Skip to content
BibleKenya

Sikkiligar Bible

ವಿಮೊಚನ 23

ನ್ಯಾಯ ವರಿ ಚೊಕಿತನಾ

ಸುಳ್ಳ ಸುದ್ದಿ ಫೈಲೌನೈ.ದುಷ್ಟೊನಾ ಕ್ಹಾತೆ ಮಳಿನ ಸುಳ್ಳ ಸಾಕ್ಷಿ ಕೌನೈ. ದುಸ್ಟ ಕಾಮೊ ಕರಾಲಾ ಘನ್ನಾ ಜ಼ನಾ ಛೆ, ತೆ ರ‍್ಹೈತಬಿ ತುಮೆ ತ್ಯುನಾ ಕ್ಹಾತೆ ಸೆರು ನೈ. ಘನಾ ಜ಼ನಾ ವಾತನೆ ಒಪ್ಪಿನ ನ್ಯಾಯ ಕೆಡಸಾನು ಸಾಕ್ಷಿ ಕವೊ ನೈ. ತೆ ನೈಸೊ ಗರಿಬನಾ ಉಪ್ಪರ ಕರುಣೆಕ್ಹು ಪಕ್ಷಪಾತನಾ ತಿರ್ಮಾನ ಕರು ನೈ.

ತಾರಾ ವೈರಿನಾ ಬೈಲ ರ‍್ಹವಾದೆ, ಗದಡು ರ‍್ಹವಾದೆ ತಪ್ಸಿಲಿನ ಗಯಾಮಾ ತೆ ತುನೆ ಮಳ್ಯಾಮ ತಿನೆ ತಿಕನ ಗೈನ ಒಪ್ಸೂ. ತುನೆ ಹಗೆತನ ಕರಾಲಾನಾ ಗದ್ಡಾನಾ ಹೊರೆನಾ ಹೆಟು ಪಡಲ ದೆಕ್ಯಾಮಾ, ತಿನೆ ಉಚಾವಾನೆ ಮನಸ ನೈ ರ‍್ಹೈತಬಿ ತಿ ನೆ ಸಹಾಯ ಕರಿನ ಉಚವೊ. "ತುಮಾರಾಮಾ ರ‍್ಹವಾನು ಗರಿಬನಾ ನ್ಯಾಯ ಕೊರಿ ತುಮೊಕನ ಆಯಾಮ ತುಮೆ ಅನ್ಯಾಯ ಫೈಸಲೊ ಕರು ನೈ. ಮೊಸನಾ ಕಾಮಕ್ಹು ದುರ ಥಯನ ರ‍್ಹೌ. ಸುಜ ತಪ್ಪ ನೈಸೊವಾಲೊ ನಿತಿವಂತವಾಲೊ ರ‍್ಹವಾನಾ ಮನಕ್ಹನೆ ಮರಾನಾ ಶಿಕ್ಷಾ ದ್ಯೂಜ ನೈ. ತ್ಯವಾ ದುಷ್ಟನೆ ಮಿ ಶಿಕ್ಷಾ ದಿದೆವಾಚಿ ನೈ ಛೊಡತೊ. ಲಂಚಾ ಕಾಡಿಲ್ಯೂನೈ, ಲಂಚ ಡೊಳಾವಾಲಾನೆ ಕುಡ್ಡಾ ನಿಂಗತ ಕರುಸ, ಸು ತಪ್ಪ ನೈಸೊವಾಲೊ ಮಾಳಾನಾ ನ್ಯಾಯನಾ ಚುಕೌ. ಬಿಜಾ಼ ದೆಶವಾಲಾನೆ ಉಪದ್ರವ ದ್ಯೂ ನೈ. ತುಮೆ ಐಗುಪ್ತ ದೆಶಮಾ ಪರದೆಶಿವಾಲಾ ಥಯಾಸ. ತ್ಯವಾವೊನಾ ಮನಸನಿ ಭಾವ್ನಾನೆ ತಿಳದಲವಾಲಾ ಥಯಾಸ.

ಕ್ಹಾತವಾ ವರಕ್ಹ ವರಿ ಕ್ಹಾತವಾ ದಿನ್ನನಾಹುತಿ

ಛೆ ವರಕ್ಹ ತುಮಾರಾ ಕ್ಹೆತರನೆ ಬಿತ್ತಿನ ತಿನಾ ಫಲನೆ ಕಾಡಿಲಿವೊ. ತೆ ನೈಸೊ ಕ್ಹಾತವಾ ವರಕ್ಹಮಾ ತೆ ಜಿಮಿನೆ ಉಗ್ರಾಡಾನೆ ಛೊಡಿಪಡು. ತುಮಾರಾ ದೆಶನಾ ಗರಿಬೊ ತಿಮಾ ಹುಟ್ಟಾನು ಕ್ಹಾವಾದೆ. ಉಗ್ರಲ ಕ್ಹಾರು ಜಂಗಲನಾ ಪ್ರಾಣಿಯೊ ಚರಾದೆ. ತುಮಾರೊ ದ್ರಾಕ್ಷಿನೊ ಮಳಾನಾ ವರಿ ತೆಲನಾ ಝಾಡೊನಾ ತೊಪೊನಾ ವಿಷಯಮಾ ಆನಾ ನಿಂಗತಜ಼಼ ಕರು.

ಅಟ್ವಾಡಾಮಾ ಛೆ ದಿನ ತುಮಾರಾ ಕಾಮೊ ಕರಲಿವೊ ಕ್ಹಾತವಾ ದಿನಮಾ ಕಯುಜ಼ ಕಾಮ ಕರೆವಾಚಿ ರ‍್ಹೌ. ತೆ ಟೈಮಾ ತುಮಾರಾ ಬೈಲೊನೆ ,ಗದ್ಡಾವೊನೆ, ದಾಸ, ದಾಸಿಯೊನೆ, ಬಿಜಾ಼ ದೆಶವಾಲಾ ವಿಶ್ರಾಮ ಲಿದ್ಯಾ. ಮಿ ತುಮೊನೆ ಕದಲ ಕ್ಹಾರು ಹುಶಾರಕ್ಹು ಕಾಯ್ದಿಲಿಯು. ಬಿಜಾ಼ ದೆವಸ್ಥಾನೊನೆ ಸೊಚುನೈ, ತೆ ನಾಮೊನೆ ಕೌ ನೈ.

ತನ್ನ ಮ್ಹೊಟಾ ಸನ್ನೊ

ತುಮೆ ಹರ ವರಕ್ಹೆ ತನ್ನ ಸಲಾ ಮನೆ ಸನ್ನ ಕರು. ಕ್ಹಾಟು ನೈ ರ‍್ಹಯಲ ರೊಕ್ಲಾವೊನೆ ಕ್ಹಾವಾನೊ ಸನ್ನ. ಮಿ ತುಮೊನೆ ಕದಲ ನಿಂಗತ ತುಮೆ ಚೈತ್ರ ಅಮಾಸಮಾ ನೆಮಕ ಥಯಲ ಕಾಲಮಾ ಕ್ಹಾತ ದಿನ ಕ್ಹಾಟೊ ರೊಕ್ಲಾವೊನೆ ಕ್ಹೌ. ತೆ ಮ್ಹೈನಾಮಾಜ ಐಗುಪ್ತ ದೆಶತೊ ಆಯಲ ಸ್ಹೆನಾಹುತಿ ಕರುಜ಼. ಹತ್ಮಾ ಕಾಣಿಕೆವಾಚಿ ಕ್ಹಾಲಿ ಹತೆ ಮಾರಾ ಸನ್ನಿದಿನೆ ಕುನ್ನಜ ಔನೈ. ತೆ ನೈಸೊ ತುಮೆ ಘಾಲಲ ಕ್ಹೆತರಮಾ ಪೈಲಾ ಫಲನೆ ಆತಾಮಾ ಸಗ್ಗಿನೊ ಸನ್ನ ಕರು. ಕ್ಹೆತರ ಮಳಾನಾ ಫಲನೆ ಜಮಾ ಕರ‍್ತಾಮಾ ಕದ್ಯಾಮ ವರಕ್ಹನಾ ಲಾಸ್ಟಮಾ ಸುಗ್ಗಿನೊ ಸನ್ನ ಕರು. ವರಕ್ಹಮಾ ತನ್ನ ಸಲಾ ತುಮಾರಾಮಾ ರ‍್ಹವಾನಾ ದಾಣ್ಗಾ ಕ್ಹಾರಾ ಕರ್ತಾ ಥಯಲ ಯಹೊವಾನಾ ಸನ್ನಿದಿನೆ ಮಳಿನ ಔ. ಮನೆ ಯಜ್ಞ ಕರ‍್ತಾಮಾ ತೆ ಬಲಿನಾ ಬಚ್ಚಾನಾ ರಗತನಾ ಕ್ಹಾತೆ ಕ್ಹಾಟು ಥಯಲ ಲೊಟನೆ ಸಮರ್ಪಿಸ ಕರು ನೈ. ಮಾರಾ ಸನ್ನಮಾ ತುಮೆ ಮನೆ ಸಮರ್ಪಿಸ ಕರಾನು . ಪಶುನಾ ಮಕ್ಹನೆ ಅಗಲ್ಯಾ ದಿನ್ನ ಲಕ್ಕಾ ಮ್ಹೆಲುಜ ನೈ. ತುಮಾರಾ ಬೆಳೆನಾ ಪೈಲಾ ಫಲಮಾ ಘನ್ನು ಶ್ರೆಷ್ಠ ಥಯಲ ತುಮಾರೊ ಕ್ಹುದಾ ಥಯಲ ಯಹೊವಾನಾ ಗುಡಿನೆ ಲಿನ ಔ. ಬಕ್ರಾನಾ ಬಚ್ಚಾ಼ನೆ ತಿನಿಯಾನಾ ದುದ್ದಮಾ ಉಕ್ಳೌ ನೈ.

ವಾಗ್ದಾನ ವರಿ ಮಾರ್ಗದರ್ಶನ

ಹಮ್ನಾ ವಾಟಮಾ ತುಮೊನೆ ವಚಾ಼ಡಾನಾಹುತಿ,ಮಿ ಗ್ವತ್ತ ಕರಲ ಜ಼ಗಾನೆ ತುಮೊನೆ ಬೈಲೈಲಿನ ಆವಾನಾಹುತಿ ದುತನೆ ತುಮಾರಾ ಅಗೊ ವಳಾಯೊಸ. ತು ತಿಮಾ ಧ್ಯಾನದಿನ ತಿನಾ ವಾತೆ ವಿದೆಯೆ ಥೌ. ತಿನೆ ದಿಕ್ಕರಶ್ಯಾಮ ತುಮಾರಾ ಅಪರಾದೊನೆ ನೈ ಕ್ಷಮಸತೊ. ಮಾರಾ ನಾಮನಿ ಮಹಿಮಾ ತಿನಾಮಾ ರ‍್ಹವಸ. ತುಮೆ ತಿನಾ ವಾತೊನೆ ಮನಸೆ ಐಕಿನ ಮಾರಾ ಆಜ್ಞಾನಾ ಪ್ರಕಾರ ಚಾಲಿ ಲಿದ್ಯಾಮ ಮಿ ತುಮಾರಾ ದುಸ್ಮನೊನೆ ದುಸ್ಮನೊ ನಿಂಗತಜ಼಼, ತುಮೊನೆ ತ್ರಾಸಕರಾಲಾನೆ ತ್ರಾಸ ಕಾರಾ ನಿಂಗತಜ಼಼ ಥವೊಸ. ಮಾರೊ ದುತ ತುಮಾರಾ ಕ್ಹಾಮೊ ಗೈನ ಅಮೊರಿಯೊ, ಹಿತ್ತಿಯೊ, ಪೆರಜಿಯೊ, ಕಾನಾನ್ಯರೊ, ಹಿವ್ವಿಯರೊ, ಯೆಬುಸಿಯರೊ, ರ‍್ಹವಾನಾ ದೆಶನೆ ತುಮೊನೆ ಸೆರಸುಸ. ತ್ಯುನೊನೆ ರ‍್ಹೈತಬಿ ಸು ನೈಸೊ ನಿಂಗತಜ಼಼ ಕರಸ. ತ್ಯುನಾ ದೆವತೆಯೊ ತುಮೆ ಅಡ್ಡ ಪಡಿನ ಪಗೆಬಿ ಪಡು ನೈ, ತ್ಯುನಾ ಆಚರಣೆನೆ ಕರುಜ ನೈ.ತೆ ಮನಕ್ಹೊನೆ ಸುಜ ನೈಸೊ ಕರಿನ ಮೂರ್ತಿಯೊನಾ ಕ್ಹಂಬಾ ಹಾಳ ಕರು ತುಮಾರೊ ಕ್ಹುದಾ ಥಯಲ ಯಹೊವಾ ಯಕ್ಲಾನೆಜ ಆರಾಧನಾ ಕರು. ತೆಳಮಾ ತೆ ತುಮಾರಾ ಅನ್ನ ಪಾನೊನೆ ಆಶಿರ್ವಾದ ದಿವಸ. ತುಮಾರಾಮಾ ರ‍್ಹವಾನಾ ರೊಗೊನೆ ಕಾಡಿ ಪಡುಸ. ತುಮಾರಾ ದೆಶ ಗರ್ಬ ಪಾತ ಥಾವಾದೆ, ಬಂಗಾತನ ಥಾವಾದೆ, ರ‍್ಹತುಜ಼ ನೈ. ತುಮೊನೊ ಸಂಪೂರ್ಣ ಥೈನ ಮರಗಿನ ಆಯುಷ್ಯ ದಿದ್ಯೊ.

ತುಮೆ ಜಾ಼ವಾನಿ ಕ್ಹಾರಿ ಜ಼ಗಾವೊಮಾ ಮಿ ಮನಕ್ಹೊನಾ ಮನಸಮಾ ಬಚಕ ಉಂಟ ಕರಿನ ತ್ಯುನೊನೆ ಕಳವಳ ಕರಿನ, ತುಮಾರಾ ವಿರೊದಿಯೊ ಕ್ಹಾರಾ ನ್ಹಾಟಿನ ಜಾ಼ವಾನಿಂಗತಜ಼಼ ಕರುಸ. ತೆ ನೈಸೊ ಕಡಜನಾ ಕಿಡಾ ತುಮೊ ನೆ ಪೈಲಾಜ ವೈಳೈನ ಹಿವ್ವಿಯರೊ, ಕಾನಾನ್ಯರೊ, ಹಿತ್ತಿಯರೊ, ತುಮಾರಾ ಕ್ಹಾಮಾ ಹುಬ್ರೆವಾಚಿ ತೆ ತ್ಯುನೊನೆ ನ್ಹಟಾಡಿ ಪಡುಕೈನ ಕರುಸ. ತೆ ಥಯಲ್ಪರ ಮಿ ಯಕ್ಕಜ ವರಕ್ಹಮಾ ತ್ಯುನೊನೆ ಕ್ಹಾರವೊನೆ ತ್ಯಾಂತೊ ಮೊಕಲ್ತೊ ನೈ.ಕಾ ಕದ್ಯಾಮ ದೆಶಮ ಮನಕ್ಹೊ ಕಮ್ಮ ಥಯಲಕ್ಹು ಜಂಗಲನ್ಞೊ ಪ್ರಾಣಿಯೊ ಹೆಚ್ಕಿ ಥೈನ ತುಮೊನೆ ತರಾಸ ಥಯೂಸತೊ. ತುಮೆ ಅಬಿವೃದ್ದಿ ಥೈನ ದೆಶಕ್ಹಾರು ಭರೆಲಕ್ಕಾ ತ್ಯುನೊನೆ ದಕ್ಹಾ ದಕ್ಹಾಥೈನ ಮೊಕ್ಲುಸ. ಲಾಲ ಸಮಂದರಕ್ಹು ಪಿಲಿಸ್ಟಿನಾ ದೆಶನಾ ನಜಿಕ ರ‍್ಹವಾನು ಸಮಂದರ ಲಕ್ಕಾ ವರಿ ಆ ಜಂಗಲಕ್ಹು ಯೂಪ್ರಿಟಿಸ ಮಹಾ ನದಿಲಕ್ಕಾ ರ‍್ಹವಾನಾ ಕ್ಹಾರಾ ದೆಶೊನೆ ತುಮಾರಾಹುತಿ ನೆಮ್ಸಿನ ತಿಮಾ ರ‍್ಹವಾನಾ ನಿವಾಸಿಯೊನೆ. ತುಮೊನೆ ಅದಿನ ಪಡಸುಸ. ತುಮೆ ತ್ಯುನೊನೆ ಮೊಕ್ಲಾವೊ. ತುಮೆ ತ್ಯುನಾ ಕ್ಹಾತೆ ತ್ಯುನಾ ದೆವತಿಯೊನಾ ಕ್ಹಾತೆ ರ‍್ಹವಾದೆ ಕಯುಜ಼ ಬಿಜು಼ ಥಯಲ ಒಡಂಬಡಿಕೆ ಕರಲ್ಯೂ ನೈ. ತ್ಯುನೆ ತುಮಾರಾ ದೆಶಮಾ ರ‍ಹೆಲ ರ‍್ಹೌ ನೈ. ರ‍್ಹಯಾಮ ಮನೆ ವಿರುದ್ದ ಥೈನ ತುಮೆ ಪಾಪ ಕರೆವಾಚಿ ತ್ಯುನೆ ಪ್ರೆರಸಸ. ತುಮೆ ತ್ಯುನಾ ದೆವತಿಯೊನೆ ಪೂಜಾ ಕರ‍್ಯಾಮ ತೆ ಪೂಜಾ ತುಮೆ ಉರುಲ ಥಾವಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.