BIBLIYA NTAGATIFU OMU MASHI
Olwimbo 8
Ocibâga mushinja wîrhu, olya wayonkaga ibêre lya nyâmà1! Singa amango nkubuganyire embuga nanakuhôbera abandi barhanangaye.
Nanakuhêka nkuhise omu mwa nyâmà2 nâwe onyigîrize. Nankakulabuzize oku irivayi lyâni linjinja n’oku murhobo gwâni gw’engerenadi;
Okuboko kwâge kulembe kwo nshegemire, n’okulyo kwâge kwo kunzonzire.
Omuhya-mulume
Banyere b’e Yeruzalemu, mwe mukasinga, murhatule, murhatule Musîmwa wâni n’ensa y’okushâsha kwâge erhacihika.
Okushwinja
Mwa ndi ola wayinamuka arhenga omu irungu ayegemîre Omuzigirwa wâge? Ho nakutuliraga aha murhi gw’epomi, halya nyoko ayankiraga izîmi lyâwe honênè, halyâla ayankiraga izîmi omuzîre wakuburhaga3.
Omuhya
Ompire nka ciziriko oku murhima gwâwe, nka ciziriko oku kuboko kwâwe. Bulyâla obuzigire kwo buzibuha nka lufù4, emitula yo miguma n’okuzimu, naye ye karhagomba. Emyampi y’emitula gubà muliro, ngulumira ya Nyamuzinda.
Amîshi galuge kurhi, garhazimiza buzigire, nanga obuzigire burhahêkwa na lwîshi. Owahâna ebiri omu mwâge byoshi mpu agule enzigi, kagayo kwône akayungukamwo.
Enyûshûlo
Bashinja haho omuhya
Mwâli wîrhu5 ali murhò: ibêre lyâge lirhacihona; Lêro kurhi rhwajira mwâli wîrhu olusiku bâmuganîza?
Omuhya-mulume
Akabà ali lukûta, rhwalushwinja n’amarhale, gukabà muhango, rhunâgusêze n’embaho z’enduluma.
Omuhya
Ncîbêrîre lukûta, n’amabêre gâni go galigi minâra. Omu masù gâge, ndi nka mbwîne omurhûla obu!
Salomoni âjiraga ishwa ly’emizâbîbu aha Baali-Hamoni. Alilangisa abalanzi, mpu ngasi muguma ayishimugalulira ebyafa by’amalehe: cihumbi ca magerha.
Eryani ishwa ly’emizâbîbu ndwîrhe nalilangîra: Wâni Salomoni ebihumbi by’amagerha byo byâwe, n’amagana abirhi g’abalanzi b’amalehe.
Omuhya-mulume
Nâwe wabêra omu masâne, abirhu badwîrhe bakuyumva. Nâni, obè nka walinyumvîsa! izù lyâwe6!
Omuhya
Yâka, Muzigirwa wâni obè nka kashafu, nka mutwîra gwa kashafu kalume, oyâkire oku ntondo z’amalâshi!
Source notes (6)
- Footnote Kucîfinja okwo Sulamita acîfinjire, erhi: nka wali mwene nyâmà! Ci kwône Nyamuzinda, ibà w’Israheli, arhali muntu. Ensiku acîderha «Mwene muntu», «Nyamuzinda haguma nîrhu», «Emanûweli» zo zicîfinjirwe.
- Footnote Omu mwa nyâmà* muli omu ka-Nyamuzinda ( 3, 4 ).
- Footnote Omuzîre waburhaga Israheli ( Eze 16, 3.44-45 ). Bene-Israheli emwâbo e Kanâni, îshe wâbo Muamoriti; nnina Muhititi.
- Footnote Obuzjgire amango bwamarhabâla, kwo kuli nka olufù, burhajîbwa omu irhwe. -Emitula kwo eri nka luhali; aha eri, kwo hali nk’aha omuliro guli: kuyokêra eyokêra. -Anagaya birya birugu, bulya birhalêrha buzigire. Byanagendera busha.
- Footnote Mwâli wîrhu ye Yeruzalemu oyo bàdesire: ishwa lirhali linganaci, arhanagwêrhi côgo cizibu cakamufungîre oku babisha.
- Footnote Omuhya oyo bâbirwe; bamujizire «burhimanya» balonzize okuyumva n’okumanya ( Bush 8, 2 ). Abalenga b’omwandiko kwo bacîkebwa mpu ogu musemwa gwayûshûlagwa buzinda, erhi n’ecitabu cikola ciyunjwîre, kuderha mpu bahugûle ebinwa bimuli. Mpu omuhya wa muli eci citabu: Burhimanya, bwo budesirwe muli co. Nka kulya omu Bush 8, 2-3 , burhimanya oli nka mu hya wakanasîmwa, n’omu Mig 31, 10-31 , oburhimanya buli nka mukazi mwîkubagirwa.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.