Sikkiligar Bible
ಯೊನ 2
ಯೊನನಿ ಪ್ರಾಥನಾ
ಯೊನ ತೆ ಮಚಲಿನಾ ಪೆಟಮಾತೊ ರ್ಹೈನ ತಿನೊ ಯಹೊವಾ ಥಯಲ ಯಹೊವಾನೆ ಇಮ್ಮ ಪ್ರಾಥನಾ ಕರ್ಯೊ.
ಕಷ್ಟನಾ ಟೈಮಾ ಮಿ ಯಹೊವಾನೆ
ಬರೊಕ್ಹೊ ಮುಕ್ಯೊಸ. ವರಿ ತೆ ಮನೆ
ಜ಼ವಾಬ ದಿವಸ ನರಕನಾ ಗರ್ಭಮಾತೊ ಸಹಾಯಕರ ಕೈನ
ಮಿ ವದ್ರಿನ ಕದ್ಯೊ. ತೆಳಾಮಾ ಮಿ ಬಲಾಯಲ ತು ಐಕ್ಯೊ.
ಕಾ ಕದ್ಯಾಮ ಮನೆ ತು ಸಮುಂದರನಿ
ಉಂಡಿ ರ್ಹಯಲ ಜ಼ಗಾಮಾ
ನಾಕಿಪಾಡ್ಯೊಸ್ತೊ, ಸಮುಂದರಮಾ
ರ್ಹಯಲ ವರಿ ಪ್ರವಾಹ ಮನೆ ಸುತ್ತಿಲಿದಿಯೊ; ಮ್ಹೊಟಿಯೊ ಅಲಿಯೊ ಮಾರಾ ಮಾತಾಪರ್ತಿಯೊ ಚಾ಼ಲಿಯೊತಿಯೊ
ತೆಳಾಮಾ ಮಿ ಕದಲ ತಾರಾ ಡೊಳಾನಾ ಕ್ಹಾಮಾತೊ ಭಾರೊ
ಘಾಲಿಪಾಡಲಂಗತಚೆ ಥೈತಬಿ ಮಿ ತಾರಾ ಪರಿಶುದ್ಧ ಸನ್ನಿದಿಮಾ ಫರಿನ ವರಿ ದೆಕುಸ
ಮಾರಾ ಸುತ್ತೆ ಫರಾನು ಪಾನಿ ಮನೆ
ಭುಚ಼ಕಾಡ್ಯು ಉಂಡುರ್ಹಯಲ ಮನೆ ಸುತ್ತೆ ಝಾಕಿಪಾಡ್ಯು
ಪಚಿಯೊ ಮಾರಾ ಮಾತಾನೆ ಸುತ್ತಿಲಿದಿಯೊತ್ಯೊ
ಡೊಂಗರೊನಾ ವಚ಼ಮಾ ಉತರಿಗಯೊತೊ,
ವರಿ ಜಿಮಿನಮಾ ಮ್ಹೈ
ಗೈನ ಬಾಕಲನ್ಯೊ ಚಾವಿಯೊ
ಘಲಾಯಿಗಯೊ. ವರಿಬಿ ಉಂಡಾಮಾತು ತು ಮನೆ ಉಪ್ಪರ ಲಾಯೊಸ. ಎ ಮಾರೊ ಯಹೊವಾ ಥಯಲ ಯಹೊವಾ,
ಮಾರೊ ಜ಼ಲಮ ಮಾರಾಮಾತೊ
ಕುಂದಿಗಯಲ ಟೈಮಾ ಯಹೊವಾ ತುನೆ ಶೆಕರಲಿನ ಮಾರಿ
ಪ್ರಾಥನಾ ತುಕನ ತಾರಿ ಪರಿಶುದ್ಧ ಆಲಯಮಾ ಐ.
ಉಪಯೊಗ ನೈಸೊ ಮೊರತಿಯೊನೆ ಪುಜಾಕರಾಲಾ.
ಯಹೊವಾನಿ ಮಯಾ ಛೊಡಿಪಾಡಸ.
ವರಿ ಮಿ. ಸ್ತೊತ್ರಾ ಕವಾನು ಯಕ್ಕ
ರಿಕಾಡ ನಾ ಕ್ಹಾತೆ ಬಲಿ ಚ಼ಡೌಸ,
ಮಿ ಕಯಿಲಿದಲ ಪುರಾಕರ್ಯೊಸ.
ರಕ್ಷಣಾ ಯಹೊವಾ ಕಂತುಜ಼ ಆವಸ ಕೈನ ಕದ್ಯೊ.
ತೆಳಾಮಾ ಯಹೊವಾ ಯಹೊವಾ ಮಚಲಿನ ಕತಾ ಟೈಮಾ ತೆ ಮಚಲಿ ಯೊನನೆ ಜಿಮಿನ್ಪರ ವಕ್ಕಕಿಪಾಡಿ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.