ದೆವಾಲಯಮಾ ಗೈನ ತಿಮಾ ಇಕ್ಕಾನು ಲಿವಾಲಾನೆಬಿ ಕ್ಹಾರಾವೊನೆ ಭಾರೊ ಘಾಲಿನ ದೊಕ್ಡಾ ಬದ್ಲಿ ಕರಾನು ಟೆಬಲ ಕ್ಹಬುತರನಾ ಪೆಟಗಿಯೊನೆ ಢಕ್ಲಿ ಪಾಡ್ಯೊ. ತೆ ತ್ಯುನೊನೆ, ‘ಮಾರು ಘರ ಪ್ರಾರ್ಥಾನು ಘರ ಥಯುಸ ಕೈನ ಬರದಲ ಛೆ; ತೆನೈಸೊ ತುಮೆ ತಿನೆ ಚೊ಼ಟ್ಟಾವೊನು ಘರ ಕರಾಡಾಸ ಕೈನ ಕದ್ಯೊ. ತೆಳಾಮಾ ತ್ಯಾ ರ‍್ಹಯಲ ಕುಡ್ಡಾ ಲಂಗ್ಡಾ ದೆವಾಲಯಮಾ ತೆ ಆತಾಮಾ ತ್ಯುನೊನೆ ಅರಾಮ ಕರ‍್ಯೊ. ತೆನೈಸೊ ಕ್ಹಾಸ ಯಾಜಕೊ ಶಾಸ್ರ್ತಿಯೊ ತೆ ಕರಲ ಆಶ್ಚರ್ಯ ಕಾಮೊ ದೆಕಿನ ವರಿ ದಾವಿದನಾ ದಿಕ್ರಾ ಹೊಸನ್ನ ಕೈನ ಪಟ್ಟಾ ವದ್ರಾನು ದೆಕಿನ ಶಿಟ್ಟ ಥಯಾ.

ತಿನೆ , ಅವ್ನೆ ಕವಾನು ಐಕಾಡ್ಯೊಸು ಕೈನ ಕತಾಮಾ ಯೆಸು, ಹಾ, ಐಕಾಡ್ಯೊಸ, ತೆನೈಸೊ ‘ ನ್ಹಾನಾ ಬಚ್ಚಾ಼ನಾ ಮ್ಹೊಡಾಕ್ಹು ದುದ್ದ ಪಿವಾನಾ ಬಚ್ಚಾ಼ನಾ ಮ್ಹೊಡಾಕ್ಹು ತು ಸ್ತೊತ್ರಾನೆ ತಯ್ಯಾರ ಕರಸಿ’ ಕವಾನು ತುಮೆ ಕೆಳಾಮಾಬಿ ಓದ್ಯಾವಸೆತೊ? ಕೈನ ಪುಚ್ಯೊ಼. ತೆಳಾಮಾ ತ್ಯುನೊನೆ ಛೊಡಿನ ಗಾಮತೊ ಗೈನ ಬೆಥನ್ಯಾನೆ ಐನ ತ್ಯಾ ರಾತೆ ಕ್ಹುರಯೊ.

ಯೆಸು ಉಂಬ್ರೊನಾ ಝಾಡನೆ ಕ್ಹರಾಪಲ

(ಮಾರ್ಕ 11:12-14)

ಪಾಟೆ ಯೆಸು ಗಾಮೆ ಗೈನ ಆತಾಮಾ ಭುಕ್ಕ ಲಾಗಿತಿ. ವಾಟಮಾ ಯಕ್ಕ ಅಂಜು಼ರನಾ ಝಾಡನೆ ದೆಕಿನ ತಿನಾ ಕ್ಹಾಮೊ ಗೈನ ತಿಮಾ ಕ್ಹಾಲಿ ಪಾಲೊ ರ‍್ಹವಾನು ದೆಕಿನ ತಿನೆ, ಅನಾಪರ ತಾರಾಮಾ ಕೆಳಾಮಾಜ ಫಲ ದಿಯುಜ಼ ನೈ ಕೈನ ಕದ್ಯೊ. ತೆ ಟೆಮಾ ತೆ ಅಂಜುರನು ಝಾಡ ಕ್ಹುಕ್ಹೈ ಗಯು. ಶಿಷ್ಯಾ ತೆ ದೆಕಿನ ಘಾಬ್ರಾ ಥೈನ, ಆ ಅಂಜುರನು ಝಾಡ ಯಕ್ಕಜ಼ ಟೆಮಾ ಕ್ಹುಕ್ಹೈ ಗಯುತೊ ಕೈನ ಘಾಬ್ರಾ ಥಯಾ. ತೆನೈಸೊ ಯೆಸು, ತುಮೊನೆ ಕ್ಹರಿಜ ಕೌಸ ತುಮೆ ಸಂಶೆಕರೆವಾಚಿ಼ ನಂಬ್ಯಾಮ ಆ ಅಂಜುರನು ಝಾಡನೆ ಕರಲ ನಿಂಗತ ತುಮೆಬಿ ಕರೊಶಿ ತೆನೈಸೊ ಎ ಡೊಂಗರನೆ ‘ ತು ಕಿತ್ತಿಲಿನ ಗೈನ ಸಮಂದರಮಾ ಪಡ’ ಕೈನ ಕದ್ಯಾಮ ತೆಬಿ ಥಾವಸ. ತುಮೆ ಭರೊಕ್ಹೊ ಕರಿನ ಪ್ರರ್ಥಾನಾಮಾ ಸುಸು ಮಾಂಗಿಲಿವೊಸಿ ತೆ ಕ್ಹಾರು ಹೊಂದಸ ಕೈನ ಕದ್ಯೊ.

ಯೆಸುನಿ ಅದಿಕಾರನಾಹುತಿ ಸವಾಲ ಕರ‍ಲ

(ಮಾರ್ಕ 11:27-33; ಲುಕ 20:1-8)

ತೆ ಥಯಲ್ಪರ ಯೆಸು ಯೆಸು ದೆವಾಲಯಮಾ ಐನ ಭೊದನೆ ಕರ್ತಾಮಾ ಖಾಸ ಯಾಜಕೊ ಮನಕ್ಹೊನಾ ಮ್ಹೊಟಾ ತಿಕನ ಐನ, ತುಮೆ ಕಯಾ ಅದಿಕಾರಕ್ಹು ಎ ಕ್ಹಾರು ಕರಾಡ್ಯೊಸ? ಆ ಅದಿಕಾರ ತುನೆ ದಿದಲವಾಲೊ ಕುನ್ನ ವ್ಹೈ? ಕೈನ ಪುಚ್ಯಾ. ಯೆಸು ತ್ಯುನೊನೆ ಕದಲ ಸುವೈ ಕದ್ಯಾಮ, ಮಿಬಿ ತುಮೊನೆ ಯಕ್ಕ ಪ್ರಶ್ನೆ ಪುಚ್ಚು಼ಸ; ತಿನೆ ತುಮೆ ಮನೆ ಉತ್ತರ ದಿದ್ಯಾಮ ತೆಳಾಮಾ ಮಿ ಕಯು ಅದಿಕಾರಕ್ಹು ಎ ಕರುಸ ಕೈನ ತುಮೊನೆ ಕೌಸ. ಬಾಪ್ತಿಸ್ಮಾ ದಿವಾನು ಅದಿಕಾರ ಯೊಹಾನನೆ ಕಿಜಾ಼ತು ಐಯುತು ಪರಲೊಕತು ನೈತೊ ಮನಕ್ಹೊಕ್ಹು? ಕದ್ಯೊ. ತೆಳಾಮಾ ತ್ಯುನೆ, ಪರಲೊಕತು ಐಯುಸ ಕೈನ ಹಮೆ ಕದ್ಯಾಮ, ‘ತಿಮ್ಮ ರ‍್ಹಯಾಮ ತುಮೆ ತಿನೆ ಕಾ ನಂಬ್ಯಾ ನತ್ತಿ’ ಕೈನ ಅಪೊನೆ ಪುಚ್ಚಸ; "ಮನಕ್ಹೊಕಂತು ಐಯುಸ ಕೈನ ಕದ್ಯಾಮ, ಅಪೊನೆ ಮನಕ್ಹೊನೊ ಭೆ ಛೆ. ಯೊಹಾನ ಪ್ರವಾದಿ ವ್ಹೈ ಕೈನ ಮನಕ್ಹೊ ವಪ್ಪಿಲಿದ್ಯಾಸ್ತೊ ಕೈನ ತ್ಯುನೊ ತ್ಯುನೊಮಾಜ಼ ಬೊಲ್ಲಿವಾಡ್ಯಾತಾ. ತೆ ಥಯಲ್ಪರ ತ್ಯುನೆ, ಹಮೊನೆ ಗ್ವತ್ತ ನತ್ತಿ ಕೈನ ಯೆಸುನೆ ಕದ್ಯಾ. ತೆಳಾಮಾ ಯೆಸು ತ್ಯುನೊನೆ ಕೈ ಅದಿಕಾರಕ್ಹು ಮಿ ಎ ಕ್ಹಾರು ಕರಾಡ್ಯೊಸ ಕೈನ ಮಿಬಿ ತುಮೊನೆ ನೈ ಕತೊ.

ಬೆ ದಿಕ್ರಾವೊನಿ ಸಾಮ್ಯ

ತೆನೈಸೊ ತುಮೊನೆ ಕಿಮ್ಮ ದಿಕ್ಹಸ? ಯಕ್ಕ ಮನಕ್ಹನೆ ಬೆ ಬಚ್ಚಾ಼ ವ್ಹತಾ. ತೆ ಪಸ್ಟಲ್ಯಾ ಬಚ್ಚಾ಼ ಕೈನ ಐನ, ದಿಕ್ರಾ ತು ಆಜ಼ನಾ ದಿನ್ನೆ ಗೈನ ದ್ರಾಕ್ಷಿಯೊನಾ ಮಳಾಮಾ ಕಾಮ ಕರ, ಕೈನ ಕತಾಮಾ ತೆಳಾಮಾ ತೆ ಪಟ್ಟೊ, , ಮಿನೈ ಜಾ಼ತೊ ಕೈನ ಕದ್ಯೊತುಬಿ ವರಿ ತಿನು ಮನಸ ಬದಲಿ ಕರ್ಲಿನ ಮಳಾಮಾ ಗಯೊ. ತೆಳಾಮಾ ತಿನಾ ಬಿಜೆಕ್ಲಾ ದಿಕ್ರಾಕನ ಐನ ತೆಜ಼ ವಾತ ಕತಾಮಾ, ಬಾ ಮಿ ಜೌ಼ಸ, ಕೈನ ಕದ್ಯೊತುಬಿ ಗಯೊಜ಼ ನೈ. ಎ ಭಂಬಿ ಜ಼ನಾವೊಮಾ ಬಾಪನಿ ವಾತನೆ ಕುನ್ನ ವಿಧೆಯ ಥಯು? ಕೈನ ಪುಚ್ತಾ಼ಮಾ ತ್ಯುನೆ ಪಸ್ಟಲ್ಯೊ ಕೈನ ಕದ್ಯಾ. ತೆಳಾಮಾ ಯೆಸು ತ್ಯುನೊನೆ ಸುಂಕವಾಲಾ, ವೈಭಿಚಾರ ಕರಾಲಿಯೊ ತುಮೊತಿ ಪೈಲಾ ಕ್ಹುದಾನಿ ರಾಜ್ಯಮಾ ಜಾ಼ವಸ ಕೈನ ತುಮೊನೆ ಕ್ಹರಿಮಾಜ಼ ಕೌಸ. ಕಾ ಕದ್ಯಾಮ ಯೊಹಾನ ಕ್ಹರಿನಿ ವಾಟ ದೆಕಾಡಾಲೊ ಥೈನ ತುಮೊಕನ ಆಯೊ. ತುಮೆ ತಿನೆ ನಂಬ್ಯಾ ನೈ. ಸುಂಕವಾಲಾ ವರಿ ವೈಭಿಚಾರ ಕರಾಲಿಯೊ ತಿನೆ ನಂಬಿಯೊ; ತುಮೆ ಎ ಕ್ಹಾರು ದೆಕ್ಯಾತಬಿ ಪಶ್ಚಾತಾಪ ಪಡ್ಯಾ ನೈ, ತಿಪರ ಬರೊಕ್ಹೊ ಕರ‍್ಯಾ ನೈ.

ದ್ರಾಕ್ಷಿಯೊನಾ ಮಳಾನೆ ವತ್ತಿ ಲಿದಲವಾಲಾವೊನಿ ಸಾಮ್ಯ

(ಮಾರ್ಕ 12:1-12; ಲುಕ 20:9-19)

ಬಿಜಿ಼ ಸಾಮ್ಯ ಐಕೊ, ಯಕ್ಕ ಘರ್ನೊ ಮಾಲಕ ವ್ಹತ್ತೊ. ತಿನೊ ಯಕ್ಕ ದ್ರಾಕ್ಷಿಯೊನೊ ಮಳೊ ವ್ಹತೊ. ತಿನಾ ಸುತ್ತೆ ಬೆಲಿ ಭಾಂದಿನ, ತಿಮಾ ದ್ರಾಕ್ಷಯೊನೊ ಘಾಣೊ ಘಾಲಿನ, ಕೈದಾನು ಝೊಪ್ಡು ಭಾಂದಿನ, ತೆ ದ್ರಾಕ್ಷಯೊನೊ ಮಳೊ ಬಿಜಾ಼ವೊನೆ ವತ್ತಿ ಘಾಲಿನ ತೆ ಬಿಜಾ಼ ದೆಶೆ ಗಯೊ. ಫಲ್ಲ ದಿವಾನೊ ಟೈಮ ನಜಿಕ ಆತಾಮಾ ತೆ ಮಳಾನೊ ಮಾಲಕ ತಿನೊ ವಾಟೊ ಲಿವಾನಾ ಹುತಿ ತೆ ವತ್ತಿ ಘಲ್ಲಿದಲವಾಲಾವೊಕನ ತಿನಾ ಆಳೊನೆ ಮೊಕಲ್ತಾಮಾ, ತೆ ವತ್ತಿ ಘಾಲ್ಲಿದಲವಾಲಾ ತೆ ಮೊಕ್ಲಲ ಆಳೊಮಾನಾ ಯಕ್ಲಾನೆ ಮಾರ‍್ಯಾ, ಯಕ್ಲಾನೆ ಕತ್ರಿಪಾಡ್ಯಾ, ಯಕ್ಲಾನೆ ದಗ್ಡಾ ಮಾರಿನ ಖಲಾಸ ಕರಿಪಾಡ್ಯಾ. ತೆ ಮಾಲಕ ವರಿಯಕ್ಕೆಬ ಹಜು಼ನ ಘನ್ನಾ ಜ಼ನಾವೊನೆ ಮೊಕಲ್ತಾಮಾ ತ್ಯುನೆ ತ್ಯುನೊನೆಬಿ ತಿಮ್ಮಜ಼ ಕರಿಪಾಡ್ಯಾ. ಲಾಸ್ಟಮಾ ತಿನಾ ದಿಕ್ರಾನೆತಬಿ ಮೊಕಲ್ಯೊಮ ತಿನೆತಬಿ ಮರಯಾದಿ ದಿವಸ ಕೈನ ತಿನಾ ದಿಕ್ರಾನೆ ಮೊಕಲ್ಯೊ. ತೆನೈಸೊ ತೆ ಮಳೊ ವತ್ತಿ ಘಾಲ್ಲಿದವಾಲಾ ತಿನಾ ದಿಕ್ರಾನೆ ದೆಕಿನ, ಎಜ಼ ಉತ್ತರಾಧಿಕಾರಿ ವ್ಹೈ ಕೈನ, ಆವೊ ಇನೆಜ಼ ಖಲಾಸ ಕರಿಪಾಡಿಯೆ, ಇನೊ ರ‍್ಹಯಲ ಕ್ಹಾರುಜ಼ ಅಪೆ ಲಿಪಾಡಿಯೆ. ಕೈನ ತ್ಯುನೊ ತ್ಯುನೊಮಾಜ಼ ಬೊಲ್ಲಿದ್ಯಾ. ತಿನೆ ದ್ರಾಕ್ಷಿಯೊನಾ ಮಳಾಮಾತಾ ಢಕ್ಲಿನ ಕಲಾಸ ಕರಿಪಾಡ್ಯಾ. ತಿಮ ರ‍್ಹಯುಮ ದ್ರಾಕ್ಷಿಯೊನೊ ಮಳಾನಾ ಮಾಲಕ ಆತಾಮಾ ತೆ ವತ್ತಿ ಘಾಲ್ಲಿದಲವಾಲಾವೊನೆ ಸು? ಕರಸ. ಕದ್ಯೊ. ತ್ಯುನೆ ತಿನೆ, ತೆ ಕೆಟ್ಟವಾಲಾವೊನೆ ವರಿ ಕ್ರುರ ತನಾಕ್ಹು ಖಲಾಸ ಕರಿನ ಕರೆಟ್ಟ ಟೈಮ್ಮಾ ಫಲ್ಲಮಾ ವಾಟೊ ದಿವಾಲಾನೆ ಬಿಜಾ಼ ವತ್ತಿವಾಲಾವೊನೆ ತೆ ಮಳೊ ವತ್ತಿ ಘಾಲಸ ಕೈನ ಕದ್ಯಾ.

ಯೆಸು ತ್ಯುನೊನೆ, ಘರ ಭಾಂದಾಲಾ

ನಕೊ ಕೈನ ಠುಕ್ರಾಯಲ ದಗ್ಡೊಜ಼ ಖಾಸ

ಮುಲಾನೊ ದಗ್ಡೊ ಥಯೊ; ಎ ಕರ್ತಾಕ್ಹುಜ಼ ಥಯು.

ವರಿ ತೆ ಕ್ಹಾರು ಅಪ್ನಾ ಡೊಳಾನೆ ಆಶ್ಚರ್ಯನಿಂಗತ

ದಿಕ್ಹಸ ಕವಾನು ತುಮೆ ಧರ್ಮಶಾಸ್ತ್ರಮಾ ಕೆಳಾಮಾಬಿ ಒದ್ಯಾ ನತ್ತಿ ಸು?

ತಿನಾ ಹುತಿ ಕ್ಹುದಾನು ರಾಜ್ಯ ತುಮೊಮಾತು ಕಾಡಿನ ತಿನೆ ಫಲ್ಲ ದಿವಾಲಾ ಮನಕ್ಹೊನೆ ದಿವಸ. ಎದಗ್ಡಾಪರ ಪಡಾಲೊ ತುಕ್ಡಾ ತುಕ್ಡಾ ಥಾವಸ; ಎ ದಗ್ಡೊ ಕಿಪರ ಪಡಸ ತೆ ತ್ಯುನೊನೆ ಪುಡಿ ಪುಡಿ ಕರಸ. ಕೈನ ಕದ್ಯೊ. ಖಾಸ ಯಾಜಕೊ ಫರಿಸಾಯರೊ ತೆ ಕದಲ ಸಾಮ್ಯ ಐಕಿನ ತ್ಯುನಾಹುತಿಜ಼ ಕವಾಡ್ಯೊಸ ಕೈನ ತಿಳದಿಲಿನ ಯೆಸುನೆ ಬಂದಿ ಕರಾನಾ ಹುತಿ ಟೈಮ ದೆಕಾಡ್ಯಾತಾ. ತೆನೈಸೊ ತ್ಯುನೆ ತಿನೆ ಬಂದಿ ಕರಾನಾಹುತಿ ಕೊಶಿಶ ಕರ‍್ಯಾತುಬಿ ಮನಕ್ಹೊ ತಿನೆ ಪ್ರವಾದಿ ವ್ಹೈ ಕೈನ ತಿಳದಿಲಿದಲ ಹುತಿ ಮನಕ್ಹೊನಾಹುತಿ ಭುಚಕ್ಯಾ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.