Sikkiligar Bible
ಯೆಹುಶು 3
ಇಸ್ರೆಲನಾ ಮನಕ್ಹೊ ಯೊರ್ದನ ನದಿ ದಾಟಲ
ಯೆಹೊಶುವಾ ಪಾಟೆ ಉಟ್ಯೊ; ತೆ ಇಸ್ರಾಯಲೊ ಕ್ಹಾರಾ ಶಿಟ್ಟಿಮ ಛೊಡಿನ ಯೊರ್ದನನೆ ಐನ ತೆ ದಾಟಾತಿ ಪೈಲಾಜ ತ್ಯಾ ಉತ್ರ್ಯಾ. ತನ್ನ ದಿನಪರ ಜನಾದಿಪತಿಯೊ ಪಾಳೆನಾ ಕ್ಹಾರಾ ಜ಼ಗಾಯೆ ಗೈನ ಮನಕ್ಹೊನೆ ಯಾಜಕ ರ್ಹಯೆಲ ಲೆವಿಯೊ ತುಮಾರೊ ಕ್ಹುದಾ ರ್ಹಯೆಲ ಯಹೊವಾನಾ ಒಡಂಬಡಿಕೆನಾ ಮಂಜುಷ ಉಚೈಲಿದಲ ದೆಕೆಲ್ಪರ ತುಮೆ ತುಮಾರಿ ಜ಼ಗಾ ಛೊಡಿನ ತಿನಾ ಪಾಚಾ ಜಾವೊ. ತೆಳಾಮಾ ತುಮೊನೆ ವರಿ ಮಂಜುಷನೆ ಬೆ ಹಜಾರ ಉಂಡು ದುರ ರ್ಹವೊ; ಕ್ಹಾಮಾ ಜೌನೈ.ಅಮ್ಮಜ ತುಮೆ ಗಯಲ ವಾಟ ತುಮೊನೆ ಗೊತ್ತ ಥಾವಸ; ತೆ ವಾಟಮಾ ತುಮೆ ಪೈಲಾಜ ಕಾ ಆಯಾ ನೈ ಕೈನ ಕದ್ಯಾ. ತೆ ನೈಸೊ ಯೆಹೊಶುವಾ ಮನಕ್ಹೊನೆ ತುಮೊನೆ ಶುದ್ದ ಕರಲಿವೊ; ಯಹೊವಾ ವಂತಾ ತುಮಾರಾ ವಚ್ಮಾ ಅಬ್ದುತವೊ ಕರಸ ಕೈನ ಕದ್ಯೊ. ವರಿ ಯಾಜಕೊನೆ ಒಡಂಬಡಿಕೆನಾ ಮಂಜುಷನೆ ಉಚೈಲಿನ ಮನಕ್ಹೊನಾ ಕ್ಹಾಮಾ ಚಾಲಿನ ತಳು ದಾಟೊ ಕೈನ ಆಜ್ಞೆಕರಿನ ತ್ಯುನೆ ತೆ ಮಂಜುಷನೆ ಉಚೈಲಿನ ತ್ಯುನಾ ಕ್ಹಾಮಾತಾ ಗಯಾ. ತೆಳಾಮಾ ಯಹೊವಾ ಯೆಹುಶುವಾನೆ ಮಿ ಹಮ್ನಾತೊಜ ತುನೆ ಕ್ಹಾರಾ ಇಸ್ರಾಯೆಲನಾ ಕ್ಹಾಮೊ ಘನಪಡಸುಸ; ಮಿ ಮೊಶೆನಾ ಕ್ಹಾತೆ ರ್ಹಯೆಲ ನಿಂಗತ ತಾರಾ ಕ್ಹಾತೆಬಿ ರ್ಹವೊಸ ಕೈನ ತ್ಯುನೆನೆ ಗೊತ್ತ ಥಾವಾಸ. ಒಡಂಬಡಿಕೆನಾ ಮಂಜುಷನೆ ಉಚೈಲಿದಲ ಯಾಜಕರೊ ಯೊರ್ದನ ತಳಾನಾ ಅಂಚೆನೆ ಆಯಲ್ಪರ ತ್ಯಾಜ ಹುಬ್ರೆ ಕೈನ ಆಜ್ಞಾಕರಿನ ಕದ್ಯೊ. ತೆಳಾಮಾ ಯೆಹುಶುವಾ ಇಸ್ರಾಯಲೊನೆ ನ್ಯಾ ಐನ ತುಮಾರೊ ಕ್ಹುದಾ ಥಯಲ ಯಹೊವಾನಾ ವಾತೊ ಐಕೊ ಕೈನ ಚೈತನ್ಯ ಸ್ವರುಪ ಥಯಲ ಕ್ಹುದಾ ತುಮಾರಾ ವಚ್ಮಾ ರ್ಹವಸ ಕೈನ ತೆ ಕಾನಾನ್ಯರೊ, ಹಿತ್ತಿಯರೊ, ಹಿವ್ವಿಯರೊ, ಪೆರಿಜೀಯರೊ, ಗಿರ್ಗಾಷಿಯರೊ,ಅಮೊರಿಯರೊ, ಯೆಬುಸಿಯರೊ, ಆ ಕ್ಹಾರಾವೊನೆ ತುಮಾರಾ ಕ್ಹಾಮಾ ಚುಕೆವಾಚಿ ಭಾರಾ ಗಯೆವಾಚಿ ತುಮೊನೆ ಗೊತ್ತ ಥಾವಸ ಕಿಮ ಕದ್ಯಾರೆ ಸರ್ವ ಲೊಕನಾ ಒಡೆಯಾ ಒಡಂಬಡಿಕೆನಾ ಮಂಜುಷನೆ ತುಮಾರಾ ಕ್ಹಾಮಾ ಗೈನ ಯೊರ್ದನಮಾ ಉತ್ರಾನು. ತುಮೆ ಥೈತಬಿ ಇಸ್ರಾಯೆಲ ಜಾತಾ ಜಾತೆ ಯಕ್ಲಾ ನಿಂಗತ ಬಾರಾ ಜನಾವೊನೆ ಇನಿಲಿವೊ. ಸರ್ವಲೊಕನಾ ಒಡೆಯಾ ಥಯಲ ಯಹೊವಾನಾ ಒಡಂಬಡಿಕೆನಾ ಮಂಜುಷನೆ ಉಚೈಲಿವಾಲಾ ಯಾಜಕೊ ತ್ಯುನಾ ಪಗೊನೆ ಯೊರ್ದಾನಾ ತಳಾನಾ ಪಾನಿಮಾ ಮ್ಹೆಲ್ತಾಮಾ ಉಪ್ಪರತು ಆವಾನು ಪಾನಿ ಕ್ಹಾಮು ಗಯೆವಾಚಿ ತ್ಯಾಜ ರಾಶಿ ಥೈನ ಹುಬ್ರೆಯೊಸ ಕೈನ ತಿಳಸ್ಯೊ. ಮನಕ್ಹೊ ಯೊರ್ದಾನ ತಳು ದಾಟಾನಾಹುತಿ ತ್ಯುನಾ ಡೆರೊ ಕಿತ್ತಿಲಿನ ಗೈ ಪಡ್ಯಾ.ಒಡಂಬಡಿಕೆನಾ ಮಂಜುಷನೆ ಉಚಾಯೆಲ ಯಾಜಕೊ ತ್ಯುನಾ ಕ್ಹಾಮಾ ವ್ಹತ್ತಾ. ಮಂಜುಷ ಉಚೈಲಿದಲ ಯಾಜಕೊ ಯೊರ್ದನೆ ಐನ ಪಾನಿಮಾ ತ್ಯುನಾ ಪಗೊನೆ ಅದ್ದುತಲೆ ಸುಗ್ಗಿನಾ ದಿನೊಮಾ ದಡಮಿರಿ ವ್ಹೈನ ಜಾವಾನು ಯೊರ್ದನ ತಳಾನು ಪಾನಿ ಹುಬ್ರೈ ಗಯು. ಉಪ್ಪರತು ಆವಾನು ಪಾನಿ ಘನ್ನು ದುರ ರ್ಹಯಲ ಚಾರೆತಾನಿನಾ ಕ್ಹಾಮು ರ್ಹವಾನು ಆದಾಮನಾ ಗಾಮಲಕ್ಕಾ ರಾಶಿ ಥೈನ ಹುಬ್ರಯುತು.ಹೆಟು ರ್ಹಯಲ ಪಾನಿ ಅರಾಬಾ ಕ್ಹಾಡಿಮಾ ರ್ಹವಾನು ಲವಣ ಸಮಂದರನೆ ವ್ಹೈನ ಗಯು. ಮನಕ್ಹೊ ಯರಿಕೊನಾ ಕ್ಹಾಮಾ ತಳು ದಾಟ್ಯಾ. ಯಹೊವಾನಾ ಒಡಂಬಡಿಕೆನಾ ಮಂಜುಷನೆ ಉಚಾಯೆಲ ಯಾಜಕೊ ಯೊರ್ದನನಾ ವಚ್ಮಾ ಕ್ಹುಕ್ಹಿ ಜಿಮಿನ್ಪರ ಹುಬ್ರೈಯಾತಾ. ತೆಕ್ಲಾಮಾಜ ಇಸ್ರಾಯಲೊ ಕ್ಹಾರಾ ಕ್ಹುಕ್ಹಿ ಜಿಮಿನ್ಪರ ಚಾಲಿನ ಗಯಾ.ತೆ ಪ್ರಕಾರ ಮನಕ್ಹೊ ಕ್ಹಾರಾ ಯೊರ್ದನನೆ ಹಿಂಗೆ ಗಯಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.