Skip to content
BibleKenya

Sikkiligar Bible

ದಾನಿಯಲ 10

ದೆವದುತನು ದರ್ಶನ

ಪಾರಶಿನೊ ರಾಜೊ಼ ಥಯಲ ಕೊರೆಷನನಿ ಆಳ್ವಿಕೆನಾ ತನ್ವಾ ವರಕ್ಹಮಾ ದಾನಿಯಲನೆ ಯಕ್ಕ ಸಂಗತಿ ಐ; ಘನ್ನಿ ತ್ರಾಸನಿ ತೆ ಸಂಗತಿ ಕ್ಹರಿ ವ್ಹೈ. ತೆ ದೆಕಲ ಕ್ಹಪನನಾ ಹುತಿ ತೆ ಸಂಗತಿ ಝಾಕಿನ ಮ್ಹೆಲ್ಯೊ. ತೆ ಕಾಲಮಾ ದಾನಿಯಲ ಥಯಲ ಮಿ ತನ್ನ ಹಪ್ತಾ ರೊತೊ ರ‍್ಹೌಸ. ತನ್ನ ಹಪ್ತಾ ಮುಗದೆಲಕ್ಕಾ ಸ್ವಾದ ರ‍್ಹಯಲ ಅನ್ನ ಖಾದ್ಯೊ ನೈ, ಮಾಕ್ಹ ದ್ರಾಕ್ಷಿಯೊನು ರಕ್ಹ ಮಾರಾ ಮ್ಹೊಡಾಮಾ ಘಾಲ್ಲಿದ್ಯೊ ನೈ, ತೆಲ ಲಗಾಡಿಲಿದ್ಯೊ ನೈ. ಪಸ್ಟಲ್ಯಾ ಮ್ಹೈನಾನಾ ಇಕ್ಹಪರ ಚಾರರ್ವಾ ದಿನ್ಮಾ ಮಿ ಹಿದ್ದಿಕೆ ಕವಾನಿ ಮ್ಹೊಟಿ ನದಿನಾ ದಂಡಿ ಹುಬರೈನ ಡೊಳೊ ಉಚೈನ ದೆಕ್ತಾಮಾ, ಚೊ಼ಕಾ ವಣ್ಣಾ ಘಾಲ್ಲಿನ ಉಫಜಿನನಿ ಕ್ಹೊನಾನಿ ಪಟ್ಟಿ ಬಿಗ್ದಿಲಿನ ಯಕ್ಕ ದಾಣಗೊ ಮನೆ ದಿಕ್ಹ್ಯೊ; ತಿನು ಅಂಗ ಪಿತರತ್ನ ನಿಂಗತ ಮಿಂಚಾ಼ಡ್ಯುತು, ತಿನು ಮ್ಹೊಡು ಮಿಂಚಾ಼ಡ್ಯುತು ತಿನಾ ಡೊಳಾ ಘನ್ನಾ ಮಿಂಚಾ಼ಡ್ಯಾತಾ ತಿನಾ ಪಗೊ ತಿಕ್ಕಲ ತಾಂಬಾನಾ ನಿಂಗತ ಮಿಂಚಾ಼ಡ್ಯಾತಾ. ತೆ ಬೊಲಾನು ಅವಾಜ಼ ಘನ್ನು ಜ಼ೊರ ವ್ಹತು. ದಾನಿಯಲ ಥಯಲ ಮಿ ಯಕ್ಲೊಜ಼ ತೆ ದರ್ಶನ ದೆಕ್ಯೊ. ವರಿ ಮಾರಾ ಕ್ಹಾತೆ ರ‍್ಹಯಲವಾಲಾ ತೆ ದೆಕ್ಯಾ ನೈ. ವರಿಬಿ ತ್ಯುನೆ ಘನ್ನಾ ಕಾಪತಾ ನ್ಹಾಟಿನ ಗೈನ ದಡಿರ‍್ಹಯಾ. ಮಿ ಯಕಾಕಿಜ಼ ತೆ ಮ್ಹೊಟು ದರ್ಶನ ದೆಕಿನ ಮಾರಾಮಾ ರ‍್ಹಯಲ ಕ್ಹಾರಿ ತಾಕತ ಜ಼ವೈಲಿದ್ಯೊ. ತೆಕ್ಲು ಥಯುತಬಿ ತೆ ಬೊಲಾನು ಮನೆ ಐಕು ಆವಾಡ್ಯುತು; ತೆ ಬೊಲಾನಿಯೊ ವಾತೊ ಮಾರಾ ಕಾನೆ ಪಡತಾಮಾ ಮಿ ಮೊಕಾನಿಂಗತ ಥೈನ ಅಡ್ಡಪಡ್ಯೊ. ಅಹಾ ಮಪರ ಹತ್ತ ಮುಕ್ಕಲನಿಂಗತ ಥಯು ಮಿ ಕಾಪ್ತೊ ಗುಡ್ಗಾವೊಪರ ಬೈಟಿನ ಹತೊಪರ ಹುಬರವಾ ವರಕ್ಹು ಥಯು. ತೆಳಾಮಾ ಮನೆ ತೆ ದಾನಿಯಲ ಘನ್ನಾ ಮಯಾನಾ ಮಿ ಕವಾನಿಯೊ ವಾತೊ ಕಾನ ದೆ; ಹಮ್ನಾ ತುಕನ ಮೊಕಲ್ಯೊಸ ಕದ್ಯೊ; ತೆಳಾಮಾ ಮಿ ಕಾಪ್ತೊ ಹುಬರಯೊ. ತೆಳಾಮಾ ಮನೆ ತೆ ದಾನಿಯಲ ಭುಚ್ಕು಼ನಕೊ ತು ಕ್ಹುದಾನಿ ಚಿತ್ತ ಕರಾನಾಹುತಿ ತು ಕ್ಹುದಾನಾ ಕ್ಹಾಮೊ ತಗ್ಗಿಸಿಲಿವಾನೆ ಮನಸ ಮ್ಹೆಲಲ ಪಸ್ಟಲ್ಯಾ ದಿನಮಾ ತು ಮಾಂಗಿಲಿವಾನು ಕ್ಹುದಾಕನ ಮುಟ್ಯುಸ. ಪಾರಸಿ ರಾಜ್ಯನೊ ದಿವ್ಯಪಾಲಕ ಥಯಲ ಇಕ್ಹಪರ ಯಕ್ಕ ದಿನ್ನ ಮನೆ ತರ್ಬಾನೆ ದೆಕ ಪ್ರಧಾನ ದೆವದುತೊಮಾ ಯಕ್ಲೊ ಮಿಕಾಯಿಲ ಮನೆ ಮದತ ಕರಾನೆ ಆಯೊ; ತ್ಯಾ ಪಾರಸಿನಾ ರಾಜಾ಼ನಾ ಕ್ಹಾತೆ ಯುದ್ದ ಕರಿನ ವಾಚ಼ಲ ಅಂತ್ಯಕಾಲಮ ತಾರಾ ಮನಕ್ಹೊನೆ ಥಾವಾನಿ ಗತಿ ತುನೆ ಕವಾನಾಹುತಿ ಆಯೊ; ತೆ ಕಾಲನಿ ಸಂಗತಿಯೊ ಕವಾನಾಹುತಿ ಅಗು ಥಾವಾನು ದರ್ಶನ ಛೆ ಕೈನ ಕದ್ಯೊ. ತೆ ಎ ವಾತೊ ಕದಲಬರೊಬ್ಬರ ಮ್ಹೊಡು ಹೆಟು ಕರಿನ ಸುಜ಼ ಬೊಲ್ಯೊ ನೈ. ದೆಕ ಮನಕ್ಹನಾ ದಿಕ್ರಾ ನಿಂಗತಮಕನ ಐನ ಯಕ್ಲೊ ಮಾರಾ ಹೊಟೊ ಮುಟ್ತಾಮಾ ಮಿ ಮ್ಹೊಡು ಖೊಲಿನ ಮಾರಾ ಕ್ಹಾಮಾ ಹುಬರಯಲವಾಲಾನೆ ಮಾರಾ ಮಾಲಕ ಎ ದರ್ಶನಕ್ಹು ತ್ರಾಸೊ ಮನೆ ಆಯಾಸ. ತಾಕತ ನೈಸೊ ಥೈಗಯೊ. ಮಾರಾ ಮಾಲಕ ಸೆವಕ ಥಯಲ ಮಾರಾವರಕ್ಹಾನೆ ಮಾರಾಮಾಕಲ ಥಯಲ ತಾರಾಕ್ಹಾತೆ ಕಿಮ್ಮ ಬೊಲು? ಹಮ್ನಾತೊ ಮಾರಿ ತಾಕತ ಜ಼ವೈಲಿದ್ಯೊಸ. ಮಾರಾಮಾ ಉಸಲಜ಼ ನತ್ತಿ ಕದ್ಯೊ. ವರಿ ತೆ ಮನೆ ಮುಟ್ಟಿನ ತಾಕತ ದಿದ್ಯೊ. ತೆ ಥಲಯ್ಪರ ತೆ ಮನಕ್ಹ ಮನೆ ಘನ್ನಾ ಮಯಾನಾ ಭುಚ್ಕು಼ ನಕೊ; ತುನೆ ಸಮಾಧಾನ ರ‍್ಹವಾದೆ, ಧೈರ್ಯ ರ‍್ಹವಾದೆ ಕೈನ ಕದ್ಯೊ. ತೆ ಎ ವಾತ ಕದಲಬರೊಬ್ಬರ ಮಿ ಧೈರ್ಯಕ್ಹು ರ‍್ಹೈನ ಮಾರಾ ಮಾಲಕ ಕೆ ಮನೆ ಧೈರ್ಯದಿದ್ಯೊ ಕೈನ ಕತಾಮಾ ತೆ ಮನೆ ಅಮ್ಮ ಕದ್ಯೊ. ಮಿ ತುಕನ ಶಾನಾಹುತಿ ಆಯೊಸ ಕೈನ ತುನೆ ಗ್ವತ್ತ ನತ್ತಿಸು? ಹಮ್ನಾ ಮಿ ಪಾರಸಿಯೊನಾ ರಕ್ಷಕೊನಾ ಕ್ಹಾತೆ ಯುದ್ದ ಕರಾನೆ ಜೌ಼. ತೆ ಯುದ್ದ ಮುಗ್ದಲ್ಪರ ಆಹಾ, ಗ್ರಿಕ ರಾಜ್ಯನೊ ರಕ್ಷಕ ಮಾರಾಕ್ಹಾಮೊ ಯುದ್ದ ಕರಾನೆ ಆವಸ. ವರಿಬಿ ಕ್ಹರಿನಿ ಶಾಸನಮಾ ಬರ್ದಲ ತೆ ಮಿ ಕೌಸ. ಎ ಭಂಬಿಜ಼ನಾವೊನಾ ಕ್ಹಾತೆ ಯುದ್ದ ಕರ್ತಾಮ ತುಮಾರೊ ಪಾಲಕ ಥಯಲ ಮಿಕಾಯಲ ಯಕ್ಕಜ಼ನೆ ಛೊಡಿನ ಮನೆ ಸಾತಿದಾರ ನತ್ತಿ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.