Sikkiligar Bible
ಯೊಹಾನ 3
ಯೆಸು ವರಿ ನಿಕೊದೆಮ
ಯಕ್ಲೊ ಯಹುದಿಯೊನೊ ಅದಿಕಾರಿ ವ್ಹತ್ತೊ ತಿನು ನಾಮ ನಿಕೊದೆಮ ವ್ಹತ್ತು. ತೆ ಫರಿಸಾಯರ ಗುಂಪನೊ ಸದಸ್ಯ ವ್ಹತ್ತೊ. ಯಕ್ಕ ರಾತೆ ನಿಕೊದೆಮ ಯೆಸುಕನ ಆಯೊ. ನಿಕೊದೆಮ"ಗುರು, ತು ಕ್ಹುದಾ ವಳಾಯಲ ಮಾಸ್ತರ ವ್ಹೈ ಕೈನ ಮನೆ ಗ್ವತ್ತ ಛೆ. ತು ಕರಾನಾ ಆ ತರಾನಾ ಅದ್ಭುತೊ ಕ್ಹುದಾನೊ ಆಸ್ರೊವಾಚಿ ಕುನ್ನಜ ನೈ ಕರತು "ಕೈನ ಕದ್ಯೊ.
ಯೆಸು"ಮಿ ತುನೆ ಕ್ಹರಿಜ ಕೌಸ. ಯಕ್ಲೊ ನವೊ ಥೈನ ಹುಟ್ಟುಜ. ಯಕ್ಲೊ ನವೊ ಥೈನ ನೈ ಹುಟ್ಯೊಮ ತೆ ಕ್ಹುದಾನಿ ರಾಜ್ಯ ನೈ ದೆಕತೊ "ಕೈನ ಉತ್ತರ ದಿದ್ಯೊ.
ನಿಕೊದೆಮ"ಮನಕ್ಹೊ ಗಡಿಯೊ ಥಯಲ್ಪರ ಹುಟ್ಟಾನು ಕಿಮ್ಮ? ಯಕ್ಲೊ ತಿನಿ ಯಾನಾ ಪೆಟ್ಮಾ ವರಿಯಕ್ಕೆಮ ಜಾ಼ವಾನೆ ಸಾಧ್ಯ ಛೆಸು? ಕೈನ ಪುಚ್ಚೊ.
ತಿನೆ ಯೆಸು"ಮಿ ತುನೆ ಕ್ಹರಿಜ ಕೌಸ. ಯಕ್ಲೊ ಪಾನಿಕ್ಹು ಆತ್ಮಾಕ್ಹು ಹುಟ್ಟುಜ. ನೈತೊ ತೆ ಕ್ಹುದಾನಿ ರಾಜ್ಯನೆ ನೈ ಜಾತೊ. ಅಂಗ ಯಕ್ಕ ಮನಕ್ಹೊ ಶರಿರಮಾ ತಿನಾ ಮಾ ಬಾ ಕ್ಹು ಹುಟ್ಯೊಸ. ತೆನೈಸೊ ಆತ್ಮಿಕಮಾ ತೆ ಆತ್ಮಾ ಕ್ಹು ಹುಟ್ಯೊಸ. "ತು ನವೊ ಥೈನ ಹುಟ್ಟುಜ "ಕೈನ ಮಿ ಕದಲ ಕ್ಹು ಘಾಬ್ರೊ ಥೌ ನಕೊ. ವಾರೊ ತಿನೆ ಮನಸ ಆಯಲ ಜ಼ಗಾ ಜಾ಼ವಸ. ವಾರೊ ಆವಾನು ಆವಾಜ ತು ಐಕ್ಸಿ. ತೆನೈಸೊ ವಾರೊ ಕಿಜ್ಗಾತೊ ಆವಾಡ್ಯೊಸ ವರಿ ಕಿಜಾ಼ ಜಾ಼ವಸ ತುನೆ ಗ್ವತ ನೈ ಥಾತು. ಆತ್ಮಾಕ್ಹು ಹುಟ್ಟಲ ಹರಿ ಯಕ್ಲೊ ತಿನಾನಿಂಗತ ಛೆ "ಕೈನ ಕದ್ಯೊ.
ನಿಕೊದೆಮ"ಎ ಕ್ಹಾರು ಕಿಮ್ಮ ಸಾಧ್ಯ ಛೆ? ಕೈನ ಪುಚ್ಚೊ.
ಯೆಸು"ತು ಇಸ್ರಾಯಲನೊ ಮಾಸ್ತರ ವ್ಹೈ. ತೆನೈಸೊ ತುನೆ ಎ ಸಂಗತಿಯೊ ಹಜು಼ನ ಗ್ವತ್ತ ನತ್ತಿ ಥಯು ಸು? ಮಿ ತುನೆ ಕ್ಹರಿಜ ಕೌಸ. ಅಪೊನೆ ಗ್ವತ್ತ ರ್ಹಯಲನಾ ಹುತಿ ಅಪೆ ಬೊಲಿಯೆಸ. ಅಪೆ ದೆಕಲನೆ ಸಾಕ್ಷಿ ದಿಯೆಸ. ತೆನೈಸೊ ಹಮೆ ಕವಾನು ತುಮೆ ಸ್ವಿಕಾರ ಕರ್ಲೆತಾ ನೈ. ಮಿ ಎ ದುನಿಯಾನಿ ಸಂಗತಿಯೊನಾ ಹುತಿ ಸು ಕದ್ಯೊತಬಿ ತುಮೆ ಬರೊಕ್ಹೊ ನೈ ಕರ್ತಾ. ಇಮ್ಮ ರ್ಹಯೊಮ ಮಿ ಸ್ವರ್ಗನಿ ಸಂಗತಿಯೊನಾ ಹುತಿ ಕದ್ಯೊಮ ತುಮೆ ಕಿಮ್ಮ ಬರೊಕ್ಹೊ ಕರೊಶಿ? ಸ್ವರ್ಗತೊ ಉತ್ರಿನ ಆಯಲ ಮನಕ್ಹನೊ ದಿಕ್ರೊ ಯಕ್ಲೊಜ಼ ವ್ಹೈ. ತೆನೈಸೊ ಬಿಜು಼ ಕುನ್ನಜ ಸ್ವರ್ಗನೆ ಗಯು ನತ್ತಿ.
"ಮೊಶೆ ಉಸುಕನಾ ಗಾಮಮಾ ತಾಂಬಾನಾ ಕ್ಹಾಪನೆ ಉಚ್ಚು ರ್ಹಯಲ ಖಾಂಪರ ಮ್ಹೆಲ್ಯೊ. ತಿನಾನಿಂಗತಜ಼ ಮನಕ್ಹನಾ ದಿಕ್ರಾನೆಬಿ ಉಚೈನ ಉಚ್ಚು ರ್ಹಯಲ ಖಂಬಾಪರ ಮ್ಹೆಲಸ. ತಿನಾಹುತಿ ತಿಪರ ಬರೊಕ್ಹೊ ಮ್ಹೆಲಾಲೊ ಹರಿ ಯಕ್ಲೊ ಹಮೆಶಾನೊ ಜ಼ಲಮ ಹೊಂದಿಲಿವಸ" ಕೈನ ಕದ್ಯೊ. ಹೊ, ಕ್ಹುದಾ ದುನಿಯಾನೆ ಕೆಕ್ಲಿಕೆ ಮಯಾ ಕರಿನ ತಿನಾ ಯಕ್ಕಜ಼ ದಿಕ್ರಾನೆ ದಿದ್ಯೊ; ತಿನೆ ಬರೊಕ್ಹೊ ಕರಾಲೊ ಯಕ್ಲೊಬಿ ಹಾಳ ಥಯಾವಾಚಿ ಕ್ಹಾರಾ ಜ಼ನಾ ಹಮೆಶಾನೊ ಜ಼ಲಮ ವ್ಹಂದಿಲ್ಯು ಕೈನ ತಿನೆ ದಿದ್ಯೊ. ಕ್ಹುದಾ ತಿನಾ ದಿಕ್ರಾನೆ ಎ ದುನಿಯಾಮಾ ವಳಾಯಲ, ತಿನಾ ಮುಲಕ ಎ ದುನಿಯಾನಾ ಮನಕ್ಹೊನೆ ಅಪರಾದಿ ವ್ಹೈ ಕೈನ ಫೈಸಲೊ ಕರಾನೆ ನ್ಹವೈ. ತೆನೈಸೊ ರಕ್ಷಣೆ ವ್ಹಂದಿಲ್ಯು ಕೈನ ಕ್ಹುದಾ ತಿನೆ ವಳಾಯೊ.
ಕ್ಹುದಾನಾ ದಿಕ್ರಾಪರ ಬರೊಕ್ಹೊ ಮ್ಹೆಲಾವಾಲಾನೆ ಫೈಸಲೊ ನೈ ಥಾತೊ. ತೆನೈಸೊ ನೈ ಬರೊಕ್ಹೊ ಕರಾಲಾನೆ ತೆಳಾಮಾಜ಼ ಫೈಸಲೊ ಥಯೊಸ. ಕಾಕದ್ಯಾಮ ತೆ ಕ್ಹುದಾನೊ ಯಕ್ಲೊಜ಼ ದಿಕ್ರಾಪರ ಬರೊಕ್ಹೊ ಮ್ಹೆಲ್ಯೊ ನೈ. ತೆ ನ್ಯಾಯನೊ ಫೈಸಲೊ ಅಮ್ಮ ರ್ಹವಸ ಉಜಾಲು ದುನಿಯಾಮಾ ಆಯು ವರಿಬಿ ಮನಕ್ಹೊ ಉಜಾಲಾನಾ ಬದಲ ಅಂದಾರಾನೆ ಮಯಾ ಕರ್ಯಾ ಕಾಕದ್ಯಾಮ ತಿನಾ ಕಾಮೊ ಕೆಟ್ಟ ವ್ಹೈ. ಕೆಟ್ಟ ಕರಾಲೊ ಹರಯಕ್ಲೊ ಉಜಾಲಾನೆ ಇನ್ಕಾರಸ. ತೆ ಉಜಾಲಾಮಾ ಆತೊ ನೈ. ಕಾಕದ್ಯಾಮ ತ್ಯುನೆ ಕರಲ ಕೆಟ್ಟ ಕಾಮೊ ಕ್ಹಾರಾ ಉಜಾಲಾಮಾ ದಿಕ್ಹು ಕೈನ ಮನಸ ರ್ಹತು ನೈ.. ತೆನೈಸೊ ಕುನ್ನ ಕ್ಹರಿನಿ ಕಾಮ ಕರಸ ತೆ ಉಜಾಲಾನಾ ನಜಿಕ ಆವಸ. ಕಾಕಾದ್ಯಾಮ ಉಜಾಲು ತ್ಯುನು ಕಾಮ ದಿಕ್ಹಾದೆ ಕೈನ ತ್ಯುನೆ ಸು-ಸು ಕರ್ಯಾಸ ತೆ ಕ್ಹಾರು ಕ್ಹುದಾನಾ ಮುಲಕ ಕರಾಯಲ ಛೆ.
ಯೆಸು ವರಿ ಬಾಪ್ತಿಸ್ಮ ದಿಲಾವಾಲೊ ಯೊಹಾನ
ಎ ಥಯಲ್ಪರ, ಯೆಸು ವರಿ ತಿನಾ ಶಿಷ್ಯಾ ಯುದೆಯ ಕವಾನಾ ಪ್ರಾಂತ್ಯನೆ ಗಯಾ. ತ್ಯಾ ಯೆಸು ತಿನಾ ಶಿಷ್ಯಾವೊನಾ ಕ್ಹಾತೆ ದಕ್ಹಾ ದಿನ್ನ ರ್ಹೈನ, ಮನಕ್ಹೊನೆ ಬಾಪ್ತಿಸ್ಮ ಕರಾಯೊ. ಯೊಹಾನಬಿ ಸಲಿಮನಾ ನಜಿಕ ರ್ಹಯಲ ಐನೊನ ಗಾಮ್ಮಾ ಬಾಪ್ತಿಸ್ಮ ಕರಾವಾಡ್ಯೊತೊ. ಕಾಕದ್ಯಾಮ ತ್ಯಾ ಘನ್ನು ಪಾನಿ ರ್ಹಯಲಕ್ಹು ಯೊಹಾನ ತ್ಯಾ ಮನಕ್ಹೊ ತ್ಯಾ ಐನ ಬಾಪ್ತಿಸ್ಮ ಕರೈಲಿವಾಡಾತಾ. (ತೆಳಾಮಾ ಯೊಹಾನೆ ಹಜು಼ನ ಜೈಲಮಾ ಘಾಲ್ಯಾ ನ್ಹೊತಾ)
ಯೊಹಾನನಾ ಶಿಷ್ಯಾವೊನಾ ದಕ್ಹಾ ಜ಼ನಾವೊನೆ ಯಕ್ಲಾ ಯೆಹುದಿಯೊನಾ ಪದ್ದತನಿ ಶುದ್ಧಾಚಾರನಾ ಹುತಿ ವಾದ-ವಿವಾದ ಚಾ಼ಲಾಡ್ಯುತು. ತಿನಾಹುತಿ ಶಿಷ್ಯಾ ಯೊಹಾನ ಕನ ಐನ"ಗುರು, ತುನೆ ಶೆ ಛೆಸು? ತೆ ಮನಕ್ಹ ಯೊರ್ದನನಿ ಪುರ್ವ ದಿಕ್ಮಾ ತಾರಾ ಕ್ಹಾತೆ ವ್ಹತ್ತೊ ವರಿ ತು ತಿನಾ ಹುತಿ ಕದ್ಯೊತೊತೊ? ತೆ ಮನಕ್ಹೊನೆ ಬಾಪ್ತಿಸ್ಮ ದಿಲಾವಾಡ್ಯೊಸ. ಘನ್ನಾ ಮನಕ್ಹೊ ತಿಕನ ಚಾ಼ಲ್ಯಾಸ "ಕೈನ ಕದ್ಯಾ.
ಯೊಹಾನ, ಕಯಾಜ ಮನಕ್ಹನೆ ತ್ಯಾಲಕ್ಕಾ ಮಳತು ನೈ, ಕಿಜಾ಼ ಲಕ್ಕಾ ತಿನೆ ಕ್ಹುದಾ ದೆತೊ ನೈ. ತುಮೆ ಕ್ಹಾರಾ ಸಾಕ್ಷಿ ಥಯಾಸ ಮಿ ಕದ್ಯೊತೊ; ಮಿ ಕ್ರಿಸ್ತ ನ್ಹೈ. ತೆನೈಸೊ ಮನೆ ತಿನಾತಿ ಪೈಲಾ ವಳಾಯಲ ವ್ಹೈ. ನೌರಿ ನೌರಾನಿಜ ವ್ಹೈ. ನೌರಾನೆ ಸಹಾಯ ಕರಾಲೊ ದೊಸ್ತ ನೌರೊ ಆವಾನಾ ಹುತಿ ಕೈದತೊ ರ್ಹವಸ ವರಿ ತೆ ಬಲಾವಸ ಕೈನ ಕಾನ ದಿನ್ನ ಐಕ್ತೊ ರ್ಹವಸ. ನೌರಾನೊ ಗಳೊ ಐಕ್ತಾಮಾ ತೆ ದೊಸ್ತ ಘನ್ನೊ ಖುಶಿ ಥಾವಸ. ತೆಜ಼ ಮಾರಿ ಖುಶಿ ಪುರಾ ಥಯು. ತೆ ಮ್ಹೊಟೊ ಥೌ ವರಿ ಮಿ ನ್ಹಾನೊ ಥೌ.
ಎ ಸ್ವರ್ಗತೊ ಆಯಲವಾಲೊ ವ್ಹೈ.
"ಉಪ್ಪರ್ತೊ ಆವಾಲೊ ಯಕ್ಲೊ ಬಿಜಾ಼ ಕ್ಹಾರಾ ಮನಕ್ಹೊತಿಬಿ ಮ್ಹೊಟೊ ವ್ಹೈ. ಕುನ್ನ ದುನಿಯಾವಾಲೊ ವ್ಹೈ ತೆ ದುನಿಯಾನೆ ಸಂಭಂದ ರ್ಹಯಲವಾಲೊ ವ್ಹೈ. ತೆ ದುನಿಯಾನಾನಿ ಸಂಗತಿಯೊನಾ ಹುತಿ ಬೊಲಸ. ಕುನ್ನ ಸ್ವರ್ಗತು ಆವಸ ತೆ ಕ್ಹಾರಾವೊತಿ ಮ್ಹೊಟೊ ಥಯೊಸ. ತೆ ದೆಕಲ ಕ್ಹಾರಾನಾ ಹುತಿ ವರಿ ಐಕಲ ಕ್ಹಾರಾನಾ ಹುತಿ ಸಾಕ್ಷಿ ದಿವಸ. ತೆನೈಸೊ ತಿನಿ ಸಾಕ್ಷಿನೆ ಮನಕ್ಹೊ ಸ್ವಿಕಾರ ನೈ ಕರ್ತಾ. ತೆನೈಸೊ ತಿನಿ ಸಾಕ್ಷಿನೆ ಕುನ್ನ ಸ್ವಿಕಾರ ಕರಿಲಿವಸ ತೆ ಅಮ್ಮ ಕರಾಕ್ಹು ಕ್ಹುದಾಜ ಕ್ಹರಿ ವ್ಹೈ ಕೈನ ದೆಕಾಡಿನ ದಿವಸ. ಕಾಕದ್ಯಾಮ ಕ್ಹುದಾ ಕಿನೆ ಮೊಕ್ಲ್ಯೊಸ ತೆ ಕ್ಹುದಾನಿಯೊ ವಾತೊ ಬೊಲಸ. ಕಾಕದ್ಯಾಮ ಕ್ಹುದಾ ತಿನೆ ಪರಿಪುರ್ಣ ಆತ್ಮಾ ದಿದ್ಯೊಸ. ಬಾ ದಿಕ್ರಾನೆ ಮಯಾ ಕರಸ. ಬಾ ದಿಕ್ರಾನೆ ಹರಯಕ್ಕ ಪರ ಅದಿಕಾರ ದಿದ್ಯೊಸ. ಕುನ್ನ ದಿಕ್ರಾ ಪರ ಬರೊಕ್ಹೊ ಮ್ಹೆಲಸ ತಿನೆ ಹಮೆಶಾನೊ ಜ಼ಲಮ ಮಳಸ. ತೆನೈಸೊ ದಿಕ್ರಾನೆ ವಿಧೆಯ ನೈ ಥಾತೊ ತಿನೆ ತೆ ಜ಼ಲಮ ಕೆಳಾಮಾಜ ಮಳ್ತೊ ನೈ. ಕ್ಹುದಾನಿ ಶಿಟ್ಟ ತಿನಾ ಉಪ್ಪರ ರ್ಹವಸ" ಕೈನ ಉತ್ತರ ದಿದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.