Skip to content
BibleKenya

Sikkiligar Bible

ದಾನಿಯಲ 5

ಬೆಲ್ತೆಚ್ಚರನು ಕ್ಹಾವಾನು ಕುಟ

ರಾಜೊ಼ ಥಯಲ ಬೆಲ್ತೆಚ್ಚರ ತಿನಾ ರಾಜ್ಯನಾ ಮ್ಹೊಟಾ ಮನಕ್ಹೊಮಾ ಹಜಾ಼ರ ಜ಼ನಾವೊನೆ ಕ್ಹಾವಾನು ಕರೈನ ತೆ ಹಜಾ಼ರ ಜ಼ನಾವೊನಾ ಡೊಳಾನಾ ಕ್ಹಾಮೊ ತೆಬಿ ದ್ರಾಕ್ಷಿಯೊನು ರಕ್ಹ ಪಿದ್ಯೊ. ತಿನೆ ಪಿತೊ ಯೆರುಸಲೆಮನಾ ದೆವಾಲಯಮಾತೊ ತಿನೊ ಬಾ ಥಯಲ ನೆಬುಕದ್ನೆಚ್ಚರ ಉಚೈಲಿನ ಆಯಲ ರುಪ್ಪಾನಾ ವರಿ ಕ್ಹೊನಾನಾ ತಾಂಬಿಯಾ ವಾಟ್ಕಾವೊಮಾ ತೆಬಿ ತಿನಾ ಮ್ಹೊಟಾ ಮನಕ್ಹೊ ತಿನಿ ಬಾಕ್ಡಿಯೊ ವರಿ ಉಪ ಬಾಕ್ಡಿಯೊನಾ ಕ್ಹಾತೆ ಪಿವಾನಾಹುತಿ ತೆ ಕ್ಹಾರು ಲಿನ ಆವಾನೆ ಆಗನ್ಯಾ ದಿದ್ಯೊ. ತೆಳಾಮಾಜ಼ ಯೆರುಸಲೆಮನಿ ದೆವಾಲಯನಾ ವಚ್ಮಾನಿ ಗುಡಿಮಾತಾ ಚೊ಼ರಿ ಕರಲ ಕ್ಹೊನಾನಾ ಸಾಮನೊನೆ ಲಾವಾನೆ ರಾಜೊ಼ ತಿನಾ ಮ್ಹೊಟಾ ಮನಕ್ಹೊ ತಿನಿ ಬೈಕೊ ವರಿ ಉಪ ಪತ್ನಿಯೊ ತೆ ವಾಟ್ಕಾವೊಮಾ ವರಿ ಕುಂಡಾವೊಮಾ ಪಿದ್ಯಾ. ದ್ರಾಕ್ಷಿಯೊನು ರಕ್ಹ ಪಿನ ಕ್ಹೊನು ರುಪ್ಪು ತಾಂಬು ಲ್ಹೊಡು ಝಾಡೊ ದಗ್ಡಾವೊನಾ ದೆವಸ್ಥಾನೊನೆ ಪುಜಾ ಕರ್ತಾಮಾ, ತೆಳಾಮಾಜ಼ ಯಕ್ಲಾನಾ ಹತ್ತನಾ ಬೊಟೊ ಐನ ದಿವ್ವಾನಾ ಕ್ಹಾಮನಾ ಕ್ಹಾಮಾ ಚು಼ನ್ನೊ ಮಾರಲ ಗೊಡಿಪರ ಲಿಕ್ತೊ ರ‍್ಹಯಲತ್ತನೆ ರಾಜೊ಼ ದೆಕ್ಯೊ. ತೆಳಾಮಾ ತಿನು ಮ್ಹೊಡು ಚು಼ಮೈ ಗಯುತು, ಮನಸ್ಸ ಕಳವಳ ಥಯುತು, ಕಂಬರನಾ ಹಡ್ಕಾ ಢಿಲ್ಲಾ ಥಯಾ, ಗುಡ್ಗಾ ಕಾಪಾಡಾತಾ. ಇಮ್ಮ ರ‍್ಹತಾಮಾ ರಾಜೊ಼ ಜೊ಼ರ ಅಡ್ಡಿನ ಮಾಟಾ ಮಂತ್ರ ಕರಾಲಾನೆ ಬಲೈನ ಬಾಬೆಲನಾ ತೆ ವಿದ್ವಾಂಸೊನೆ ಕಯೊ ಎ ಲಿಕ್ಹಾವಟನೆ ಒದಿನ ಇನು ಮತ್ಲಬ ಮನೆ ಕವಾಲಾನೆ ತಿನೆ ಮಿ ಘನ್ನ ಕಿಮ್ಮತನಾ ವಣ್ಣಾ ಘಲೈನ ತಿನಾ ಗಳಾಮಾ ಕ್ಹೊನಾನಿ ಚೈನ ಘಲೈನ ತಿನೆ ರಾಜ್ಯನಾ ತನ್ನ ಕ್ಹಾಸ ಅದಿಕಾರಿಯೊಮಾ ತಿನೆ ಯಕ್ಲಾನೆ ಕ್ಹಾಸ ಅದಿಕಾರಿ ಕರುಸ ಕೈನ ಕದ್ಯೊ. ತೆ ಆಸ್ಥಾನನಾ ಕ್ಹಾರಾ ವಿದ್ವಾಂಸೊ ಐನ ದೆಕ್ಯಾ. ವರಿಬಿ ತೆ ಲಿಕ್ಕಲ ಕ್ಹಾರು ಒದಾನೆ ತಿನು ಮತ್ಲಬ ರಾಜಾ಼ನೆ ಕವಾನೆ ಕಿನೆಜ಼ ಥಯು ನೈ. ತೆಳಾಮಾ ರಾಜೊ಼ ಥಯಲ ಬೆಲ್ಶಚ್ಚರ ಘನ್ನೊ ಘಾಬ್ರೊ ಥೈನ ತಿನು ಮ್ಹೊಡು ಚುಮೈ ಗಯುತು, ತಿನಾ ಮ್ಹೊಟಾ ಮನಕ್ಹೊ ಮಬ್ಬ ಥೈಗಯಾ. ರಾಜೊ಼ ವರಿ ತಿನಾ ಮ್ಹೊಟಾ ಮನಕ್ಹೊ ಕದಲ ವಾತೊ ರಾಣಿ ಐಕ್ತಾಮಾ ಅನ್ನ ಕರಾನಿ ಕ್ಹೊಲಿ ಐನ ರಾಜಾ಼, ಹಮೆಶಾ ಜಿವ್ತೊ ರ‍್ಹೆ, ತಾರು ಮನಸ್ಸ ಕಳವಳ ಥೌ ನೈ, ತಾರು ಮ್ಹೊಡು ಚುಮೈ ಜೌನೈ. ಪರಿಶುದ್ದ ಕ್ಹುದಾವೊನಾ ಆತ್ಮಾವೊ ರ‍್ಹಯಲ ಯಕ್ಲೊ ತಾರಿ ರಾಜ್ಯಮಾ ಛೆ; ಕ್ಹುದಾನಾ ಗ್ಯಾನನೆ ಸರಿ ಸಮಾನ ರ‍್ಹಯಲ ಗ್ಯಾನ, ವಿವೆಕ ವರಿ ಗ್ಯಾನನು ಉಜಾಲು ತಾರಾ ಬಾಪನಾ ಕಾಲತುಬಿ ತಿಮಾ ದಿಕ್ಹಿನ ಐಯುಸ;ತಾರು ಬಾಪ ಥಯಲ ನೆಬುಕದ್ನೆಚ್ಚರ ತಿನೆ ಜೊಯಿಷ್ಯೊಪರ ಮಂತ್ರವಾದಿಯೊಪರ ಪಂಡಿತೊಪರ ಸಕಣಾ ಕವಾಲಾವೊಪರ ತಿನೆ ಮ್ಹೊಟೊ ಕರಿನ ಮ್ಹೆಲ್ಯೊತೊ; ಹೊ, ಬೆಲ್ಶಚ್ಚರ ಕವಾಲೊ ರಾಜಾ಼ಕ್ಹು ಬಿಜು಼ ನಾಮ ವ್ಹಂದಿಲಿದಲ ಎ ದಾನಿಯಲಮಾ ಘನ್ನಿ ಮ್ಹೊಟಿ ಗ್ಯಾನ, ವಿವೆಕ ಕ್ಹಪನೊನು ಮತ್ಲಬ ಕವಾನು ಶಾಣೆತನಾ ಒಡಪೊ ಛೊಡೈನ ಕವಾನು ಜಾದು ಗುಂಚಾ಼ಳೊನಾ ಗಾಟೊ ಕ್ಹೊಲಾನೆ ಶಾಣೆತನಾ ತಿಮಾ ದಿಕ್ಹಿನ ಆಯಲಹುತಿಜ಼ ತಿನೆ ತಿನಾಹುತಿಜ಼ ನೆಮ್ಶೊತೊ. ಹಮ್ನಾ ತೆ ದಾನಿಯಲನೆ ಬಲಾಯಾಮ ತೆ ಗೊಡಿಪರ ಬರ್ದಲ ತಿಳ್ಸಾವಸ.

ದಾನಿಯಲ ಲಿಕ್ಹಾವಟನೆ ತಿಳ್ಸಾಯಲ

ತೆಳಾಮಾ ದಾನಿಯಲನೆ ಬಲಾತಾಮಾ ವರಿ ರಾಜೊ಼ ತಿನೆ ರಾಜೊ಼ ಥಯಲ ಮಾರೊ ಬಾ ಯಹುದತೊ ಕೈದಿಯೊ ಕರಿನ ಲಾಯಲ ಯಹುದ್ಯೊನೊ ದಾನಿಯಲ ಕವಾಲೊ ತುಜ಼ ವ್ಹೈ ಸು? ಕ್ಹುದಾವೊನಿ ಆತ್ಮಾ ತಾರಾಮಾ ರ‍್ಹೈನ ಘನ್ನು ಗ್ಯಾನಬಿ ವಿವೆಕಬಿ ಗ್ಯಾನನು ಉಜಾಲುಬಿ ತುನೆ ಛೆ ಕೈನ ಮಿ ಐಕ್ಯೊಸ. ಹಮ್ನಾ ಆಂ ಲಿಕ್ಹಾವಟ ಒದಿನ ಇನು ಮತ್ಲಬ ಮನೆ ತಿಳ್ಸಾವಾನಾಹುತಿ ವಿದ್ವಾಂಸೊನೆ ಮಂತ್ರವಾದಿಯೊನೆ ಕ್ಹಾಮೊ ಬಲೈಲಿನ ಆತಾಮಾ ತ್ಯುನೆ ಇನು ಮತ್ಲಬ ಇವ್ನೊನೆ ಕವಾನೆ ಥಯಾ ಬಗರ ಗಯಾ. ತುತೊ ಗುಡಾರ್ಥ ಕೈನ ಗುಂಚಾ಼ಲಾನಾ ಗಾಟೊ ಕ್ಹೊಲಾಲೊ ಥಯೊಸ ಕವಾನಿ ವಾತ ಮಕನ ಐಸ; ಎ ಲಿಕ್ಹಾವಟನೆ ಒದಿನ ಇನು ಮತ್ಲಬ ಮನೆ ತಿಳ್ಸಾವಾನೆ ತುಕ್ಹು ಥಯುಮ ಮಿ ತುನೆ ಹಮ್ನಾ ಘನ್ನಾ ಕಿಮ್ಮತನಾ ವಣ್ಣಾ ಘಾಲಿನ ತಾರಾ ಗಳಾಮಾ ಕ್ಹೊನಾನಿ ಚೈನ ಘಾಲಾ ಲಗಾಡಿನ ತುನೆ ರಾಜ್ಯನಾ ತನ್ನ ಕ್ಹಾಸ ಅದಿಕಾರಿಯೊಮಾ ಯಕ್ಲೊ ಕರುಸ ಕೈನ ಕದ್ಯೊ. ತೆಳಾಮಾ ದಾನಿಯಲ ಸನ್ನಿದಿಮಾ ತು ದಿವಾನು ತುಕನಜ಼ ರ‍್ಹವಾನೆದೆ, ತಾರಾ ಬಹುಮಾನೊ ಬಿಜಾ಼ನೆ ಥಾವಾದೆ; ತೆನೈಸೊ ಮಿ ಎ ಲಿಕ್ಹಾವಟನೆ ಒದಿನ ಇನು ಮತ್ಲಬ ರಾಜಾ಼ನೆ ಕೌಸ. ರಾಜಾ಼, ಸರ್ವಶಕ್ತ ಕ್ಹುದಾ ತಾರೊ ಬಾಪ ಥಯಲ ನೆಬುಕದ್ನೆಚ್ಚರನೆ ಎ ರಾಜ್ಯನು ಮಹತ್ವ ಮಾನ ವರಿ ಸನ್ಮಾನೊ ದಿದ್ಯೊ; ಎ ಕ್ಹಾಸ ವರಾಕ್ಹು ಕ್ಹಾರಾ ಜನಾಂಗ ಕುಲ ಭಾಷಾವಾಲಾ ತಿನಾ ಕ್ಹಾಮಾ ಭುಚ್ಕಿನ ಕಾಪ್ಯಾ; ಚಾ಼ಯೆ ಥಯಲವಾಲಾವೊನೆ ಕ್ಹಲಾಸ ಕರಾ ಲಗಾಡ್ಯೊ, ಚಾ಼ಯೆ ಥಯಲವಾಲಾವೊನೆ ವಚಾ಼ಡ್ಯೊ, ಮನಸೆ ಆಯಲವಾಲಾವೊನೆ ಚ಼ಡಾಯೊ, ಮನಸೆ ಆಯಲವಾಲಾವೊನೆ ಉತಾರ‍್ಯೊ. ಇಮ್ಮ ತಿನು ಮನಸ ಮಸ್ತಿಕ್ಹು ತಿನು ಸ್ವಭಾವ ಜಡ ಥೈನ ತಿನೆ ಸೊಕ್ಕ ಆಯಲಕ್ಹು ತಿನೆ ರಾಜಾ಼ನಾ ಸಿಂಹಾಸನ ಪರ್ತೊ ಢಕ್ಲಿನ ಮನಕ್ಹ ಕಾಡಿ ಪಡ್ಯೊ; ತೆ ಮನಕ್ಹೊನಾ ವಚ್ಮಾ಼ತೊ ಭಾರೊ ಕಡಾಯಲವಾಲೊ ವ್ಹೈ, ತಿನು ಗ್ಯಾನ ಜಂಗ್ಲಿ ಜಾನವರ ಲಿಂಗತ ಥಯು, ರಾನನಾ ಗದಡಾವೊನಾ ಕ್ಹಾತೆ ರ‍್ಹಯೊ; ಸರ್ವಶಕ್ತ ಥಯಲ ಕ್ಹುದಾ ಮನಕ್ಹೊನಾ ರಾಜ್ಯಮಾ ರಾಜೊ಼ ಥೈನ ತ್ಯುನಾ ಉಪ್ಪರ ತಿನೆ ಚಾ಼ಯೆ ಥಯಲವಾಲಾವೊನೆ ನೆಮಕ ಕರಸ ಕವಾನು ತಿನೆ ಗ್ವತ್ತ ಥಾಯೆ ಲಕ್ಕಾ ಬೈಲೊ ಲಿಂಗತ ಚಾ಼ರೊ ಚ಼ರಾನು ತಿನಿ ಗತಿ ಥೈ, ಹಬಾಳನಿ ಠಾರ ತಿನಾ ಅಂಗನೆ ಭಿಂಜಾತುತು. ಬೆಲ್ಶಚ್ಚರ, ತಿನೊ ದಿಕ್ರೊ ಥಯಲ ತು ಎ ಕ್ಹಾರು ತಿಳ್ದಿ ಲಿದ್ಯೊತಬಿ ತಾರಾ ಮನಸ್ಸನೆ ತಗ್ಸಿ ಲಿದ್ಯೊ ನೈ; ಪರಲೊಕನಾ ಮಾಲಕನೆ ವಿರುದ್ದ ಥೈನ ತುನೆ ತುಜ಼ ಜಾಸ್ತ ಕರಿ ಲಿದ್ಯೊ; ತಿನಾ ಆಲಯನಾ ಸಾಮನೊನೆ ಸನ್ನಿದಿನೆ ಲಾಯಾತೊ; ತು ತಾರಾ ರಾಜ್ಯನಾ ಮ್ಹೊಟಾವೊನಾ ವರಿ ತಾರಾ ಬಾಕ್ಡಿಯೊನಾ ವರಿ ಸುಳಿಯೊನಾ ಕ್ಹಾತೆ ತೆ ಕ್ಹಾರಾವೊಮಾ ದ್ರಾಕ್ಷಿಯೊನು ರಕ್ಹ ಪಿನ ಗ್ಯಾನ ಡೊಳಾ ಕಾನೊ ನೈ ರ‍್ಹಯಲ ಕ್ಹೊನು ರುಪ್ಪು ತಾಂಬು ಲ್ಹೊಡು ಝಾಡ ದಗ್ಡಾವೊನಾ ದೆವಸ್ಥಾನೊನೆ ಸ್ತುತಿ ಕರ‍್ಯೊಸ; ತೆನೈಸೊ ತಾರೊ ಜ಼ಲಮ ಕಿನಾ ಹತ್ತಮಾ ಛೆ ತಾರಿ ಪರಿಸ್ಥಿತಿ ಕಿನಾ ಅದಿನಮಾ ಛೆ ತೆ ಕ್ಹುದಾನೆ ಮಹಿಮಾ ಕರ‍್ಯೊಜ಼ ನೈ; ಇಮ್ಮ ರ‍್ಹತಾಮಾ ತೆ ಹತ್ತ ಕ್ಹುದಾನಿ ಸನ್ನಿದಿತೊ ಐನ ಎ ಲಿಕ್ಹಾವಟನೆ ಲಿಕ್ಯು. ಲಿಕ್ಕಲ ಲಿಕ್ಹಾವಟ ಎಜ಼ ವ್ಹೈ ಮೆನೆ, ಮೆನೆ, ತೆಕೆಲ, ಉಫರ್ಸಿನ. ಇನು ಮತ್ಲಬ ಇಮ್ಮ ಛೆ ಮೆನೆ ಕದ್ಯಾಮ ಕ್ಹುದಾ ತಾರಿ ಆಳ್ವಿಕೆನೊ ಟೈಮ ಹಿಸಾಬ ಕರಿನ ಕ್ಹರಾಯೊಸ; ತೆಕೆಲ ಕದ್ಯಾಮ ತು ತಕ್ಕಡಿಮಾ ತೊಲೈನ ಕಮ್ಮ ಛೆ ಕೈನ ದಿಕ್ಹಿನ ಆಯೊಸ; ಉಫರ್ಸಿನ ಕದ್ಯಾಮ ತಾರಿ ರಾಜ್ಯ ಬಿಜಿ಼ ಥೈನ ಮೆದ್ಯವಾಲಾವೊನೆಬಿ ಪಾರಸಿವಾಲಾವೊನೆಬಿ ದಿದಲ ಛೆ ಕೈನ ಅರಿಕೆ ಕರ‍್ಯೊ. ತೆಳಾಮಾ ಬೆಲ್ಶಚ್ಚರ ಆಗನ್ಯಾ ದೆತಾಮಾ ದಾನಿಯಲನೆ ಘನ್ನಾ ಕಿಮ್ಮತನಾ ವಣ್ಣಾ ಘಾಲಿನ ತಿನಾ ಗಳಾಮಾ ಕ್ಹೊನಾನಿ ಚೈನ ಘಾಲಿನ ಎ ರಾಜ್ಯನಾ ತನ್ನ ಕ್ಹಾಸ ಅದಿಕಾರಿಯೊಮಾ ಯಕ್ಲೊ ಥಯೊ ಕೈನ ಕದ್ಯೊ. ತೆಜ಼ ರಾತೆ ಕಸ್ದಿಯನೊ ರಾಜೊ಼ ಥಯಲ ಬೆಲ್ಶಚ್ಚರ ಕ್ಹಲಾಸ ಕರಾ ಲಗಾಡ್ಯಾ. ಮೆದ್ಯೆಯನೊ ದಾರ್ಯಾವೆಷ ರಾಜ್ಯನೆ ಲಿದ್ಯೊ. ತಿನಿ ವೈಸ ಕಮ್ಸಿ ಕಮ್ಮ ಕ್ಹಾಟಪರ ಬೆ ವ್ಹತ್ತಿ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.