ಎಸ್ತರ 2

ಎಸ್ತರ ರಾಣಿ ಥಯಲ

1ಎ ಕ್ಹಾರು ಥಯಲ್ಪರ ರಾಜಾ಼ನಿ ಶಿಟ್ಟ ಛೊಡಿನ ವಷ್ಟಿನೆ, ತೆ ಕರಲ ವರಿ ತಿನಿ ವಿಶಯಮಾ ಕರಲ ಫೈಸಲೊ ಶೆ ಕರ್ಲಿವಾಡ್ಯೊತೊ. 2ತೆಳಾಮಾ ತಿನಿ ಸೆವೆ ಕರ್ತಾ ರ‍್ಹಯಲ ರಾಜಪರಿವಾರವಾಲಾ ರಾಜಾ಼ನೆ, "ತಾರಾ ಹುತಿ ಸುಂದರ ರ‍್ಹಯಲ ಛೊಕ್ರಿಯೊನೆ ಹುಡ್ಕಾನಾ ಹುತಿ ಹಮೊನೆ ಅಪ್ಪಣೆ ದ್ಯು ಕದ್ಯಾ. 3ರಾಜೊ಼ ತಿನಿ ರಾಜ್ಯನಾ ಕ್ಹಾರಾ ಸಂಸ್ಥಾನೊಮಾ ಕಾಮ ಕರಾಲಾವೊನೆ ಮೊಕ್ಲು; ತ್ಯುನೆ ಸುಂದರಿ ರ‍್ಹಯಲ ಕ್ಹಾರಿಯೊ ಛೊಕ್ರಿಯೊನೆ ಶುಶನ ಕೊಟೆನಾ ಅಂತಪುರಮಾ ಮಳೈನ, ಅಂತಪುರನಾ ಪಾಲಕ ರಾಜಕಂಚಿಕಿಯೊ ಥಯಲ ಹೆಗೈಯನಾ ವಶಮಾ ದಿವಾದೆ. ತೆ ತ್ಯುನೊನೆ ಕಾಂತಿ ಜಾಸ್ತಿ ಥಾವಾನು ಮಲ್ಲಮ ದ್ರವ್ಯವೊ ವಾಟಾದೆ. 4ರಾಜೊ಼ ಕೈ ಛೊಕ್ರಿನೆ ಪಸಂದ ಕರಸ ತೆ ಛೊಕ್ರಿ ವಷ್ಟಿನಾ ಬದಲಿ ತೆ ರಾಣಿ ಥಾವಾದೆ" ಕದ್ಯಾ. ರಾಜೊ಼ ತ್ಯುನಾ ವಿಚಾರೊನೆ ಸಮ್ಮತಿ ಕರಿನ ತಿನಾನಿಂಗತಜ಼಼ ಕರ‍್ಯೊ. 5ಶುಶನ ಕೊಟೆಮಾ ಮೊರ್ದೆಕೈ ಕವಾಲೊ ಯಕ್ಲೊ ಯೆಹುದಿ ಮನಕ್ಹ ರ‍್ಹವಾಡೊತೊ. ಎ ಬೆನ್ಯಾಮಿನನಾ ಕುಲನೊ ಕಿಶನನೊ ಪರನಾತನೊ, ಶಿಮ್ಗಿಯನೊ ನಾತನೊ, ಯಾಯಿರನೊ ದಿಕ್ರೊ ವ್ಹತೊ. 6ಬಾಬೆಲೊನನೊ ರಾಜೊ಼ ಥಯಲ ನೆಬುಕದ್ನೆಚ್ಚರಕ್ಹು ಯೆಹುದಿ ರಾಜೊ಼ ಥಯಲ ಯೆಹೊಯಾಕಿನನಾ ಕ್ಹಾತೆ ಬಂದಿ ಕರಿನ ನಿಂಗೈಯಲವಾಲಾವೊಮಾ ಎಬಿ ಯಕ್ಲೊ ವ್ಹೈ. 7ತೆ ಎಸ್ತರ ಕೈನ ನಾಮ ರ‍್ಹಯಲವಾಲಿನೆ ಹದೆಸ್ಸಾ ಕವಾನಾ ತಿನಾ ನ್ಹಾನಾ ಕಾಕಾನಿ ಅನಾಥ ರ‍್ಹಯಲ ದಿಕ್ರಿನೆ ಮಾ ಬಾಪ ಮರಲ ದಿನ್ನತಾ ದಿಕ್ರಿ ವ್ಹೈ ಕೈನ ವಪ್ಪಿಲಿನ ತಿನೆ ರಾಕಾಡ್ಯೊತೊ. ತೆ ಘನ್ನಿ ಸುಂದರಿ ವರಿ ಲಾವಣ್ಯವತಿ ವ್ಹತ್ತಿ. 8ರಾಜಾ಼ನೊ ಫೈಸಲೊ, ಆಜ್ಞೆ ದಿದಲಲ್ಪರ ಕಾರ್ಯ ನಿರ್ವಾಹಕೊ ಘನ್ನಿಯೊ ಛೊಕ್ರಿಯೊನೆ ಮಳೈನ ಶುಶನ ಕೊಟೆಮಾ ಹೆಗೈನಾ ವಶಮಾ ವಪ್ಸಿನ ದೆತಾಮಾ ಎಸ್ತರ ರಾಜ಼ನಾ ಘರ್ಮಾ ಐನ ಅಂತಪುರ ಪಾಲಕ ಥಯಲ ಹೆಗೈನಾ ಪರಾಂಭರಮಾ ವ್ಹತ್ತಿ. 9ಹೆಗೈ ತಿನೆ ಪಸಂದ ಕರಿನ ತಿನಿ ಮರ್ಗಾನೆ ಪಾತ್ರ ಥಯಲ ತಿನಾಹುತಿ ತಿನಾ ತಕ್ಕ ಮಲ್ಲಾಮೊ ವರಿ ಅನ್ನ ದಿದ್ಯೊ. ತೆ ತಿನಾಹುತಿ ಕ್ಹಾತ ಸೆವಕಿಯೊನೆ ಇನಿಲಿನ ತಿನೆ ವರಿ ಸೆವಕಿಯೊನೆ ಅಂತಪುರಮಾ ಚೊ಼ಕಿ ಜ಼ಗಾ ಮುಕ್ಯೊತೊ. 10ಎಸ್ತರ ತೆ ಹೈಜ಼ ಜನಾಂಗವಾಲಿ ವ್ಹೈ ಕೈನ, ಹೈ ಕುಲವಾಲಿ ವ್ಹೈ ಕೈನ ದೆಕಾಡಿನ ದಿದಿ ನೈ. ಮೊರ್ದೆಕೈ ಇಮ್ಮ ಅಪ್ಪಣೆ ದಿದಲ ದೆಕಿನ. 11ತೆ ತಿನು ಅರಾಮನಾ ಹುತಿ ವರಿ ತೆ ಅಗಿ ಸು ಕರು ಕೈನ ವಿಚಾರ ಕರಾನಾ ಹುತಿ ದಿನ್ನೆಬಿ ಅಂತಹಪುರಮಾ ಪ್ರಾಕಾರನಾ ಕ್ಹಾಮೊ ಪ್ಹರಾಡ್ಯೊತೊ. 12ಛೊಕ್ರಿಯೊನೆ ಮಲ್ಲಮ ಲಗಾಡಾನು ಪುರಾ ಕರಾನಾ ಹುತಿ ಗಂಧರಸ ಪ್ರಯೊಗಮಾ ಛೆ ಮ್ಹೈನಾ, ಅಮ್ಮತಿಮ್ಮ ಕರಿನ ಬಾರಾ ಮ್ಹೈನಾ ಥಯಾ. ಎ ಟೈಮ ಥಯಲ್ಪರ ರಾಜಾ಼ನಾ ಘರನಾ ನಿಯಮನಾ ನಿಂಗತ ತಿನಾಕ್ಹು ತಿನೆ ತಯ್ಯಾರ ಕರಿಲಿದಲ ಹರಿಯಕ್ಕ ಛೊಕ್ರಿ ಅಹಶ್ಟೆರೊಶ ರಾಜಾ಼ನಾ ಕ್ಹಾಮಾ ಜಾ಼ವಾನು ವ್ಹತ್ತು. 13ರಾಜಾ಼ನಾ ಕ್ಹಾಮಾ ಜಾ಼ವಾನಿ ಪಾಳಿ ಕಿನಿ ಆವಸ ತೆ ಅಂತಪುರತಿ ರಾಜಾ಼ನಾ ಘರೆ ಲಿನ ಜಾ಼ವಾನಾಹುತಿ ಸು ಪುಚ್ಯಾತಬಿ ದಿವಸ. 14ತೆ ತ್ಯಾ ಕ್ಹಾಂಜೆ ಗಯಲವಾಲಿ ಮರ್ನಾ ದಿನ್ನೆ ತೆ ಪಾಟೆ ರಾಜಾ಼ನಾ ಬಿಜಿಯೊ ಬೈಕೊನೆ ಪಾಲನೆ ಕರಾಲೊ ಥಯಲ ಶವಷ್ಗರ ಕವಾಲಾನೆ ರಾಜಕಂಚುಕಿನಾ ಹತ್ಮಾ ರ‍್ಹಯಲ ಬೆವಾ ಅಂತಪುರೆ ಆವಸ. ರಾಜೊ಼ ತಿನೆ ಪಸಂದ ಕರಿನ ನಾಮ ಕೈನ ಬಲಾಯೆ ಲಕ್ಕಾ ಯಕ್ಲಿಬಿ ರಾಜಾ಼ಕನ ವರಿ ಪ್ಹರಿನ ಆವಾಜೊ಼ಗು ನ್ಹೊತು. 15ರಾಜಾ಼ಕನ ಜಾ಼ವಾನೆ ಮೊರ್ದೆಕೈನಿ ದತ್ತ ಪುತ್ರಿ ತಿನೊ ಕಾಕೊ ಥಯಲ ಅಬಿಹೈಲನಿ ದಿಕ್ರಿ ಥಯಲ ಎಸ್ತರೆಳನಿ ಪಾಳಿ ಆತಾಮಾ, ಅಂತಪುರನೊ ಪಾಲಕ ಥಯಲ ಹೆಗೈ ಕವಾಲಿ ರಾಜಕಂಚುಕಿ ನೆಮ್ಸಲನೆಜ಼ ಚೊಡಿನ ತೆ ಬಿಜು಼ ಸುಜ಼ ಪುಚ್ಚಿ ನೈ. ದೆಕಾಲಾ ಕ್ಹಾರುಜ಼ ತಿನೆ ಮೆಚ್ಯಾ. 16ರಾಜೊ಼ ಥಯಲ ಅಹಷ್ವೆರೊಶನಕನ ತಿನೊ ಅಧಿಕಾರನು ಕ್ಹಾತ್ವಾ ವರಕ್ಹ ದಕ್ಹವಾ ಮ್ಹೈನೊ ಥಯಲ್ಪರ ಪುಶ್ಯಮಾಸಮಾ ತಿನೆ ರಾಜಾ಼ನಾ ಘರ್ಮಾ ಲಾಯಾ. 17ರಾಜೊ಼ ಕ್ಹಾರಿಯೊಜ಼ ಛೊಕ್ರಿಯೊಮಾ ಎಸ್ತರನೆಜ಼ ಪಸಂದ ಕರ‍್ಯೊ. ಕ್ಹಾರಿಯೊ ಛೊಕ್ರಿಯೊಮಾ ತೆ ತಿನಿ ದಯಾನೆ, ಮಯಾನೆ ಪಾತ್ರ ಥಯಲಹುತಿ ತೆ ರಾಜಮುಕುಟ ತಿನಾ ಮಾತಾಪರ ಮ್ಹೆಲಿನ, ತಿನೆ ವಷ್ಟಿನಾ ಬದಲಿ ರಾಣಿ ಥೈನ ಕರ‍್ಯೊ. 18ತೆ ತಿನಾ ಕ್ಹಾರಾ ಸರದಾರೊನೆ ವರಿ ಪರಿವಾರವಾಲಾವೊನೆ ಎಸ್ತರನಾಹುತಿ ಖಾವಾನು ಮ್ಹೊಟು ಕರೈನ, ಕ್ಹಾರಾ ಸಂಸ್ಥಾನೊಮಾ ಜೆಲ್ಮಾ ರ‍್ಹಯಲವಾಲಾವೊನೆ ಛೊಡೈನ ದಾನ ಕರಾಯೊ.

ಮೊರ್ದೆಕೈ ಕೆಟ್ಟ ವಿಚಾರ ಕರಲ

19ಬೆವಾಸಲಾ ಛೊಕ್ರಿಯೊನೆ ಮಳಾತಾಮಾ ಮೊರ್ದಕೈ ರಾಜಾ಼ನಾ ಮಹೆಲನಾ ಮ್ಹೊಟಾ ಬಾಕಲನಾ ಕ್ಹಾಮೊ ಬೈಟ್ಯೊತೊ. 20ಎಸ್ತರತೊ ಮೊರ್ದೆಕೈ ಪರಾಂಬರಿಕೆನಾ ದಿನ್ನೊಮಾ ರ‍್ಹತಾಮಾ ಕಿಮ್ಮ ತಿಮ್ಮಜ಼ ತೆಳಾಮಾಬಿ ತಿನಿ ಆಜ್ಞೆನೆ ಪಾಲನೆ ಕರಾಲಿ ಥೈನ ಮಿ ಹೈ ಕುಲವಾಲಿ ವ್ಹೈ ಕೈನ, ಹೈ ಜನಾಂಗವಾಲಿ ವ್ಹೈ ಕೈನ ಕಿನೆಜ಼ ದೆಕಾಡಿನ ದಿದಿನೈ. 21ತೆ ದಿನ್ನೊಮಾ ಮೊರ್ದೆಕೈ ರಾಜಾ಼ನಾ ಮಹೆಲನು ಬಾಕಲ ಕೈದಾಲೊ ಥಯಲ ಬಿಗೆತಾನ ವರಿ ತೆರೆಶ ಕವಾಲ್ಯೊ ಬೆ ಜ಼ನಿಯೊ ರಾಜಕಂಚುಕಿಯೊ ಶಿಟ್ಟ ಥೈನ ರಾಜಾ಼ಪರ ವಿರುದ್ದ ಥೈನ ಮ್ಹೈನಾ ಮ್ಹೈ ವಿಚಾರ ಕರಿಲಿದ್ಯೊತ್ಯೊ. 22ಎ ಕ್ಹಾರುಜ಼ ಮೊರ್ದೆಕೈನೆ ಗ್ವತ್ತ ಥಾತಾಮಾ ತೆ ಎಸ್ತರ ರಾಣಿಕನ ಕದ್ಯೊ. ತೆ ತಿನು ನಾಮ ರಾಜಾ಼ನೆ ಕೈನ ತೆ ಸಂಗತಿಯೊ ಕದಿ. 23ವಿಶಯನಾ ಹುತಿ ವಿಚಾರಣೆನಾ ಕವಾನೊ ಟೈಮ ಆತಾಮಾ ತೆ ಕ್ಹರಿಜ಼಼ ವ್ಹೈ ಕೈನ ಗ್ವತ್ತ ಥಯಲಕ್ಹು ತೆ ಭಂಬಿ ಜ಼ನಾವೊನೆ ಪ್ಹಾಸಿನೆ ಘಲಾಯೊ. ತೆ ಸಂಗತಿಯೊ ರಾಜೊ಼ ದಿನ್ನೆ ಬರ್ದಾನಾ ಪುಸ್ತಕಮಾ ದಾಖಲಾ ಥಯು.