ಎಸ್ತರ 1

ರಾಜೊ಼ ವಷ್ಟಿ ರಾಣಿನೆ ಹೆಟೊ ಉತಾರ‍್ಯಲ

1ಭಾರತ ದೆಶತಿ ಸುರು ಥೈನ ಕುಶಿನಲಕ್ಕಾ ರ‍್ಹಯಲ ಯಕ್ಹೊನ ಸತ್ತರಪರ ಕ್ಹಾತ ಸಂಸ್ಥಾನೊಪರ ಅದಿಕಾರ ಕರ್ತೊ ರ‍್ಹಯಲ ಅಹಶ್ವರೊಶನನಾ ಟೈಮಮಾ ಥಯಲ ಚರಿತ್ರೆ. 2ಅಹಶ್ವೆರೊಶನ ರಾಜೊ಼ ಶುಶನ ಕೊಟೆಮಾ ತಿನಿ ರಾಜಸಿಂಹಾಸನ್ಪರ ಬೈಟಿನ ಅದಿಕಾರ ಕರ್ತೊತೊ. 3ತೆ ತಿನೊ ಅದಿಕಾರ ತನ್ವಾ ವರಕ್ಹಮಾ ತೆ ತಿನಾ ಕ್ಹಾರಾಜ಼ ಸರ್ದಾರೊಮಾ ವರಿ ತ್ಯುನಾ ಪರಿವಾರನಾ ಹುತಿ ಖಾವಾನು ಅನ್ನ ತಯ್ಯಾರ ಕರ‍್ಯೊ. ಪಾರಸಿನಾ ವರಿ ಮೆದ್ಯನಾ ಸೆನಾದಿಪತಿಯೊ, ಮ್ಹೊಟಾ ವರಿ ಸಂಸ್ಥಾನನಾ ಅದಿಕಾರಿಯೊ, ರಾಜಾ಼ನಿ ಸನ್ನಿಧಿಮಾ ಮಳಿನ ಆಯಾ. 4ತ್ಯುನೆ ಘನ್ನಾ ದಿನ್ನ ಕದ್ಯಾಮ, ಯಕ್ಹೊನ ಐಂಶಿ ದಿನ್ನಲಕ್ಕಾ ತಿನಿ ರಾಜ್ಯನಿ ಸೌಕಾರ ತನಾ ವರಿ ಮಹಿಮಾನಿ ವೈಭವ ತಿನಿ ತಾಕತ ದೆಕಾಡಿನೆ ದಿದ್ಯೊ. 5ತೆ ಥಯಲ್ಪರ ರಾಜೊ಼ ಶುಶನ ಕೊಟೆಮಾ ರ‍್ಹಯಲ ಕ್ಹಾರಾ ಮ್ಹೊಟಾವೊನೆ ವರಿ ನ್ಹಾನಾವೊನೆ ರಾಜಾ಼ನಾ ಘರ್ಮಾ ರ‍್ಹಯಲ ಮಳಾನಾ ಅಂಗಳಮಾ ಕ್ಹಾತ ದಿನ್ನಲಕ್ಕಾ ಖಾವಾನು ಅನ್ನ ಕರಾಯೊ. 6ತೆ ಮಳಾನಿ ಜ಼ಗಾಪರ ಉಲನ್ನಾ ಧೊಳಾ ಪ್ಹಡ್ಕಾವೊಕ್ಹೊ ನಿಲಿ ಪ್ಹಡ್ಕಾ, ಧುಮ್ರನಾನಾರಿನಿ ದೊರಾ ವರಿ ಅಮೃತಶಿಲೆನಾ ದಗ್ಡಾವೊನಾ ಖಂಬಾವೊನೆ ಭಾಂದಲ ರುಪ್ಪಾನಿ ಇಟ್ಟಿಯೊಕ್ಹು ಅಲಂಕಾರ ಕರ‍್ಯಾತಾ. ಜರ್ತಾರ ಕಸುತಿಯೊ ಘಾಲಲ ಖ್ಹುನಾ ರುಪ್ಪಾಕ್ಹು ಕರಲ ಆಸನೊ, ತ್ಯುನೊನೆ ಲಾಲ, ಧೊಳು, ಹಳದಿ ವರಿ ಕಾಳು ರಂಗ ರ‍್ಹಯಲ ಅಮೃತನಿಯೊ ಮೊರ್ತಿಯೊ ದಗ್ಡಾವೊಕ್ಹು ಕರಲ ಜಿಮಿನನಾ ಕಟ್ಟಾವೊಪರ ಮ್ಹೆಲ್ಯಾತಾ. 7ಕ್ಹೊನಾನಾ ಸಾಮ್ನೊ ಗನ್ನಾ ತರಾನಾ ವ್ಹತಾ. ರಾಜ ದ್ರಾಕ್ಷಿಯೊನು ರಕ್ಹ ವರಿ ಅನ್ನ ಖಾವಾನು ರಾಜಾ಼ನೆ ಕಿಮ್ಮ ತಿಮ್ಮಜ಼ ಕ್ಹಾರುಜ಼ ವ್ಹತ್ತು. 8ಪಿವಾನಾಹುತಿ ಕಿನೆಜ಼ ಜು಼ಲುಮ ಕರು ನೈ, ಕೈನ ರಾಜ಼ಾನಿ ಆಗನ್ಯಾ ವ್ಹತ್ತಿ. ಹರಿ ಯಕ್ಲಾನೆ ತ್ಯುನಾ ಮನಸ ನಿಂಗತ ದ್ಯು ಕೈನ ರಾಜೊ಼ ತಿನಾ ಘರವಾಲಾವೊನೆ ಕದ್ಯೊತೊ. 9ವಷ್ಟಿ ರಾಣಿ ರಾಜಾ಼ನಾ ಘರಮಾ ಬಾಕ್ಡಿಯೊನೆ ಅನ್ನ ಕರೈತಿ. 10ಕ್ಹಾತ್ವಾ ದಿನ್ನೆ ರಾಜೊ಼ ದ್ರಾಕ್ಷಿಯೊನು ರಕ್ಹ ಪಿನ ಖುಷಿಮಾ ರ‍್ಹತಾಮಾ ಘನ್ನಿ ಖುಬಸುರತ ರ‍್ಹಯಲ ತಿನಿ ರಾಣಿನು ಸುಂದರತಾ ಮನಕ್ಹೊನೆ, ಸರ್ದಾರೊನೆ ದೆಕಾಡು ಕೈನ ಮನಸ ಕರ‍್ಯೊ. ತೆ ತಿನಾ ಸಾನಿದ್ಯನಾ ಸೆವಕೊ ಥಯಲ ಮೆಹೊಮಾನ, ಬಿಜೆತಾ, ಹರ್ಬೊನಾ, ಬಿಗೆತಾ, ಅಬಗೆತಾ, ಜೆತರ, ಕರ್ಕಸ, ಕವಾಲಿಯೊ ಕ್ಹಾತ ಕಂಚೊಕಿಯೊನೆ, 11"ವಷ್ಟಿ ರಾಣಿ ರಾಜಮುಕುಟ ಘಾಲ್ಲಿನ ರಾಜಾ಼ನಿ ಸನ್ನಿಧಿಮಾ ಆ ಕೈನ ಕವೊ" ಕೈನ ಆಗನ್ಯಾ ದಿದ್ಯೊ. ತೆ ಘನ್ನಿ ಸುಂದರಿ ವ್ಹತಿ. 12ತೆ ನೈಸೊ ಕಂಚುಕಿಯೊ ಕದಲ ರಾಜಾ಼ನಿ ಆಗನ್ಯಾನೆ ವಷ್ಟಿ ರಾಣಿ, ನೈ ಆತಿ ಕೈನ ಕದಿ. ತಿನಾಹುತಿ ರಾಜೊ಼ ಘನ್ನೊ ಶಿಟ್ಟ ಥಯೊ. 13ವಿಧಿನಾಯ್ಯ ಗ್ವತ್ತ ರ‍್ಹಯಲ ಕ್ಹಾರಾವೊನಾ ಕ್ಹಾಮಾ ಮಹೆಲನಿ ಸಂಗತಿಯೊ ಮುಕ್ಕಾನಿ ಪದ್ದತ ವ್ಹತಿ. 14ರಾಜೊ಼ ತೆ ಸ್ಥಾನ್ಪರ ರಾಜಾ಼ನಿ ಸಾನಿದ್ಯಮಾ ಸೆವಕೊ ವರಿ ರಾಜ಼ ಸಭಾನಾ ಮ್ಹೊಟಾ ರ‍್ಹಯಲ ಕರ್ಷೆನಾ, ಶೆತಾರ, ಅದ್ಮಾತ, ತರ್ಷಿಷ, ಮೆರೆಸ, ಮರ್ಸೆನಾ, ಮೆಮೊಕಾನ ಕವಾಲಿಯೊ ಕ್ಹಾತ ಪಾರಸಿಯೊ ವರಿ ಮೆದ್ಯ ದೆಶನಾ ಅದಿಕಾರಿಯೊ ವ್ಹತಾ. 15ತೆ ಸಮುಯೊಜಿತ ಗ್ಯಾನಿ ಇವ್ನೊನೆ ಕಂಚುಕಿಯೊನಾ ಮುಕಾಂತರ ತಿನೆ ಥಯಲ ರಾಜಾ಼ನಿ ಆಗನ್ಯಾನೆ ಕೈದಿಲಿದ್ಯಾ ಬಗರ ರ‍್ಹಯಲ ವಷ್ಟಿ ರಾಣಿನೆ ನಿಯಮನಾ ಪ್ರಕಾರ ಸು ಕರಾನು ವ್ಹೈ? ಕೈನ ಪುಚ್ಯೊ಼. 16ತೆಳಾಮಾ ಮೆಮೊಕಾನ ರಾಜಾ಼ನಾ ವರಿ ಸರ್ದಾರೊನಾ ಕ್ಹಾಮೊ, "ವಷ್ಟಿ ರಾಣಿನು ಅಪರಾಧ ರಾಜಾ಼ನಾ ವಿರುದ್ದ ಯಕ್ಕಜ಼ ನ್ಹವೈ. ತಿನಾ ಅದಿಕಾರಿಯೊನೆಬಿ ಅವಮಾನ ಕರಿಸ. 17ರಾಣಿ ಸು ಕರಿಸ ಕೈನ ಐಕಲ ರಾಜ್ಯನಾ ಕ್ಹಾರಾ ಬಾಕ್ಡಿಯೊನೆ ಗ್ವತ್ತ ಥೈನ ತ್ಯುನಾ ತ್ಯುನಾ ಮಾಟಿಯೊನೆ ತಿರಸ್ಕಾರ ಕರಾನೆ ಕಾರಣ ಥಾವಸ. ತ್ಯುನೆ "ರಾಜೊ಼ ಥಯಲ ಅಹಷ್ವೆರೊಷನ ವಷ್ಟಿ ರಾಣಿನೆ ರಾಜ ಸನ್ನಿಧಿಮಾ ಔ ಕೈನ ಮೊಕಲ್ತಾಮಾ ತೆ ಗೈ ನೈತೊ ಕವಸ. 18ರಾಣಿ ಕರಲ ಐಕ್ತಾಮಾ ಪಾರಸಿ ವರಿ ಮೆದ್ಯ ಕುಲನಿಯೊ ಬಾಕ್ಡಿಯೊ ಹಮ್ನಾಜ಼ ತೆ ರಾಜಾ಼ನಾ ಕ್ಹಾರಾ ಸರದಾರೊನೆ ಕಸತೊ. ಇಮ್ಮ ಕೆಕ್ಲು ಮಾಟಿ ಬೈಕೊಮಾ ತಿರಸ್ಕಾರ ವರಿ ಶಿಟ್ಟ ಹುಟ್ಟಸ. 19ರಾಜೊ಼ ವಪ್ಪಾನೊ ರ‍್ಹಯೊಮ ವಷ್ಟಿ ರಾಣಿ ವರಿ ಕೆಳಾಮಾಜ಼ ರಾಜಾ಼ನಿ ಸನ್ನಿಧಿಮಾ ದಿಕ್ಹುಜ಼ ನೈ ಕೈನ ರಾಜ ಆಗನ್ಯಾ ಪ್ರಕಟ ಥೈನ ತೆ ಕೆಳಾಮಾಜ಼ ರದ್ದ ಥೌ ನೈಸೊ ಪಾರಸಿಯೊ ವರಿ ಮೆದ್ಯ ಶಾಸನೊಮಾ ಲಿಖಿತ ರುಪಮಾ ಥಾವಾದೆ; ರಾಜೊ಼ ತಿನಾ ಪಟ್ಟಾನೆ ತಿತಿಬಿ ಜಾಸ್ತಿ ಸುಂದರಿ ರ‍್ಹಯಲ ತಿನೆ ದಿವಾದೆ. 20ಎ ರಾಜನಿರ್ಣಯ ಘನ್ನು ವಿಸ್ತಾರ ರ‍್ಹಯಲ ತಿನಿ ರಾಜ್ಯಮಾ ಕ್ಹಾರಿ ಬಗಲ ಗ್ವತ್ತ ಥಾತಾಮಾ ಶ್ರೆಷ್ಠೊ, ಕನಿಷ್ಠೊ ಥಯಲ ಕ್ಹಾರಿಯೊ ಬಾಕ್ಡಿಯೊ ತ್ಯುನಾ ತ್ಯುನಾ ಮಾಟಿಯೊನೆ ಮರ್ಯಾದಿ ದಿವಸ" ಕೈನ ಕದ್ಯೊ. 21ಎ ವಾತ ರಾಜಾ಼ನೆಬಿ, ತಿನಾ ಸರ್ದಾರೊನೆಬಿ ಚೊ಼ಕು ವ್ಹೈ ಕೈನ ದಿಕ್ಹತಾಮಾ ರಾಜೊ಼ ಮೆಮೊಕಾನನಾ ವಾತನಿಂಗತಜ಼಼ ಕರ‍್ಯೊ. 22ತೆ ಹರಿಯಕ್ಕ ಕುಟುಂಬಮಾ ದಾಣ್ಗೊಜ಼ ಮಾಲಕ ಥೈನ ರ‍್ಹವಸ ವರಿ ತಿನಾಕ್ಹಾತೆ ರ‍್ಹಯಲವಾಲಾ ತಿನಿಯೊ ವಾತೊಜ಼ ಉಪಯೊಗ ಕರು ಕೈನ ಕ್ಹಾರಾ ರಾಜ ಸಂಸ್ಥಾನೊಮಾ ಪತ್ರನಾ ಮುಲಕ ತಿಳಸಾಯೊ. ತೆ ಕಯಾ- ಕಯಾ ಜಾ಼ತನಾ ಮನಕ್ಹೊ ವ್ಹತಾ ತೆ ತೆ ಜಾ಼ತಮಾ ಪತ್ರ ಬರ್ದಾಯೊ.