ಆದಿ 25

ಅಬ್ರಹಾಮನಿ ಬಿಜೆಕ ಸಂತತಿ

1ಅಬ್ರಹಾಮ ಕೆಟೊರ ಕವಾಲಿ ವರಿ ಯಕ್ಲಿನೆ ಹಿವಾ ಕರಿಲಿದ್ಯೊ. 2ತೆ ಅಬ್ರಹಾಮನೆ ಜಿಮ್ರಾನ, ಯೊಕ್ಷಾನ, ಮೆದಾನ, ಇಷ್ಬಾಕ, ಶುಹಾ ಇವ್ನೊನೆ ಜ಼ನ್ನಿ. 3ಯೊಕ್ಷಾನ ಶೆಬಾ, ದೆದಾನ ಕವಾಲಾವೊನೆ ಪಡದ್ಯೊ. ಅಶ್ಮೊರ್ಯರ, ಲೆಟುಶ್ಯರೊ,ಲೆಯುಮ್ಯರ ದೆದಾನಕ್ಹು ಹುಟ್ಯಾ. 4ಗೆಫಾ, ಗೆಫರ, ಹನೊಕ, ಅಬಿದಾ, ಎಲ್ದಾಯಾ ಕವಾಲಾ ಮಿದ್ಯಾನಕ್ಹು ಹುಟ್ಯಾ. ಇವ್ನೆ ಕ್ಹಾರಾ ಕೆಟೊರನಿ ಸಂತತಿ ವ್ಹೈ. 5ಅಬ್ರಹಾಮ ತಿನಿ ಆಸ್ತಿ ಕ್ಹಾರಿ ಇಸಾಕನೆ ದಿದ್ಯೊ. 6ಅಬ್ರಹಾಮ ತಿನಿಯೊ ಬಿಜಿಯೊ ಬಾಕ್ಡಿಯೊನಾ ಬಚ್ಚಾ಼ವೊನೆ ಆಸ್ತಿ ದಾನ ಕರ‍್ಯೊ ವರಿ ತೆ ಜಿವ್ತೊ ರ‍್ಹತಾಸ್ತಾಜ಼ ತ್ಯುನೊನೆ ಇಸಾಕಕಂತೊ ಪುರ್ವ ದಿಕ್ಕಮಾ ರ‍್ಹಯಲ ಕೆದೆಮ ದೆಶನೆ ಮೊಕಲ್ಯೊ.

ಅಬ್ರಹಾಮನು ಮರಣ

7ಅಬ್ರಹಾಮ ಯಕ್ಹೊನ ಸತ್ತರ್ಪರ ಪಾಂಚ ವರಕ್ಹ ಜಿವ್ತೊ ವ್ಹತೊ. 8ಅಬ್ರಹಾಮ ತಿನಿ ವೈಸ ಪುರಾ ಥೈನ ಗಡಿಯೊ ಥೈನ ಮರಿನ ತ್ಯುನಾ ಪಿತೃಯೊಕನ ಗೈನ ಮಳ್ಯೊ. 9ತಿನಾ ದಿಕ್ರಾ ಥಯಲ ಇಸಾಕ ಇಷ್ಮಾಯೆಲ ಹಿತ್ತಿಯ ಥಯಲ ಚೊಹರನೊ ದಿಕ್ರೊ ಎಫ್ರನೆಣಿ ಜಮಿನಮಾ ರ‍್ಹಯಲ ಮಕ್ಪೆಲನ ಗವಿಮಾ ತಿನೆ ಸಮಾದಿ ಕರ‍್ಯಾ. ತೆ ಮಮ್ರೆಯ ತೊಪನಿ ಪುರ್ವ ದಿಕ್ಕಮಾ ಛೆ. 10ಅಬ್ರಹಾಮ ತೆ ಜಿಮಿನ ಹಿತ್ತಿಯವಾಲಾವೊಕಂತಿ ಇಕ್ಕಾತಿ ಲಿದ್ಯೊತೊ ತಿನಾಜ಼ ಅಬ್ರಹಾಮನಿ ಬೈಕೊ ಸಾರಾಳನೆ ವರಿ ತಿನೆ ಸಮಾದಿ ಥೈ. 11ಅಬ್ರಹಾ ಮರಲ್ಪರ ಕ್ಹುದಾನಿ ಮರ್ಗಾ ತಿನೊ ದಿಕ್ರೊ ಥಯಲ ಇಸಾಕನೆಬಿ ಮಳಿ.ಇಸಾಕ ಬೆರ ಲಹೈರೊಹಿ ಕನ ವ್ಹತೊ.

ಇಸ್ಮಾಯಿಲನು ಘರ್ದಾನು

12ಅಬ್ರಹಾಮ ಸಾರಳಾ ಐಗುಪ್ತನಿ ದಾಸಿ ಥಯಲ ಹಾಗರಳನೆ ಹುಟ್ಟಲ ಇಷ್ಮಾಯೆಲನಿ ಕುಟುಂಬನಿ ಚರಿತ್ರ. 13ಇಷ್ಮಾಯಿಲನಾ ಬಚ್ಚಾ಼ವೊನೆ ಇನಾಕ್ಹು ಹುಟ್ಟಲ ಕುಟುಂಬನಾ ನಾಮೊ ಕಯಾ ವ್ಹೈ ಕದ್ಯಾಮ; ಪೈಲಾ ಹುಟ್ಟಲ ನೆಬಾಯೊತ, ಪಾಚಾ಼ತೊ ಕೆದಾರ ಅದ್ಬೆಯೆಲ ಮಿಬ್ಸಾಮ, 14ಮಿಷ್ಮಾ ದುಮಾ ಮಸ್ಸಾಸಂತಾನವಾಲಾ ಇವ್ನೆಜ಼ ವ್ಹೈ.ಇವ್ನಾ ಕುಲವಾಲಾ 15ಹದದ, ತೆಮಾ ಯಟುರ ನಾಫಿಷ ಕೆದ್ಮಾ ಕವಾಲಾ 16ತ್ಯುನಾ ಖಾಂದಾನನಾ ಗಾಮೊಮಾ ಪಾಳೆಮಾ ರ‍್ಹಯಲ ಇಷ್ಮಾಯಿಲ ಸಂತಾನವಾಲಾ ಇವ್ನೆಜ಼ ವ್ಹೈ.ಇವ್ನಾ ಕುಲವಾಲಾ ಸಂಖೆನಿಂಗತ ಬಾರಾ ಜ಼ನಾ ಅರಸರಿಕರಸ. 17ಇಷ್ಮಾಯಿಲ ಯಕ್ಹೊನ ಮುವತ್ತಪರ ಕ್ಹಾತ ವರಕ್ಹ ಜಿವ್ತೊ ವ್ಹತೊ. ಪಾಚಾ಼ತೊ ತೆ ಮರ‍್ಯೊ. ತ್ಯುನಾ ಪಿತೃವೊಕನ ಮಳ್ಯೊ. 18ಇಷ್ಮಾಯಿಲೊ ಹವಿಲತೊಐಗುಪ್ತ ದೆಶಮುಡಲಮಾ ರ‍್ಹಯಲ ಅಶ್ಯುನಿ ವಾಟ್ಮಾ ರ‍್ಹಯಲ ಶುರಿನ ಲಕ್ಕಾ ವಾಸ ಕರ‍್ಯಾ. ಇಮ ತ್ಯುನೊನೆ ತ್ಯುನಾ ಸಂಭದಿಕೊನೆ ರ‍್ಹವಾನೆ ಜ಼ಗಾ ಮಳಿ.

ಎಸಾವ ವರಿ ಯಾಕೊಬ ಹುಟ್ಟಲ

19ಅಬ್ರಹಾಮನಾ ದಿಕ್ರೊ ಥಯಲ ಇಸಾಕನಿ ಚರಿತ್ರೆ. 20ಅಬ್ರಹಾಮ ಇಸಾಕನೆ ಪಡದ್ಯೊ. ಇಸಾಕ ಚಾ಼ಳಕ್ಹವರಕ್ಹೊನಾ ರ‍್ಹತಾಮಾ ಅರ್ಯಾಮನೊ ಥಯಲ ಬೆತೊವೆಲನಿ ದಿಕ್ರಿ ಅರಾಮ್ಯ ಥಯಲ ಲಾಬಾನನಿ ನ್ಹಾನಿ ದಿಕ್ರಿನ ಥಯಲ ರೆಬೆಕ್ಕನೆ ಪದ್ದನ ಅರಾಮ್ತೊ ಬಲೈನ ಬೈಕೊ ಕೈನ ಕರ್ಲಿದ್ಯೊ. 21ತೆ ಗ್ವಡ್ಡ ರ‍್ಹಯಲಹುತಿ ಇಸಾಕ ತಿನಾಹುತಿ . ಯಹೊವಾಕನ ಪ್ರಾಥನಾ ಕರಿನ ಮಾಂಗಿಲಿದಲ ಕ್ಹು ರೆಬೆಕ್ಕ ಪೆಟೆ ರ‍್ಹೈ. 22ತಿನಾ ಪೆಟಮಾ ಬಚ್ಚಾ಼ ವದ್ಯಾಡಾಕ್ಹು ತೆ, ಇಮ ಥಯುಮ ಮಿ ಕಿಮ ಜಿವ್ತಿ ರ‍್ಹೌ. ಕೈನ ಇನಾಹುತಿ ಯಹೊವಾನಿ ಸನ್ನಿದಿಮಾ ವಿಚಾರ ಕರಾಹುತಿ ಗೈ. 23ಯಹೊವಾ ತಿನೆ,

'ತಾರಾ ಪೆಟಮಾ ಬೆಜ಼ನಾಂಗೊ ಛೆ; ಎ ಬೆ ಜ಼ನಾಂಗ ಹುಟ್ತಾಮಾಜ಼ ಭಿನ್ನ ಥೈನ ರ‍್ಹವಸ. ತ್ಯುನೊಮಾ ಯಕ್ತಿ ಯಕ್ಕ ತಾಕತವರ ರ‍್ಹವಸ. ಮ್ಹೊಟೊ ನ್ಹಾನಾನಿ ಸೆವೆ ಕರಸ”. ಕದ್ಯೊ.

24ತಿನೆ ದಿನೊ ಭರಿನ ಜ಼ನ್ನಿ. 25ಪೈಲಾ ಹುಟ್ಟಲ ಲಾಲ ವರಿ ಅಂಗ ಭರಿನ ಬಾಲೊ ವ್ಹತಾ ತಿನೆ ಎಸಾವ, ಕೈನ ನ್‍ಮ ಮ್ಹೆಲ್ಯಾ. 26ಬೆವಾ ಬಚ್ಚು಼ ಎಸಾವನಿ ಪಗನಿ ಎಡಿ ಧರಲಿನ ಹುಟ್ಟಲ ಹುತಿ ತಿನೆ ಯಾಕೊಬ ಕೈನ ನಾಮ ಮ್ಹೆಲ್ಯಾ. ತ್ಯುನೆ ಹುಟ್ತಾಮಾ ಇಸಾಕನೆ ಕ್ಹಾಟ ವರಕ್ಹ ವ್ಹತಿ.

ಎಸಾವ ತಿನು ಪೈಲಾರತನಾನು ಹಕ್ಕ ಇಕ್ಕಾನು

27ತೆ ಭಂಬಿ ಪಟ್ಟಾ ಮ್ಹೊಟಾ ಥಾತಾಮಾ ತ್ಯುನೊಮಾ ಎಸಾವ ಶಿಕಾರ ಕರಾಮಾ ಶಾಣ್ಯೊ ಥಯೊತೆ ರಾನ್ಮಾ ರ‍್ಹವಾಲೊ ಥಯೊ. ಯಾಕೊಬ ಶಾಂತ ಮನಕ್ಹ ಥೈನ ಗುಡಾರೊಮಾ ರ‍್ಹವಾಡೊ. 28ಶಿಕಾರ ಕರಲ ಮಾಕ್ಹ ಘನು ಪಸಂಧ ರ‍್ಹಯಲಹುತಿ ತೆ ಎಸಾವನೆ ಘನ್ನೊ ಮಯಾ ಕರ‍್ಯೊ. ರೆಬೆಕ್ಕಾ ಯಾಕೊಬನೆ ಮಯಾ ಕರಾಡಿ. 29ಯಕ್ಕದಿನ್ನ ಯಾಕೊಬ ಅನ್ನ ಕರ್ತಾಮಾ ಎಸಾವ ರಾನತೊ ದಣದಿನ ಐನ ತಿನೆ, ಮಿ ಘನ್ನೊ ದಣದಿನ ಆಯೊಸ. 30ಐಲು ಲಾಲ ರ‍್ಹಯಲ ಪದಾರ್ಥ ಹಮ್ನಾಜ಼ ಮನೆ ಖಾವಾನಾ ಹುತಿ ದೆ. ಕದ್ಯೊ. ಎ ಸಂಗತಿಕ್ಹು ಎಸಾವನೆ ಎದೊಮ ಕೈನ ನಾಮ ಪಡ್ಯು. 31ಯಾಕೊಬ ತಿನೆ ತುನೆ ಪೈಲಾರ ಕವಾನು ರ‍್ಹಯಲ ಮನೆ ಇಕ್ಕಿಪಾಡ ಕತಾಮಾ,

32ಎಸಾವ ಕದ್ಯೊ ಥಯು ಕದ್ಯೊ ಮಾರಾ ಹೆವಾ ಮರಾಲಾನೆ ಪೈಲಾರ ಕವಾನು ಸುಜ಼ ಉಪಯೊಗ ನತ್ತಿ. ಕದ್ಯೊ.

33ತೆಳಾಮಾ ಯಕೊಬ ಪೈಲಾ ಪ್ರಯಾಣ ಕರು ಕತಾಮಾ ಎಸಾವ ಪ್ರಯಾಣ ಕರಿನ ತಿನೆ ರ‍್ಹಯಲ ಪೈಲಾರ ಕವಾನು ಹಕ್ಕ ತಿನೆ ದಿಪಾಡ್ಯೊ. 34ತೆಳಾಮಾ ಯಾಕೊಬ ಎಸಾವನೆ ರೊಕ್ಲೊ ಅಲಸಂದಾನಿ ಗುಗ್ಗರಿನು ಕ್ವಡ್ಡು ಕೊಡಾನ ದಿದ್ಯೊ. ಎಸಾವ ಖೈನ ವರಿ ಪಿನ ಗೈಪಡ್ಯೊ. ಇಮ್ಮ ತಿನೆ ರ‍್ಹಯಲ ಪೈಲಾರ ಕವಾನು ಹಕ್ಕನೆ ತಾತ್ಸಾರ ಕರಿಪಾಡ್ಯೊ.