2 ಕೊರಿಂಥ 3

ಕ್ಹುದಾನಿ ಸೆವೆನಾಹುತಿ ನಯಿ ವಾತ

1ಹಮೊನೆ ಹಮೆಜ಼ ಘನ್ನಾ ಚೊ಼ಕಾ ವ್ಹೈ ಕೈನ ಕೈಲಿವಾಡಾಸ ಸು? ನೈತೊ ಬಿಜಾ಼ವೊನೆ ದೆಕಾಡಾನಾಹುತಿ ಯೊಗ್ಯತಾ ಪತ್ರ ಹಮೊನೆ ಚಾ಼ಯೆ ಕೈನ ತುಮೊನೆ ಲಾಗಸ ಸು? ನೈತೊ ತೆ ಯೊಗ್ಯತಾ ಪತ್ರ ತುಮೊಕ್ಹು ಹಮೆ ಲ್ಯುಸು? 2ಹಮೊನೆ ತುಮೆಜ಼ ತೆ ಯೊಗ್ಯತಾ ಪತ್ರ ವ್ಹೈ ತೆ ಪತ್ರ ಹಮಾರಾ ಮನಸೊಮಾ ಬರ್ದಲ ಛೆ ತೆ ಪತ್ರ ಕ್ಹಾರಾವೊನೆ ಗೊತ್ತ ಛೆ. ತೆ ಪತ್ರ ಕ್ಹಾರಾ ಒದಸ. 3ತುಮೆಬಿ ತಿಮ್ಮಜ಼ ದೆಕಾಡೊಶಿ ಕಿಮ್ಮ ಕದ್ಯಾಮ ಕ್ರಿಸ್ತ ಹಮಾರಾ ಹತೆ ಬರ್ದಾಯಲ ನಿಂಗತಜ಼ ತುಮೆ ಹಮಾರಿ ಸೆವಾನು ಫಲ ವ್ಹೈ. ತೆ ಪತ್ರ ಕ್ಹಾಲಿ ಮಸಿಕ್ಹು ಲಿಕ್ಕಲ ನವೈ. ಜ಼ಲಮ ರ‍್ಹಯಲ ಕ್ಹುದಾನಿ ಆತ್ಮಾಕ್ಹುಜ಼ ಬರ್ದಲ ವ್ಹೈ. ದಗ್ಡಾನಾ ಹಲಗಿಪರ ನೈ ಮನಕ್ಹನಾ ಮನಸನಾ ಹಲಗಿಪರ ಬರ್ದಲ ವ್ಹೈ.

4ಹಮೊನೆ ಹವೊ ಬರೊಕ್ಹೊ ಕ್ರಿಸ್ತನಾ ಮುಲಕಜ಼ ಕ್ಹುದಾಪರ ಛೆ. 5ಹಮೊಕ್ಹುಜ಼ ಸುಬಿ ಥಯುಸ ಕವಾನೆ ಅಕ್ಲಾ ಹಮೆ ಲಾಯಕ ನತ್ತಿ. ಹಮೊನೆ ಯೊಗ್ಯತೆ ಆಯಲ ಕ್ಹುದಾಕ್ಹುಜ಼ ವ್ಹೈ. 6ತೆ ನವು ವಡಂಬಡಿಕೆನಾ ಸೆವಕೊ ಥಾವಾನೆ ತಾಕತ ಹಮೊನೆ ದಿದ್ಯೊಸ. ಆಂ ನವು ವಡಂಬಡಿಕೆ ಲಿಖಿತ ರುಪನಾ ನಿಂಗತ ನತ್ತಿ ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲ ವ್ಹೈ. ಲಿಖಿತ ರುಪಮಾ ರ‍್ಹಯಲ ವಡಂಬಡಿಕೆ ಮೌತ ಲಾವಸ. ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲ ವಡಂಬಡಿಕೆ ಜ಼ಲಮ ದಿವಸ.

7ದಗ್ಡಾಪರ ಬರ್ದಲ ಆಂ ಮೌತನೆ ಲಾವಾನು ಶಾಸನ ಘನ್ನು ಮಹಿಮಾಕ್ಹು ಭರಲ ವ್ಹತ್ತು. ತೆ ಮಹಿಮಾಕ್ಹು ಮೊಶೆನಾ ಮ್ಹೊಡಾಪರ ತೆ ಮಹಿಮಾ ವ್ಹತ್ತಿ. ತೆ ಮಹಿಮಾ ದಕ್ಹಾ ದಿನ ಥಯಲ್ಪರ ಗೈ ಪಡಾನಿ ರ‍್ಹೈತಬಿ ತೆ ಮಹಿಮಾಕ್ಹು ಮೊಶೆನು ಮ್ಹೊಡು ದೆಕಾನೆ ಇಸ್ರಾಯೆಲ ಮನಕ್ಹೊನೆ ಥಯು ನೈ. 8ತೆಜ಼ ಮಹಿಮಾ ತೆಕ್ಲಿ ರ‍್ಹಯಾರೆ ಕ್ಹುದಾನಿ ಆತ್ಮಾನೆ ಸಂಬಂದ ರ‍್ಹಯಲ ಆಂ ಸೆವಾ ಹಜು಼ ಕೆಕ್ಲಿ ಮಹಿಮಾಕ್ಹು ಭರಲ ರ‍್ಹೌ? 9ತಪ್ಪ ಕರಾಲಾನೆ ಫೈಸಲೊ ಕರಾನೆ ರ‍್ಹಯಲ ಸೆವಾಜ಼ ಮಹಿಮಾಕ್ಹು ಭರಲ ರ‍್ಹಯಾರೆ ಆಂ ನಿತಿನಿ ಸೆವಾ ಹಜು಼ನ ಕೆಕ್ಲಿಕಿ ಮಹಿಮಾಕ್ಹು ಭರಲ ರ‍್ಹೌ? 10ಹಮ್ನಾ ಘನ್ನಿ ಮಹಿಮಾ ರ‍್ಹಯಲ ಸೆವಾ ಆಯಲಕ್ಹು ಪೈಲಾ ರ‍್ಹಯಲ ಸೆವಾನಿ ಮಹಿಮಾ ತಿನಾ ಕ್ಹಾಮಿ ಮಹಿಮಾ ನೈಸೊ ಥೈ. 11ಕ್ಹರಿಜಾ಼ವಾನಿ ಮಹಿಮಾಜ಼ ಅಕ್ಲಿ ಪ್ರಭಾವಕ್ಹು ಭರಲ ರ‍್ಹಯಾಮ ಹಮೆಶಾಬಿ ರ‍್ಹವಾನಿ ಮಹಿಮಾ ಹಜು಼ನ ಕೆಕ್ಲಿಕಿ ಜಾಸ್ತ ಪ್ರಭಾವಕ್ಹು ಭರಲ ರ‍್ಹೌ ನೈ?

12ಹಮೊನೆ ಅಕ್ಲೊ ಬರೊಕ್ಹೊ ರ‍್ಹಯಲಕ್ಹುಜ಼ ಹಮೆ ಅಕ್ಲಾ ಧೈರ್ಯಕ್ಹು ಛೆ. 13ಅಪೆ ಮೊಶೆನಿಂಗತ ನತ್ತಿ. ಕುಂದಿ ಜಾ಼ವಾನಿ ಮಹಿಮಾ ಅಂತ್ಯಥಾವಾನಾ ಇಸ್ರಾಯೆಲನಾ ಮನಕ್ಹೊ ದೆಕು ನೈ ಕೈನ ಮೊಶೆ ತಿನಾ ಮ್ಹೊಡಾನೆ ಘುಮುಸ ಘಾಲ್ಲಿದ್ಯೊ. 14ತೆನೈಸೊ ತೆ ಮನಕ್ಹೊ ಗ್ಯಾನ ನೈಸೊವಾಲಾ ಥೈನ ತ್ಯುನೆ ಕಳೈಲಿದ್ಯಾ ನೈ. ತ್ಯುನೆ ಜುನ್ನು ವಡಂಬಡಿಕೆ ಒದತಾಮಾ ಹಜು಼ನಬಿ ತೆಜ಼ ಘುಮುಸಮಾ ಕಳಿಲಿವಸ. ತೆ ಘುಮುಸ ಕಾಡ್ಯಾ ನೈ. ಕಾಕದ್ಯಾಮ ತೆ ಘುಮುಸ ಕ್ರಿಸ್ತಕ್ಹುಜ಼ ಕಡಾವಸ. 15ಹಜು಼ನಬಿ ಮೊಶೆನು ಧರ್ಮಶಾಸ್ತ್ರ ಒದತಾಮಾ ತ್ಯುನಾ ಮನಸೊಬಿ ಮಂಡ ರ‍್ಹವಸ. 16ತ್ಯುನು ಮನಸ ಪ್ರಭು ಬಗಲ ಫರ್ತಾಮಾಜ಼ ತೆ ಘುಮುಸ ಝಾಕಲ ಖುಲ್ಲಾ ಥಾವಸ. 17ತೆ ಪ್ರಭು ಕ್ಹುದಾನಿ ಆತ್ಮಾ ವ್ಹೈ. ಕಿಜಾ಼ ಪ್ರಭುನಿ ಆತ್ಮಾ ರ‍್ಹವಸ ತ್ಯಾ ಬಿಡುಗಡೆ ರ‍್ಹವಸ. 18ಅಪ್ನಾ ಮ್ಹೊಡಾ ಘುಮುಸಕ್ಹು ಝಕಾಯಾ ನತ್ತಿ. ಅಪೆ ಮ್ಹೊಡಾಪರ ಘುಮುಸ ನೈಸೊವಾಲಾ ಥಯಾಸ. ಪ್ರಭುನಿ ಮಹಿಮಾ ಅರಕ್ಹಾಮಾ ದಿಕ್ಹಾನಾ ಭೌಲಾನಿಂಗತ ಛೆ. ಪ್ರಭುಕ್ಹು ದಿಕ್ಹಾನಿ ಮಹಿಮಾ ಅಪೊನೆ ಘನ್ನಿ ಬದಲಾವಣೆ ಕರಿನ ತಿನಾ ನಿಂಗತಜ಼ ಕರಸ. ಎ ಕ್ಹಾರು ಕಾಮ ಕ್ಹುದಾನಿ ಆತ್ಮಾ ಥಯಲ ಪ್ರಭುನುಜ಼ ವ್ಹೈ.