Sikkiligar Bible
ದಾನಿಯಲ 2
ನೆಬುಕದ್ನೆಚ್ಚರನು ಕ್ಹಪನ
ನೆಬುಕದ್ನೆಚ್ಚರ ತಿನಿ ಆಳ್ವಿಕೆನಾ ಬೆಂವಾ ವರಕ್ಹಮಾ ಕ್ಹಪನ ದೆಕ್ಯೊ. ತೆ ಕ್ಹಪನ ತಿನೆ ಘಾಬ್ರಾ ಕರಿ ಪಡ್ಯಾ ವರಿ ತಿನೆ ನಿಂದರ ಆಯೆ ನೈಸೊ ಕರ್ಯಾ. ತೆಳಾಮಾ ರಾಜೊ಼ ತಿನಾ ಕ್ಹಾರಾ ಶ್ಯಾಣ್ಯಾವೊನೆ ಬಲಾಯೊ ತ್ಯುನೆ ಮಾಟಾ ಮಂತ್ರಕ್ಹು, ಜ್ಯೊತಿಶ್ಯ ಶಾಸ್ತ್ರನಾ ಸಹಾಯಕ್ಹು ರಾಜಾ಼ನಾ ಕ್ಹಪನನು ಮತ್ಲಬ ಭವಿಶ್ಯಮಾ ಥಾವಾನು ತಿಳ್ದಿಲಿವಾನೆ ಕೊಶಿಶ ಕರ್ಯಾ. ರಾಜೊ಼ ತೆ ದೆಕಲ ಕ್ಹಪನನು ಮತ್ಲಬ ತಿಳ್ದಿಲಿವ ಕೈನ ರ್ಹಯಲಕ್ಹು ತ್ಯುನೆ ಮ್ಹೈ ಐನ ರಾಜಾ಼ನಾ ಕ್ಹಾಮಾ ಹುಬ್ರಯಾ. ತೆಳಾಮಾ ರಾಜೊ಼ ತ್ಯುನೊನೆ, ‘ಮಿ ಯಕ್ಕ ಕ್ಹಪನ ದೆಕ್ಯೊ. ತೆ ಮನೆ ಕ್ಹಾವಾಡುಸ. ತೆ ಕ್ಹಪನನು ಮತ್ಲಬ ಸು ವ್ಹೈ ಕವಾನು ಮಿ ತಿಳ್ದಿಲಿವ ಕೈನ ಛೆ” ಕದ್ಯೊ. ತೆಳಾಮಾ ತ್ಯುನೆ ಅರಮೆಯಿಕ ಬಾಷಾಮಾ, ‘ರಾಜಾ಼ ಅಮರ ಥೈನ ರ್ಹೆ. ಹಮೆ ತಾರಾ ಸೆವಕೊ ವ್ಹೈ. ದಯಾಕರಿನ ಹಮೊನೆ ತಾರು ಕ್ಹಪನ ಕೆ. ಹಮೆ ತಿನು ಮತ್ಲಬ ಕಯ್ಯೆಸ” ಕೈನ ಉತ್ತರ ದಿದ್ಯಾ. ತೆಳಾಮಾ ರಾಜೊ಼ ತ್ಯುನೊನೆ, ‘ತಿಮ್ಮ ನೈ, ತುಮೆ ಮನೆ ಮಾರು ಕ್ಹಪನ ತಿನು ಮತ್ಲಬ ಕೌ. ನೈ ಕದ್ಯಾಮ ಮಿ ತುಮೊನೆ ತುಂಡ ತುಂಡ ಕರಿನ ಕಾಟಾನೆ ಆಗನ್ಯಾ ದಿವ್ಸ. ತುಮಾರಾ ಘರೊ ಪಾಡಿನ ಮಾತಿ ಕರು ಕೈನ ಆಗನ್ಯಾ ದಿವ್ಸ. ತೆನೈಸೊ ತುಮೆ ಮನೆ ಮಾರು ಕ್ಹಪನ ತಿನು ಮತ್ಲಬ ತಿಳ್ಸಾಯಮ ಕಾಣಿಕೆ ಬಹುಮಾನೊ ದಿವ್ಸ ವರಿ ಮ್ಹೊಟ್ಟಿ ಸನ್ಮಾನ ಕರುಸ. ಹಮ್ನಾ ತುಮೆ ಮನೆ ಕ್ಹಪನನು ಮತ್ಲಬ ಕವೊ” ಕದ್ಯೊ. ತೆಳಾಮಾ ತೆ ಪಂಡಿತೊ ರಾಜಾ಼ನೆ, ‘ದಯಾಕರಿನ ತು ಕ್ಹಪನನಾ ಹುತಿ ಕೆ. ಹಮೆ ತಿನು ಮತ್ಲಬ ಕಯೆಸ” ಕದ್ಯಾ. ತಿನಾಹುತಿ ರಾಜೊ಼ ಥಯಲ ನೆಬುಕದ್ನೆಚ್ಚರ, ‘ತುಮೆ ಘನ್ನೊ ಟೈಮ ಚಾಯೆ ಕೈನ ಕೊಶಿಶ ಕರಾಡಾಸ ಕವಾನು ಮನೆ ಗ್ವತ್ತ ಛೆ. ಮಿ ಕದಲ ತುಮೊನೆ ಕರೆಟ್ಟ ಗ್ವತ್ತ ಥಯುಸ. ತುಮೆ ಮನೆ ಮಾರಾ ಕ್ಹಪನನಾಹುತಿ ನೈ ಕದ್ಯಾಮ ತುಮೊನೆ ಯಕ್ಕಜ಼ ಶಿಕ್ಷಾ ಥಾವಸ ಕೈನ ತುಮೊನೆ ಗ್ವತ್ತ ಛೆ. ತುಮೆ ಕ್ಹಾರಾ ಮನೆ ಸುಳ್ಳ ಕೌ ಕೈನ ಫೈಸಲೊ ಕರಿ ಲಿದ್ಯಾಸ. ತುಮೆ ಟೈಮ ಬದ್ಲಿ ಥಾವಸ ಕೈನ ಆಸ ಕರಾಡಾಸ. ಹಮ್ನಾ ಮಾರು ಕ್ಹಪನ ತಿಳ್ಸಾವೊ. ತುಮೆ ಕ್ಹಪನ ತಿಳ್ಸಾಯಮ ತಿನು ಕ್ಹರಿನು ಮತ್ಲಬ ಕೆಸಕೊಶಿ” ಕೈನ ತ್ಯುನೊನೆ ಉತ್ತರ ದಿದ್ಯೊ. ತೆಳಾಮಾ ಪಂಡಿತೊ, ‘ಮಹಾಪ್ರಭು ಪುಚ್ಚಾನು ಕವಾಲಾ ಎ ಜಗತ್ಮಾ ಕುನ್ನಜ ನತ್ತಿ. ಇತ್ತಿ ಪೈಲಾ ಕಯೊಜ಼ ರಾಜೊ಼ ತಿನಿ ಆಸ್ತಾನನಾ ಪಂಡಿತೊನೆ ಮಂತ್ರವಾದಿಯೊನೆ ಹವು ಸವಾಲ ಪುಚ್ಚಾ ನತ್ತಿ. ಕ್ಹಾರತಿ ಮ್ಹೊಟೊ ವರಿ ತಾಕತವರ ರಾಜೊ಼ ತಿನಾ ಪಂಡಿತೊನೆ ರ್ಹವಾದೆ ಜೊಯಿಸರೊನೆ ರ್ಹವಾದೆ ಹವು ಪುಚ್ಚಾ ನೈ. ರಾಜೊ಼ ಪುಚ್ಚಾನು ವಿಶಯ ಘನ್ನು ಕಟಿನ ಛೆ. ದೆವಸ್ಥಾನೊ ಯಕ್ಕಜ ರಾಜಾ಼ನಾ ಕ್ಹಪನನು ಮತ್ಲಬ ಕವಾನೆ ಸಾದ್ಯ ಛೆ. ತೆನೈಸೊ ದೆವಸ್ಥಾನೊ ಮನಕ್ಹೊನಾ ಕ್ಹಾತೆ ರ್ಹತಾ ನೈ” ಕದ್ಯಾ. ಎ ಐಕಿನ ರಾಜೊ಼ ಘನ್ನೊ ಶಿಟ್ಟ ಥೈನ ಬಾಬಿಲೊನನಾ ಕ್ಹಾರಾ ವಿದ್ವಾಂಸೊನೆ ಕ್ಹಲಾಸ ಕರು ಕೈನ ಆಗನ್ಯಾ ದಿದ್ಯೊ. ರಾಜೊ಼ ಥಯಲ ನೆಬುಕದ್ನೆಚ್ಚರನಿ ಆಗನ್ಯಾ ಪುರಾ ಕರು ಲಾಗ್ಯು. ಕ್ಹಾರಾ ವಿದ್ವಾಂಸೊನೆ ಕ್ಹಲಾಸ ಕರು ಲಾಗ್ಯು. ದಾನಿಯಲ ವರಿ ತಿನಾ ದೊಸ್ತೊನೆ ಹುಡಕಿನ ತ್ಯುನೊನೆ ಕ್ಹಲಾಸ ಕರಾನಾಹುತಿ ರಾಜಾ಼ನಾ ವಳೌ ಲಾಗ್ಯು.
ಕ್ಹುದಾ ದಾನಿಯಲನೆ ಕ್ಹಪನನು ಮತ್ಲಬ ದೆಕಾಡ್ಯೊ
ಅರ್ಯೊಕ ರಾಜಾ಼ನಾ ಅಂಗ ರಕ್ಷಕನೊ ದಳವಾಯಿ ಥಯೊತೊ. ತೆ ಬಾಬಿಲೊನನಾ ವಿದ್ವಾಂಸೊನೆ ಕ್ಹಲಾಸ ಕರಾನೆ ಚಾಲ್ಯೊತೊ. ತೆನೈಸೊ ದಾನಿಯಲ ತಿನಾ ಕ್ಹಾತೆ ಬೊಲ್ಯೊ. ದಾನಿಯಲ ತಿನಾ ಕ್ಹಾತೆ ಘನ್ನಾ ನರಮೆ ಬೊಲ್ಯೊ. ದಾನಿಯಲ ಅರ್ಯೊಕನೆ, ‘ರಾಜೊ಼ ತ್ಯವಿ ಕಟಿನ ಶಿಕ್ಷಾ ಕಾ ಆಗನ್ಯಾ ದಿದ್ಯೊ? ಕೈನ ಪುಚ್ಯೊ. ತೆಳಾಮಾ ಅರ್ಯೊಕ ರಾಜಾ಼ನಾ ಕ್ಹಪನನೆ ಸಂಬದ ರ್ಹಯಲ ಕ್ಹಾರಾ ವಿಶಯ ತಿಳ್ಸಾಯೊ. ತೆಳಾಮಾ ದಾನಿಯಲ ರಾಜೊ಼ ಥಯಲ ನೆಬುಕದ್ನೆಚ್ಚರ ಕನ ಗೈನ ತಿನೆ ದಕ್ಹೊ ಟೈಮ ದಿದ್ಯೊಮ ತೆ ರಾಜಾ಼ನು ಕ್ಹಪನ ತಿನು ಮತ್ಲಬ ಕೌಸ ಕೈನ ಕದ್ಯೊ. ತೆಳಾಮಾ ದಾನಿಯಲ ಘರೆ ಗೈನ ತಿನೊ ದೊಸ್ತ ಥಯಲ ಹನನ್ಯ, ಮಿಶಾಯೆಲ ವರಿ ಅಜರ್ಯ ಇವ್ನೊನೆ ಎ ವಿಶಯ ತಿಳ್ಸಾಯೊ. ಪರಲೊಕನೊ ಕ್ಹುದಾ ತಿನೆ ಸಹಾಯ ಕರು ಕೈನ ಕೃಪಾ ದೆಕಾಡು ಕೈನ ಪ್ರಾಥನಾ ಕರು ಕೈನ ದಾನಿಯಲ ತ್ಯುನೊನೆ ಮಾಂಗಿಲಿದ್ಯೊ. ದಾನಿಯಲ ವರಿ ತಿನಾ ದೊಸ್ತೊ ಮರಣ ದಂಡಣೆಕ್ಹು ಪಾರ ಥೌ ಕದ್ಯಾಮ ಕ್ಹಪನನು ಮತ್ಲಬ ಕವಾನುಜ ವ್ಹತ್ತು. ತೆ ದಿನ್ನೆ ರಾತೆ ದಾನಿಯಲನೆ ಕ್ಹುದಾನಿ ದರ್ಶನ ಥಯು. ತೆಳಾಮಾ ದಾನಿಯಲ ಪರಲೊಕನಾ ಕ್ಹುದಾನೆ ಇಮ್ಮ ಸ್ತುತಿ ಕರ್ಯೊ. ‘ಕ್ಹುದಾನು ನಾಮ ಹಮೆಶಾಬಿ ವರಿ ಯುಗ ಯುಗಂತರ ಸ್ತುತಿ ಕರೊ. ಗ್ಯಾನ ತಾಕತ ತಿನಾಜ ವ್ಹೈ. ತೆ ಕಾಲ ಸಮಯನೆ ಬದ್ಲಿ ಕರಸ. ತೆ ರಾಜಾ಼ವೊನೆ ಬದ್ಲಿ ಕರಸ. ತೆ ರಾಜಾ಼ವೊನೆ ಅದಿಕಾರ ದಿವಸ. ತೆ ತ್ಯುನಿ ಅದಿಕಾರ ಕಾಳಿಲಿವಾಲೊ ವ್ಹೈ. ಮನಕ್ಹೊನೆ ಗ್ಯಾನ ದಿನ ಗ್ಯಾನಿಯೊ ಕರಾಲೊ ತೆಜ ವ್ಹೈ. ಮನಕ್ಹೊನೆ ವಿವೆಕ ದಿನ ವಿವೆಕಿಯೊ ಕರಾಲೊ ತೆಜ ವ್ಹೈ. ಮ್ಹೈ ದಡಿ ರ್ಹಯಲ ರಾಜ಼ ತಿಳ್ದಿಲಿವಾಲೊ ತೆಜ಼ ವ್ಹೈ. ಉಜಾಲು ತಿನಾ ಕ್ಹಾತೆ ಛೆ. ತಿನಾಹುತಿ ಅಂದಾರಾಮಾ ರ್ಹಯಲ ತಿನೆ ಗ್ವತ್ತ ಥಾವಸ. ಮಾರಾ ಪುರ್ವಿಕರೊನಾ ಕ್ಹುದಾ, ತುನೆ ಸ್ತುತಿ ಕರುಸ. ತು ಮನೆ ಗ್ಯಾನ ತಾಕತ ದಿದ್ಯೊಸ. ಮಿ ಐಕಲ ದಿದ್ಯೊಸ. ರಾಜಾ಼ನಾ ಕ್ಹಪನನೆ ತಿಳ್ಸಾಯೊಸ”.
ದಾನಿಯಲ ರಾಜಾ಼ನು ಕ್ಹಪನ ವರಿ ತಿನು ಮತ್ಲಬ ಕದ್ಯಲ
ಪಾಚಾಲ್ತೊ ದಾನಿಯಲ ಅರ್ಯೊಕ ಕನ ಗಯೊ. ರಾಜೊ಼ ಥಯಲ ನೆಬುಕದ್ನೆಚ್ಚರ ಬಾಬಿಲೊನನಾ ಶಾಣ್ಯಾವೊನೆ ಕ್ಹಲಾಸ ಕರಾನೆ ಅರ್ಯೊಕನೆ ಇನಿಲಿದ್ಯೊ. ದಾನಿಯಲ ಅರ್ಯೊಕನೆ, ‘ಬಾಬಿಲೊನನಾ ಶಾಣ್ಯಾವೊನೆ ಕ್ಹಲಾಸ ಕರು ನಕೊ. ಮನೆ ರಾಜಾ಼ ಕನ ಬಲೈ ಲಿನ ಜಾ. ಮಿ ತಿನೆ ತಿನಾ ಕ್ಹಪನ ವರಿ ತಿನು ಮತ್ಲಬ ಕೌಸ” ಕದ್ಯೊ. ತೆಳಾಮಾಜ಼ ಅರ್ಯೊಕ ದಾನಿಯಲನೆ ರಾಜಾ಼ ಕನ ಬಲೈ ಲಿನ ಗಯೊ. ಅರ್ಯೊಕ ರಾಜಾ಼ನೆ, ‘ಯೆಹುದತೊ ಕೈದಿ ಕರಿಲಿನ ಲಾಯಲವಾಲಾವೊಮಾ ರಾಜಾ಼ನು ಕ್ಹಪನ ವರಿ ತಿನು ಮತ್ಲಬ ಕವಾಲಾ ಯಕ್ಲಾನೆ ಮಿ ಕಂಡ ಧರ್ಯೊಸ. ತೆ ರಾಜಾ಼ನು ಕ್ಹಪನ ವರಿ ತಿನು ಮತ್ಲಬ ಕವಸ” ಕದ್ಯೊ. ರಾಜೊ಼ ದಾನಿಯಲನೆ ಬೆಲ್ತೆಶಚ್ಚರನೆ ‘ತು ಮಾರಾ ಕ್ಹಪನನೆ ತಿನು ಮತ್ಲಬನೆ ಕೆ ಸಕಶಿ ಸು?” ಕೈನ ಪುಚ್ಯೊ. ತೆಳಾಮಾ ದಾನಿಯಲ, ‘ರಾಜೊ಼ ಥಯಲ ನೆಬುಕದ್ನೆಚ್ಚರ, ಕಯೊ ವಿದ್ವಾಂಸ ರ್ಹವಾದೆ ಮಾಟಾ ಕರಾಲೊ ರ್ಹವಾದೆ ಜೊಯಿಸೊ ರ್ಹವಾದೆ ಶಕುನ ಕವಾಲಾ ರ್ಹವಾದೆ ರಾಜೊ಼ ಥಯಲ ತುನೆ ರಹಸ್ಯ ರ್ಹಯಲ ಕವಾನೆ ಥಯು ನೈ. ತೆನೈಸೊ ಪರಲೊಕಮಾ ಯಹೊವಾ ಕವಾಲೊ ಛೆ. ತೆ ರಹಸ್ಯ ರ್ಹಯಲ ಕವಸ. ಭವಿಶ್ಯಮಾ ಥಾವಾನು ರಾಜೊ಼ ಥಯಲ ತುನೆ ಯಹೊವಾ ತಿಳ್ಸಾಯೊಸ. ಎಜ ತು ದೆಕಲ ಕ್ಹಪನ ವ್ಹೈ, ತು ವಚ್ಚಾನಾನಾ ಉಪ್ಪರ ಕ್ಹುರಯಲ ಟೈಮಮಾ ದೆಕಲ ಸಂಗತಿಯೊ ಎ ವ್ಹೈ: ರಾಜಾ಼, ತು ತಾರಾ ವಚ್ಚಾನಾಮಾ ಕ್ಹುರಯೊತೊ. ಭವಿಶ್ಯಮಾ ಥಾವಾನಾ ಹುತಿ ವಿಚಾರ ಕರಾಡೊತೊ. ಕ್ಹುದಾ ಮನಕ್ಹೊನೆ ರಹಸ್ಯ ತಿಳ್ಸಾವಸ. ಭವಿಶ್ಯಮಾ ಥಾವಾನು ತೆಜ ತುನೆ ದೆಕಾಡ್ಯೊಸ. ಕ್ಹುದಾ ರಹಸ್ಯ ಮನೆಬಿ ತಿಳ್ಸಾಯೊಸ! ಕ್ಹುದಾ ಮನೆ ತಿಳ್ಸಾಯಲ ಮಿ ಬಿಜಾವೊತಿ ಜಾಸ್ತ ಗ್ಯಾನ ರ್ಹಯಲವಾಲೊ ವ್ಹೈ ಕೈನ ನ್ಹವೈ. ತೆನೈಸೊ ರಾಜೊ಼ ಥಯಲ ತುನೆ ಇನು ಮತ್ಲಬ ತಿಳ್ದಾದೆ ಕವಾನಾ ಉದ್ದೆಶಕ್ಹು ಕ್ಹುದಾ ಮನೆ ತಿಳ್ಸಾಯೊಸ. ಇನಾಹುತಿ ತಾರಾ ಮನಸನಿ ವಿಚಾರೊನಾ ವಿಶಯ ತುನೆ ಕಳಿನ ಆವಸ. ‘ರಾಜಾ಼, ತಾರಾ ಕ್ಹಪನಮಾ ತಾರಾ ಕ್ಹಾಮು ಯಕ್ಕ ಮ್ಹೊಟಿ ಮುರ್ತಿ ದೆಕ್ಯೊ. ತೆ ಘನ್ನ ಮ್ಹೊಟುಬಿ ಚಮ್ಕಾನುಬಿ ಪ್ರಭಾವಕ್ಹುಬಿ ವತ್ತು. ದೆಕ್ಯಲವಾಲಾ ಘಾಬ್ರಾ ಥೈನ ಡೊಳಾ ಫರಾಯಲ ಲಿಂಗತ ವ್ಹತ್ತು. ತೆ ಮುರ್ತಿನು ಮಾತು ಚೊಕ್ಕ ಕ್ಹೊನಾಕ್ಹು ಕರಲ ವ್ಹತ್ತು. ತಿನಿ ಛಾತಿ ವರಿ ರಟ್ಟಾ ರುಪ್ಪಾಕ್ಹು ಕರಲ ವ್ಹತ್ತು. ತೆ ಮುರ್ತಿನು ಪೆಟ, ಕಂಬರ ವರಿ ಮಾಂಡಿಯೊ ತಾಂಬಾಕ್ಹು ಕರಲ ವ್ಹತ್ತು . ಪಗೊ ಲ್ಹೊಡಾಕ್ಹು ಕರಲ ವ್ಹತ್ತಾ. ತೆ ಮುರ್ತಿನಾ ತಳವಾ ಲ್ಹೊಡು ವರಿ ಯರಿ ಮಾತಿಕ್ಹು ಕರಲ ವ್ಹತ್ತು. ತು ತೆ ಮುರ್ತಿನೆ ದೆಕ್ತಾಮಾ ತುನೆ ಯಕ್ಕ ಮ್ಹೊಟೊ ದಗ್ಡೊ ದಿಕ್ಹ್ಯೊ. ತೆ ಮ್ಹೊಟೊ ದಗ್ಡೊ ತಿನಾಕ್ಹು ತೆ ಡ್ಹಿಲ್ಲು ಥಯು; ಕುನ್ನಜ ತಿನೆ ಫೊಡ್ಯೊ ನೈ. ಪಾಚಲ್ತು ತೆ ಮ್ಹೊಟೊ ದಗ್ಡೊ ತೆ ಮುರ್ತಿನಾ ಲ್ಹೊಡಾನು ವರಿ ಮಾತಿನಾ ಪಗೊನೆ ಲಾಗ್ಯು. ತೆ ಮ್ಹೊಟೊ ದಗ್ಡೊ ಮುರ್ತಿನಾ ಪಗೊನೆ ಫೊಡಿನ ಫುಡಿ ಫುಡಿ ಕರ್ಯು. ಪಾಚಲ್ತು ಲ್ಹೊಡು, ಮಾತಿ, ಪಿತ್ತೊಳ, ರುಪ್ಪು, ಕ್ಹೊನು, ಕ್ಹಾರು ಯಕ್ಕಜ ಟೈಮಮಾ ಫುಟಿನ ಚುರ ಚುರ ಥಯು. ತೆ ತುಕ್ಡಾ ಕ್ಹಾರಾ ಝಳಾನಾ ದಿನ್ನಮಾ ಕೊಂಡಾ ಲಿಂಗತ ಥಯಾ. ವಾರೊ ತೆ ತುಕ್ಡಾವೊನೆ ಉರಾಡಿ ಲಿನ ಗಯು. ತ್ಯಾ ಸುಜ ಉಗ್ರ್ಯು ನೈ. ಪೈಲಾ ತ್ಯಾ ಯಕ್ಕ ಮುರ್ತಿ ವ್ಹತ್ತಿ ಕೈನ ಕುನ್ನಜ ಕವಾ ವರಕ್ಹು ನ್ಹೊತು. ಪಾಚಲ್ತು ತೆ ಮುರ್ತಿನೆ ಲಾಗ್ಯಲ ಮ್ಹೊಟೊ ದಗ್ಡೊ ಯಕ್ಕ ಮ್ಹೊಟು ಡೊಂಗರ ಥೈನ ಪುರಾ ಭುಮಂಡಲ ಫೈಲಿ ಗಯು. ಕ್ಹಪನ ಎಜ಼ ವ್ಹೈ; ಇನು ಅರ್ಥ ರಾಜಾ಼ನಾ ಸನ್ನಿದಿಮಾ ಕೌಸ. ರಾಜಾ಼, ತು ರಾಜಾ಼ವೊನಾ ರಾಜೊ಼ ವ್ಹೈ, ಪರಲೊಕವನೊ ಕ್ಹುದಾ ತುನೆ ರಾಜ್ಯನಿ ತಾಕತ ಪರಾಕ್ರಮ ವೈಭವ ದಿದ್ಯೊಸ; ಮನಕ್ಹೊ ರ್ಹವಾನಾ ಕ್ಹಾರಾ ಗಾಮೊಮಾ ಹಬಾಳನಾ ಪಕ್ಷಿಯೊನೆ ಜಿಮಿನಾ ಜಿವಜಂತುವೊನೆ ತುನೆ ಒಪ್ಸಿನ ತು ತೆ ಕ್ಹಾರಾವೊನೆ ಆಳೆಲಿಂಗತ ಕರ್ಯೊಸ. ತುಜ಼ ತೆ ಕ್ಹೊನಾನು ಮಾತು ವ್ಹೈ. ತಾರಾ ದಿನೊ ಥಯಲ್ಪರ ಧೊಳು ರ್ಹಯಲ ಬಿಜೆಕ ರಾಜ್ಯ ಹುಟ್ಟಸ. ತೆ ಥಯಲ್ಪರ ಬಿಜೆಕ ರಾಜ್ಯ ತಾಂಬಾನು ರ್ಹವಸ ತಲೆದುರಿ ಭುಮಂಡಲ್ಪರ ರಾಜ಼ ಕರಸ. ಚಾರವಾ ರಾಜ್ಯ ಲ್ಹೊಡಾ ಲಿಂಗತ ಘಟ್ಟ; ಲ್ಹೊಡು ಕ್ಹಾರಾ ಸಾಮನೊನೆ ಪುಡಿ ಪುಡಿ ಕರಿನ ತೊಡಿಪಡಸ; ಕ್ಹಾರು ನಾಶ ಕರಾನು ಲ್ಹೊಡಾ ಲಿಂಗತ ತೆ ಪುಡಿ ಪುಡಿ ಕರಸ. ಪಗೊನೆ ವರಿ ಬೊಟೊಮಾ ಯಕ್ಕ ಭಾಗ ಕುಂಬಾರನಾ ಮಾತಿಮಾ ಯಕ್ಕ ಭಾಗ ಲ್ಹೊಡು ಥಯಲನೆ ತು ದೆಕಲ ಪ್ರಕಾರ ತೆ ರಾಜ್ಯ ಬಿಜು಼-ಬಿಜು಼ ರ್ಹವಸ; ಜೆಡಿಮಾತಿನಾ ಕ್ಹಾತೆ ಲ್ಹೊಡು ಮಳೆಲಿಂಗತ ತು ದೆಕಲ ಲಿಂಗತ ತೆ ರಾಜ್ಯಮಾ ಲ್ಹೊಡಾನಿ ತಾಕತ ರ್ಹವಸ. ಪಗ್ಗನಾ ಬೊಟೊನು ಯಕ್ಕ ಭಾಗ ಲ್ಹೊಡಾನು ಯಕ್ಕ ಭಾಗ ಮಾತಿ ರ್ಹಯಲ ತಿಮ್ಮ ತೆ ರಾಜ್ಯನು ಯಕ್ಕ ಭಾಗ ಘಟ್ಟ ಯಕ್ಕ ಭಾಗ ಬಲಹಿನ ರ್ಹವಸ. ಲ್ಹೊಡು ಜೆಡಿಮಾತಿನಾ ಕ್ಹಾತೆ ಮಳಲ ರ್ಹಯಲ ತು ದೆಕಲ ಲಿಂಗತ ತೆ ರಾಜ್ಯನಾ ಅಂಶ ಸಂತತಿ ಸಂಬಂಧಕ್ಹು ಮಳಸ; ತಿನಾಹುತಿ ಲ್ಹೊಡು ಮಾತಿನಾ ಕ್ಹಾತೆ ಕಿಮ್ಮ ಕಲಾತು ನೈ ತಿಮ್ಮ ತೆ ಯಕ್ಕನೆ ಯಕ್ಕ ವ್ಹಂದತು ನೈ. ತೆ ರಾಜಾ಼ವೊನಾ ಟೈಮಮಾ ಪರಲೊಕನೊ ಕ್ಹುದಾ ಯಕ್ಕ ರಾಜ್ಯ ಸ್ಥಾಪನಾ ಕರಸ; ತೆ ಕೆಳಾಮಾಜ಼ ನಾಶ ನೈ ಥಾತು, ತಿನಿ ತಾಕತ ಬಿಜಾ಼ ಜನಾಂಗನೆ ನೈ ಜಾ಼ತಿ, ತೆ ಕ್ಹಾರಾ ರಾಜ್ಯನೆ ನಾಶ ಕರಿನ ಹಮೆಶಾನು ರಾಜ್ಯ ಥೈನ ಹುಬ್ರವಸ. ಡೊಂಗರಮಾತು ಯಕ್ಕ ಗೊಲ ದಗಡೊ ಹತ್ತನೈಸೊ ಫುಟಿನ ಲ್ಹೊಡು ತಾಂಬು ಮಾತಿ ರುಪ್ಪು ಕ್ಹೊನಾವೊನೆ ಪುಡಿ ಪುಡಿ ಕರಲ ತಾರಾ ಡೊಳೆ ಬಿತ್ತತು ನೈ; ಇನಾಕ್ಹು ಪರಲೊಕನೊ ಕ್ಹುದಾ ಅಗಾ ಥಾವಾನಾ ವಿಶಯ ರಾಜಾ಼ನೆ ತಿಳ್ಸಾಯೊಸ; ಕ್ಹಪನ ಕ್ಹರಿಜ಼ ವ್ಹೈ, ತಿನು ಅರ್ಥಬಿ ಬರೊಕ್ಹೊ ಕರಾವರ್ಕ್ಹು ಛೆ ಕೈನ ಕದ್ಯೊ.
ರಾಜೊ಼ ದಾನಿಯಲನೆ ಬಹುಮಾನ ದಿದಲ
ತೆಳಾಮಾ ರಾಜ಼ೊ ಥಯಲ ನೆಬುಕದ್ನೆಚ್ಚರ ದಾನಿಯಲನೆ ಅಡ್ಡ ಪಡಿನ ನೆ ಬಲಿನೆ ಕರಿನ ಉದ ಘಾಲು ಕೈನ ಆಗನ್ಯಾ ದಿದ್ಯೊ. ತಿನಾಹುತಿ ತು ಎ ರಾಜ಼ನೆ ಭಾರೊ ಲಾವಾನೆ ಸಮರ್ಥ ಥಯಲಕ್ಹು ತುಮಾರೊ ಕ್ಹುದಾ ದೆವಾದಿದೆವ ರಾಜಾ಼ವೊನೊ ಮಾಲಕ ದಡಿರ್ಹಯಲನೆ ಭಾರೊ ಕಾಡಾಲೊ ಥಯೊಸ ಕವಾನು ಕ್ಹರಿಜ಼ ವ್ಹೈ ಕೈನ ಕದ್ಯೊ. ಪಾಚ಼ಲ್ತೊ ರಾಜೊ಼ ದಾನಿಯಲನೆ ಅದಿಕಾರ ದಿನ ತಿನೆ ಅಮುಲ್ಯ ಮೊಗಾ ರ್ಹಯಲ ಬಹುಮಾನೊ ದಿನ ಬಾಬಿಲನಾ ಕ್ಹಾರಾ ಸಂಸ್ಥಾನೊನೆ ದಿನ ಬಾಬೆಲನಾ ವಿದ್ವಾಂಸೊನಾ ಕ್ಹಾರಾ ಶಾನಾವೊಪರ ತಿನೆ ಶಾನೊ ಥೈನ ಕರ್ಯೊ. ದಾನಿಯಲ ಮಾಂಗಿಲಿವಾಕ್ಹು ರಾಜೊ಼ ಶದ್ರಕ ಮೆಶಕ ಅಬೆದ್ನಗೊ ಕಾವಾಲಾವೊನೆ ಬಾಬೆಲ ಸಂಸ್ಥಾನನಾ ಕಾಮೊ ತ್ಯುನೊನೆ ದಿದ್ಯೊ; ದಾನಿಯಲ ರಾಜ಼ಮಹಲಮಾ ಹುಬ್ರಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.