Sikkiligar Bible
ಯೆಹುಶು 2
ಯೆರಿಕುವೆನೆ ಜಾಸುಸುನೆ ಮೊಕ್ಲಲ
ನುನನೊ ದಿಕ್ರೊ ಥಯಲ ಯೆಹುಶುವಾ ವರಿ ಕ್ಹಾರಾ ಮನಕ್ಹೊ ಆಕಾಶಿಯಾಮಾ ಘರೊ ಕರಿಲಿದ್ಯಾತಾ. ಯೆಹುಶುವಾ ಬೆ ಉಡಾಚಾರ ಕರಾಲಾವೊನೆ ಯೆರಿಕೊ ಗಾಮನಾ ಹುತಿ ತಿಳ್ದಿಲಿವಾನೆ ವಳಾಯೊ. ಎ ಮನಕ್ಹೊನೆ ಯೆಹುಶುವಾ ವಳಾಯಲ ಸಂಗತಿ ಬಿಜು ಕಿನೆಜ ಗ್ವತ್ತ ನ್ಹೊತು. ಗೈನ ತೆ ಯೆರಿಕೊ ಗಾಮನೆ ಘನ್ನ ಸುಕ್ಷ್ಮಕ್ಹು ದೆಕೊ” ಕೈನ ಯೆಹುಶುವಾ ತೆ ಗುಡಾಚಾರಿಯೊನೆ ಕದ್ಯೊ. ತೆ ಭಂಬಿ ಜನಾ ಯೆರಿಕೊ ಗಾಮೆ ಗೈನ ಯಕ್ಕ ವ್ಯಶ್ಯಾನಾ ಘರಮಾ ರ್ಹಯಾ. ತೆ ಬಾಕಡಿನು ನಾಮ ‘ರಾಹಾಬ.’ ತೆಳಾಮಾ ಕುನ್ನ ಯಕ್ಕ ಯೆರಿಕೊ ಗಾಮನಾ ರಾಜಾನೆ, ಕಾಲ ರಾತೆ ಇಸ್ರಾಯೆಲನಾ ದಕ್ಹಾ ಜನಾ ಅಪ್ನಾ ದೆಶಾ ಕಮಜೊರಿಯೊನೆ ತಿಳ್ದಿಲಿವಾನೆ ಆಯಾಸ” ಕೈನ ಕದ್ಯಾ. ತೆಳಾಮಾ ಯೆರಿಕೊ ಗಾಮನೊ ರಾಜೊ ರಾಹಾಬನೆ, ತಾರಾ ಘರೆ ಐನ ರ್ಹಯಲ ಮನಕ್ಹೊನೆ ಝಾಕಿನ ಮ್ಹೆಲು ನಕೊ. ತ್ಯುನೊನೆ ಭಾರಿ ಬಲೈ ಲಿನ ಆ. ತ್ಯುನೆ ಅಪ್ನಾ ದೆಶನಾ ಹುತಿ ತಿಳ್ದಿಲಿವಾನೆ ಆಯಾಸ” ಕೈನ ಮೊಕ್ಲೊ. ರಾಹಾಬ ಎ ಭಂಬಿ ಜನಾವೊನೆ ಝಾಕಿನ ಮ್ಹೆಲಿತಿ. ತೆನೈಸೊ ತೆ ಪುಚ್ಚಾನೆ ಆಯಲವಾಲಾವೊನೆ, ಬೆ ಮನಕ್ಹೊ ನ್ಹ್ಯಾ ಆಯಾತಾ, ತೆನೈಸೊ ತ್ಯುನೆ ಕಿಜಾಂತಾ ಆಯಾತಾ ಕವಾನು ಮನೆ ಗ್ವತ್ತ ನ್ಹೊತು. ಖಾಂಜೆ ಗಾಮನಾ ಬಾಕಲೊ ಝಾಕಾನು ಟೈಮ ಥಾತಾಮಾ ತ್ಯುನೆ ಗೈಪಡ್ಯಾ. ತ್ಯುನೆ ಕಿಜಾ ಗಯಾ ಕವಾನು ಮನೆ ಗ್ವತ್ತ ನತ್ತಿ. ತೆನೈಸೊ ತುಮೆ ಜಲ್ದಿ ಗಯಮ ತ್ಯುನೊನೆ ಧರ ಸಕೊಶಿ” ಕದಿ. ತೆನೈಸೊ ತೆ ಕ್ಹರಿಮಾಜ ತೆ ಗುಡಾಚಾರಿಯೊನೆ ಛತ್ತನಾ ಉಪ್ಪರ ಬಲೈ ಲಿನ ಗೈನ ವಟ್ಟಲ ಚಾರಾಮಾ ತ್ಯುನೊನೆ ಝಾಕಿನ ಮ್ಹೆಲಿತಿ. ರಾಜಾನಾ ಭಟ್ಟೊ ಗಾಮನಾ ಭಾರಾ ಗೈನ ಗಾಮನಾ ಬಾಕಲೊ ಝಾಕಿನ ಇಸ್ರೆಲತಾ ಆಯಲ ತೆ ಭಂಬಿ ಜನಾವೊನೆ ಹುಡಕಿನ ಗಯಾ. ತ್ಯುನೆ ಯೊರ್ದನ ನದಿ ಲಕ್ಕಾ ಗೈನ ಮನಕ್ಹೊ ನದ ದಾಟಾನಾ ಕ್ಹಾಟರಾ ಜ಼ಗಾವೊಮಾ ಹುಡಕ್ಯಾ. ತೆ ಭಂಬಿ ಗುಡಾಚಾರಿಯೊ ತ್ಯಾಜ ಕ್ಹುರ್xಯಾವಾನೆ ತಯ್ಯಾರಿ ಕರಿಲಿದ್ಯಾತಾ. ತೆನೈಸೊ ರಾಹಾಬ ಛತ್ತನಾ ಉಪ್ಪರ ಗೈನ ತ್ಯುನಾ ಕ್ಹಾತೆ ಬೊಲಿನ, ''ಯಹೊವಾ ಎ ದೆಶನೆ ತುಮಾರಾ ಮನಕ್ಹೊನೆ ದಿದ್ಯೊಸ ಕೈನ ಮನೆ ಗ್ವತ್ತ ಛೆ. ತುಮಾರಿ ವಿಶಯ ಐಕಿನ ಹಮೊನೆ ಭೆಂ ಹುಟ್ಯುಸ. ಎ ದೆಶಮಾ ರ್ಹವಾನಾ ಕ್ಹಾರಾ ಮನಕ್ಹೊ ತುಮೊಕ್ಹು ಭುಚ್ಕಿನ ಛೆ. ಯಹೊವಾ ತುಮೊನೆ ಸಹಾಯ ಕರಲ ತರಿಕಾನಾ ಹುತಿ ಹಮೆ ಐಕಿನ ಭುಚ್ಚಕ್ಯಾಸ. ತುಮೆ ಇಜಿಪ್ಟತಾ ಭಾರಾ ಆಯಲ್ಪರ ತೆ ಲಾಲ ಸಮುಂದರನಾ ಪಾನಿನೆ ಕ್ಹುಕ್ಹಾಯಲ ಹಮೆ ಐಕ್ಯಾಸ. ಯೊರ್ದನ ನದಿನಾ ಪುರ್ವ ದಿಕ್ಕಮಾ ರ್ಹಯಲ ಸಿಹೊನ ವರಿ ಒಗ್ ಕವಾನಾ ಅಮೊರಿಯನಾ ಬೆ ಜನಾ ರಾಜಾವೊನೆ ತುಮೆ ಕಿಮ್ಮ ನಾಶ ಕರ್ಯಾಸ ಕವಾನು ಐಕ್ಯಾಸ. ಎ ಕ್ಹಾರಾವೊನಾಹುತಿ ಐಕಿನ ಹಮೊನೆ ಘನ್ನು ಭೆಂ ಐಯುಸ; ಹಮೊಮಾ ಕಿನೆಜ ತುಮಾರಾ ಕ್ಹಾತೆ ಯುದ್ದ ಕರಾನೆ ಧೈರ್ಯ ನತ್ತಿ. ಕಾಕದ್ಯಾಮ ತುಮಾರೊ ಕ್ಹುದಾ ಥಯಲ ಯಹೊವಾ, ಭುಪರಲೊಕನೆ ಆಳಾಲೊ ಥಯೊಸ. ಹಮ್ನಾ ತುಮೆ ಹಮೊನೆ ಯಕ್ಕ ಪ್ರಮಾಣ ಕರು. ಮಿ ತುಮೊನೆ ದಯಾ ದೆಕಾಡಿನ ಸಹಾಯ ಕರಿ. ತಿನಾಹುತಿ ತುಮೆಬಿ ಮಾರಾ ಕುಟುಂಬವಾಲಾವೊನೆ ದಯಾ ದೆಕಾಡೊಶಿ ಕೈನ ಯಕ್ಕ ವಳಕ ದಿವೊ. ಮಾರಾ ಕುಟುಂಬವಾಲಾವೊನೆ ಕದ್ಯಾಮ ಮಾರಾ ಮಾ ಬಾಪನೆ, ಭಾಯೊ ಭೆನೊನೆ ವರಿ ತ್ಯುನಾ ಕ್ಹಾರಾ ಕುಟುಂಬವಾಲಾವೊನೆ ಜಿವ್ತಾ ಛೊಡಾನೆ ಪ್ರಮಾಣ ಕರೊ” ಕೈನ ಮಾಂಗಿಲಿದಿ. ತಿನಾಹುತಿ ತ್ಯುನೆ, 'ಹಮಾರು ಜಲಮ ದಿನಬಿ ತುಮಾರು ಜಲಮ ವಚಾ಼ಡೆಸ. ತೆನೈಸೊ ತುಮೆ ಎ ಕಿನೆಜ ಕವೊ ನಕೊ. ಯಹೊವಾ ಎ ದೆಶ ಹಮೊನೆ ದಿದಲ್ಪರ ಹಮೆ ತುಮೊನೆ ದಯಾ ದೆಕಾಡೆಸ. ತುಮೆ ಹಮೊನೆ ಬರೊಕ್ಹೊ ಕರ ಸಕೊಶಿ” ಕದ್ಯಾ. ರಾಹಾಬನಾ ಘರನೆ ಗಾಮನಿ ಗೊಡಿಯೆ ಲಾಗಿನ ಭಾಂದ್ಯಾತಾ ತುಮೆ ಪಾಚಾ ರ್ಹಯಲವಾಲಾವೊನೆ ಮಳಲ ನಂಗತ ತೆ ಪರ್ವತನೆ ನ್ಹಾಟಿನ ಜಾವೊ ತ್ಯಾ ತನ್ನ ದಿನ ದಡಿನ ರೈನ ತ್ಯುನೆ ಗಯಲ್ಪರ ತುಮಾರಿ ವಾಟ ಧರಿನ ಜಾವೊ ಕೈನ ಕದಿ. ವರಿ ತ್ಯುನೆ ಹಮೆ ಕದಲ ವಾತನಿಂಗತ ತು ಚಾಲೆಲ ರ್ಹಯಾಮ ತು ಹಮಾರಾ ಕರಲ ಪ್ರಮಾಣಖ್ಹು ಬಿಡುಗಡೆ ಥಯೊತೊ. ವರಿ ಹಮೆ ಆ ಗಾಮಾ ರ್ಹತಾಮಾ ತು ಹಮೊನೆ ಉತಾರೆಲ ಕಿಡಕಿನೆ ಲಾಲ ದೊರೊ ಭಾಂದೊ ಕದ್ಯೊ ವರಿ ತಾರಾ ಮಾಬಾಪನೆ ಭಾಯೊನೆ ಕ್ಹಾರಾ ಸಂಬದಿಕಿಯೊನೆ ತಾರಾ ಘರಮಾ ಬಲೆಲಿದಲ ರ್ಹವೊ. ತ್ಯುನಾಮಾ ಕಯೊಬಿ ಘರ ಛೊಡಿನ ರೊಡೆ ಆಯೊರೆ ರಗತನು ಪಾಪ ವ್ಹೈ ತ್ಯುನಾ ಮಾತಾನಾ ಉಪ್ಪರ ನಿರ್ದೊಸಿಯೊ ಕೈನ ರ್ಹವಸ. ವರಿ ತಾರಾಖ್ಹಾತೆ ಘರಮಾ ರ್ಹಯಲವಾಲಾ ಉಪ್ಪರ ಹತ್ತ ಘಾಲ್ಯಾಮ ತೆ ರಗತನು ಪಾಪ ವ್ಹೈ ಅಪ್ನಾ ಮಾತಾನಾ ಉಪ್ಪರ ರ್ಹವಸ; ತೆ ನೈಸೊ ತು ಹಮಾರಾ ಸಂಗತಿಯೊನೆ ಭಾರಾ ಆವಾನಾಹುತಿ ಹಮೊಖ್ಹು ಕರಲ ಪ್ರಮಾಣಖ್ಹು ಬಿಡುಗಡೆ ಥಾವಸ ಕೈನ ಕದ್ಯಾ. ತಿನಾಹುತಿ ತೆ ತುಮಾರಾ ವಾತನಿಂಗತ ಥಾವಾದೆ ಕೈನ ತ್ಯುನೊನೆ ವಳೈ; ತ್ಯುನೆ ಗಯಲ್ಪರ ತೆ ಲಾಲ ದೊರೊ ಕಿಡಕಿನೆ ಭಾಂದಿ. ತ್ಯುನೆ ತೆ ಪರ್ವತೆ ಗೈನ ಪಿಟ್ಟ ಲಗಾಡಿನ ಪಾಚಾ ರ್ಹೆಲಕ್ಕಾ ತನ್ನ ದಿನ ತ್ಯಾಜ ವ್ಹತ್ತಾ. ಪಿಟ್ಟ ಲಗಾಡಿನ ತ್ಯುನೆ ತ್ಯುನೊನೆ ವಾಟನಾ ಯುದ್ದನೆ ಹುಡಕಿನ ದೆಕಿನ ಗೈಪಡ್ಯಾ. ತೆಳಾಮ ತ್ಯುನೆ ಬೆಜನಾ ಡೊಂಗರಪರ್ತಾ ಉತ್ರಿನ ತಳು ದಾಟಿನ ನೂನನೊ ದಿಕ್ರೊ ಥಯಲ ಯೆಹುಶುವಾ ಕನ ಐನ ತ್ಯುನೊನೆ ಅನಸಾಯಲ ತಿಳಶ್ಯಾ. ತೆ ನೈಸೊ ತ್ಯುನೆ ಯೆಹುಶುವಾನೆ ಯಹೊವಾ ಕ್ಹರಿಜ಼ ತೆ ದೆಶ ಕ್ಹಾರು ಹಮೊನೆ ದಿದ್ಯೊಸ; ತಿನಾ ನಿವಾಸಿಯೊ ಕ್ಹಾರಾ ಹಮಾರಾ ನಿಮಿತ್ತ ಕಂಗಟ್ಟನಿ ಗಯಾಸ ಕೈನ ತಿಳಶ್ಯಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.