Sikkiligar Bible
2 ಕೊರಿಂಥ 2
ಬಿಜೆಕ್ಕೆಮ ತುಮೊಕನ ಐನ ತುಮೊನೆ ತ್ರಾಸಮಾ ಪಾಡು ನೈ ಕೈನ ಮಿ ಫೈಸಲೊ ಕರಲಿದ್ಯೊಸ. ಮಿಜ಼ ತುಮೊನೆ ದುಖ ದಿದ್ಯೊಮ, ಮನೆ ಕುನ್ನ ಖುಶಿ ಕರಸ? ಮಾರಾಕ್ಹು ದುಖಮಾ ಪಡಲವಾಲಾ ತುಮೆ ನ್ಹವೈ ಸು? ತಿನಾಹುತಿ ಮಿ ತೆ ಪತ್ರ ಬರ್ದ್ಯೊಸ; ಮನೆ ಖುಶಿ ಕರಾಲಾಜ಼ ಮನೆ ದುಖಮಾ ಪಾಡು ನೈ ಕೈನ ಮಿ ಆಯೊ ನೈ ಮಾರಿ ಖುಶಿಜ಼ ತುಮಾರಿ ಖುಶಿ ವ್ಹೈ ಕೈನ ಮಿ ತಿಳದಿಲಿದ್ಯೊಸ. ಮಿ ತುಮೊನೆ ಘನ್ನೊ ತ್ರಾಸಕ್ಹು ವರಿ ಮನಸ ದುಕ್ಕ ಕರಿಲಿನ ವರಿ ರೊತೊಜ಼ ಬರದ್ಯೊಸ. ಮಾರು ಉದ್ದೆಶ ತುಮೊನೆ ದುಖ ಕರುಕೈನ ನ್ಹವೈ. ತೆನೈಸೊ ಮಿ ತುಮೊನೆ ಕೆಕ್ಲೊ ಮಯಾ ಕರೊಸ ಕೈನ ತಿಳ್ಸವಾನು ವ್ಹೈ.
ಅಪರಾದಿನೆ ಮಾಫಿ
ಮನಸೆ ದುಖ ಕರಾಲೊ ತುಮೊಮಾ ಯಕ್ಲೊ ರ್ಹೈತಬಿ ತೆ ಕ್ಹಾಲಿ ಮನೆ ಯಕ್ಕಜ಼ ದುಖ ನತ್ತಿ ಕರ್ಯೊ ತುಮಾರಾಮಾ ಘನ್ನಾಜ಼ನಾವೊನೆ ದುಖ ಕರ್ಯೊಸ. ತೆ ದುಖ ಕ್ಹಾರಾ ಜ಼ನಾವೊನೆ ಥಯುಸ ಕೈನ ಮಿ ಕತೊ ನೈ. ಹವಾ ಮನಕ್ಹನೆ ತುಮಾರಾ ಘನ್ನಾ ಮನಕ್ಹೊಕ್ಹು ಮಳಲ ಶಿಕ್ಷಾ ಬಸ್ಸ. ಹಮ್ನಾ ತುಮೆ ತಿನೆ ಶಿಕ್ಷಾ ದಿದ್ಯಾವಾಚಿ ತಿನೆ ಮಾಫಕರೊ, ತಿನೆ ಮಯಾ ಕರೊ. ನೈತೊ ತೆ ಘನ್ನೊ ದುಖಮಾ ಡುಬಿ ಜಾ಼ವಸ. ತಿನಾಹುತಿ ತಿನೆ ತುಮೆ ಮಯಾ ದೆಕಾಡು ಕೈನ ಮಾಂಗಿಲ್ಯುಸ. ಕ್ಹಾರಾ ವಿಷಯಮಾ ತುಮೆ ವಿಧೆಯ ಥಯಾಸು ನೈ ಕೈನ ತುಮಾರಿ ಚಾಳಿಯೊ ಪರಿಕ್ಷಾ ಕರ್ಲಿನ ತಿಳಿದಿಲ್ಯು ಕೈನ ತೆಜ಼ ಉದ್ದೆಶಕ್ಹು ಬರ್ದ್ಯೊಸ. ತುಮೆ ಕಿನೆ ಮಾಫ ಕರೊಶಿ ನೈ ತಿನೆ ಮಿಬಿ ಮಾಫ ಕರುಸ. ತುಮಾರಾಹುತಿಜ಼ ತಿನೆ ಕ್ರಿಸ್ತನಾ ಸನ್ನಿದಾನಮಾ ಮಾಫ ಕರ್ಯೊಸ. ಸೈತಾನ ಅಪೊನೆ ಮೊಸ ಕರಿಪಾಡು ನೈ ಕೈನ ಅಮ ಕರ್ಯೊ. ತೆ ಸು ಕರಸ ತಿನಾ ವಿಚಾರೊ ಕಿಮ್ಮ ಶೆ ಕೈನ ಅಪೆತೊ ಚೊ಼ಕಿ ತರಾಜ಼ ತಿಳದಿಲಿದ್ಯಾಸ.
ತ್ರೊವಾನೆ ಪೌಲಾನಿ ಪ್ರಯಾಣ
ಕ್ಹುದಾ ಮಾರಾಹುತಿ ಬಾಕಲ ಕಾಡ್ಯೊಸ ಕೈನ ವಿಚಾರ ಕರಲಿನ ಕ್ರಿಸ್ತನಿ ಸುವಾರ್ತೆ ಕವಾನೆ ಮಿ ತ್ರೊವಾ ಕವಾನಾ ಗಾಮೆ ಆಯೊ. ರ್ಹೈತುಬಿ ತ್ಯಾ ಮಾರೊ ಭೈ ತಿತ ನೈ ಮಳಲಕ್ಹು ಮನೆ ಸಮಾದಾನ ಥಯು ನೈ ತಿನಾಹುತಿ ತ್ಯಾ ರ್ಹಯಲ ಕ್ಹಾರಾವೊನೆ ಮಳಿನ ತ್ಯಾಂತೊ ಮೆಕೆದೊನ್ಯನೆ ಆಯೊ.
ಕ್ರಿಸ್ತ ಮುಲಕ ಜಯ
ಕ್ಹುದಾನೆ ಸ್ತೊತ್ರಾ ಥಾವಾದೆ ಕ್ರಿಸ್ತನಾ ಮುಲಕ ಕೆಳಾಮಾಬಿ ಅಪೊನೆ ಜಿತ್ತಾಡಾಲೊ ವ್ಹೈ. ಕ್ಹುದಾನಾ ಗ್ಯಾನನಿ ಚೊ಼ಕಿ ಬಾಸ ಕ್ಹಾರಿ ಜ಼ಗಾ ಫೈಲಾವಾನೆ ಅಪೊನೆ ಉಪಯೊಗ ಕರ್ಯೊಸ. ರಕ್ಷಣೆನಿ ವಾಟಮಾ ರ್ಹಯಲವಾಲಾವೊನೆ ವರಿ ಹಾಳ ಥಾವಾನಿ ವಾಟಮಾ ರ್ಹಯಲ ಮನಕ್ಹೊನೆ ಕ್ಹುದಾಮಾ ಕ್ರಿಸ್ತನಿ ಬಾಸನಾ ಮನಕ್ಹೊ ಥಯಾಸ. ಅಪೆ ಹಾಳ ಥಾವಾನಾ ವಾಟಮಾ ರ್ಹಯಲವಾಲಾವೊನೆ ತ್ಯುನೆ ಬಳಾನು ಆಗ ಥಯಾಸ; ರಕ್ಷಣೆನಾ ವಾಟ್ಮಾ ರ್ಹಯಲವಾಲಾವೊನೆ ಜುವ ದಿವಾಲಾ ಸುಗಂದ ವ್ಹೈ. ಹವಾ ಕಾಮೊನೆ ಕುನ್ನ ಲಾಯಕ ವ್ಹೈ? ಕೆಕ್ಲಾಕಿ ಮನಕ್ಹೊ ಕ್ಹುದಾನಿ ವಾಕ್ಯಾ ತಿಮಾ ಸು ಚಾ಼ಯೆ ತೆ ಘಾಲಿನ ವ್ಯಾಪಾರ ಕರಸ. ಹಮೆ ತೊ ತಿಮ್ಮ ನವೈ. ಕ್ಹುದಾಕಂತಾಜ಼ ಇನಿಲಿದಲವಾಲಾ ಥೈನ ಕ್ಹುದಾನಾ ಕ್ಹಾಮಾ ಕ್ರಿಸ್ತ ಯೆಸುನಾ ಅನ್ಯೊನ್ಯತೆಮಾ ಹಮೆ ಸು ಹೊತ್ತು ತೆಜ಼ ತುಮೊನೆ ಕದ್ಯಾಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.