Skip to content
BibleKenya

Sikkiligar Bible

ಯೊಹಾನ 4

ಯೆಸು ವರಿ ಸಮಾರ್ಯಾ ಬಾಕ್ಡಿ

ತೆ ಯೊಹಾನತಿಬಿ ಹೆಚ್ಕಿ ಶಿಷ್ಯಾ ಕರಲಿನ ತ್ಯುನೊನೆ ಬಾಪ್ತಿಸ್ಮ ಕರಾವಾಡ್ಯೊಸ ಕೈನ ಕವಾನಿ ಸುದ್ದಿ ಫರಿಸಾಯರೊನೆ ಗ್ವತ್ತ ಥಯುಸ ಕೈನ ಯೆಸುನೆ ಗ್ವತ್ತ ಥಯು. ಕ್ಹರಿಮಾಜ಼ ಮನಕ್ಹೊನೆ ಬಾಪ್ತಿಸ್ಮ ದಿಲಾಯಲ ಯೆಸು ನ್ಹವೈ. ತಿನಾ ಶಿಷ್ಯಾಜ಼ ದಿಲಾಯಾ. ಮನಕ್ಹೊ ಸು ಕವಾಡ್ಯಾಸ ಕವಾನು ಯೆಸು ಐಕಿನ ತೆ ಯುದಾಯ ಛೊಡಿನ ವರಿ ಗಲಿಲಾಯಯೆ ಗಯೊ. ತೆ ಸಮಾರ್ಯಾ ಪ್ರಾಂತ್ಯಮಾತೊಜ ಗಲಿಲಾಯೆ ಜಾ಼ವಾನಿ ವಾಟ ದಾಟಿನ ಜಾ಼ವಾನು ವ್ಹತ್ತು.

ಯೆಸು ಸಮರ್ಯಾ ಕವಾನೆ ಗಾಮ್ಮಾ ರ‍್ಹಯಲ ಸುಖಾರ ಕವಾನಿ ಜ಼ಗಾಪರ ಆಯೊ. ಯಾಕೊಬ ತಿನಾ ದಿಕ್ರಾ ಯೊಸೆಫನೆ ದಿದಲ ಜ಼ಗಾನಾ ನಜಿಕ ಎ ಗಾಮ ಛೆ. ಯಾಕೊಬನಿ ಇರ ತ್ಯಾಜ ವ್ಹತ್ತಿ. ಯೆಸು ಘನ್ನು ದುರತೊ ಚಾಲ್ತೊ ಆಯಲ ಹುತಿ ತೆ ಸುಸ್ತ ಥಯೊತೊ. ತಿನಾಹುತಿ ತೆ ಇರಕನ ಬೈಟ್ಯೊ. ತೆಳಾಮಾ ಕಮ್ಸಿ ಕಮ ದುಪ್ಪಾರ ಥೈತಿ.

ಸಮಾರ್ಯಾವಾಲಿ ಯಕ್ಕ ಬಾಕ್ಡಿ ಪಾನಿ ಲಿವಾನೆ ತೆ ಇರಕನ ಐ. ಯೆಸು ತಿನೆ"ಮನೆ ಪಿವಾನೆ ದಕ್ಹು ಪಾನಿ ದೆಶಿ ಸು? ಕೈನ ಪುಚ್ಯೊ. ಯೆಸುನಾ ಶಿಷ್ಯಾ ಖಾವಾನಾ ಹುತಿ ಇಕ್ಕಾತು ಅನ್ನಲಾವಾನೆ ಗಾಮೆ ಗಯಾತಾ.

ಸಮಾರ್ಯಾವಾಲಿ ತೆ ಬಾಕ್ಡಿ ತುತೊ ಯಹುದಿ ವ್ಹೈ. ಮಿತೊ ಸಮಾರ್ಯಾವಾಲಿ ವ್ಹೈ" ಪಿವಾನೆ ಪಾನಿ ತು ಮಕನ ಪುಚ್ಚಾನು ಕಾ? ಕದಿ. ಯೆಹುದಿಯೊನಾ ಮನಕ್ಹೊ ಸಮಾರ್ಯಾವಾಲಾನಾ ಕ್ಹಾತೆ ಕಯುಜ಼ ಸಂಭಂದ ಮ್ಹೆಲ್ತಾ ನ್ಹೊತಾ..

ಯೆಸು ತಿನೆ"ಕ್ಹುದಾ ಸು ದಿವಸ ಕವಾನು ತುನೆ ಗ್ವತ್ತ ನತ್ತಿ ಪಾನಿ ಪುಚ್ತಾಮಾ ಮಿ ಕುನ್ನ ವ್ಹೈ ಕವಾನು ತುನೆ ಗ್ವತ್ತ ನತ್ತಿ. ತುನೆ ಎ ಕ್ಹಾರು ಗ್ವತ್ತ ರ‍್ಹವತ್ತೊ, ತು ಮಕನ ಮಾಂಗಿಲೆತಿತಿ, ವರಿ ಮಿ ತುನೆ ಜಿವ ಜಲ ದೆತೊತೊ "ಕದ್ಯೊ.

ತೆ ಬಾಕ್ಡಿ ಅಯ್ಯಾ, ತೆ ಜಿವ ಜಲ ತುನೆ ಕಿಜ್ಗಾ ಮಳಸ? ಇರ ಘನ್ನಿ ಉಂಡಿ ಛೆ ವರಿ ತಿಮಾತು ಪಾನಿ ಕಾಡಾನೆ ತುಕನ ಸುಜ಼ ಸಾಮನ ನತ್ತಿ. ಹಮೊನೆ ಆ ಇರ ಯಾಕೊಬ ದಿದ್ಯೊಸ. ತೆಬಿ ಎಜ಼ ಪಾನಿ ಪಿದ್ಯೊ. ತೆನೈಸೊ ತಿನಾ ಬಚ್ಚಾ಼ಬಿ ಎಜ಼ ಇರನು ಪಾನಿ ಪಿದ್ಯಾ ತಿನಾ ಜಾನ್ವರೊಬಿ ಎಜ಼ ಇರಮಾನು ಪಾನಿ ಪಿತಾತಾ. ಹಮಾರೊ ಪಿತೃ ಥಯಲ ಯಾಕೊಬತಿಬಿ ತು ಮ್ಹೊಟೊ ವ್ಹೈಸು? ಕೈನ ಕದಿ.

ಯೆಸು, ಎ ಪಾನಿ ಪಿವಾಲಾ ಹರಿ ಯಕ್ಲಾನೆ ಫರಿನ ತರಕ್ಹ ಲಾಗಸ, ವರಿ ಮಿ ದಿವಾನು ಪಾನಿ ಕುನ್ನ-ಕುನ್ನ ಪಿವಸ ತ್ಯುನೊನೆ ಫರಿನ ತರಕ್ಹ ಲಾಗ್ತಿಜ ನೈ. ಮಿ ದಿವಾನು ಪಾನಿ ತ್ಯುನಾ ಮ್ಹೈತು ಜ಼ಲಮ ದಿವಾನು ಪಾನಿನು ಝರಿನಿಂಗತ ರ‍್ಹವಸ. ವರಿ ತೆ ತ್ಯುನೊನೆ ಹಮೆಶಾನೊ ಜ಼ಲಮ ದಿವಸ" ಕೈನ ಕದ್ಯೊ.

ತೆ ಬಾಕ್ಡಿ ಯೆಸುನೆ"ಗುರು, ತೆ ಪಾನಿ ಮನೆ ದೆ! ತೆಳಾಮಾ ಮನೆ ವಟ್ಟಜ ತರಕ್ಹ ಲಾಗ್ತಿ ನೈ. ಪಾನಿ ಲಿನ ಜಾ಼ವಾಲಾನೆ ಮಿ ನ್ಯ್ಹಾ ವರಿ ಆವಾನೆ ಜರುರತ್ತ ರ‍್ಹತಿ ನೈ" ಕೈನ ಕದಿ.

ಯೆಸು ತಿನೆ"ತು ಗೈನ ತಾರಾ ಮಾಟಿನೆ ಬಲೈ ಲಿನ ಫರಿನ ಆ "ಕದ್ಯೊ.

ತೆ ಬಾಕ್ಡಿನೆ "ಮನೆ ಮಾಟಿ ನತ್ತಿ" ಕದಿ.

ಯೆಸು ತಿನೆ"ತಾರೊ ಮಾಟಿ ನತ್ತಿ ಕೈನ ಕ್ಹರಿ ಕದಿ. ಕ್ಹರಿಮಾಜ಼ ತುನೆ ಪಾಂಚ಼ ಜ಼ನಾವೊನಾ ಕ್ಹಾತೆ ಹಿವಾ ಥಯಾತಾ. ವರಿಬಿ ತು ಹಮ್ನಾ ಕಿನಾ ಕ್ಹಾತೆ ಛೆ ತೆ ಕ್ಹರಿಮಾಜ಼ ತಾರೊ ಮಾಟಿ ನ್ಹವೈ. ತು ಮನೆ ಕ್ಹರಿಜ ಕದಿ" ಕೈನ ಕದ್ಯೊ.

ತೆ ಬಾಕ್ಡಿ, ಗುರು, ತು ಪ್ರವಾದಿ ವ್ಹೈ ಕೈನ ಮನೆ ದಿಕ್ಹಾಡ್ಯೊಸ. ಹಮಾರಾ ಸಮಾರ್ಯಾನಾ ಪಿತ್ರೊ ಆ ಡೊಂಗರಪರ ಆರಾಧನಾ ಕರ್ತಾತಾ ತೆನೈಸೊ ಮನಕ್ಹೊ ಆರಾಧನಾ ಕರಾನಿ ಜ಼ಗಾ ಯೆರುಸಲೆಮ ವ್ಹೈ ಕೈನ ಯೆಹುದಿಯೊ ಥಯಲ ತುಮೆ ಕವೊಶಿ" ಕದಿ.

ಯೆಸು ತಿನೆ"ಎ ಬಾಕ್ಡಿಮನೆ ನಂಬ! ತು ಹಬ್ದಾತಿ ಕೆಳಾಮಾಜ ಬಾನೆ ಯೆರುಸಲೆಮಾ ರ‍್ಹೈನೆಕಾ ಆ ಡೊಂಗರಪರ ರ‍್ಹೈನೆಕಾ ಆರಾಧನಾ ಕರಾನೆ ನೈ ಥಾತು. ತುಮೆ ಸಮಾರ್ಯಾವಾಲಾ ಕಿನೆ ಆರಾದನಾ ಕರಾಡಾಸ ತುಮೊನೆ ಗ್ವತ್ತ ನತ್ತಿ. ತೆನೈಸೊ ಹಮೆ ಯಹುದಿಯೊ ಕಿನೆ ಆರಾದನಾ ಕರಿಯೆಸ ಕೈನ ಹಮೊನೆ ಗ್ವತ್ತ ಛೆ. ಕಾಕದ್ಯಾಮ ಬಿಡುಗಡೆ ಯೆಹುದಿಯೊಕ್ಹುಜ಼ ಆವಸ. ಕ್ಹರಿಕ್ಹು ಆರಾಧನಾ ಕರಾಲಾ ಬಾನಿ ಆರಾಧನಾ ಆತ್ಮಾಕ್ಹು ವರಿ ಕ್ಹರಿಕ್ಹು ಕರಾನೊ ಟೈಮ ಆವಸ. ತೆ ಟೈಮ ಹಮ್ನಾಜ ಆಯೊಸ. ವರಿ ತೆವಾಜ ಆರಾಧನಾ ಕರಾಲಾವೊನೆ ಬಾ ಹುಡ್ಕಸ. ಕ್ಹುದಾ ಆತ್ಮಾ ವ್ಹೈ. ತಿನಾ ಹುತಿ "ಕ್ಹುದಾನೆ ಆರಾಧನಾ ಕರಾಲಾ ಆತ್ಮಾಕ್ಹು ಕ್ಹರಿಕ್ಹು ಆರಾಧನಾ ಕರು" ಕೈನ ಕದ್ಯೊ.

ತೆ ಬಾಕ್ಡಿ ಮಸ್ಸಿಹಾ ಆವಸ ಕವಾನು ಮನೆ ಗ್ವತ್ತ ಛೆ. ತೆ ಆತಾಮಾ ಮನೆ ಹರಿ ಯಕ್ಕ ಕವಸ ಕೈನ ಕದಿ. ಮಸ್ಸಿಹಾ ಕದ್ಯಾಮ ಕ್ರಿಸ್ತ ವ್ಹೈ.

ತೆಳಾಮಾ ಯೆಸು ತಿನೆ, ತಾರಾ ಕ್ಹಾತೆ ಬೊಲಾಲೊ ಮಿಜ಼ ತೆ ವ್ಹೈ ಕೈನ ಕದ್ಯೊ.

ತೆ ಟೈಮ್ಮಾ ತಿನಾ ಶಿಷ್ಯಾ ಫರಿನ ಆಯಾ. ಯೆಸು ಯಕ್ಕ ಬಾಕ್ಡಿನಾ ಕ್ಹಾತೆ ಬೊಲಾನು ದೆಕಿನ ಘನ್ನಾ ಘಾಬ್ರಾ ಥಯಾ. ತೆನೈಸೊ ತ್ಯುನೆ, ತುನೆ ಸು ಚಾ಼ಯೆ? ಕೈನ ತು ತಿನಾ ಕ್ಹಾತೆ ಸು ಬೊಲಾಡೊಸ? ಕೈನ ತ್ಯುನೆ ಕುನ್ನಜ ತ್ಯುನೊನೆ ಪುಚ್ಯಾ ನೈ.

ಪಾಚಾ಼ತಿ ತೆ ಬಾಕ್ಡಿ, ತಿನೊ ಪಾನಿನೊ ಘಡೊ ತ್ಯಾಜ ಛೊಡಿನ ಗಾಮ್ಮಾ ಫರಿನ ಗೈನ ಮನಕ್ಹೊಕನ, "ಮಿ ನ್ಯ್ಹಾ ಲಕ್ಕಾಬಿ ಕರಲ ಹರಿ ಯಕಬಿ ಯಕ್ಕ ಮನಕ್ಹ ಮನೆ ಕದ್ಯೊ. ಐನ ತುಮೆ ತಿನೆ ದೆಕೊ. ತೆಜ಼ ಕ್ರಿಸ್ತ ವಸೆ ಸು? ಕೈನ ಕದಿ. ತಿನಾಹುತಿ ಮನಕ್ಹೊ ತಿನೆ ದೆಕಾನೆ ಗಾಮ್ಮಾತಾ ಭಾರಾ ಆಯಾ.

ತೆಕ್ಲಾಮಾಜ಼ ಯೆಸುನಾ ಶಿಷ್ಯಾ "ಗುರು, ಅನ್ನ ಖಾ ಕೈನ ತಿನೆ ಘನ್ನಾ ಕದ್ಯಾ.

ತೆ ವಾತೆ ಯೆಸು, ಮಕನ ಖಾವಾನೆ ಅನ್ನ ಛೆ. ತೆ ಅನ್ನನಾ ಹುತಿ ತುಮೊನೆ ಗ್ವತ್ತ ನತ್ತಿ ಕದ್ಯೊ.

ತಿನಾಹುತಿ ಶಿಷ್ಯಾ, ಕುನ್ನಬಿ ತಿನೆ ಪೈಲಾಜ ಅನ್ನ ಲೈನ ದಿದ್ಯಾ ವಸೆ ಸು? ತ್ಯುನೊ-ತ್ಯುನೊಮಾಜ಼ ಬೊಲ್ಲಿದ್ಯಾ.

ಯೆಸು ತ್ಯುನೊನೆ, ಮನೆ ಮೊಕ್ಲಲವಾಲೊ ಮಿ ಸು ಕರು ಕೈನ ಆಸ ಕರಸ ತೆ ಕರಾನುಜ ಮನೆ ಅನ್ನ ವ್ಹೈ. ತೆ ಮನೆ ದಿದಲ ಕಾಮ ಪುರಾ ಕರು. ಸುಗ್ಗಿನೆ ಹಜು಼ನ ಚಾರ ಮ್ಹೈನಾ ಕೈದು, ಕೈನ ತುಮೆ ಕವೊಸಿ. ತೆ ಮಿ ತುಮೊನೆ ಕವಾಡ್ಯೊಸ, ತುಮಾರಾ ಡೊಳಾ ಖುಲ್ಲಾ ಕರೊ. ಖೆತರನಾ ಸುತ್ತೆ ದೆಕೊ, ತೆ ಕಾಟಾನೆ ತಯ್ಯಾರ ಥಯಾಸ.. ಹಮ್ನಾಬಿ, ಬೆಳಿ ಕಾಟಾಲಾವೊನೆ ಕುಲಿ ಮಳಸ. ತೆ ಬೆಳಿ ಹಮೆಶಾ ರ‍್ಹವಾನೆ ಜ಼ಲಮನಾ ಹುತಿ ಮಳಾವಸ. ತಿನಾ ಹುತಿ ಬಿತ್ತಾಲಾ ವರಿ ಕಾಟಾಲಾ ಮಳಿನಜ ಖುಶಿ ಥಾವಸ. ಯಕ್ಲೊ ಬಿತ್ತಸ, ಯಕ್ಲೊ ತೆ ಬೆಳೆನೆ ಕಾಟಸ. ಕವಾನಿ ಯಕ್ಕ ಕಹಾವತ ಕ್ಹರಿ ವ್ಹೈ. ತುಮೆ ನೈ ರಾಬಲ ಬೆಳಿ ಕಾಟಾನೆ ತುಮೊನೆ ಮೊಕ್ಲಾಡ್ಯೊಸ. ಬಿಜಾ಼ ರಾಬ್ಯಾ, ತೆನೈಸೊ ತ್ಯುನೆ ರಾಬಲ ಹುತಿ ತುಮೆ ಫೈದೊ ಖಾವೊಸಿ" ಕೈನ ಕದ್ಯೊ.

ತೆ ಗಾಮನಾ ಘನ್ನಾ ಸಮಾರ್ಯಾವಾಲಾ ಮನಕ್ಹೊ ಯೆಸುನೆ ನಂಬ್ಯಾತಾ. ಕಾಕದ್ಯಾಮ ತೆ ಬಾಕ್ಡಿ ತಿನಾಹುತಿ ತ್ಯುನೊನೆ"ಮಿ ಕರಲ ತೆಕ್ಲುಬಿ ಮನೆ ತೆ ಕದ್ಯೊತೊ" ಕೈನ ಕದಿತಿ. ಸಮಾರ್ಯಾವಾಲಾ ಯೆಸುಕನ ಐನ ಹಮಾರಾ ಕ್ಹಾತೆ ರ‍್ಹೆ ಕೈನ ಕೈಲಿದ್ಯಾತಾ. ತಿನಾಹುತಿ ತೆ ತ್ಯಾ ಬೆ ದಿನ್ನ ವ್ಹತ್ತೊ.

ತೆ ಕದಲ ವಾತೊ ತ್ಯಾನಾ ಮನಕ್ಹೊ ಘನ್ನಾ ನಂಬ್ಯಾತಾ. ತ್ಯುನೆ ತೆ ಬಾಕ್ಡಿ ತೆ ಕದಲ ವಾತೊಕ್ಹು ಹಮೆ ಯೆಸುನೆ ನಂಬ್ಯಾತಾ. ತಿನಾ ಹುತಿ ಹಮೆಜ಼ ಖುದ್ದ ದೆಕಿನ ಹಮೆ ನಂಬಿಯೆಸ. ಕ್ಹರಿಮಾಜ಼ ಎಜ಼ ದುನಿಯಾನೆ ವಚಾ಼ಡಾಲೊ ವ್ಹೈ ಹಮ್ನಾ ಹಮೊನೆ ಗ್ವತ್ತ ಥಯುಸ ಕೈನ ಕದ್ಯಾ.

ಯೆಸು ಅದಿಕಾರಿನಾ ದಿಕ್ರಾನೆ ಅರಾಮ ಕರಲ

(ಮತ್ತಾಯ 8:5-13; ಲುಕ 7:1-10)

ಬೆ ದಿನ್ನ ತ್ಯಾ ರ‍್ಹಯಲ್ಪರ ಯೆಸು ತ್ಯಾಂತೊ ಗಲಿಲಾಯೆ ಗಯೊ. ಪ್ರವಾದಿನೆ ತಿನಾ ಸ್ವಂತ ಗಾಮ್ಮಾ ಮರ್ಯಾದಿ ನತ್ತಿ ಖುದ್ದನಾ ಹುತಿ ಯೆಸುಜ ಕದ್ಯೊ. ತೆ ಗಲಿಲಾಯಯೆ ಆತಾಮಾ, ತ್ಯಾನಾ ಮನಕ್ಹೊ ತಿನೆ ಬಲೈ ಲಿದ್ಯಾ. ಕಾಕದ್ಯಾಮ ತೆ ಫಸ್ಕ ಸನ್ನನಾ ಟೈಮ್ಮಾ ಯೆಸು ಕರಲ ಕ್ಹಾರಾ ಕಾಮೊ ದೆಕ್ಯಾತಾ. ತೆ ಸನ್ನಮಾ ತೆ ಕ್ಹಾರಾ ಮನಕ್ಹೊ ಗಲಿಲಯಾಯೆ ಗಯಾತಾ.

ಯೆಸು ಗಲಿಲಾಯನಾ ಕಾನಾ ಗಾಮೆ ವರಿ ಯಕ್ಕೆಮ ಆಯೊ. ತೆ ಪಾನಿಕ್ಹು ದ್ರಾಕ್ಷಿಯೊನು ರಕ್ಹ ಕರಲ ತೆ ಗಾಮ್ಮಾ ವ್ಹೈ. ತೆಜ಼ ಗಾಮ್ಮಾ ಯಕ್ಕ ಮ್ಹೊಟೊ ಅದಿಕಾರಿ ಕಪೆನೌರ್ಮಿಮಾ ರ‍್ಹತೊತೊ. ತಿನಾ ದಿಕ್ರಾನೆ ಅರಾಮ ನ್ಹೊತು. ಯೆಸು ಯುದೆಯತೊ ಐನ ಗಲಿಲಾಯಮಾ ಛೆ ಕೈನ ಸುದ್ದಿ ತೆ ಐಕ್ಯೊ. ತಿನಾ ಹುತಿ ತೆ ತಿಕನ ಗೈನ ತಿನಾ ದಿಕ್ರಾನೆ ಅರಾಮ ಕರಾನಾಹುತಿ ತಿನೆ ಕಪೆನೌರ್ಮಿ ಔ ಕೈನ ತಿಕನ ಕೈಲಿದ್ಯೊ. ತಿನೊ ದಿಕ್ರೊ ಮರ್ವಾನಿ ಪರಸ್ತಿತಿಮಾ ವ್ಹತ್ತೊ. ಯೆಸು ತಿನೆ"ಸುಚಕ ಕಾಮೊ ವರಿ ಘಾಬ್ರಾಥಾವಾನಾ ಕಾಮೊ ದೆಕ್ಯಾವಾಚಿ ಮನೆ ನಂಬತಾಜ಼ ನೈ" ಕೈನ ಕದ್ಯೊ.

ತೆ ಮ್ಹೊಟೊ ಅದಿಕಾರಿ"ಸ್ವಾಮಿ, ಮಾರೊ ದಿಕ್ರೊ ಮರಾತಿ ಪೈಲಾಜ ತು ಔ" ಕೈನ ಮಾಂಗಿಲಿದ್ಯೊ.

ಯೆಸು ತಿನೆ"ಜಾ಼ ತಾರೊ ದಿಕ್ರೊ ವಾಚಸ "ಕೈನ ಕದ್ಯೊ.

ಯೆಸುನಿ ವಾತ ನಂಬಿನ ತೆ ತಿನಾ ಘರೆ ಗಯೊ. ತೆ ಘರೆ ಜಾ಼ತಾಮಾ ತಿನಾ ಆಳೊ ತಿಕನ ಐನ"ತಾರೊ ದಿಕ್ರೊ ಅರಾಮ ಥಯೊಸ "ಕೈನ ಕದ್ಯೊ.

ತೆ, ಮಾರಾ ದಿಕ್ರಾನೆ ಕೆಳಾಮಾ ಅರಾಮ ಥಯು ಕೈನ ಪುಚ್ಚೊ. ತೆಳಾಮಾ ತೆ ಆಳೊ "ತಾರಾ ದಿಕ್ರಾನೆ ಕಾಲ ದುಪಾರೆಜ ಯಕ್ಕ ವಾಸ್ತಾ ತಿನೆ ರ‍್ಹಯಲ ತೌ ಛೊಡಿನ ಗೈ ಪಾಡ್ಯೊಸ" ಕೈನ ಕದ್ಯಾ. ತಾರೊ ದಿಕ್ರೊ ವಾಚಸ" ಕೈನ ಯೆಸು ಕದಲ ಎಜ಼ ಟೈಮೆ ವ್ಹೈ ಕೈನ ತೆ ದಿಕ್ರಾನಾ ಬಾನೆ ಗ್ವತ್ತ ವ್ಹತ್ತು. ತಿನಾಹುತಿ ತೆ ವರಿ ತಿನಾ ಘರವಾಲಾ ಕ್ಹಾರಾ ಯೆಸುನೆ ನಂಬ್ಯಾತಾ.

ಯೆಸು ಯುದೆಯತೊ ಗಲಿಲಾಯಯೆ ಆಯಲ್ಪರ ಎ ಬೆಂವಾ ಸುಚಕ ಕಾರ್ಯ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.