Sikkiligar Bible
ಪ್ರಸಂಗಿ 1
ಜಿಂದಗಿ ವ್ಯರ್ಥ ವ್ಹೈ
ಎ ಯೆರುಸಲೆಮಮಾ ರಾಜೊ಼ ಥಯಲ ‘ದಾವಿದನೊ’ ದಿಕ್ರೊ ಥಯಲ ಪ್ರಸಂಗಿ ‘ಶಿಕ್ಲಾವಾನಾ’ ವಾತೊ ವ್ಹೈ. ಪ್ರಸಂಗಿ ಅಮ್ಮ ಕವಸ "ವ್ಯರ್ಥಜ಼ ವ್ಯರ್ಥ ವ್ಹೈ, ಪುರಾಜ಼ ವ್ಯರ್ಥ ವ್ಹೈ, ಕ್ಹಾರುಜ಼ ವ್ಯರ್ಥ ವ್ಹೈ. ಮನಕ್ಹ ಎ ಲೊಕಮಾ ಕರಾನು ಕ್ಹಾರು ಪ್ರಯಾಸಕ್ಹು ತಿನೆ ಸು ಲಾಭ ಛೆ? ಯಕ್ಕ ಸಂತತಿ ನಾಶ ಥಾವಸ, ವರಿಯಕ್ಕ ಸಂತತಿ ಆವಸ. ತೆನೈಸೊ ಜಿಮಿನತಬಿ ಶಾಶ್ವತ ಥೈನ ಹುಬ್ರ್ಯವಸ. ಸುರ್ಯೊ ಹುಟ್ಟಸ, ಸುರ್ಯೊ ಡುಬಸ, ತೆ ಜಾ಼ವಾನಿ ಜ಼ಗಾನೆ ಭೆಗಿನ ಫರಿನ ವರಿ ಜಾ಼ವಸ. ವಾರೊ ದಕ್ಷಿಣ ದಿಕ್ಕೆ ಛುಟಸ. ಉತ್ತರ ದಿಕ್ಕೆ ಫರಸ. ತೆ ಸುತ್ತತು ಗೈನ, ವಾರೊ ಸುತ್ತಾನಾ ಪ್ರಕಾರ ಫರಿನ ಆವಸ. ಕ್ಹಾರಾ ನದಿಯೊ ಹರದಿನ ಸಮಂದರ ಜಾ಼ವಸ. ತಿಮ್ಮ ರ್ಹಯುತಬಿ ಸಮಂದರ ಭರ್ತು ನೈ. ನದಿಯೊ ಕಿಜಾ಼ತ್ಯೊ ಹರದಿನ ಐಯ್ಯೊಸ ತೆಜ಼ ಜ಼ಗಾಯೆ ಫರಿನ ಜಾ಼ವಸ. . ಕ್ಹಾರಾ ಕಾಮೊ ಪ್ರಯಾಸಕ್ಹು ಭರ್ಯಲ ಛೆ. ತಿನೆ ಮನಕ್ಹ ಕೆ ನೈ ಸಕ್ತೊ. ದೆಕಾಕ್ಹು ಡೊಳಾ ತೃಪ್ತಿ ನೈ ಥಾತಾ, ಐಕಾಕ್ಹು ಕಾನೊ ಥಕ್ತಾ ನೈ. ರ್ಹಯಲಜ಼ ರ್ಹವಸ, ಥಯಲಜ಼ ಥಾವಸ. ದುನಿಯಾನಾ ನವು ರ್ಹಯಲ ಕಯುಜ಼ ನತ್ತಿ. ‘ದೆಕ, ಎ ನವು ವ್ಹೈ’ ಕೈನ ವಿಷಯಮಾತಬಿ ಕೆಸಕಸ ಸು? ಅಪೊತಿ ಪೈಲಾ ರ್ಹಯಲ ವ್ಹೈ, ಪೈಲಾನಾ ಕಾಲತುಬಿ ರ್ಹಯಲಜ಼ ವ್ಹೈ. ಪೈಲಾನಾ ಕಾಲಮಾ ಥಯಲ ಸಂಗತಿಯೊನಿ ಶೆಂ ಹಮ್ನಾನಾ ಮನಕ್ಹೊನೆ ನತ್ತಿ. ಅಗಲ್ಯಾ ಕಾಲಮಾ ಥಾವಾನಾ ಸಂಗತಿಯೊನಿ ಶೆಂ ಅಗಲ್ಯಾ ಕಾಲನ ಮನಕ್ಹೊನೆ ರ್ಹತು ನೈ.” ತೆ ಕವಾಲಾ ಕುನ್ನಜ಼ ರ್ಹತು ನೈ.
ಪ್ರಸಂಗಿನು ಅನುಭವ
ಪ್ರಸಂಗಿ ಥಯಲ ಮಿ ಯೆರುಸಲೆಮಮಾ ಇಸ್ರಾಯೆಲೊನೆ ರಾಜೊ಼ ಥೈನ ವ್ಹತ್ತೊ. ಹಬಾಳನಾ ಹೆಟಾ ಥಾವಾನಾ ಕ್ಹಾರಾ ಕಾಮೊ ಗ್ಯಾನಕ್ಹು ವಿಚಾರ ಕರಿನ ಪರಿಕ್ಷಾ ಕರಾನಾಹುತಿ ಮಾರು ಮನಸ ಮ್ಹೆಲ್ಯೊ. ಕ್ಹುದಾ ಮನಕ್ಹೊನಾ ಉಪ್ಪರ ನೆಮಿಸಲ ಕ್ಹಾರಾ ಕಾಮೊ ಘನ್ನಾ ಪ್ರಯಾಸನಾ ವ್ಹೈ.
ಲೊಕಮಾ ಥಾವಾನಾ ಕ್ಹಾರಾ ಕಾಮೊ ದೆಕ್ಯೊಸ. ಆಹಾ, ವಾರಾನಾ ಪಾಚಾ಼ ಲಾಗೆ ಲಿಂಗತ ಕ್ಹಾರುಜ಼ ವ್ಯರ್ಥ ವ್ಹೈ. ಅಡುತಿಡು ರ್ಹಯಲನೆ ಶಿದಾ ಕರಾನೆ ಥಾತು ನೈ! ನೈ ರ್ಹಯಲನೆ ಲೆಕ್ಕೊ ಕರಾನೆ ಅಸಾದ್ಯ ವ್ಹೈ!
ಮಿ ಮಾರಾ ಮನಸಮಾ ವಿಚಾರ ಕರ್ತೊ, "ದೆಕ, ಮಾರಾತಿ ಪೈಲಾ ಯೆರುಸಲೆಮನೆ ಆಳ್ಯಲ ಕ್ಹಾರಾವೊತಿ ಜಾಸ್ತ ಗ್ಯಾನ ಪಡ್ದಿಲಿದ್ಯೊಸ. ಮಾರು ಮನಸ ಗ್ಯಾನನೆ, ತಿಳವಳಿಕೆನೆ ಕ್ಹಾಸ ಹೊಂದಿಲದ್ಯುಸ” ಕೈನ ಕೈಲಿದ್ಯೊ. ತೆಳಾಮಾ ಗ್ಯಾನನೆ, ಪಿಸಾಳಾಪನ್ನನೆ, ಗ್ಯಾನ ನೈ ರ್ಹಯಲನೆ ತಿಳ್ದಿಲಿವಾನೆ ಮಿ ಮನಸ ಮ್ಹೆಲ್ಯೊ. ಎಬಿ ವಾರಾನೆ ಪಾಚಾ಼ ಲಾಗೆ ಲಿಂಗತ ಕ್ಹಾರುಜ಼ ವ್ಯರ್ಥ ವ್ಹೈ ಕೈನ ಮಿ ತಿಳ್ದಿಲಿದ್ಯೊ. ಕಾಕದ್ಯಾಮ ಘನ್ನಿ ಗ್ಯಾನ ರ್ಹಯಲ ಜ಼ಗಾ ಘನ್ನಿ ಚಿಂತಾ ರ್ಹವಸ. ಘನ್ನಿ ಗ್ಯಾನ ಪಡ್ದಿಲಿವಾಲಾನೆ ಮನಸೆ ದುಕ್ಕ ಥಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.