ಆದಿ 18

ಅಬ್ರಹಾಮನೆ ಕ್ಹುದಾ ದಿದಲ ವಾಗ್ದಾನ

1ಯಹೊವಾ ಅಬ್ರಹಾಮನೆ ಮಮ್ರೆನಾ ಓಕ ಝಾಡೊಕನ ದಿಕ್ಹ್ಯೊ. ದಿನ್ನನಾ ಘನ್ನೊ ತಡ್ಕೊ ಪಡಾನಾ ಟೈಮಮಾ ಅಬ್ರಹಾಮ ತಿನಾ ಗುಡಾರನಾ ವ್ಹಚ್ಚಲಕನ ಬೈಟ್ಯೊತೊ. 2ತೆಳಾಮಾ ತೆ ಮಾತು ಉಚೈನ ದೆಕತಾಮಾ ತ್ಯಾ ತನ್ನ ಜ಼ನಾ ಹುಬ್ರಯಲ ದೆಕ್ಯೊ. ತಿವನೊನೆ ದೆಕಲ ಬರೊಬರ ತಿವನೊನೆ ಮಳಾನೆ ನ್ಹಾಟಿನ ಗೈನ ಅಡ್ಡಪಡಿನ ತಿವನೊನೆ, 3'ಸ್ವಾಮಿಯೊ, ತುಮಾರೊ ಸೆವಕ ಥಯಲ ಮಾರಾ ಕ್ಹಾತೆ ದಕ್ಹಿಯೆಳ ರವೊ. 4ತುಮಾರಾ ಪಗೊ ಧವಾನಾ ಹುತ್ತಿ ಪಾನಿ ಲೈನ ದ್ಯುಸ. ತುಮೆ ಝಾಡೊನಾ ಹೆಟಾ ಅರಾಮ ಕರೊ. 5ಮಿ ತುಮೊನೆ ಅನ್ನ ಲೈನ ದ್ಯುಸ. ತುಮೆ ಚಾ಼ಯೆ ತೆಕ್ಲು ಅನ್ನ ಖಾದಲ್ಪರ ತುಮಾರಿ ಪ್ರಯಾಣ ಅಗಾ ಜಾ಼ಸಕೊಶಿ.” ಕೈನ ಕದ್ಯೊ. ತೆ ತನ್ನೆ ದಾಣಗಾ, 'ಹು, ತು ಕದಲ ತಿಮ್ಮಜ಼ ಕರ” ಕದ್ಯಾ. 6ಅಬ್ರಹಾಮ ಗುಡಾರೆ ಭೆಗಿನ ಗೈನ ಸಾರಳನೆ, 22 ಮಾಪ್ಟಾ ಯಕ್ಲು ಘೌಂನೊ ಲೊಟ ಭೆಗಿನ ಮಕ್ಹಳ” ಕೈನ ಕದ್ಯೊ. 7ಪಾಚಲ್ತೊ ತೆ ತಿನಾ ಜಾನ್ವರೊ ರ‍್ಹಯಲ ಜ಼ಗಾಯೆ ನ್ಹಾಟಿನ ಗೈನ ಚೊ಼ಕು ರ‍್ಹಯಲ ಬೈಲನಾ ಬಚ್ಚಾ಼ನೆ ಲಿನ ಆಳನೆ ದಿನ, 'ಭೆಗಿನ ಬೈಲನಾ ಬಚ್ಚಾ಼ನೆ ಕತ್ರಿನ, ಖಾವಾನೆ ತಯ್ಯಾರ ಕರ” ಕೈನ ಕದ್ಯೊ. 8ಅಬ್ರಹಾಮ ತೆ ತನ್ನೆ ಜ಼ನಾವೊನೆ ಮಾಕ್ಹನು ಅನ್ನ ವರಿ ಮಸರ ವಾಡ್ಯೊ. ತೆ ತನ್ನೆ ಜ಼ನಾ ಅನ್ನ ಖಾತಾಮಾ ಅಬ್ರಹಾಮ ತಿವ್ನಾ ನಜಿಕ ಝಾಡನಾ ಹೆಟೊ ಹುಬ್ರಯೊತೊ. 9ತೆ ದಾಣ್ಗಾ ಅಬ್ರಹಾಮನೆ, 'ತಾರಿ ಬೈಕೊ ಥಯಲ ಸಾರಳ ಕಿಜಾ಼ ಛೆ?” ಕೈನ ಪುಚ್ಯಾ. ಅಬ್ರಹಾಮ ತಿವ್ನೊನೆ, 'ತೆ ಗುಡಾರಮಾ ಛೆ” ಕದ್ಯೊ. 10ತೆಳಾಮಾ ತ್ಯುನೊಮಾನೊ ಯಕ್ಲೊ, 'ಮಿ ವರಿ ಅಗಲ್ಯಾ ವರಕ್ಹ ಎಜ಼ ಟೈಮ್ಮಾ ಔಸ. ತೆ ಟೈಮಮಾ ತಾರಿ ಬೈಕೊ ಥಯಲ ಸಾರಳನೆ ಯಕ ದಿಕ್ರೊ ರಹವಸ” ಕೈನ ಕದ್ಯೊ. ಸಾರಲ ಗುಡಾರಮಾ ರೈನ ಎ ಕ್ಹಾರು ಐಕಾಡಿತಿ. ತಿನೆ ಎ ಸಂಗತಿಯೊ ಐಕಿ. 11ಅಬ್ರಹಾಮ ವರಿ ಸಾರಳ ಘನ್ನಾ ಗಡಿಯಾ ಡೊಕ್ಹಲಿ ಥಯಾತಾ. ಸಾರಳನೆ ಬಚ್ಚಾ ಹುಟ್ಟಾನು ಟೈಮ ಥೈನ ಗಯೊತೊ. 12ತಿನಾಹುತಿ ಸಾರಳನೆ ಬರೊಕ್ಹೊ ಕರಾನೆ ಥಯೂ ನೈ. ತೆ ತಿನಾ ಮನಸ್ಮಾ, 'ಹಮ್ನಾಜ಼ ಮಾರಿ ವೈಸ ಥೈ ಗೈಸ ಹಮೆ ಶಾರಿರಿಕ ಸಂಭಂದ ಕರಾನೆ ಥಾವಸ್ಸು?; ಮಾರಾ ಮಾಟಿನೆಬಿ ವೈಸ ಥೈ ಗೈಸ” ಕೈನ ಕೈಲಿದಿ. 13ತೆಳಾಮಾ ಯಹೊವಾ ಅಬ್ರಹಾಮನೆ, 'ಮಿ ಕವಾನು ಸಾರಳ ಬರೊಕ್ಹೊ ಕರಾಡಿ ನತ್ತಿ. ತೆ ಅಕ್ಹ್ತಿ ತಿನಾ ಮನಸ್ಮಾ, ‘ಮನೆ ಬಚ್ಚಾ ನೈ ಥಾವಾ ಯಕ್ಲಿ ವೈಸ ಥೈ ಗೈಸ’ ಕೈನ ಶಾನೆ ಕದಿ? 14ಯಹೊವಾನೆ ಅಸಾದ್ಯ ರ‍್ಹಯಲ ಛೆ ಸು? ಮಿ ವರಿ ಅಗಲ್ಯಾ ವರಕ್ಹಮಾ ಎಜ಼ ಟೈಮ್ಮಾ ಔಸ. ತೆಳಾಮಾ ತಾರಿ ಬೈಕೊ ಥಯಲ ಸಾರಳನೆ ಯಕ್ಕ ದಿಕ್ರೊ ರ‍್ಹವಸಜ಼” ಕದ್ಯೊ. 15ತೆನೈಸೊ ಸಾರಳ ಭುಚ್ಕಿನ, 'ಮಿ ಅಕ್ಹಿ ನತ್ತಿ” ಕದಿ. ತಿನಾಹುತಿ ಯಹೊವಾ, 'ನ್ಹವೈ, ತು ಅಕ್ಹಲ ಕ್ಹರಿಜ಼಼ ವ್ಹೈ!” ಕದ್ಯೊ.

ಸೊದೊಮನಾ ಹುತಿ ಅಬ್ರಹಾಮ ಮಾಂಗಿಲಿವಾನು

16ಪಾಚಲ್ತಾ ತೆ ದಾಣಗಾ ಜಾ಼ವಾನೆ ಉಟಿನ ಹುಬ್ರಯಾ. ತ್ಯುನೆ ಸೊದೊಮ ಕನ ಡೊಳಾ ಉಚೈನ ದೆಕಿನ ತ್ಯಾ ಜಾ಼ವಾನೆ ಶುರುಕರ‍್ಯಾ. ತ್ಯುನೊನೆ ವಳಾವಾನೆ ಅಬ್ರಹಾಮ ತ್ಯುನಾ ಕ್ಹಾತೆ ದಕ್ಹೊ ದುರ ಗಯೊ. 17ಯಹೊವಾ ತಿನಾಮಾ ಇಮ್ಮ ಕೈಲಿದ್ಯೊ: 'ಮಿ ಹಮ್ನಾ ಕರಾನು ಕಾಮ ಅಬ್ರಹಾಮನೆ ಕೌ ಸು? 18ಅಬ್ರಹಾಮಕ್ಹು ತಾಕತವರ ಮ್ಹೊಟಿ ಜ಼ನಾಂಗ ಹುಟ್ಟಸ; ತಿನಾ ಮುಲಕ ಎ ಲೊಕನಾ ಕ್ಹಾರಾ ಮನಕ್ಹೊ ಆಶಿರ್ವಾದ ಹೊಂದಿಲಿವಸ. 19ಮಿ ತಿನಾ ಕ್ಹಾತೆ ಖಾಸ ಒಡಂಬಡಿಕೆ ಕರಿಲಿದ್ಯೊಸ. ತೆ ತಿನಾ ಬಚ್ಚಾವೊನೆಬಿ ಸಂತತಿವಾಲಾವೊನೆಬಿ ಮನೆ ವಿಧೆಯ ಥಾಯೆ ನಿಂಗತ ವರಿ ನ್ಯಾಯ ನಿತಿಕ್ಹು ಜಿವ್ನಾ ಕರೆ ನಿಂಗತ ಆಗನ್ಯಾ ಕರು ಕೈನ ಮಿ ತಿನಾ ಕ್ಹಾತೆ ಒಡಂಬಡಿಕೆ ಕರಿಲಿದ್ಯೊ. ತ್ಯುನೆ ಇಮ್ಮ ಜಿವ್ನಾ ಕರ‍್ತಾಮ, ಮಾರಾ ವಾಗ್ದಾನೊ ಕ್ಹಾರಾ ಪುರಾ ಕರುಸ.” 20ತೆನೈಸೊ ಯಹೊವಾ, 'ಸೊದೊಮ ವರಿ ಗೊಮೊರನಾ ಮನಕ್ಹೊ ಘನ್ನಾ ರವಾನು ವರಿ ದುಖ ಖಾವಾನು ಘನ್ನು ಜಾಸ್ತ ಥಯುಸ. ತೆ ಗಾಮನಾ ಮನಕ್ಹೊನು ಪಾಪ ಘನ್ನು ಜಾಸ್ತ ಥಯುಸ, 21ತ್ಯುನು ಅಡ್ಡಾನು ಮನೆ ಐಕು ಐಸ ತಿನಾಹುತಿ ಮಿ ಹೆಟೊ ಉತ್ರಿನ ತ್ಯಾ ಗೈನ ಮಿ ಐಕಲ ಕ್ಹರಿಜ಼ ವ್ಹೈ ಸು ಕೈನ ಪರಿಕ್ಷಾ ಕರುಸ” ಕದ್ಯೊ. 22ತಿನಾಹುತಿ ತೆ ದಾಣಗಾ ಸೊದೊಮ ಕನ ಜಾ಼ವಾನು ಶುರು ಕರ‍್ಯಾ. ತೆನೈಸೊ ಅಬ್ರಹಾಮ ಯಹೊವಾನಾ ಕ್ಹಾಮೊ ಹುಬ್ರಯೊತೊ. 23ಅಬ್ರಹಾಮ ಯಹೊವಾನಾ ನಜಿಕ ಐನ, 'ಯಹೊವಾ, ತು ಕೆಟ್ಟ ಮನಕ್ಹೊನೆ ನಾಶ ಕರ‍್ತಾಮಾ ನಿತಿವಂತವಾಲಾವೊನೆ ಬಿ ನಾಶ ಕರು ಕೈನ ಕರ‍್ಯೊಸ ಸು? 24ಯಕ್ಕೆಳೆ ತೆ ಗಾಮಮಾ ಐವ್ವತ್ತ ಜ಼ನಾ ನಿತಿವಂತವಾಲಾ ರ‍್ಹಯಾಮ ಸು ಕರ್ಶಿ? ತು ತೆ ಗಾಮನೆ ನಾಶ ಕರ್ಶಿ ಸು? ಕ್ಹರಿಬಿ ನೈ! ತ್ಯಾ ರ‍್ಹವಾನಾ ಐವ್ವತ್ತ ಜ಼ನಾ ನಿತಿವಂತವಾಲಾವೊನಾ ಹುತಿ ತು ತೆ ಗಾಮನೆ ವಚಾ಼ಡಶಿ? 25ಕ್ಹರಿಮಾಜ಼ ತು ತೆ ಗಾಮನೆ ನಾಶ ನೈ ಕರ್ತೊ. ಕೆಟ್ಟ ರ‍್ಹಯಲವಾಲಾವೊನೆ ಖಲಾಸ ಕರಾನಾ ಹುತಿ ತು ನಿತಿವಂತವಾಲಾವೊನೆ ಖಲಾಸ ನೈ ಕರ್ತೊ. ಯಕ್ಕೆಳೆ ತು ಖಲಾಸ ಕರ್ಯೊಮ, ಚೊ಼ಕಾ ಕೆಟ್ಟ ಯಕ್ಕಜ಼ ಥಾವಸ. ತ್ಯುನೆ ಭಂಬಿ ಜ಼ನಾ ಶಿಕ್ಷಾನೆ ಗುರಿ ಥಾವಸ. ತು ದುನಿಯಾಮಾ ರ‍್ಹಯಲವಾಲಾ ಕ್ಹಾರಾವೊನೆ ನ್ಯಾಯಾದಿಪತಿ ಥಯೊಸ ನೈ?. ತು ನ್ಯಾಯ ರ‍್ಹಯಲಜ ಕರ್ಶಿ ಕೈನ ಮನೆ ಗ್ವತ್ತ ಛೆ” ಕೈನ ಕದ್ಯೊ. 26ಪಾಚಲ್ತೊ ಯಹೊವಾ, 'ಸೊದೊಮಮಾ ಐವ್ವತ್ತ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ, ಮಿ ಪುರಾ ಗಾಮನೆ ವಚಾ಼ಡುಸ” ಕದ್ಯೊ. 27ತೆಳಾಮಾ ಅಬ್ರಹಾಮ ಯಹೊವಾನೆ, 'ತುನೆ ಮಾರಾಕ್ಹು ಹೊಲಿಸಿ ಲಿದ್ಯಾಮ, ಮಿ ಕ್ಹಾಲಿ ಮಾತಿ ವರಿ ರಾಕ ವ್ಹೈ. ತೆನೈಸೊ ಎ ಸವಾಲ ಪುಚ್ಚಾ಼ನೆ ಮನೆ ಮೌಕೊ ದೆ. 28ಯಕ್ಕೆಳೆ ಪಾಂಚ಼ ಜ಼ನಾ ಕಮ್ಮ ಥಯಾರೆ ಚಾಳಕ್ಹಪರ ಪಾಂಚ಼ ಜ಼ನಾ ಕ್ಹಾಲಿ ನಿತಿವಮತವಾಲಾ ರ‍್ಹಯಾಮ ತೆ ಗಾಮನೆ ನಾಶ ಕರ್ಶಿ ಸು?” ಕೈನ ಪುಚ್ಚೊ. ತಿನಾಹುತಿ ಯಹೊವಾ ತಿನೆ, 'ಮಿ ಚಾಳಕ್ಹಪರ ಪಾಂಚ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ ತೆ ಗಾಮನೆ ನಾಶ ನೈ ಕರ್ತೊ” ಕಯನ ಕದ್ಯೊ. 29ವರಿ ಅಬ್ರಹಾಮ ಕ್ಹುದಾನೆ, 'ಕ್ಹಾಲಿ ಚಾಳಕ್ಹ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ, ತು ತೆ ಗಾಮನೆ ನಾಶ ಕರ್ಶಿ ಸು?” ಕೈನ ಪುಚ್ಯೊ. ಯಹೊವಾ ತಿನೆ, 'ಚಾಳಕ್ಹ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ ಮಿ ತೆ ಗಾಮನೆ ನಾಶ ನೈ ಕರ್ತೊ” ಕೈನ ಕದ್ಯೊ 30ಪಾಚಲ್ತೊ ಅಬ್ರಹಾಮ, 'ಪ್ರಭು, ಮಪರ ಶಿಟ್ಟ ಥೌ ನಕೊ. ಎ ಸವಾಲ ಪುಚ್ಚು಼ಸ ತೆ ಗಾಮಮಾ ಕ್ಹಾಲಿ ಮುವ್ವತ್ತ ಜ಼ನಾ ನಿತಿವಂತವಾಲಾ ರ‍್ಹಯಮ ತು ತೆ ಗಾಮನೆ ನಾಶ ಕರ್ಶಿ ಸು?” ಕೈನ ಪುಚ್ಯೊ. ಯಹೊವಾ ತಿನೆ, 'ತ್ಯಾ ಮುವ್ವತ್ತ ಜ಼ನಾ ನಿತಿವಂತವಾಲಾ ರ‍್ಹಯಾಮ ಮಿ ತೆ ಗಾನೆ ನಾಶ ನೈ ಕರ್ತೊ” ಕದ್ಯೊ. 31ಪಾಚಾ಼ತೊ ಅಬ್ರಹಾಮ, 'ಮಾರೊ ಯಹೊವಾ ಸುಜ಼ ತಿಳ್ದಿಲ್ಯು ನೈ. ಮಿ ವರಿ ಯಕ್ಕ ಸವಾಲ ಪುಚ್ಚು಼ಸ. ತ್ಯಾ ಇಕ್ಹ ಜ಼ನಾ ನಿತಿವಂತವಾಲಾ ರ‍್ಹಯಮ ಸು ಕರ್ಶಿ?” ಕೈನ ಪುಚ್ಯೊ. ಯಹೊವಾ ತಿನೆ, 'ತ್ಯಾ ಇಕ್ಹ ಜ಼ನಾ ನಿತಿವಂತವಾಲಾ ರ‍್ಹಯಮ ತೆ ಗಾಮನೆ ಮಿ ನಾಶ ನೈ ಕರ್ತೊ” ಕೈನ ಕದ್ಯೊ. 32ಪಾಚ಼ಲ್ತೊ ಅಬ್ರಹಾಮ, 'ಯಹೊವಾ, ದಯಾ ಕರಿನ ಮಪರ ಶಿಟ್ಟ ಥೌ ನಕೊ. ಎ ಯಕ್ಕ ಸಲಾ ಕ್ಹಾಲಿ ಸವಾಲ ಪುಚ್ಚುಸ. ದಕ್ಹ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ ಸು ಕರ್ಶಿ?” ಕೈನ ಪುಚ್ಯೊ. ಯಹೊವಾ ತಿನೆ, 'ಮಿ ತೆ ಗಾಮಮಾ ದಕ್ಹ ಜ಼ನಾ ನಿತಿವಂತವಾಲಾವೊನೆ ದೆಕ್ಯೊಮ, ತಿನೆ ನಾಶ ನೈ ಕರ್ತೊ” ಕದ್ಯೊ. 33ಯಹೊವಾ ಅಬ್ರಹಾಮನಾ ಕ್ಹಾತೆ ಬೊಲಾನು ಕ್ಹರಾಯಲ್ಪರ ತ್ಯಾಂತೊ ಗೈಪಡ್ಯೊ. ಅಬ್ರಹಾಮಬಿ ತಿನಾ ಘರೆ ವಾಪಸ ಗಯೊ.