Sikkiligar Bible
2 ಕೊರಿಂಥ 10
ತಿನೆ ಅದಿಕಾರ ನತ್ತಿಕೈನ ವಿರೊದಿಯೊ ಕದಲ ವಾತೊನೆ ಪೌಲಾ ದಿವಾನು ಜವಾಬ
ಪೌಲಾ ಹಮಾರಾ ಕ್ಹಾಮೊ ರ್ಹತಾಮಾ ದಿನ ಥೈನ ಚಾ಼ಲಿಲಿವಸ ದೂರಮಾ ರ್ಹತಾಮಾ ಅಪೊನೆ ದಿಟ್ಟತನಾ ದೆಕ್ಲಾಡಾಲೊ ಥಯೊಸ ಕೈನ ಕವಾನು ತೆ ಪೌಲಾ ಕವಾಲೊ ಮಿ ಕ್ರಸ್ತನು ಶಾಂತ ಮನಸನೆ ಕ್ಹರಿನಿ ಸ್ಹೆಂನೆ ಲೈನ ತುಮೊನೆ ಕ್ಹರಿಜ಼ ಕವಾನು ಸುವೈ ಕದ್ಯಾರೆ, ಕುನಬಿ ಅಪೊನೆ ಲೊಕನಾ ತರಿಕಾಮಾ ಜಿವ್ಸಸಕೈನ ಮೊಜ಼ಸತೊ ತ್ಯುನಾ ಕ್ಹಾತೆ ದಿಟ್ಟತನಾಕ್ಹು ರ್ಹೌ ಕೈನ ಕೈಲಿದ್ಯೊಸ. ಹಮೆ ತುಮಾರಾ ಕ್ಹಾತೆ ರ್ಹತಾಮಾ ಥ್ಯವು ದಿಟ್ಟತನಾನೆ ದೆಕ್ಲಾಡಾನಾಹುತಿ ಅವಕಾಶ ಮಳು ನೈ ಕೈನ ತುಮೊಕನ ಮಾಂಗಿಲ್ಯುಸ. ಅಪೆ ಲೊಕಮಾ ರ್ಹೈತಬಿ ಲೊಕನಾಹುತಿ ಯುದ್ದ ಕರಾಲಾ ನವೈ. ಅಪೆ ಉಪಯೊಗ ಕರಾನಾ ಆಯುದೊ ಲೊಕನಾ ಆಯುದೊ ನವೈ. ತೆ ಕ್ಹುದಾನಾ ಇಸಾಬಮಾ ತಾಕತವರ ಥಯಲ ವ್ಹೈ ಕೊಟೆವೊನೆ ಪಾಡಾಲಾ ಥಯಾಸ. ಅಪೆ ಕ್ಹುದಾನಾ ಗ್ಯಾನನೆ ವಿರೊದಿಯೊ ಥೈನ ಉಟಾನಾ ಅಹಂ ಬಾವಾನಾವೊನೆ ನಸ್ಟ ಕರಿನ, ಹರಯಕ್ಕ ವಿಚಾರೊನೆ ಕ್ರಿಸ್ತನೆ ವಿದೆಯೆ ಥಾವಾ ನಿಂಗತ ಕಬ್ಜೊ ಕರಿನ, ತುಮಾರಿ ವಿದೆಯತೆ ಪೂರಾ ಥಯಲ್ಪರ ಕ್ಹಾರಾ ಅವಿದೆಯತೆನೆ ಪ್ರತಿಕಾರನೆ ದಿವಾನಾಹುತಿ ತಯ್ಯಾರ ಥಯಾಸ. ತುಮೆ ಭಾರು ರ್ಹಯಲ ಯಕ್ಕಜ಼ ದೆಕ್ಯೊಸಿ. ಕುನ್ನತಬಿ ತಿನೆ ಕ್ರಿಸ್ತವಾಲೊ ವ್ಹೈಕೈನ ಒಪ್ಪಿ ಲಿದ್ಯಾರೆ ತೆ ವಿಚಾರ ಕರಲಿನ ತೆ ಕಿಮ್ಮ ಕ್ತಿಸ್ತವಾಲೊ ವ್ಹೈ ತಿಮ್ಮಜ಼ ಹಮೆಬಿ ಕ್ರಸ್ತವಾಲಾ ವ್ಹೈ ಕೈನ ಕಳೈಲಿವಾದೆ. ಹಮೊನೆ ರ್ಹವಾನು ಅದಿಕಾರನೆ ಹಮೆ ಯಕ್ಕ ವಕ್ಹತ ಹೆಚ್ಚ ಹೊಗಳಿಲಿದ್ಯಾಮ ತಿಮ್ಮಜ಼ ಹೊಗಳಿ ಲಿವಾಮಾ ಸರಮೌ ನೈ, ತೆನೈಸೊ ತುಮೊನೆ ಪಾಡಾನಾಹುತಿ ನವೈ ಭಾಂದಾನಾಹುತಿ ವ್ಹೈ ಕರ್ತಾ ಎ ಅದಿಕಾರ ಹಮೊನೆ ದಿದಲ ರ್ಹವಸ. ಮಿ ತುಮೊ ಪತ್ರಿಕೆನಾ ಮುಲಕ ಬುಕ್ಕಾಡಾಡೊಸ ಕೈನ ತಿಳ್ದಿ ಲಿವೊ ನಕೊ. ತಿನಾಕ್ಹು ಆಯಲ ಪತ್ರಿಕೆ ಕಟೊರ ರ್ಹಯಲ ವ್ಹೈ, ತಾಕತವರ ಥಯಾಸ, ತೆನೈಸೊ ದೈಹಿಕ ಥಯಲ ತೆ ಕಮಜ಼ೊರ ನ್ಹವೈ ತಿನಾ ವಾತೊ ಅವಮಾನನಾ ವಾತೊ ವ್ಹಯ ಕೈನ ದಕ್ಹಾ ಜ಼ನಾ ಕವಸತೊ. ಥ್ಯವಾ, ಅಪೆ ದೂರ ರ್ಹತಾಮಾ ಪತ್ರಿಕೆನಾ ಮುಲಕ ವಾತೊಮಾ ಕೆವಾ ಥಯಾಸತೊ ನಜಿಕ ರ್ಹತಾಮಾ ಕಾಮೊಮಾಬಿ ಥ್ಯವಾಜ಼ ಛೆ ಕೈನ ಕಳೈಲಿವಾದೆ.
ಬಿಜೆಯಕ್ಲಾ ಸವಾರತಾ ಕದಲ ಜ಼ಗಾಕನ ತೆ ಕವಾಲೊ ನ್ಹವ್ಹೈ ಕೈನ ಪೌಲಾ ಕವಸ
ತ್ಯುನೊನೆ ತ್ಯುನೆಜ಼ ಹೊಗಳಿಲಿವಾಲಾವೊಮಾ ಹಮೊನೆ ಸೆರಸಿಲಿವಾಹುತಿ ರ್ಹವಾದೆ ತ್ಯುನಕ್ಹಾತೆ ಹೊಲಸನಾ ಥಾವಾದೆ ಮಿ ಪಸಂದ ಕರ್ತೊ ನೈ. ತ್ಯುನೆತಬಿ ತ್ಯುನಾ ತ್ಯುನಾಮಾಜ಼ ತ್ಯುನೊನೆ ಅಳತಿ ಕರಲಿನ ತ್ಯುನೊನೆತ್ಯುನೆಜ಼ ಹೊಲಿಸಿಲಿನ ವಿವೆಕ ನೈಸೊವಾಲಾ ಥಯಾಸ. ಹಮೆತಬಿ ಹಮಾರಾ ಯೊಗ್ಯತೆನೆ ಮಿರಿನ ಹೊಗಳಿ ಲಿದ್ಯಾವಾಚಿ ಕ್ಹುದಾ ಹಮೊನೆ ನೆಮ್ಸಲ ನಿಂಗತ ಮರೆಮಾ ರ್ಹೈನ ಹೊಗಳಿ ಲಿಯೆಸ. ಎ ಮರೆಮಾ ರ್ಹೈನ ತುಮೊಲಕ್ಕಾ ಆಯಾಸ. ಹಮೆ ಕ್ರಿಸ್ತನಿ ಸುವಾರ್ತೆನೆ ಕತಾ ಬಿಜಾ಼ವೊತಿ ಪೈಲಾಜ಼ ತುಮೊಕನ ಆಯಲಕ್ಹು ತುಮೊಪರ ಅದಿಕಾರ ನೈಸೊವಾಲಾ ನಿಂಗತ ಮೆರೆನೆ ಅತಿಕ್ರಮಿಸಿನ ಜಾ಼ತಾ ನೈ. ಕ್ರಸ್ತನಿ ಸುವಾರ್ತೆನೆ ಕತಾ ಹಮೆ ತುಮೊಕನ ಆಯಾಸತೊ. ಅಪೆ ಮಿತಿಮಿರಿನ ಬಿಜಾ಼ವೊನಾ ಮ್ಹೈನತನಾ ಫಲನೆ ಲಿನ, ಎ ಹಮಾರಾ ವ್ಹೈ ಕೈನ ಜಗ್ಗಾಲಾ ನವೈ. ತೆನೈಸೊ ತಾರಿ ನಂಬಿಕೆ ಹೆಚ್ಚ ಥಾತಾಮಾ ತುಮಾರಾ ಮುಲಕ ಹಮಾರಿ ಮಿತಿ ಹಜಿ಼ ಫೈಲಿ. ತುಮೆ ಹಿಂಗೆ ರ್ಹವಾನಾ ಗಾಮೊಮಾ ಸುವಾರ್ತೆ ಕಯೆಸ ಕೈನ ಆಸ ಮ್ಹೆಲ್ಲಿದ್ಯಾಸ. ಬಿಜೆಯಕ್ಲಾನಾ ಜ಼ಗಾಪರ ಹಮೊನೆ ಮಳಲ ಫಲನಾಹುತಿ ವೃದ್ದಿ ಥಾತಾ ನೈ. ಹೆಚ್ಚ ಥಾವಾಲೊ ಕರ್ತಾಮಾ ಹೆಚ್ಚ ಥಾವಾದೆ. ತಿನೆ ತೆಜ಼ ಹೊಗಳಿಲಿವಾಲೊ ಯೊಗ್ಯ ನ್ಹವೈ. ಕರ್ತಾ ಕಿನೆ ಹೊಗಳಸತೊ ತೆಜ಼ ಯೊಗ್ಯ ವ್ಹೈ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.