Sikkiligar Bible
ಪ್ರಸಂಗಿ 3:1
Verse 1 is marked below, with the whole chapter around it. Read from the start
ಹರಯಕ್ಕನೆ ಟೈಮ
ಹರಿಯಕ್ಕ ಕಾಮನೆ ಯಕ್ಕ ಟೈಮ ಛೆ, ಜಿಮಿನಪರ ಚಾ಼ಲಾನಾ ಹರಿಯಕ್ಕ ಕಾಮನೆ ಯಕ್ಕ ಟೈಮ ಛೆ. ಹುಟ್ಟಾನು ಟೈಮ, ಮರಾನೊ ಟೈಮ, ಝಾಡೊ ಘಾಲಾನೊ ಟೈಮ, ಘಾಲಲ ಕ್ಹಾರು ಕಿತ್ತಾನೊ ಟೈಮ, ಖಲಾಸ ಕರಾನೊ ಟೈಮ, ಸ್ವಸ್ತ ಕರಾನೊ ಟೈಮ, ಪಾಡಾನೊ ಟೈಮ, ಭಾಂದಿನ ಉಟಾಡಾನೊ ಟೈಮ, ರವಾನೊ ಟೈಮ, ಅಕ್ಹಾನೊ ಟೈಮ, ಅಟಾವಾನೊ ಟೈಮ, ನ್ಹಾಚಾ಼ನೊ ಟೈಮ, ದಗ್ಡಾ ಭಿರ್ಕಾವಾನೊ ಟೈಮ, ದಗ್ಡಾ ಜ಼ಮಾಕರಾನೊ ಟೈಮ, ಔಳಿಲಿವಾನೊ ಟೈಮ, ಔಳಿ ನೈ ಲಿವಾನೊ ಟೈಮ, ಕಮಾವಾನೊ ಟೈಮ, ಜ಼ವೈಲಿವಾನೊ ಟೈಮ, ವಚಾ಼ಡಾನೊ ಟೈಮ, ನಾಕಾನೊ ಟೈಮ, ಫಾಟಾನೊ ಟೈಮ, ಶಿವಾನೊ ಟೈಮ, ಗಪ್ಪ ರ್ಹವಾನೊ ಟೈಮ, ಬೊಲಾನೊ ಟೈಮ, ಮಯಾ ಕರಾನೊ ಟೈಮ, ದ್ವೆಶ ಕರಾನೊ ಟೈಮ, ಯುದ್ದನೊ ಟೈಮ, ಸಮಾಧಾನನೊ ಟೈಮ, ರಾಬಾಲಾನೆ ತಿನಾ ಮ್ಹೈನತಕ್ಹು ಸು ಫೈದೊ ವ್ಹೈ? ಮನಕ್ಹನೆ ಫರಜ಼ ವ್ಹೈ ಕೈನ ಕ್ಹುದಾ ನೆಮ್ಸಲ ಮ್ಹೈನತ ದೆಕ್ಯೊಸ. ಯಕ್ಕೆಕ ಸಾಮನನೆ ಟೈಮನಾ ತಕ್ಕ ಚೊ಼ಕೊ ಕರ್ಯೊಸ. ತೆನೈಸೊ ಮನಕ್ಹೊನಾ ಮನಸಮಾ ಹಮೆಶಾನು ವಿಚಾರ ಮ್ಹೆಲ್ಯೊಸ. ತೆನೈಸೊ ಕ್ಹುದಾ ಚ಼ಲಾವಾನು ಕಾಮನೆ ತ್ಯುನೆ ವಿಚಾರ ಕರೆವಾಚಿ ಕರ್ಯೊಸ. ಮನಕ್ಹೊ ತಿನಾ ಜಿವಮಾನಮಾ ಕ್ಹುಸಿಕ್ಹು ಸುಖಾನೆ ಅನುಬವಿಸಾತಿ ಹಜಿ ತ್ಯುನೊನೆ ತಿತ್ತಿ ಉಪ್ಪರ ನತ್ತಿ ಕೈನ ಮಿ ವಿಚಾರ ಕರ್ಯೊಸ. ತೆನೈಸೊ ಹರಯಕ್ಲೊ ಕ್ಹಾವಾ ಪಿವಾನು ಲಿನ ತಿನಾ ಹರಯಕ್ಕ ಪ್ರಯಾಸಮಾ ಸುಖಾ ಅನುಭವ ಕರಾನೆ ಕ್ಹುದಾನಿ ಮರ್ಗಾ ವ್ಹೈ ಕವಾನು ಮನೆ ಗ್ವತ್ತ ಛೆ. ಕ್ಹುದಾನು ಕಾಮ ಹಮೆಶ್ಯಾನು ವ್ಹೈ ಕೈನ ಮನೆ ಗ್ವತ್ತ ಛೆ. ತಿನೆ ಸುಬಿ ಸೆರಸತ್ತಾ ನೈ. ತಿನಾಕ್ಹು ಸುಬಿ ಕಾಡ ಸಕ್ತಾ ನೈ. ಕ್ಹುದಾನಾ ಎ ನಿಯಮನೆ ಮನಕ್ಹೊ ತ್ಯುನಾ ಕ್ಹಾಮಾ ಭೆಂ ವರಿ ಭಕ್ತಿಮಾ ರ್ಹೌ ಕವಾನು ಕಾರಣ ವ್ಹೈ. ಹಮ್ನಾ ರ್ಹಯಲ ಪಾಚು಼ ವ್ಹತ್ತು; ಅಗಲ್ಯು ಹಮ್ನಾಬಿ ಛೆ. ಹಾಳ ಥಯಲ ಕ್ಹುದಾ ಫರಿನ ಲಾವಸ.
ದುನಿಯಾಮಾ ಅನ್ಯಾಯ
ತೆನೈಸೊ ಮಿ ಲೊಕಮಾ ದೆಕಿನ ಫೈಸಲಾನಾ ಜ಼ಗಾಮಾ ಧರಮನಾ ಜ಼ಗಾಮಾ ಅಧರಮ ರ್ಹವಾನು ದೆಕ್ಯೊ. ತೆಳಾಮಾ ಮಿ ಮನಸಮಾ, "ಕ್ಹುದಾ ನಿತಿವಂತವಾಲಾನೆ, ಅನಿತಿವಂತವಾಲಾನೆ ಫೈಸಲೊ ಕರಸ. ತೆ ಫೈಸಲಾನಾ ತರಿಕಾವೊನೆ, ಕ್ಹಾರಾ ಕಾಮೊನೆ ಯಕ್ಕ ಟೈಮ ಛೆ” ಕೈನ ಕೈಲಿದ್ಯೊ. ಮಿ ಮಾರಾ ಮನಸಮಾ ಅಮ್ಮ ವಿಚಾರ ಕರ್ಯೊ, "ಕ್ಹುದಾ ಮನಕ್ಹೊನೆ ಪರಿಕ್ಷಾ ಕರಿನ, ತ್ಯುನೆ ಜಾನವರೊನಾ ಸಮಾನ ವ್ಹೈಕೈನ ಕವಾನು ದೆಕ್ಲಾಡಸ.” ಮನಕ್ಹನಿ ಪರಸ್ಥಿತಿ ಪಶುನಿ ಗತಿ ಯಕ್ಕಜ಼ ವ್ಹೈ. ಪಶುನೆ ಮೌತ ಅವಾನಾ ತಿಮ್ಮ ಮನಕ್ಹನೆಬಿ ಆವಸ, ಕ್ಹಾರಾವೊನೆ ಜ಼ಲಮ ಯಕ್ಕಜ಼ ವ್ಹೈ. ಮನಕ್ಹ ಪಶುತಿಬಿ ಶ್ರೆಷ್ಟ ನವೈ. ಕ್ಹಾರುಜ಼ ವ್ಯರ್ಥ ವ್ಹೈ. ಕ್ಹಾರಾ ಪ್ರಾಣಿಯೊ ಯಕ್ಕ ಜ಼ಗಾಕನ ಜಾ಼ವಸ. ಕ್ಹಾರುಜ಼ ಮಾತಿಕ್ಹು ಥಯಲ ವ್ಹೈ. ಕ್ಹಾರುಜ಼ ಮಾತಿಮಾ ವರಿ ಜಾ಼ವಸ. ಮನಕ್ಹನಿ ಆತ್ಮಾ ಉಪ್ಪರ ಜಾ಼ವಸ, ಪಶುನಿ ಆತ್ಮಾ ಹೆಟಿ ಉತ್ರಿನ ಜಿಮಿನನಾ ಹೆಟಿ ಜಾ಼ವಸ ಕೈನ ಕಿನೆ ಗ್ವತ್ತ ಛೆ? ಅಮ್ಮ ಮಿ ವಿಚಾರ ಕರಿನ ಮನಕ್ಹ ತಿನಾ ಕಾಮೊಮಾ ಕ್ಹುಸಿ ಥಾವಾತಿ ತಿನೆ ಸುಜ ಉಪ್ಪರ ನತ್ತಿ. ಎಜ಼ ತಿನು ಪಾಲ ವ್ಹೈ ಕೈನ ವಿಚಾರ ಕರ್ಯೊ. ಜಿವಮಾನನಾ ಥಯಲ್ಪರ ಸಂಬವಿಸಾನು ದೆಕಾನಾಹುತಿ ಮನಕ್ಹನೆ ವರಿ ಕುನ್ನ ಆವಾ ಲಗಾಡಸ?
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.