Skip to content
BibleKenya

Sikkiligar Bible

ವಿಮೊಚನ 39

ಯಹೊವಾ ಮೊಶೆನೆ ಆಗನ್ಯಾ ದಿದಲ ತಿಮ್ಮ ತೆ ನಿಲಿ ಧ್ರುಮ ರಗತನಾನಿಂಗತ ದೊರಾಕ್ಹು ಕ್ಹುದಾನಿ ಮಂದಿರನಾ ಸೆವಾನೆ ಅಲಂಕಾರ ಕರಾನು ಸಾಮನ ಆರೊನನೆ ದಿಕ್ಷಾ ವಸ್ರ್ತ ಕರ್ಯಾ. ಮ್ಹೊಟೊ ಯಾಜಕ ಎಪೊದ ಕೈನ ಕವಚನೆ ಹುರಿನಾರಿನಾ ಪಡ್ಕಾಕ್ಹು ಕ್ಹೊನಾನಾ ದೊರಾಕ್ಹುಬಿ ನಿಲಿ ಧೂಮ್ರ ರಗತ ನಂದರ ದೊರಾವೊಕ್ಹುಬಿ ಕರ್ಯೊ. ನಿಲಿ ಧೂಮ್ರ ರಗತ ನಂದರ ದೊರಾವೊನಾಕ್ಹಾತೆ ನಾರಿನಾ ಪಡ್ಕಾನಾ ಕ್ಹಾತೆ ವಿಚಿತ್ರ ಥಯಲ ಕಸೂತಿ ಕಾಮವಾಲಾವೊನಾ ಪದ್ದತಿನಾಹುತಿ ಬುಟೆದಾರಿನೂ ಕಾಮ ಕರಾನಾಹುತಿ ಕ್ಹೊನಾನೆ ಫೊಡಿನ ತಗಡೊ ಕರಿನ ನ್ಹಾನ್ಹಾ ಎಳಿಯೊ ನಿಂಗತ ಕತ್ರ್ಯಾ. ತೆ ಕವಚನೆ ಕ್ಹಾಂದಾಪರ ಬೆ ಪಟ್ಟಿಯೊನೆ ಕರ್ಯಾ; ತಿನಾ ಭಂಬಿ ಕೊನಾವೊನೆ ಜೊಡ್ಸಾಯಾ. ಕವಚನಾ ಉಪ್ಪರ ರ‍್ಹಯಲ ಚೊಕಿ ಕಲಾಕ್ಹು ಕರಲ ಬುಟೆದಾರಿನೊ ಕಂಬರನೊ ಪಟ್ಟೊ ಕವಚನೆ ಮಳಿನ ರ‍್ಹಯಲ ತಿನಾ ನಿಂಗತ ಹುರಿನಾರನಾ ಫಡ್ಕಾಕ್ಹು ಕ್ಹೊನಾನಾ ದೊರಾಕ್ಹು ನಿಲಿ ಜಾ಼ಂಬ್ಳಾನಾ ಕಲರ ಲಾಲ ದೊರಾಕ್ಹು ಥಯಲ ವ್ಹತ್ತು. ಯಹೊವಾ ಮೊಶೆನೆ ಕದಲ ತಿಮ್ಮ ತೆ ಕ್ಹಾರು ಕರ‍್ಯಾ. ಮುದ್ರಾ ರತ್ನ ಕೆತ್ತೆ ಲಿಂಗತ ಬೆ ಗೊಮೆದಕ ರತ್ನಮಾ ಇಸ್ರಾಯೆಲನಾ ಬಾರಾ ಕುಲನಾ ನಾಮೊ ಕೆತ್ತಿನ ತೆ ರತ್ನನೆ ಕುಂದಣಮಾ ಭಾಂದ್ಯಾ. ತೆ ಭಂಬಿ ರತ್ನ ಇಸ್ರಾಯೆಲೊನಾ ಶೆಂ ರ‍್ಹಯಲ ರತ್ನ ಥಾವಾನಾ ಹುತಿ ತೆ ಕ್ಹಾರಾವೊನೆ ಕವಚನಾ ಖಾಂದಾನಾ ಉಪ್ಪರ ರ‍್ಹಯಲ ಪಟ್ಟಿಯೊಮಾ ಭಾಂದಾ ಲಗಾಡ್ಯೊ. ಯಹೊವಾ ಮೊಶೆನೆ ತಿಮ್ಮ ಆಗನ್ಯಾ ದಿದ್ಯೊತೊ.

ಛಾತಿನು ಕವಚ ಕರಾನು

ಕವಚನಾ ನಿಂಗತ ಬುಟೆದಾರನಾ ಕಾಮಕ್ಹು ಕ್ಹೊನಾನಾ ದೊರಾಕ್ಹುಬಿ ನಿಲಿ ಜಾ಼ಂಬ್ಳಾನು ಕಲರ ವರಿ ಲಾಲ ರ‍್ಹಯಲ ದೊರಾಕ್ಹುಬಿ ಹುರಿನಾರನಾ ಫಡ್ಕಾಮಾ ಪಿಶಿನು ಪದಕ ಕರ‍್ಯೊ. ತೆ ಚೌಕ ವ್ಹತ್ತು. ತೆ ಪಿಶಿನು ಪದಕ ಬೆ ಪದರನು ವ್ಹತ್ತು; ತೆ ಯಕ್ಕ ಗೆಣ ಲಾಂಬು ಯಕ್ಕ ಗೆಂ ರುಂದ ವ್ಹತ್ತು. ತಿನಾ ಕ್ಹಾಮಾ ಚಾರ ಲೈನನಾ ಹುತಿ ರತ್ನ ತಯ್ಯಾರ ಕರ‍್ಯಾ. ಪಸ್ಟನಾ ಲೈನಮಾ ಮಾಣಿಕ್ಯ ಪುಶ್ಪರಾಗ ಸ್ಪಟಿಕ, ಬೆವಾ ಲೈನಮಾ ನಿಲಿ, ರತ್ನ, ತ್ಯಾಪಿಯೊ, ತನ್ವಾ ಲೈನಮಾ ಸುವರ್ಣ ರತ್ನ ಗೊಮೆದಕ ದುಮ್ರ ಮಣಿಯೊ, ಚಾರವಾ ಲೈನಮಾ ಹಿತ ರತ್ನ ಬೆರುಲ್ಲ ವೈಡುರ್ಯ ಕ್ಹೊನಾನಾ ಖಾಚಾವೊಮಾ ಘಾಲ್ಯಲ ವ್ಹತ್ತು. ಇಸ್ರಾಯೆಲೊನಾ ಕುಲನಾ ಸಂಕ್ಯಾ ನಿಂಗತ ಬಾರಾ ರತ್ನ ವ್ಹತ್ತಾ; ಮುದ್ರಾ ರತ್ನಮಾ ಕೆತ್ತಾನಾ ತರಿಕಾಮಾ ಯಕ್ಕೆಕ್ಕ ರತ್ನಮಾ ಯಕ್ಕೆಕ್ಕ ಕುಲನು ನಾಮ ಕೆತ್ತಲ ವ್ಹತ್ತು. ಪದಕನಾ ಉಪ್ಪರ ಹುರಿಯೊ ನಿಂಗತ ರ‍್ಹವಾನಾ ಕ್ಹೊನಾನಾ ಸರಾವೊನೆ ಹೆಣಗಿನಾ ಕಾಮಕ್ಹು ಕರ‍್ಯಾ. ಬೆ ಕ್ಹೊನಾನಾ ಖಾಚಾ ಬೆ ಕ್ಹೊನಾನಾ ಇಟ್ಟಿಯೊ ಕರಿನ ತೆ ಇಟ್ಟಿಯೊನೆ ಪದಕನಾ ಭಂಬಿ ಮುಲಾವೊನೆ ಅಟ್ಕಾಯಾ. ಹೆಣಿಗಿನಾ ಕ್ಹಾಮಕ್ಹು ಕರ‍್ಹಯಲ ತೆ ಭಂಬಿ ಕ್ಹೊನಾನಾ ಸರಾವೊನೆ ಪದಕನಾ ಮುಲಾವೊಮಾ ರ‍್ಹವಾನಾ ಇಟ್ಟಯೊನೆ ಅಟ್ಕಾಯಾ. ಹೆಣಗಿ ಕಾಮನಾ ತೆ ಸರಾವೊನಾ ಮುಲಾವೊನೆ ಕವಚನಾ ಖಾಂದಾನಾ ಪಟ್ಟಿಯೊಮಾ ರ‍್ಹಯಲ ಬೆ ಖಾಚಾವೊನಾ ಕ್ಹಾಮಾ ಅಟ್ಕಾಯಾ. ತೆನೈಸೊ ಬೆ ಕ್ಹೊನಾನಾ ಇಟ್ಟಿಯೊ ಕರಿನ ಪದಕನಾ ಮ್ಹೈನಾ ಮುಲಾವೊಮಾ ಕವಚನಾ ನಜಿಕಜ ಮ್ಹೆಲ್ಯಾ. ವರಿ ಬಿಜಾ಼ ಬೆ ಕ್ಹೊನಾನಾ ಇಟ್ಟಿಯೊ ಕರಿನ ಕವಚನಾ ಭಂಬಿ ಖಾದಾವೊನಾ ಪಟ್ಟಿಯೊನಾ ಕ್ಹಾಮಾ, ಕವಚನೆ ಮಳಾಯಲ ಜ಼ಗಾ ಕನ ತೆ ಚೊಕಿ ಕಲಾಕ್ಹು ಕರ‍್ಹಯಲ ಕಂಬರನಾ ಪಟ್ಟಾನಾ ಉಪ್ಪರ ಮ್ಹೆಲ್ಯಾ. ಪದಕ ಚೊಕಿ ಕಲಾಕ್ಹು ಕರಲ ಕಂಬರನಾ ಪಟ್ಟಾನಾ ಉಪ್ಪರ ಬಿಗಿ ಥಾಯೆ ನಿಂಗತ ಕವಚತು ಖುಲಿನ ಪಡೆ ನೈಸೊ ತಿನಾ ಇಟ್ಟಿಯೊನೆ ಕವಚನಾ ಇಟ್ಟಿಯೊಕ್ಹು ನಿಲಿ ದೊರಾಕ್ಹು ಭಾಂದ್ಯಾ. ಯಹೊವಾ ಮೊಶೆನೆ ತಿಮ್ಮಜ಼ ಆಗನ್ಯಾ ಕರ‍್ಯೊತೊ.

ಯಾಜಕೊನಾ ಬಿಜಾ ವಣ್ಣಾ ತಯ್ಯಾರ ಕರಾನು

ಕವಚನಾ ಕ್ಹಾತೆ ವರಾಡಿನ ರ‍್ಹವಾನಾ ಉಪ್ಪರಲ್ಯಾ ಅಂಗಡಾನೆ ನಿಲಿ ಕಲರನಾ ಫಡ್ಕಾಕ್ಹುಜ ನೆತ ಕಾಮಕ್ಹು ಕರ‍್ಯೊ. ಮಾತು ದೆಕಾಡಾನೆ ತಿಮಾ ಭೊಕಾಡೊ ಕರಿನ ತೆ ಫಾಟೆ ನೈಸೊ ಯುದ್ದನಾ ಕವಚನಾ ಕ್ಹಾಮೊ ತೆ ಭೊಕಾಡಾನಾ ಸುತ್ತೆಬಿ ಕಸುತಿ ಘಾಲ್ಯೊ. ಉಪ್ಪರಲ್ಯಾ ಅಂಗ್ಡಾನಾ ಸುತ್ತೆ ನಿಲಿ ಜಾ಼ಂಬ್ಳಾನಾ ಕಲರ ವರಿ ಲಾಲ ದೊರಾಕ್ಹು ಅನಾರ ನಿಂಗತ ಚಂಡಾ ಕರ‍್ಯಾ. ವರಿ ಚೊಕ್ಕ ಕ್ಹೊನಾಕ್ಹು ಗೆಜ್ಜಿಯೊ ಕರಿನ ಉಪ್ಪರಲ್ಯಾ ಅಂಗ್ಡಾನಾ ತುದಿಮಾ ಅನಾರನಾ ಚಂಡಾವೊನಾ ಕ್ಹಾತೆ ಮ್ಹೆಲ್ಯಾ. ಕ್ಹೊನಾನಾ ಗೆಜ್ಜಿಯೊ ಅನಾರನಾ ನಿಂಗತ ರ‍್ಹವಾನಾ ಚಂಡಾ ಯಕ್ಕ ಥಯಲ್ಪರ ಯಕ್ಕ ಕ್ಹುದಾನಾ ಸೆವೆನಾ ಹುತಿ ರ‍್ಹಯಲ ತೆ ಉಪ್ಪರಲ್ಯಾ ಅಂಗ್ಡಾನಾ ತುದಿನಾ ಸುತ್ತೆ ವ್ಹತ್ತಾ. ಯಹೊವಾ ಮೊಶೆನೆ ಆಗನ್ಯಾ ದಿದ್ಯಲ ತಿಮ್ಮಜ಼ ಕರ‍್ಯಾ. ಆರೊನನೆಬಿ ತಿನಾ ಬಚ್ಚಾ಼ವೊನೆಬಿ ಬಾರಿಕ ದೊರಾಕ್ಹು ಹೆಣಗಿನಾ ಕಾಮ ನಿಂಗತ ಅಂಗ್ಡಾವೊನೆ ದೊರಾವೊಕ್ಹು ಮಹಾ ಯಾಜಕನಾ ಕಿರಿಟನೆ ದೊರಾವೊಕ್ಹು ಅಲಂಕಾರ ಕರ್xಯಲ ಕಿರಿಟೊನೆ ದೊರಾವೊಕ್ಹು ಮ್ಹೈ ಘಾಲ್ಯಾನಾ ವಣ್ಣಾ ಹುರಿನಾರಕ್ಹು ನಿಲಿ ಜಾ಼ಂಬ್ಳಾನು ಕಲರ ವರಿ ಲಾಲ ದೊರಾವೊಕ್ಹುಬಿ ಬುಟೆದಾರಿ ಕರಾನಾ ಕಾಮ ನಿಂಗತ ಕಂಬರನೊ ಪಟ್ಟೊ ಕರ‍್ಯಾ.ಯಹೊವಾ ಮೊಶೆನೆ ಆಗನ್ಯಾ ಕರಲ ತಿಮ್ಮಜ಼ ತೆ ಕರ‍್ಯಾ. ವರಿ ಚೊಕ್ಕ ಕ್ಹೊನಾಕ್ಹು ಪರಿಶುದ್ದ ಕಿರಿಟ ಥಯಲ ಪಟ್ಟೊ ಕರಿನ ಮುದ್ರೆ ಕೆತ್ತಾನಾ ತರಿಕಾಕ್ಹು ತಿಮಾ ಯಹೊವಾನೆ ಪವಿತ್ರ ವ್ಹೈ ಕವಾನಿ ಲಿಪಿ ಲಿಕ್ಯಾ. ತಿನೆ ಕಿರಿಟನೆ ಬಿಗ್ದಾನಾ ಹುತಿ ನಿಲಿ ದೊರೊ ಭಾಂದ್ಯಾ. ಯಹೊವಾ ಮೊಶೆನೆ ಆಗನ್ಯಾ ದಿದ್ಯಲ ನಿಂಗತ ತೆ ಕರ‍್ಯಾ.

ಕಾಮ ಮುಕ್ತಾಯ

ಇನಾ ನಿಂಗತ ದೆವದರ್ಶನು ಗುಡಾರನು ಕ್ಹಾರು ಕಾಮ ಪುರಾ ಥಯು. ಯಹೊವಾ ಮೊಶೆ ಆಗನ್ಯಾ ದಿದ್ಯಲ ತಿಮ್ಮ ತಿನೆ ಇಸ್ರಾಯೆಲೊ ಕರ‍್ಯಾತಾ. ತೆಳಾಮಾ ತ್ಯುನೆ ತೆ ಗುಡಾರನೆ ಮೊಶೆನಾ ಕ್ಹಾಮಾ ಲಿನ ಆಯಾ. ಸುವೈ ಕದ್ಯಾಮ- ಝುಪ್ಡಾನೆ ತಿನೆ ಸಂಬಂದ ರ‍್ಹಯಲ ಕ್ಹಾರು ಕದ್ಯಾಮ ತಿನಾ ಕೊಂಡಿಯೊ, ಚೌಕಟ್ಟೊ, ಅಗಳಿಯೊ, ಖಂಬಾ, ಗದ್ದಗಿನಾ ದಗ್ಡಾವೊನೆ ಎ ಕ್ಹಾರಾವೊನೆ; ಹದ ಕರ‍್ಹಯಲ ಲಾಲ ಕಲರನಾ ಬಕ್ರಾನಾ ಚಾಂಬ್ಡಾಕ್ಹು ಥಯಲ ಮೆಲಹೊದಿಕೆ, ರಾನಡುಕ್ಕುರನಾ ಚಾಂಬ್ಡಾಕ್ಹು ಥಯಲ ಮೆಲಹೊದಿಕೆ, ಮಹಾ ಪವಿತ್ರ ಜ಼ಗಾನೆ ಝಾಕಾನಾ ಪಡ್ದಾ ಎ ಕ್ಹಾರಾವೊನೆ; ಆಗನ್ಯಾ ಶಾಸನನಿ ಪೆಟಗಿ, ತಿನಾ ಲಾಕ್ಡಾ, ಕೃಪಾಸನ ಎ ಕ್ಹಾರಾವೊನೆ; ಟೆಬಲ, ತಿನಾ ಕ್ಹಾರಾ ಸಾಮನೊ, ಎಡಿನೊ ರೊಕ್ಲೊ ಎ ಕ್ಹಾರಾವೊನೆ; ಚೊಕ್ಕ ಕ್ಹೊನಾನು ದಿವ್ವಾನೊ ಖಂಬೊ, ತಿನಾ ಉಪ್ಪರ ಮ್ಹೆಲಾನಾ ಸಮೈಯ್ಯೊ, ತಿನಾ ಸಾಮನೊ, ದಿವ್ವಾನೆ ಚಾ಼ಯೆ ಥಯಲ ತೆಲ ಎ ಕ್ಹಾರಾವೊನೆ; ಕ್ಹೊನಾನಿ ಉದನೊ ಧವಾಂಡೊ ದಿವಾನೊ ಕಟ್ಟೊ, ಅಭಿಶೆಕನು ತೆಲ, ಚೊಕಿ ಬಾಸ ರ‍್ಹಯಲ ಉದ ಎ ಕ್ಹಾರಾವೊನೆ; ಝುಪ್ಡಾನಾ ಬಾಕಲನಾ ಪಡ್ದಾನೆ; ತಾಂಬಾನೊ ಬಲಿನೊ ಕಟ್ಟೊ, ತಿನಾ ತಾಂಬಾನಾ ಜಾಳಗಿಯೊ, ತಿನಾ ಲಾಕ್ಡಿಯೊ, ಸಾಮನೊ ಎ ಕ್ಹಾರಾವೊನೆ; ಗಂಗಾಳ, ತಿನು ಪಿಟ ಎ ಕ್ಹಾರಾವೊನೆ; ತಿನಾ ಆಂಗಳನಾ ಪಡ್ದಾ, ಖಂಬಾ, ಗದ್ದಗಿನಾ ದಗ್ಡಾ ಎ ಕ್ಹಾರಾವೊನೆ; ಅಂಗಳಾನಾ ಬಾಕಲನೊ ಪಡ್ದೊಬಿ, ತಿನಾ ರಾಕ್ಹೊ, ಗುಟೊ ಎ ಕ್ಹಾರಾವೊನೆ; ದೆವದರ್ಶನನಾ ಗುಡಾರನಾ ಸೆವೆನೆ ಚಾ಼ಯೆ ಥಯಲ ಕ್ಹಾರಾ ಸಾಮನೊ; ಪವಿತ್ರ ಜ಼ಗಾಮಾ ಥಾವಾನಿ ಸೆವೆನಾ ಹುತಿ ಚಾ಼ಯೆ ಥಯಲ ಅಲಂಕಾರನಾ ಫಡ್ಕಾ ಕದ್ಯಾಮ ಆರೊನನೆ ಚಾ಼ಯೆ ಥಯಲ ದಿಕ್ಷಾನಾ ಫಡ್ಕಾ ಯಾಜಕ ಸೆವೆ ಕರಾಲಾ ತಿನಾ ಬಚ್ಚಾ಼ವೊನೆ ಚಾ಼ಯೆ ಥಯಲ ಫಡ್ಕಾ ಎ ಕ್ಹಾರಾವೊನೆ ಲಾಯಾ. ಯಹೊವಾ ಮೊಶೆನೆ ಆಗನ್ಯಾ ದಿದ್ಯಲ ತಿಮ್ಮಜ಼ ಇಸ್ರಾಯೆಲೊ ತೆ ಕಾಮ ಕ್ಹಾರು ಕರ‍್ಯಾತಾ. ತ್ಯುನೆ ಕರ‍್ಹಯಲ ಕಾಮನೆ ಮೊಶೆ ಪರಿಕ್ಷಾ ಕರಿನ ಯಹೊವಾನಿ ಅಪ್ಪಣೆ ನಿಂಗತ ತ್ಯುನೆ ಕ್ಹಾರು ಕರ‍್ಯಾ ಕೈನ ತಿಳ್ದಿಲಿನ ತ್ಯುನೊನೆ ಆಶಿರ್ವಾದ ಕರ‍್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.