Sikkiligar Bible
ಆದಿ 26
ಗೆರಾರಮಾ ಇಸಾಕ ರ್ಹಯಲ
ಅಬ್ರಹಾಮನಾ ಕಾಲಮಾ ಆಯಲ ಬರ್ಗಾಲ ಯಕ್ಕಜ಼ ನೈಸೊ ಬಿಜೆಕ ಬರ್ಗಾಲ ಕಾನಾನ ದೆಶಮಾ ಪಡ್ಯು. ತೆಳಾಮಾ ಇಸಾಕ ಫಿಲಿಷ್ಟಿನೊ ರಾಜೊ಼ ಥಯಲ ಅಬಿಮೆಲಕಕನ ಗೆರಾರಿಯೆ ಗಯೊ. ತ್ಯಾ ಯಹೊವಾ ಇಸಾಕನೆ ದರ್ಶನ ದಿನ ತು ಐಗುಪ್ತ ದೆಶನೆ ಉತ್ರಿನ ಜೌ಼ ನಕೊ ಮಿ ಕವಾನಾ ದೆಶ ಗೈನ ತ್ಯಾ ಜಿವ್ನಾ ಕರು. ತು ಎ ದೆಶಮಾ ರ್ಪವಾಸಿ ಥೈನ ರ್ಹೌ. ಮಿ ತಾರಾ ಕ್ಹಾತೆ ರ್ಹೈನತುನೆ ಅಭಿವೃದ್ದಿ ಕರಿನ ತುನೆ ತಾರಿ ಸಂತತಿನೆ ಎ ಪ್ರದೆಶ ಕ್ಹಾರು ದಿಪಾಡುಸ. ಇಮ ತಾರಾ ಮಾ ಬಾಪನೆ ಕರಲ ವಾಗ್ದಾನನೆ ಪುರಾ ಕರುಸ. ತಾರಿ ಸಂತತಿಯೊನೆ ಹಬಾಳಮಾ ರ್ಹಯಲ ಚಿಕ್ಕಿಯೊ ನಿಂಗತ ಹುಟ್ಸೌಸ. ತಾರಿ ಸಂತತಿನೆ ಎ ಪ್ರದೆಶ ದಿಪಾಡುಸ. ತಾರಿ ಸಂತತಿನಾ ಮುಲಕ ಜಿಮಿನ್ಪರ ರ್ಹಯಲ ಕ್ಹಾರಿ ಜ಼ನಾಂಗನೆ ಆಶಿರ್ವಾದ ಮಳಸ. ಕಾ ಕದ್ಯಾಮ ಅಬ್ರಹಾಮ ಮಾರಿ ವಾತನೆ ವಿಧೆಯ ಥೈನ ಮಾರಿಯೊ ನಿಯೊಮೊನೆ ಪ್ರಕಾರಜ಼ ಚಾ಼ಲಿಲಿನ ಗಯೊ. ಇಸಾಕ ಗೆರಾರಿಮಾ ವ್ಹತೊ. ತೆ ಗಾಮನಾ ಮನಕ್ಹೊ ತಿನೆ ಬೈಕೊನೆ ದೆಕಿನ ತಿನೆ ಪುಚ್ತಾ಼ಮಾ ತೆ ರೆಬೆಕ್ಕಳ ಸುಂದರ ರ್ಹಯಲಹುತಿ ತೆ ಜ಼ಗಾನಾ ಮನಕ್ಹೊ ಇನಾಹುತಿ ಮನೆ ಖಲಾಸ ಕರಸ ಕೈನ ತೆ ತಿನಿ ಬೈಕೊ ವ್ಹೈ ಕೈನ ಕವಾನೆ ಭುಚ಼ಕಿನ ಎ ಮಾರಿ ನ್ಹಾನಿ ಭೆನ ವ್ಹೈ ಕೈನ ಕದ್ಯೊ. ತೆ ತೆ ಜ಼ಗಾಪರ ಘನ್ನಾ ದಿನ್ನ ರ್ಹಯಲ್ಪರ ಯಕ್ಕ ದಿನ್ನ ಫಿಲಿಷ್ಟಿನೊ ರಾಜು಼ ರ್ಹಯಲ ಅಬಿಮೆಲಕ ಖಿಡಕಿಮಾತೊ ದೆಕ್ತಾಮಾ ಇಸಾಕ ತಿನಿ ಬೈಕೊ ರೆಬೆಕ್ಕಳನಾ ಕ್ಹಾತೆ ಮಯಾ ಕರಾನು ದೆಕ್ಯೊ. ತೆಳಾಮಾ ಅಬಿಮೆಲಕ ಇಸಾಕನೆ ಬಲೈನ ಆ ಬಾಕ್ಡಿ ತಾರಿ ಬೈಕೊ ವ್ಹೈ ತೆ ತಾರಿ ಬೈಕೊ ವ್ಹೈ ಕೈನ ಕಾ ಕದ್ಯೊ? ಕೈನ ಪುಚ್ಯೊ. ಇಸಾಕ ತಿನೆ ತು ತಿನೆ ಲಿವಾನಹುತಿ ಮನೆ ಖಲಾಸ ಕರಿಪಾಡ್ಸಿ ಕೈನ ಇನಾನಿಂಗತ ಕದ್ಯೊ . ಅಬಿಮೆಲಕ ತಿನೆ ತು ಹಮೊನೆ ಕೆಟ್ಟ ಕರ್ಯೊ ಹಮೊಮಾ ರ್ಹಯಲ ದಾಣ್ಗಾವೊಮಾ ತಾರಿ ಬೈಕೊನಾ ಕ್ಹಾತೆ ಕ್ಹುರವಾನಾಹುತಿ ತುಜ಼ ವಾಟ ಕರಿನೆ ದಿದ್ಯೊಸ. ತೆ ಕ್ಹಾರು ಥಾವತ್ತೊ ಮ್ಹೊಟು ಅಪರಾಧ ಥಾತುತು ಕೈನ ಕದ್ಯೊ. ತೆಳಾಮಾ ಅಬಿಮೆಲಕ ತಿನಾ ಪ್ರಾಜಾನೆ ಆ ಮನಕ್ಹ ಇನಿ ಬೈಕೊನೆ ಸುಜ಼ ಕೆಟ್ಟ ಕರು ನೈ ಕೈನ ಇವ್ನೊನೆ ಕೆಟ್ಟ ಕರಾಲಾವೊನೆ ಖಲಾಸ ಕರೈಪಾಡುಸ ಕೈನ ಕದ್ಯೊ.
ಪಿಲಿಷ್ಟಿಯೊ ಇಸಾಕನೆ ವಳಾಯಲ
ಇಸಾಕ ತೆ ಪ್ರದೆಶ ಬಿಯ್ಯಾ ಬಿತ್ಯು ತೆ ತಿನೆ ತೆಜ಼ ವರಕ್ಹಮಾ ಮ್ಹೊಟಿ ಸುಗ್ಗಿ ಥೈ. ಯೆತಿನೆ ಘನ್ನೊ ಆಶಿರ್ವಾದ ದಿದ್ಯೊ. ತಿನಿ ಸೌಕಾರತನಾ ಜಾಸ್ತಿ ಥಾತಿ-ಥಾತಿ ತೆ ಘನ್ನೊ ಸೌಕಾರ ಥಯೊ. ತಿನೆ ಢೊರೊ ಬಕ್ರಾ ವರಿ ಪ್ರಾಣಿಯೊನು ಹಿಂಡ ವ್ಹತು. ಯಕ್ಲುಜ಼ ನೈಸೊ ತಿನೆ ಘನ್ನಾ ಸೆವಕೊ ವ್ಹತಾ ಎ ಕ್ಹಾರು ಫಿಲಿಷ್ಟಿವಾಲಾ ದೆಕಿನ ತಿನಾಹುತಿ ಸಂಗಟ ಘಾಲ್ಲಿವಾಡ್ಯಾತಾ. ತಿನಾಹುತಿ ಘನ್ನಾ ವರಕ್ಹ ಪಾಚೊ಼ ಅಬ್ರಹಾಮ ವರಿ ತಿನಾ ಸೆವಕೊ ಕಾಡಲ ಇರನೆ ಫಿಲಿಷ್ಟಿವಾಲಾ ತಿಮಾ ಮಾತಿ ಘಲಿನ ಝಾಕಿಪಾಡ್ಯಾ. ಅಬಿಮೆಲೆಕ ಇಸಾಕನೆ ಮಾರು ದೆಶ ಛೊಡಿನ ಗೈಪಡ ಕಾ ಕದ್ಯಾಮ ಮಾರಾತಿಬಿ ತು ಘನ್ನೊ ತಾಕವರ ಥಯೊಸ ಕೈನ ಕದ್ಯೊ. ತಿನಾಹುತಿ ಇಸಾಕ ತ್ಯಾಂತೊ ಗೈನ ಗೆರಾರಿನಾ ನ್ಹಾನಾ ವಕ್ಳಾನಾ ಬಾಜು಼ಮಾ ರ್ಹವಾನೆ ಜ಼ಗಾ ಕರಿಲಿದ್ಯೊ. ಇಸಾಕ ತ್ಯಾ ರ್ಹಯೊ. ಇತ್ತಿ ಪೈಲಾ ಘನ್ನಾ ವರಕ್ಹ ಪಾಚಾ಼ ಅಬ್ರಹಾಮ ಘನ್ನಿಯೊ ಇರೊ ಖಂದಾಯೊತೊ ಅಬ್ರಹಾಮ ಮರಲ್ಪರ ಫಿಲಷ್ಟಿಯೊ ತೆ ಇರೊ ಝಾಕಿ ಪಾಡ್ಯಾ. ಇಸಾಕ ತೆ ಇರೊ ವರಿ ಕಡೈನ ತಿನೊ ಬಾಪ ದಿದಲಜ಼ ನಾಮೊ ದಿದ್ಯೊ. ಇಸಾಕನಾ ಸೆವಕೊ ನ್ಹಾನಾ ವಕಳಾನಾ ನಜಿ಼ಕ ಐನ ಇರ ಖಂದ್ಯಾ ತೆ ತೆ ಇರಮಾ ಪಾನಿ ನಿಕ್ಹಳ್ಯು. ತೆ ನೈಸೊ ಗೆರಾರಿನಾ ಕಣಿವೆಮಾ ಢೊರೊ ವರಿ ಬಕ್ರಾ ಕೈದಾಲಾ ಮನಕ್ಹೊ ಇಸಾಕನಾ ಸೆವಕೊನಾ ಕ್ಹಾತೆ ತಕ್ರಾರ ಕರಿನ ಎ ಪಾನಿ ಹಮಾರು ವ್ಹೈ ಕೈನ ಕದ್ಯಾ. ತಿನಾಹುತಿ ಇಸಾಕ ತೆ ಇರನೆ ಎಸೆಕ ಕೈನ ನಾಮ ಮ್ಹೆಲ್ಯೊ. ತೆ ಥಯಲ್ಪರ ಇಸಾಕನಾ ಸೆವಕೊ ವರಿ ಯಕ್ಕ ಇರ ಖಂದ್ಯಾ ತೆಳಾಮಾ ತ್ಯಾನಾ ಮನಕ್ಹೊ ಇರನಾ ಹುತಿ ತಕ್ರಾರ ಕರ್ಯಾ. ತಿನಾಹುತಿ ಇಸಾಕ ತೆ ಇರನೆ ಸಿಟ್ನಾ ಕೈನ ನಾಮ ಮ್ಹೆಲ್ಯೊ. ಇಸಾಕ ತ್ಯಾಂತೊ ಗೈನ ವರಿ ಯಕ್ಕ ಇರ ಖಂದಾಯೊ. ತೆ ಇರನಾ ಹುತಿ ತಕ್ರಾರ ಕರಾನೆ ಕುನ್ನಜ಼ ಐಯುನೈ. ತಿನಾಹುತಿ ಇಸಾಕ ಹಮ್ನಾ ಯಹೊವಾ ಅಪ್ನಾಹುತಿ ಯಕ್ಕ ಜ಼ಗಾ ದೆಕಾಡಿನೆ ದಿದ್ಯೊಸ. ಅಪೆ ಎ ಜ಼ಗಾಪರ ಅಭಿವೃದ್ದಿ ಥೈಯೆಸ ಕೈನ ತೆ ಇರನೆ ರೆಹೊಬೊತ ಕೈನ ನಾಮ ಮ್ಹೆಲ್ಯೊ. ಇಸಾಕ ತೆ ಜ಼ಗಾ ಕಂತೊ ಬೆರಷೆಬನೆ ಗಯೊ. ತೆ ರಾತೆ ಇಸಾಕನೆ ಕ್ಹುದಾ ದಿಕ್ಹಿನ ಮಿ ತಾರಾ ಬಾ ಥಯಲ ಅಬ್ರಹನೊ ಕ್ಹುದಾ ವ್ಹೈ. ಭುಚ್ಕು ನಕೊ ಮಿ ತಾರಾ ಕ್ಹಾತೆ ಛೆ. ಮಿ ತುನೆ ಆಶಿರ್ವಾದ ದ್ಯುಸ ಮಿ ತಾರಾ ಕುಟುಂಬನೆ ಉನ್ನತ ಸ್ಥಿಮಾ ಲೌಸ. ಮಾರೊ ಸೆವಕ ಥಯಲ ಅಬ್ರಹಾಮನಾ ಹುತಿ ಎ ಕ್ಹಾರು ಕರುಸ.ಕೈನ ಕದ್ಯೊ ತಿನಾಹುತಿ ತೆ ಜ಼ಗಾಪರ ಇಸಾಕ ಬಲಿನೊ ಕಟ್ಟೊ ಭಾಂದಿನ ಯಹೊವಾನೆ ಆರಾಧನಾ ಕರ್ಯೊ.ಇಸಾಕ ತೆ ಜ಼ಗಾಪರ ಪಾಳೆ ಕರಿಲಿದ್ಯೊ.ತಿನಾ ಸೆವೆಕೊ ಯಕ್ಕ ಇರ ಖಂದ್ಯಾ.
ಇಸಾಕ ವರಿ ಅಬಿಮೆಲಕನಾ ವಚ್ಮಾ ವಪ್ಪಂದ
ಅಬಿಮೆಲಕ ಇಸಾಕನೆ ದೆಕಾನಾಹುತಿ ಗೆರಾರಿತೊ ಆಯೊ. ಅಬಿಮೆಲೆಕ ಸಲಹೆ ದಿವಾಲೊ ಅಹುಜ್ಜತನ ವರಿ ಸೆನಾದಿಪತಿ ಥಯಲ ಫಿಕೊಲನನೆ ತಿನಾ ಕ್ಹಾತೆ ಬಲೈಲಾಯೊತೊ. ಇಸಾಕ ತಿನೆ ಮನೆ ದೆಕಾನಾಹುತಿ ಆಯೊಸ ಕಾ? ಪೈಲಾ ತು ಮಾರಾ ಕ್ಹಾತೆ ದೊಸ್ತ ನಿಂಗತ ನ್ಹೊತೊ ವರಿ ತಾರು ದೆಶ ಛೊಡಿನೆ ಜಾ಼ವಾನಾ ಹುತಿ ತು ಜ಼ಬರದಸ್ತಿ ಕರ್ಯೊತೊ. ಕೈನ ಕದ್ಯೊ. ತ್ಯುನೆ ತಿನೆ ತಾರಾ ಕ್ಹಾತೆ ಯಹೊವಾ ಛೆ ಕೈನ ಹಮ್ನಾ ಹಮೊನೆ ಗ್ವತ್ತ ಥೈಯು. ಅಪೆ ಯಕ್ಕ ವಪ್ಪಂದ ಕರಿಲ್ಯು ಕೈನ ಹಮಾರಿ ವಿಚಾರ ವ್ಹೈ. ತು ಹಮೊನೆ ಯಕ್ಕ ಕ್ಹಮ ಘಾಲು ಕೈನ ಛೆ. ತಿನಾಹುತಿ ಇಸಾಕ ತ್ಯುನಾಹುತಿ ಯಕ್ಕ ಮ್ಹೊಟು ಖಾವಾನು ಕರಾಯೊ. ತ್ಯುನೆ ಕ್ಹಾರಾ ಚೊಕಿತರಾ ಅನ್ನ ಖಾದ್ಯಾ. ಮರ್ನಾ ದಿನ್ನಾ ಪಾಟೆ ತ್ಯುನೆ ಯಕ್ನಾ ಯಕ್ಕ ಕ್ಹಮ ಘಾಲಿನ ಸಮಾಧಾನುಕ್ಹು ಗಯಾ. ತೆ ದಿನ್ಮಾ ಇಸಾಕನಾ ಸೆವಕೊ ಐನ ತ್ಯುನೆ ಖಂದಲ ಇರನಾ ಹುತಿ ಕತಾಮ ತ್ಯಾ ಹಮೊನೆ ಪಾನಿ ಮಳ್ಯುಸ ಕೈನ ಕದ್ಯಾ.
ತಿನಾಹುತಿ ಇಸಾಕ ತೆ ಇರನೆ ಸಿಬಾ ಕೈನ ನಾಮ ಮ್ಹೆಲ್ಯೊ ತೆ ದಿನ್ನತಾಜ಼ ತೆ ಗಾಮನೆ ಬೆರ್ಷೆಬ ಕೈನ ಕವಸ.
ಎಸಾವನಾ ಬಾಕ್ಡಿಯೊ
ಎಸಾವಾನೆ ಚಾ಼ಳಕ್ಹ ವರಕ್ಹ ಥಾತಾಮಾ ಹಿತ್ತಿಯೊಮಾನಾ ಬೆ ಜ಼ನಿಯೊನೆ ಹಿವಾ ಕರ್ಲಿದ್ಯೊ. ಯಕ್ಲಿ ಬೆರಿನಿ ದಿಕ್ರಿ ಥಯಲ ಯೆಹುದಿತಳನೆ ವರಿ ಯಕ್ಲಿ ಎಲೊನನಿ ದಿಕ್ರಿ ಥಯಲ ಬಾಶೆಮತನೆ, ಹಿವಾ ಕರಿಲಿದ್ಯೊ. ಎ ಹಿವಾವೊಕ್ಹು ಇಸಾಕ ವರಿ ರೆಬೆಕ್ಕನಾ ಮನಸನೆ ಘನ್ನು ದುಖ ಥಯು.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.