Sikkiligar Bible
2 ಕೊರಿಂಥ 11
ಪೌಲಾ ಹುಶಾರಕಿ ಕರಾನು
ಮಿ ಮನೆ ಹೊಗಳಿ ಲಿವಾನೆ ಪಿಸಾಳಾಪನೆ ತುಮೆ ನಕ್ಕರ ತಡ್ದಿಲಿವೊಕೈನ ಪುಚ್ಚುಸ. ತುಮೆ ಮನೆ ತಡ್ದಿಲಿವೊ. ಕಾಕದ್ಯಾಮ ಕ್ಹುದಾಮಾ ರ್ಹವಾನಾ ಚಿಂತಾಕ್ಹುಜ಼ ಮಿ ತುಮಾರಾ ವಿಶಯಮಾ ಚಿಂತಾ ಕರುಸ. ತುಮೊನೆ ಕ್ರಿಸ್ತ ಕವಾಲಾ ಯಕ್ಲಾಜ಼ ದಾಣ್ಗಾನೆ ಶುದ್ದ ಕನ್ಯೆನೆ ಒಪ್ಸುಕೈನ ತುಮೊನೆ ತಿನೆ ಘಟ್ಟ ಕರ್ಯೊಸತೊ. ತೆನೈಸೊ ಕಿಮ್ಮ ಹವಾ ಕ್ಹಾಪನೆ ಮ್ಹೈ ಥೈನ ಮೊಸನೆ ಗೈ ತಿಮ್ಮಜ಼ ತುಮಾರು ಮನಸ ಕ್ರಸ್ತನಾ ವಿಶಯಮಾ ರ್ಹವಾನು ಯಥಾರ್ಥನೆ ಶುದ್ದನೆ ಛೊಡಿನ ಕೆಟ್ಟಿ ಗಯುಸ ಕೈನ ಮನೆ ಬುಚು಼ಕ ವಾಟ್ಯುಸ. ಕಾಕದ್ಯಾಮ ಕುನ್ನತಬಿ ಐನ ಹಮೆ ಕದಲ ಯೆಸು ನೈಸೊ ಹಜಿಯಕ್ಲೊ ಯೆಸು ತುಮೊನೆ ದಿಕ್ಹಾಲೊ ನತ್ತಿ ತುಮೆ ಹೊಂದೆವಾಚಿ಼ ರ್ಹಯಲ ಬಿಜಾ಼ ಥಯಲ ಆತ್ಮಾನಾ ಪ್ರೆರಣೆನೆ ಹೊಂದತಾಮಾ, ತುಮೆ ಒಪ್ಯಾವಾಚಿ ರ್ಹಯಲ ಬಿಜು಼ ಸುವಾರ್ತೆನೆ ಐಕ್ತಾಮಾ ತಡ್ದಿಲಿವೊಸಿ ಘನು ಘಾಬ್ರು. ಘನಾ ಚೊ಼ಕಾ ರ್ಹಯಲ ಅಪೊಸ್ತಲೊ ಕೈಲಿವಾನಾ ತ್ಯುನಾತಿಬಿ ಮಿ ಯಕ್ಕಮಾತಬಿ ಕಮ್ಮ ಥಯಲವಾಲೊ ನವೈಕೈನ ಮೊಜು಼ಸ. ಮಿ ತರಬೆತಿಮಾ ನಿಪುಣ ನೈ ರ್ಹೈತಬಿ ಗ್ಯಾನಮಾ ಕಮ್ಮ ನತ್ತಿ. ಎ ಕ್ಹಾರಾ ವಕ್ಹತಮಾ ದೆಕಾಡಿನ ದಿದ್ಯೊಸ.
ತೆ ಕೊರಿಂಥ ಸಭೆನೆ ದೊಕ್ಡಾನಿ ಮದತ ಲಿದ್ಯಾವಾಚಿ ಗಯಲಕ್ಹು ದೊಷೊ ಮೊಜು಼ ನೈಕೈನ ಪೌಲಾ ಕದಲ
ತುಮೆ ಅಬಿವೃದ್ದಿ ಥೌಕೈನ ಮನೆಮಿಜ಼ ತಗ್ಸಿಲಿನ ಕ್ಹುದಾನಿ ಸುವಾರ್ತಾನೆ ತುಮೊನೆ ಉಚಿತ ಕದಲಕ್ಹು ಪಾಪ ಕರ್ಯೊಸಸು? ತುಮೊನೆ ಸೆವಾ ಕರಾನಾಹುತಿ ಮಿ ಬಿಜಾ಼ ಸಭೆವೊಕ್ಹು ಮದತ ಕರಲಿವಾಡೊತೊ, ತುಮಾರಾಹುತಿ ಬಿಜಾ಼ ಸಭೆವೊಕ್ಹು ದೊಕ್ಡಾ ಉಸಲ ಕರಾಡೊತೊ. ಮಿ ತುಮಾರಾಮಾ ರ್ಹತಾಮಾ ಖರ್ಚಾನೆ ಸುಜ಼ ನೈ ರ್ಹಯಲ ಟೈಮಾ ಕಿನಾಜ಼ ಉಪ್ಪರ ವಜ್ಜು ಘಾಲ್ಯೊ ನತ್ತಿ. ಮೆಕೆದೊನತಾ ಆಯಲ ಭಾಯೊ ಮನೆ ಚಾ಼ಯೆ ಥಯಲ ಕ್ಹಾರುಜ಼ ದಿದ್ಯಾ. ಮಿ ತುಮೊನೆ ಕಿಮಾಜ಼ ವಜ್ಜು಼ ಥೌ ನೈಕೈನ ದೆಕಿಲಿವಾಡೊತೊ. ಇಪರಬಿ ದೆಕಿಲ್ಯುಸ. ಹಮ್ನಾ ಮಾರಿ ಹೊಗಳಿಕೆ ಆಖಾಯನಾ ಗಾಮೊಮಾ ಯಕ್ಲೊಬಿ ತಡದ್ಯಾವಾಚಿ ಕ್ರಿಸ್ತಕನ ಕ್ಹರಿಜ಼ ಕೌಸ. ತುಮಾರಾಕ್ಹು ಮಿ ಸುಜ಼ ಕಾ ಲಿವಾಡೊ ನತ್ತಿ? ತುಮೊಪರ ಮಯಾ ನೈ ರ್ಹಯಲಕ್ಹು ಸು? ನತ್ತಿ, ತುಮೊಪರ ಹಮೊನೆ ರ್ಹಯಲ ಮಯಾ ಕೆಕ್ಲಿಕಿ ಕ್ಹುದಾ ದೆಕ್ಯೊಸ. ದಕ್ಹಾಜನಾ಼ ತ್ಯುನೆ ಕರಾನಾ ಕಾಮೊ, ಅಪೆ ಅಪೊಸ್ತಲೊ ಥೈನ ಕರಾನಾ ಕಾಮೊ ಸರಿ ಸಮಾನ ವ್ಹೈ ಕೈನವಾದ ಕರಾನೆ ಅವಕಾಶ ಹುಡಕಸ. ಹುಡ್ಕಾಲಾವೊನೆ ಕಯುಜ಼ ಆಸ್ಪದ ಮಳೆವಾಚಿ಼ ಮಿ ಹಮ್ನಾ ಕರಾನುಜ಼ ಅಗೊ ಬಡೈನ ಜೌಸ. ತೆನೈಸೊ ಥ್ಯವಾ ಸುಳ್ಳ ಅಪೊಸ್ತಲೊ, ಮೊಸಕರಾಲಾ ಕಾಮವಾಲಾ, ಕ್ರಿಸ್ತನಾ ಅಪೊಸ್ತ ಥೈನ ದಿಕ್ಹಾನಾಹುತಿ ಬಿಜು಼ ರೂಪ ಘಾಲ್ಲಿಲಿವಾಲಾ ಥಯಾಸ. ಆಂ ಸುವೈ ಘಾಬ್ರು ನವೈ. ಸೈತಾನ ತೆಜ಼ ಪ್ರಕಾಶ ರೂಪ ದೆವದೂತನು ರೂಪ ಘಲ್ಲೆತಾಮಾ, ತಿನಾ ಸೆವಕೊ ನಿತಿನೆ ಸೆವಕೊ ಥೈನ ದಿಕ್ಹಾನಾಹುತಿ ರೂಪ ಘಾಲ್ಲಿವಾನು ಘಬ್ರುಸು ನವೈ. ತ್ಯುನು ಅಂತ್ಯಾವಸ್ಥೆಬಿ ತ್ಯುನಾ ಕಾಮೊನೆ ತಕ್ಕ ರ್ಹವಸ.
ತೆ ಕ್ರಿಸ್ತನಾ ಸೆವೆಮಾ ಪಡ್ದಲ ಕಷ್ಟ ಕ್ರಿಸ್ತಕ್ಹು ಹೊಮದಲ ಜಾಸ್ತಿ ಕಯು ವ್ಹೈ ಕೈನ ಕವಾನು
ಕುನಬಿ ಮನೆ ಬುದ್ದಿಹಿನ ವ್ಹೈ ಕೈನ ತಿಳದ್ಯೊ ನಕೊ ಕೈನ ಫರಿನ ಕೌಸ. ತಿಮ್ಮಜ಼ ಸ್ಹೆಂ ಕರಿತಬಿ ಚಿಮತಾ ನತ್ತಿ. ಮನೆ ಬುದ್ದಿ ನೈಸೊವಾಲೊ ಕೈನ ಸ್ವಿಕಾರ ಕರಿನ. ತೆಳಾಮಾ ಮಿ ಆತ್ಮಾನಿ ಪ್ರಶಂಸೆ ಕರಾನೆ ಕಮ್ಮ ಥೈತಬಿ ಕಮ್ಮ ಥಾವಸ. ಮಿ ಹಮ್ನಾ ಬೊಲಾನಾ ವಾತೊನೆ ಕರ್ತಾನೆ ಅನುಸರಸಾಲಾ ಥೈನ ನೈಸೊ ಭರೊಕ್ಹಾಕ್ಹು ತಿನೆ ಹೊಗಗಳಿಲಿವಾನೆ ಬುದ್ದಿ ನೈಸೊವಾಲಾ ನಿಂಗತ ಕರುಸ. ದಕ್ಹಾಜ಼ನಾ ಲೊಕನು ಸಮಂದ ಥಯಲ ಕಾಮೊಮಾ ಹೊಗಳಿಲಿವಾನಾಹುತಿ ಮಿ ಹೊಗಳುಸ. ತುಮೆ ಗ್ಯಾನವಾಲಾ ಥೈನ ಗ್ಯಾನ ನೈಸೊವಾಲಾವೊನೆ ಕ್ಹುಶಿಕ್ಹು ತಡ್ದಿಲಿವೊಸಿತೊ. ಯಕ್ಲೊ ತುಮೊನೆ ತಿನಾಮಾ ವಶಮಾ ಕರಲಿದ್ಯಾಮ, ಯಕ್ಲೊ ತುಮೊನೆ ಗಳಿತಬಿ, ಯಕ್ಲೊ ತುಮೊನೆ ಫರಿನ ಧರ್ಯಾಮ, ಯಕ್ಲೊ ತಿನೆ ಹೆಚ್ಕಿ ಕರಲಿದ್ಯಾಮ ಯಕ್ಲೊ ತಿನಾ ಮ್ಹೊಡಾಪರ ಮಾರಿತಬಿ ತಡ್ದಿಲಿವಸತೊ. ಹಮೆ ತಾಕತ ನೈಸೊವಾಲಾ ಥೈನ ಸರಮಕ್ಹು ಕೌಸ. ಕಯಾ ಆದಾರಕ್ಹು ಕುನ್ನತಬಿ ಮ್ಹೊಟಾಪನಕ್ಹು ಹೊಗಳಸತೊ ತಿನಾಕ್ಹುಜ಼ ಮಿ ಹೊಗಳಿಲಿವಾನಾಹುತಿ ಗ್ಯಾನನೈಸೊವಾಲಾ ನಿಂಗತ ಬೊಲಾಡೊಸ. ತ್ಯುನೆ ಇಬ್ರಿವಾಲಾ ವ್ಹೈ? ಮಿ ಇಬ್ರಿವಾಲೊ ವ್ಹೈ ತ್ಯುನೆ ಇಸ್ರಾಯಲನಾ ವ್ಹೈ? ಮಿ ಇಸ್ರಾಯಲವಾಲೊ ವ್ಹೈ. ತ್ಯುನೆ ಅಬ್ರಾಮನನಾ ವಂಶವಾಲಾ ವ್ಹೈ? ಮಿಬಿ ತೆಜ಼ ವಂಶವಾಲೊ ವ್ಹೈ. ತ್ಯುನೆ ಕ್ರಸ್ತನಾ ಸೆವಕೊ ವ್ಹೈ? ತ್ಯುನಾತಿಬಿ ಮಿ ಹೆಚ್ಚ ಸೆವೆ ಕರಾಲೊ ಥಯೊಸ. ಮಿ ಗ್ಯಾನ ನೈಸೊವಾಲಾ ನಿಂಗತ ಬೊಲಾಡೊಸ ಕ್ರಿಸ್ತನಾ ಸೆವಾಮಾ ತ್ಯುನಾತಿಬಿ ಹೆಚ್ಚ ಮ್ಹೈನತ ಕರ್ಯೊಸ, ಹೆಚ್ಚ ಜೆಲಮಾ ರ್ಹಯೊಸ, ಮಿತಿಮಿರಿನ ಮಾರೊ ಕ್ಹಾದ್ಯೊಸ. ಘನಿಸಲಾ ಮೌತನಾ ಮ್ಹೊಡಾಮಾ ಕ್ಹಾಪಡ್ಯೊಸ. ಪಾಂಚ಼ಸಲಾ ಯಹುದ್ಯೊಕ್ಹು ಮನೆ ಯಕ್ಕ ಕಮ್ಮ ಚಾಳಕ್ಹ ಮಾರೊ ಬೈಟ್ಯಾಸ. ತನ್ನಸಲಾ ಬಾರಕೊಲಕ್ಹು ಮನೆ ಮಾರ್ಯಾಸ. ಯಕ್ಕಸಲಾ ಮನಕ್ಹೊ ಮನೆ ಕ್ಹಲಾಸ ಕರಾನೆ ದಗ್ಡಾ ನಾಕ್ಯಾಸ. ತನ್ನಸಲಾ ಮಿ ರ್ಹಯಲ ಹಡಗ ತುಟಿ ಗಯು. ಯಕ್ಕರಾತ ಯಕ್ಕಪಾಟ ಸಮಮದರಮಾ ಕಾಟ್ಯೊಸ. ಕ್ರಸ್ತನಿ ಸೆವಾಮಾ ಕೆಕ್ಲಾಕಿ ಕ್ಹಮ್ಮೊ ಘಾಲ್ಯಾಸ. ನದಿಯೊನಾ ಅಪಾಯೊ, ಚ್ವಟ್ಟಾನಾ ಅಪಾಯೊ, ಕ್ಹುದನಾ ಮನಕ್ಹೊ ಅಪಾಯೊ ಅನ್ಯ ಮನಕ್ಹೊಕ್ಹು ಅಪಾಯೊ, ಗಾಮಾ ಅಪಾಯ, ಬಿಜಿ ಜ಼ಗಾಮಾ ಅಪಾಯೊ ಸಮಂದಮಾ ಅಪಾಯೊ, ಸುಳ್ಳ ಭಾಯೊಕ್ಹು ಆಪಾಯೊ, ಮನೆ ಥಯು. ತ್ರಾಸ ಕ್ಹೈನ ರಾಬ್ಯೊಸ, ಕೆಕ್ಲಿಸಲಾ ನಿಮದರ ಹಾಳ ಥೈಸ; ಭುಕ್ಕಕ್ಹು ಪನಿನಾ ತರಕ್ಹಕ್ಹು ವದ್ಯಾಡ್ಯೊಸ; ಕೆಕ್ಲಿಕಿಸಲಾ ಅನ್ನ ವರಿ ವಣ್ಣಾ ನೈಸೊ ಅಲೆದಾಡ್ಯೊಸ; ಥಂಡನಾ ದಿನಮಾ ಕಾಪ್ಯೊಸ. ಹವಾ ಬಿಜಾ ಸಂಗತಿಯೊಮಾ, ಕ್ಹಾರಾ ಸಭೆವೊನಾಹುತಿ ಚಿಂತಾ ದಿನ್ನೆ ದಿನ್ನೆ ಮನೆ ಕದ್ರಾತುತು. ಕುನ್ನತಬಿ ತಾಕತವರ ರ್ಹಯಾರೆ ಮಿ ತಿನಾಕ್ಹಾತೆ ತಾಕತವರ ಥೈನ ವ್ಹತ್ತೊ? ಕುನ್ನತಬಿ ತಪ್ಸಿ ಲಿದ್ಯಾಮ ಮಿ ಸಂತಾಪ ಪಡ್ದೆವಾಚಿ ವ್ಹತ್ತೊ? ಮಿ ಹೊಗಳಿಲಿದ್ಯಾಮ ಮಾರಿ ತಾಕತನಾಹುತಿ ಹೊಗಗಳಿಲೆತೊತೊ. ಮಾರಾ ವಾತೊ ಸುಳ್ಳ ವ್ಹೈ ಕೈನ ಮಾರೊ ಕರ್ತಾ ಥಯಲ ಯೆಸು ಕ್ರಿಸ್ತ ಕ್ಹುದಾ, ಬಾಬಿ ಥಯಲವಾಲೊ ಹಮೆಶಾಬಿ ಸ್ತುತಿ ಹೊಂದಾಲೊ ವ್ಹೈ ಕೈನ ಕ್ಹುದಾ ವ್ಹೈ ಕೈನ ಗೊತ್ತ ಥಯು. ದಮಸ್ಕಮಾ ರಾಜೊ಼ ಥಯಲ ಅರೆತನಾ ಅದಿನಮಾ ರ್ಹಯಲ ಅದಿಪತಿ ಮನೆ ಧರುಕೈನ ದಮಸ್ಕನಾ ಗಾಮನೆರ ಕಾಯ್ದಾತಾಮಾ. ತ್ಯುನೆ ಮನೆ ಯಕ್ಕ ಟೊಪ್ಲಿಮಾ ಬೈಟಾಡೊ ಗೊಡಿಮಾ ರ್ಹಯಲ ಯಕ್ಕ ಕಿಡಕಿತಾ ಉತಾರಿ ಪಡ್ಯಾ. ಇಮ್ಮ ತಿಮಾ ಹತ್ತಕ್ಹು ತಪ್ಸಿಲಿನ ನ್ಹಾಟಿ ಗಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.