Skip to content
BibleKenya

Sikkiligar Bible

ಯಜಕೆಲಾ 14

ಕ್ಹುದಾ ಮೊರ್ತಿಯೊನೆ ಆರಾಧನಾಖಂಡನೆ

ಇಸ್ರಾಯಲನಾ ಮ್ಹೊಟಾ ಮನಕ್ಹೊಮಾ ದಕ್ಹಾಜ಼ನಾ ಐನ ಮಾರಾ ಕ್ಹಾಮಾ ಬೈಟ್ತಾಮಾ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಇವ್ನೆ ತ್ಯುನಾ ಗೊಂಬಿಯೊನೆ ಮನಸೊಮಾ ಸ್ಹೆಂ ಕರಲಿನ ತ್ಯುನೊನೆ ಪಾಪಕಾರಿ ಥಯಲ ವಿಘ್ನನೆ ತ್ಯುನಾ ಕ್ಹಾಮಾ ಮ್ಹೆಲ್ಲಿದ್ಯಾಸ; ಹವಾವೊನೆ ಮಿ ಕ್ಹುದಾನು ಉತ್ತರ ದಿವಾನು ಯುಕ್ತಬಿ?

ತಿನಾಹುತಿ ತು ತ್ಯುನೊನೆ ತಿಳಸೈನ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಇಸ್ರಾಯಲ ವಂಶಮಾ ಕಯು ಕಯೊ ತ್ಯುನಾ ಗೊಂಬಿಯೊನೆ ಮನಸಮಾ ಸ್ಹೆಂ ಕರಲಿನ ತ್ಯುನೊನೆ ಪಾಪಕಾರಿ ಥಯಲ ವಿಘ್ನನೆ ತ್ಯುನಾ ಕ್ಹಾಮಾ ಮ್ಹೆಲ್ಲಿನ ಪ್ರವಾದಿ ಪ್ರಶ್ನೆ ಪುಚ್ಚಾನೆ ಆವಸ ತೆ ಪಾತಕಕನೆ ಕದ್ಯಾರೆ ತಿನಾ ಹಿಸಾಬ ನೈ ರ‍್ಹಯಲ ಗೊಂಬಿಯೊನಾ ನಿಂಗತ ಯಹೊವಾ ಥಯಲ ಮಿ ತಿನೆ ಉತ್ತರ ದ್ಯುಸ; ಇಸ್ರಾಯಲನಾ ವಂಶವಾಲಾ ಕ್ಹಾರಾ ತ್ಯುನಾ ಗೊಂಬಿಯೊನಾ ನಿಮಿತ್ತ ಮನೆ ತೊರದಲಕ್ಹು ಮಿ ತ್ಯುನೊನೆ ಕ್ಹಾರಾಜನಾವೊನೆ ತ್ಯುನಾ ಆಶಾಪಾಶಮಾ ಕ್ಹಾಪಡೈನ ಧರಸ ತೆ ಥಯಲ್ಪರ ತು ಇಸ್ರಾಯಲ ಮನಕ್ಹೊನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಕವಸ. ತುಮೆ ತುಮಾರಾ ಗೊಂಬಿಯೊನೆ ಛೊಡಿನ ಪಾಚಾ಼ ಸರ್ಕಿನ ಪಾಚಾ಼ ಫರಿನ, ತುಮಾರಾ ಕ್ಹಾರಾ ಸಾಮ್ನೊನೆ ಕನ ಪಿಟ್ಟ ಕರೊ. ತಿನಾ ಉಪ್ಪರ ಘನ್ನಿ ಶಿಟ್ಟ ಐನ ತಿನೆ ಗತಿನೆ ಬೆರಗಿನೆ ಹುಶಾಕಿನಾ ವಾತೊನೆ ವಡಪೊನೆ ಇಡ ಕರಿನ ತಿನೆ ಮಾರಾ ಮನಕ್ಹೊಮಾತೊ ಕಿತ್ತಿನ ಘಾಲುಸ; ಅಮ್ಮ ಮಿ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.

ಯಕ್ಲೊ ಪ್ರವಾದಿ ಉಸುಮಾ ಕ್ಹುದಾನಾ ವಾತೊ ಕದ್ಯಾರೆ ತೆ ಪ್ರವಾದಿನೆ ಮರಳಮಾ ಘಾಲಲವಾಲಾನೆ ಯಹೊವಾ ಥಯಲ ಮಿಜ; ಮಿ ತಿನಾ ಉಪ್ಪರ ಹತ್ತ ಉಚೈನ ಇಸ್ರಯಲೊ ಥಯಲ ಮಾರಾ ಮನಕ್ಹೊಮಾತೊ ತಿನೆ ಕಿತ್ತಿನ ನಾಮ ನೈಸೊ ಕರುಸ. ಪ್ರವಾದಿನು ದೊಷ ಕೆಕ್ಲೊ ತಿನೆ ಪ್ರಶ್ನೆ ಪುಚ್ಚಾಲೊ ದೊಷ ತೆಕ್ಲೊ; ಕ್ಹುಶಿವಾಲಾ ತ್ಯುನಾ ತ್ಯುನಾ ದೊಷ ಫಲನೆ ಅನುಭವಕರಸ. ಅಮ್ಮ ರ‍್ಹಯಾಮ ಇಸ್ರಯಲ ವಂಶವಾಲಾ ಹಜಿನ ಮನೆ ತೊರೆದಸ, ತ್ಯುನಾ ಲೆಕ್ಕಾ ನೈಸೊ ದೊಷಕ್ಹು ಅಪ್ನೊನೆ ಹೊಲೆಕರಸ; ತ್ಯುನೆ ಮನೆ ಪ್ರಜೆ ಥಾವಸ, ಮಿ ತ್ಯುನೊನೆ ಕ್ಹುದಾ ಥಯಲ ರ‍್ಹಸ, ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

ನೊಹಾ ದಾನಿಯಲ ವರಿ ಯೊಬ

ವರಿ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಅಪಾರಾದ ಕರಿನ ಮನೆ ವಿರುದ್ದ ಥೈನ ಪಾಪ ಕರಲ ದೆಶನಾ ಉಪ್ಪರ ಮಿ ಹತ್ತ ಉಚೈನ ತ್ಯುನು ಅನಾಜ ಬಂದಕರೈನ ಕಾಡಿನ ಕ್ಷಾಮನೆ ಆವಾಲಗಾಡಿನ ಮನಕ್ಹೊ ಜಾ಼ನವರೊನೆ ತಿಮಾತೊ ನಿರ್ಮೂಲ ಕರಾನಾ ಪಕ್ಷಮಾ ನೊಹಾ, ದಾನಿಯಲ, ಯೊಬ ಕೈನ ತನ್ನೆ ಜನಾ ದಾಣ್ಗಾ ತ್ಯಾ ವ್ಹತ್ತಾ ತ್ಯುನಾ ಸದಾಚಾರಕ್ಹು ಸ್ವಂತ ಜಲಮ ವಚಾ಼ಡಿ ಲೆತಾತಾ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

ಮಾರಿ ಆಗನ್ಯಾನಾಹುತಿ ದುಷ್ಟ ಗೆಂಡಾ ಮೃಗಾವೊ ದೆಶಮಾ ಫರಿನ ತಿನೆ ನಿರ್ಜನ ಕರಿನ ಹಾಳ ಕರಿನ ಕುನಬಿ ದಾಟಿನ ನೈ ಜೌ಼ ಕೈನ ಬುಚ್ಕಾಡಾನಾ ಪಕ್ಷಮಾ ಆಂ ತನ್ನೆಜನಾ ದಾಣ್ಗಾ ತಿಮಾ ವ್ಹತ್ತಾ ಮಾರೊ ಜಲಮ ತುಮೆ ಉಗ್ರ್ಯಾತಬಿ ನೈತೊ ತುಮಾರಾ ಗಂಡ ಬಚ್ಚಾವೊನೆ ರ‍್ಹವಾದೆ ಹೆಣ್ಣ ಬಚ್ಚಾವೊನೆ ರ‍್ಹವಾದೆ ನೈ ವಚಾ಼ಡಿ ಲೆತಾತಾ; ದೆಶಬಿ ಹಾಳ ಥೈನ ಜಾ಼ವಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ನೈತೊ ತಲ್ವಾರಜ, ದೆಶಮಾ ಹೊಕ್ಕಿನ ಜೌ಼ ಕೈನ ಆಗನ್ಯಾ ದಿನ ಮಿ ತಿನೆ ತೆ ದೆಶನೆ ಲೈನ ಮನಕ್ಹೊ ವರಿ ಜಾನವರೊನೆ ತಿಮಾತೊ ಕಲಾಸ ಕರಾನಾ ಪಕ್ಷಮಾ ಆಂ ತನ್ನೆ ಜನಾ ದಾಣ್ಗಾ ತಿಮಾ ಮಆರೊ ಜಲಮ, ತುಮೆ ಉಗ್ರ್ಯಾಮ ನೈತೊ ತುಮಾರಾ ಗಂಡ ಬಚ್ಚಾವೊನೆ ರ‍್ಹವಾದೆ ಹೆಣ್ಣ ಬಚ್ಚಾವೊನೆ ರ‍್ಹವಾದೆ ನೈ ವಚಾ಼ಡಿ ಲೆತಾತಾ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ನೈತೊ ಮಿ ತೆ ದೆಶನಾ ಉಪ್ಪರ ಮಾರಿ ಶಿಟ್ಟ ತಿನಾ ಉಪ್ಪರ ಶಿಟ್ಟನೆ ಲೈನ ರಗತ ಚುವೈನ ತ್ರಾಸ ವಳೈನ ಮನಕ್ಹೊನೆ ವರಿ ಜಾನರೊನೆ ಕಲಾಸ ಕರಾನಾ ಪಕ್ಷಮಾ ನೊಹಾ ದನಿಯಲ ಯೊಬ ಕವಾಲಾ ತಿಮಾ ವ್ಹತ್ತಾ ಮಾರೊ ಜಲಮ, ತ್ಯುನಾ ಸದಚಾರಕ್ಹು ಸ್ವಂತ ಜಲಮೊನೆ ವಚಾ಼ಡಿ ಲಿದ್ಯಾರೆ ನೈತೊ ತುಮಾರಾ ಗಂಡ ಬಚ್ಚಾವೊನೆ ರ‍್ಹವಾದೆ ಹೆಣ್ಣ ಬಚ್ಚವೊನೆ ರ‍್ಹವಾದೆ ವಚಾ಼ಡಿ ಲೆತಾ ನ್ಹೊತಾ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿ ತಲ್ವಾರ ಕ್ಷಾಮ ದುಷ್ಟ ಮೃಗೊ ವ್ಯಾದಿ ಕವಾಲಾ ಚಾರೆ ತ್ರಾಸೊನೆ ಯರುಸಲೆಮನಾ ಕ್ಹಾತೆಜ ಲೈನ ಮನಕ್ಹೊನೆ ವರಿ ಜಾನವರೊನೆ ಕಲಾಸ ಕರ್ತಾಮಾ ಕೆ ಸಕಸಿ! ತೆನೈಸೊ ಬಾಕ್ಡಿಯೊ ದಾಣ್ಗಾವೊಮಾ ದಕ್ಹಾಜನಾ ಕಿಮ್ಮ ತಪ್ಸಿಲಿದ್ಯಾ ಉಗ್ರಿನ ತ್ಯಾಂತಾ ಲಿನ ಜಾ಼ವಸ; ಆಹಾ, ತ್ಯುನೆ ತುಮೊಕನೈನ ಸೆರಲ್ಪರ ತುಮೆ ತ್ಯುನಾ ಕೆಟ್ಟವಾಟೊ ಅಧ್ಬುತಕಾಮೊನೆ ದೆಕಿನ ಮಿ ಯರುಸಲೆಮನಾ ಉಪ್ಪರ ಆವಾಲಗಾಡಲ ತ್ರಾಸನಾ ವಿಷಯಮಾ, ತಿನೆ ಉಂಟಕರಲ ಕ್ಹಾರಾ ತ್ರಾಸೊನಾ ವಿಷಯಮಾ ಸಮಾಧಾನ ಹೊಂದೊಸಿ. ತುಮೆ ತ್ಯುನಾ ಕೆಟ್ಟ ವಾಟೊ ವರಿ ಅಧ್ಬುತೊನೆ ದೆಕ್ತಾಮಾ ತ್ಯುನಾಕ್ಹುಜ ತುಮೊನೆ ಸಮಾಧಾನ ಥಾವಸ; ಮಿ ಯರುಸಲೆಮನೆ ಕರಲ ಗಪ್ಪನೆ ಕರಲ ನವೈ ಕೈನ ತುಮೊನೆ ಗೊತ್ತ ಥಾವಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.