Sikkiligar Bible
ಆದಿ 11
ತಾರು ಮಾರು ಥಯಲ
ಪಾನಿನು ತುಫಾನ ಥಯಲ್ಪರ ಜಿಮಿನನಾ ಕ್ಹಾರಿ ಜ಼ಗಾ ಮನಕ್ಹೊ ಪುರಾ ಯಕ್ಕ ಜಾತಮಾ ಬೊಲತಾತಾ. ಕ್ಹಾರಾ ಮನಕ್ಹೊ ಯಕ್ಕ ಜಾತನಾ ವಾತೊ ಬೊಲತಾತಾ. ಮನಕ್ಹೊ ಪುರ್ವ ದಿಕ್ಕೆ ಐನ ಸಿನಾರ ಕವಾನಾ ಗಾಮಾ ತ್ಯಾ ಜ಼ಗಾ ದೆಕಿನ ತ್ಯಾಜ ರ‍್ಹಯಾ ಯಕ್ಲಾನೆ ಯಕ್ಲೊ ಬೊಲ್ಲೆತಾ ಆವೊ ಮಳಿನ ಚೊ಼ಕಾ ಇಟಂಗಿಯೊ ಕರಿಯೆ ಕೈನ ಫೈಸಲೊ ಕರ‍್ಯಾ ಇಮ್ಮ ತ್ಯುನೆ ಘರೊ ಭಾಂದಾನಾ ಹುತಿ ದಗ್ಡಾ ಲಿದ್ಯಾ ಬಗರ ಇಟಂಗಿಯೊ, ಚು಼ನ್ನಾನಾ ಬದಲಿ ಡಾಂಬರ ಉಪಯೊಗ ಕರ‍್ಯಾ. ತಿನಾಹುತಿ ತ್ಯುನೆ ಹಮೆ ಅಪೊನೆ ಯಕ್ಕ ಗಾಮನೆ ಹಬಾಳ ಮುಟ್ಟಾನು ಡೊಂಗರ ಭಾಂದ್ಯಾರೆ ಅಪೆ ಪ್ರಸಿದ್ದಿ ಥೈಯೆಸ ತೆಳಾಮಾ ಅಪೆ ಜಿಮಿನ್ಪರ ಬಿಜಾ಼ ಬಿಜಾ಼ ಥೈನ ಯಕ್ಕ ಜ಼ಗಾಪರ ರ‍್ಹವಾನೆ ಸಾದ್ಯಥಾವಸ ಕೈನ ಬೊಲಿದ್ಯಾ. ಕ್ಹುದಾ ಗಾಮನೆ ವರಿ ಡೊಂಗನೆ ದೆಕಾನೆ ಉತ್ರಿನ ಆಯೊ. ಮನಕ್ಹೊ ತೆ ಕ್ಹಾರು ಭಾಂದೆಲ ದೆಕಿನ ಕ್ಹುದಾ ಆ ಮನಕ್ಹೊ ಕ್ಹಾರಾ ಯಕ್ಕಜ಼ ಜಾತ ಬೊಲಾನಾಹುತಿ ಘನ್ನಾಜ಼ನಾ ಮಳ್ಯಾಸ. ಪೈಲಾತಾಜ ಹವಾ ಕಾರಯೊ ಕರಾಡಾಸ ಐನೆ ಅಗಾ ಸುಬಿ ಚಾ಼ಯೆ ಥಯಾಮ ಕರಾನೆ ಶಕ್ತಿವಾಲಾ ಥಾವಸ. ತಿನಾಹುತಿ ಹಮೆ ಹೆಟಾ ಗೈನ ತ್ಯುನಿ ಜಾತ ತಾರು ಮಾರು ಕರೆ ತಳಾಮಾ ತ್ಯುನೆ ಯಕ್ಕಲಾನೆ ಯಕ್ಕಲೊ ನೈ ಕಳೈಲೆತಾ ಕೈನ ಕದ್ಯೊ. ಲಾಸ್ಟಮಾ ಕ್ಹುದಾ ಮನಕ್ಹೊನೆ ಜಿಮಿನ್ಪರ ಬಿಖರೈಪಾಡ್ಯೊ.ತಿನಾಹುತಿ ತೆ ಗಾಮನೆ ಭಾಂದಿನ ಪುರಾ ಕರಾನೆ ಸಾದ್ಯ ಥೈ ನೈ. ಕ್ಹುದಾ ಕ್ಹಾರಾ ಲೊಕನಿ ಜಾತ ತಾರು ಮಾರು ಕರಲ ತೆ ಜ಼ಗಾಪರ ತಿನಾಹುತಿ ತೆ ಜ಼ಗಾನೆ ಬಾಬೆಲ ಕೈನ ನಾಮ ಐಯು.ಅಮ್ಮ ಕ್ಹುದಾ ಮನಕ್ಹೊನೆ ತೆ ಜ಼ಗಾಕಂತೊ ಜಿಮಿನ್ಪರ ಭಿಕ್ಹರೈಪಾಡ್ಯೊ.
ಶೆಮನು ಖಾಂದಾನ
ಆಶೆಮನಾ ಕ್ಹಾಂದಾನು ಇತಿಹಾಸ ವ್ಹೈ. ಪಾನಿನು ತುಫಾನ ಥೈನ ಬೆ ವರಕ್ಹ ಥಯಲ್ಪರ ಶೆಮ ಕ್ಹೊ ವರಕ್ಹನೊ ರ‍್ಹತಾಮಾ ಅರ್ಪಕ್ಷದ ಕೈನ ದಿಕ್ರೊ ಹುಟ್ಟ್ಯೊ. ತೆ ಥಯಲ್ಪರ ಶೆಮ ಪಾಂಚಕ್ಹೊ ವರಕ್ಹ ವಾಚ್ಯೊ.ತೆ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ಅರ್ಪಕ್ಷದ 35 ವರಕ್ಹನೊ ರ‍್ಹತಾಮಾ ಶೆಲಹ ಕೈನ ದಿಕ್ರೊ ಹುಟ್ಟ್ಯೊ. ಶೆಲಹ ಹುಟ್ಟಲ್ಪರ ಅರ್ಪಕ್ಷದ 403 ವರಕ್ಹ ವಾಚ್ಯೊ. ತೆ ಟೈಮಾ ತಿನೆ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ಶಲಹ 30 ವರಕ್ಹನೊ ರ‍್ಹತಾಮಾ ಎಬರ ಕೈನ ದಿಕ್ರೊ ಹುಟ್ಟ್ಯೊ. ಎಬರ ಹುಟ್ಟಲ್ಪರ ಶೆಲಹ 403 ವರಕ್ಹ ವಾಚ್ಯೊತೊ.ತೆ ದಿನೊಮಾ ತೆ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ಎಬರ 34 ವರಕ್ಹನೊ ರ‍್ಹತಾಮಾ ಪೆಲೆಗ ಕೈನ ದಿಕ್ರೊ ಹುಟ್ಟ್ಯೊ. ಪೆಲೆಗ ಹುಟ್ಟಲ್ಪರ ಎಬರ 430 ತಿ ಹೆಚ್ಕಿ ವರಕ್ಹ ವಾಚ್ಯೊತೊ.ತೆ ಟೈಮಾ ತಿನೆ ಬಿಜಾ಼ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ಪೆಲೆಗ 30 ವರಕ್ಹನೆ ರ‍್ಹತಾಮಾ ರೆಗುವ ಕೈನ ದಿಕ್ರೊ ಹುಟ್ಟ್ಯೊ. ರೆಗುವ ಹಟ್ಟಲ್ಪರ ಪೆಲೆಗ 209 ವರಕ್ಹ ವಾಚ್ಯೊತೊ ತೆ ಟೈಮಾ ತಿನೆ ಬಿಜ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ರೆಗುವ 32 ವರಕ್ಹನೊ ರ‍್ಹತಾಮಾ ಸೆರುಗ ಕೈನ ದಿಕ್ರೊ ಹುಟ್ಟ್ಯೊ. ಸೆರುಗಹುಟ್ಟಲ್ಪರ ರೆಗುವ 207 ವರಕ್ಹ ವಾಚ್ಯೊತೊ.ತೆ ಟೈಮಾ ತಿನೆ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ಸೆರುಗ 30 ವರಕ್ಹನೊ ರ‍್ಹತಾಮಾ ನಾಹೊರ ಕೈನ ದಿಕ್ರೊ ಹುಟ್ಟ್ಯೊ. ನಾಹೊರ ಹುಟ್ಟಲ್ಪರ ಸೆರುಗ 200 ವರಕ್ಹ ವಾಚ್ಯೊತೊ. ತೆ ಟೈಮಾ ತಿನಾ ಬಿಜಾ಼ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ನಾಹೊರ 29 ವರಕ್ಹನೊ ರ‍್ಹತಾಮಾ ತೆರಹ ಕೈನ ದಿಕ್ರೊ ಹುಟ್ಟ್ಯೊ. ತೆರಹ ಹುಟ್ಟಲ್ಪರ ನಾಹೊರ 119 ವರಕ್ಹ ವಾಚ್ಯೊತೊ.ತೆ ಟೈಮಾ ತೆ ಬಿಜಾ಼ ಗಂಡ ವರಿ ಹೆಣ್ಣ ಬಚ್ಚಾವೊನೆ ಪಡದ್ಯೊ. ತೆರಹ 70 ವರಕ್ಹನೊ ರ‍್ಹತಾಮಾ ಅಬ್ರಾಮ ನಾಹೊರ ವರಿ ಹಾರಾನ ಕೈನ ದಿಕ್ರಾವೊನೆ ಪಡದ್ಯೊ.
ಅಬ್ರಹಾಮನಿ ಚರಿತ್ರೆ
ತೆರಹಾನು ಕ್ಹಾಂದಾನು ಇತಿಹಾಸ ವ್ಹೈ.ತೆರಹ ಅಬ್ರಾಮ ನಾಹೊರ ವರಿ ಹಾರಾನ ತ್ಯುನೊ ಬಾ ವ್ಹೈ.ಹಾರಾನ ಲೊಟನ ಬಾ ವ್ಹೈ ಹಾರಾನ ಬಾಬಿಲೊನಿ ತಿನಿ ಸ್ವಂತ ಜ಼ಗಾ ವ್ಹತ್ತಿ ಉರ ಕೈನ ಗಾಮಾ ಮರಿಗಯೊ. ಹಾರಾನ ಮರತಾಮಾ ತಿನೊ ಬಾ ಹಜು಼ನಬಿ ಜ್ಯುತೊ ವ್ಹತ್ತೊ. ಅಬ್ರಾಮ ವರಿ ನಾಹೊರ ಹಿವಾ ಕರಲಿದ್ಯಾ ಅಬ್ರಾಮನಿ ಬೈಕೊನೊ ನಾಮ ಸಾರಯಳ ವ್ಹೈ. ನಾಹೊರನಿ ಬೈಕೊನೊ ನಾಮ ಮಿಲ್ಕಾ ವ್ಹೈ. ಆ ಹಾರಾನನಿ ದಿಕ್ರಿ ವ್ಹೈ ಹಾರಾನ ಮಿಲ್ಕಾ ವರಿ ಇಸ್ಕ ಕವಾಲಾನೊ ಬಾ ವ್ಹೈ. ಸಾರಯಳನೆ ಬಚ್ಚಾ ನ್ಹೊತಾ ಕಾಕದ್ಯಾಮ ತೆ ಬಂಜೆ ಥಯಿತಿ. ತೆರಹಾ ತಿನಾ ಕ್ಹಾಂದಾನೆ ಬಲೈಲಿನ ಬಾಬಿಲೊನ ಉರ ಕವಾನು ಸ್ವಂತ ಗಾಮ ಛೊಡಿನ ಗೈನ ಕಾನಾನ ನೆ ಪ್ರಯಾಣ ಕರ‍್ಯಾ ತೆರಹಾನೊ ದಿಕ್ರೊ ಥಯಲ ಅಬ್ರಾಮ ತಿನೊ ನಾತನೊ ಹಾರಾನೆಬಿ ದಿಕ್ರೊ ಥಯಲ ಲೊಟಾನೆಬಿ ವರಿ ಮಾರಿ ವ್ಹೌ ಅಬ್ರಾಮನಿ ಬೈಕೊ ತಯಲ ಸಾರಯಳನೆ ಬಲೈಲಿನ ಹಾರಾನ ಗಾಮೆ ಗೈನ ತ್ಯಾ ರ‍್ಹವಾನೆ ಫೈಸಲೊ ಕರ‍್ಯಾ. ತೆರಹಾ 205 ವರಕ್ಹ ವಾಚಿನ ಹಾರಾನ ಗಾಮಾಜ ಮರಿ ಗಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.