Skip to content
BibleKenya

Sikkiligar Bible

ಪ್ರಸಂಗಿ 7

ಜಿಂದಗಿನಾಹುತಿ ವಿಚಾರೊ

ಬಾಸನಾ ತೆಲತಿಬಿ ನಾಮಜ಼ ಚೊ಼ಕು ವ್ಹೈ, ವರಿ ಹುಟ್ಟಾನಾ ದಿನತಿಬಿ ಮರಾನೊ ದಿನ್ನಜ಼ ಉಪ್ಪರ ವ್ಹೈ. ಹಿವಾನಾ ಘರತಿಬಿ ರವಾ ಧವಾನಾ ಘರೆ ಜಾವಾನು ಚೊ಼ಕು ವ್ಹೈ. ಕ್ಹಾರಾ ಮನಕ್ಹೊನೆ ಲಾಸ್ಟಮಾ ಎಜ಼ ಗತಿ ವ್ಹೈ, ಜುತ್ಯು ರ‍್ಹಯಲ ಮನಕ್ಹ ಆಂ ದೆಕಿನ ತಿನಾ ಮನಸಮಾ ವಿಚಾರ ಕರಸ. ಅಕ್ಹಾತಿಬಿ ದುಕ್ಕಜ ಚೊ಼ಕೊ ವ್ಹೈ, ಮ್ಹೊಡು ಚು಼ಮ್ಮಾಯಲತಿಬಿ ಮನಸಜ಼ ಉಪ್ಪರ ವ್ಹೈ. ದುಖನು ಘರ ಗ್ಯಾನಿಯೊನಿ ಮನಸನಿ ಜ಼ಗಾ ವ್ಹೈ, ಕ್ಹುಶಿನು ಘರ ಪಿಸಾಳಾವೊನಿ ಮನಸ್ಸನಿ ಜ಼ಗಾ ವ್ಹೈ. ಪಿಸಾಳಾವೊನಾ ಗಿದ್ದತಿಬಿ ಗ್ಯಾನಿಯೊ ಬುಚ್ಕಾಡಾನು ಐಕಾನು ಚೊಕು ವ್ಹೈ. ಪಿಸಾಳಾವೊನು ಅಖ್ನು ಗಾಡಿಗಿನಾ ಹೆಟಿ ಲಾಗಲ ಕಾಟಾನಾ ಚಟ್ಟಪಟ್ಟ ಅವಾಜ ನಂಗತಜ ವ್ಹೈ. ಎಬಿ ವ್ಯರ್ಥ ವ್ಹೈ. ದಬ್ಬಾಳಿಕೆಬಿ ಗ್ಯಾನಿನಿ ಮುರ್ಖ ಕರಸ, ಲಂಚಾ಼ ಮನಸನೆ ಕೆಡಸಸ. ಆದಿತಿಬಿ ಅಂತ್ಯಜ಼ ಚೊ಼ಕು ವ್ಹೈ; ಅಹಂಕಾರತಿಬಿ ತಾಳ್ಮೆವಾಲೊ ಚೊ಼ಕೊ ವ್ಹೈ. ತುಮಾರು ಮನಸ ಶಿಟ್ಟ ನೈ ಆವಾವರಕ್ಹು ಕರಾದೆ, ಶಿಟ್ಟನೆ ಪಿಸಾಳಾವೊನಿ ಛಾತಿಜ಼ ಚೊ಼ಕು ವ್ಹೈ. ಪಾಚ಼ಲ್ಯೊ ಕಾಲ ಆಂ ಕಾಲತಿಬಿ ಉಪ್ಪರ ರ‍್ಹಯಲ ತಿನೆ ಕಾರಣ ಸುಜ಼ ಕವು ನಕೊ. ತು ಎ ವಿಶಯಮಾ ವಿಚಾ಼ರ ಕರಾನು ಗ್ಯಾನಿಯೊನು ಸವಾಲ ನವ್ಹೈ. ಗ್ಯಾನಬಿ ಆಸ್ತಿತಿ ಪ್ರಯೊಜನ ವ್ಹೈ. ಹಾಂ ಜ಼್ಯುತಾ ರ‍್ಹಯಲವಾಲಾವೊ ತೆ ಆಸ್ತಿ ಘನ್ನು ಫೈದೊ ಥಯುಸ. ದೊಕ್ಡಾ ಕಿಮ್ಮ ವ್ಹೈ ತಿಮ್ಮಜ಼ ಗ್ಯಾನಬಿ ಆಶ್ರಯ ವ್ಹೈ. ಗ್ಯಾನನೆ ಕ್ಹಾಸ ರ‍್ಹಯಲ ಸುವೈ ಕದ್ಯಾಮ ತಿನೆ ಹೊಂದಿಲಿದಲವಾಲನೆ ತೆ ಜಿವದಾಯಕ ಚೊ಼ಕು ವ್ಹೈ. ಕ್ಹುದಾನು ಕಾಮ ದೆಕ; ತೆ ವಾಕು ಕರಲ ಸಿದಾ ಕರಾನೆ ಕಿಕ್ಹು ಥಾಸ? ಸುಖಾನಾ ದಿನೊಮಾ ಸುಖಾಕ್ಹು ರ‍್ಹೆ, ದುಖನಾ ದಿನೊಮಾ ವಿಚಾ಼ರ ಕರ; ಮನಕ್ಹ ತಿನೊ ಕಾಲ ಥಯಲ್ಪರ ಸಂಬವಿಸಾನು ಕಯುಜ ಲಿದ್ಯಾವಾಚಿ಼, ಕ್ಹುದಾ ಎಕ್ಹಾರು ಯಕ್ಕನಾ ಉಪ್ಪರ ಯಕ್ಕ ಆವಾಲಗಾಡಸ. ಮಾರಾ ಜಿವನಮಾ ದೆಕ್ಯೊಸ ನಿತಿವಾಲೊ ತಿನಾ ನಿತಿಮಾ ಹಾಳ ಥಾವಾಸ. ದುಷ್ಟಬಿ ತಿನಾ ದುಷ್ಟತನಮಾ ಘನ್ನಾ ದಿನ ಜ್ಯು಼ತೊ ರ‍್ಹವಸ. ಎ ಕ್ಹಾರು ವ್ಯರ್ಥ ಥಯಲ . ತು ಘನೊ ನಿತಿವಾಲೊ ಥೌನಕೊ, ತಾರಾ ನಜ಼ರಮಾ ತು ಗ್ಯಾನಿ ಥವು ನಕೊ. ತುನೆ ತುಜ಼ ನಾಸನೆ ಕಾ ಗುರಿ ಕರಲೆಸಿ? ತು ಘನೊ ದುಷ್ಟ ಥೌ ನಕೊ ನೈತೊ ಮುರ್ಖ ಥೌ ನಕೊ, ತಾರೊ ವಕ್ಹತ ಆವಾತಿ ಪೈಲಾಜ಼ ಕಾ ಮರಣ ಹೊಂದಸಿ? ತು ಆಂ ಧರಲಿವಾನು ಚೊ಼ಕು ವ್ಹೈ, ತಿನಾಕ್ಹು ಹತ್ತನೆ ಪಾಚೊ಼ ಕಾಡು ನಕೊ. ಕ್ಹುದಾನೆ ಬುಚ್ಕಾಲೊ ತೆ ಕ್ಹಾರಾವೊಕ್ಹು ಪಾರ ಥಾವಸ. ದಕ್ಹ ಜನಾ ಅಧಿಕಾರಿಯೊಕ್ಹು ಗಾಮನೆ ಥಾವಾನಿ ತಾಕತತಿಬಿ ಗ್ಯಾನಿನೆ ಗ್ಯಾನಕ್ಹು ಥಾವಾನಿ ತಾಕತಜ಼ ಹೆಚ಼್ಚ ವ್ಹೈ. ಪಾಪ ಕರೆವಾಚಿ಼ ನ್ಯಾಯಾ ಕರಾಲಾ ಕ್ಹರಿನಾ ದಾಣ್ಗಾ ಲೊಕಮಾ ನತ್ತಿಜ಼ ನತ್ತಿ. ಮನಕ್ಹೊ ಕವಾನಾ ವಾತೊಕ್ಹಾರಾ ಧ್ಯಾನನೆ ಲೌ ನಕೊ, ತಾರೊ ಆಳ ತುನೆ ಶಾರ್ಪ ದಿವಾನು ಕಾನೆ ಪಡ್ಯು. ತುಬಿ ಘನಿ ಸಲಾ ಬಿಜಾವೊನೊ ಶಾರ್ಪ ದಿದ್ಯೊಸ ಕವಾನೆ ತಾರು ಮನಸಜ಼ ಸಾಕ್ಷಿ ವ್ಹೈ. ಎ ಕ್ಹಾರು ಗ್ಯಾನಕ್ಹು ಪರಿಕ್ಷಾ ಕರ‍್ಯೊ. "ಮಿ ಗ್ಯಾನಿ ಥೌಸ” ಕೈಲಿದ್ಯೊ. ತೆನೈಸೊ ತೆ ಮಾರಾಕ್ಹು ದುರ ಥಯು. ಗ್ಯಾನಬಿ ಘನು ದುರಬಿ ಅಗಾಧಮಾಬಿ ಛೆ. ತಿನೆ ಕುನ್ನ ಪಡ್ದಿಲಿದ್ಯಾಸ? ಮಿ ಫರಿನ ಗ್ಯಾನೆ ವರಿ ಮೂಲ ತತ್ವನೆ ಧುಂಡಿನ, ವಿಚಾ಼ರ ಕರಿನ ಲಿವಾನಾಹುತಿ ಅನಿತಿ ಮುರ್ಖಬಿ ಅ ಗ್ಯಾನ ಪಿಸಾಳು ವ್ಹೈ ಕೈನ ತಿಳದಿಲಿವಾನಾಹುತಿ ಮನಸ ಮ್ಹೆಲ್ಯೊ. ತೆಳಾಮಾ ಮರಣತಿಬಿ ಹೆಚ಼್ಚ ಸುದ್ದಿ ದಿಕ್ಹಿನ ಐ. ಕಯು ವೈ ಕದ್ಯಾಮ ಕೆಟ್ಟ ಹೆಂಗಸ. ತಿನು ಮನಸ ಉರಲೊ, ಬಲಿಯೊ, ತಿನಾ ಭಾಂವಾ ಸಂಕೊಲಿಯ, ಕ್ಹುದಾ ಚೊ಼ಕೊ ವ್ಹೈ ತಿನಾಕ್ಹು ತಪ್ಪಸೈ ಲಿವಾಲೊ. ತೆ ನೈಸೊ ಪಾಪಿಬಿ ತಿನಾ ಹತೆ ಮಳಸ. ಪ್ರಸಂಗಿ ಅಮ್ಮ ಕವಸ, " ದೆಕ, ಮಿ ಆಂ ಹುಡ್ಕಿನ ಪಡ್ದಿಲಿದ್ಯೊಸ” ಹಜಿಯಕ್ಕ ಸಂಶೊದನೆನೆ ಕೆಕ್ಲೊ ಚ಼ಲಾಯೊ ತಬಿ ಉತ್ತರ ಮಳ್ಯು ನೈ. ಹಜಾ಼ರ ದಾಣ್ಗಾವೊಮಾ ಯಕ್ಲಾ ಯೊಗ್ಯನೆ ದೆಕ್ಯಾವಸ, ತೆನೈಸೊ ಹಜಾ಼ರ ಹೆಣ್ಣ ಮನಕ್ಹೊಮಾ ಯೊಗ್ಯ ಯಕ್ಲಿನೆಬಿ ದೆಕ್ಯಾನತ್ತಿ. ಕ್ಹುದಾ ಮನಕ್ಹೊನೆ ಸತ್ಯವಂತ ಕರಿನ ಸೃಷ್ಟಿ ಕರ‍್ಯೊ. ತ್ಯುನೆತಬಿ ಘನಾ ಕಾಮೊ ವಿಚಾ಼ರ ಕರ‍್ಯಾಸ. ಎ ಕ್ಹಾರು ಮಿಜ಼ ದೆಕ್ಯೊಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.