BIBLIYA NTAGATIFU OMU MASHI

Olwimbo 7

Abimbiza

Galuka galuka Sulamita1, galuka galuka rhukulole ebusù. Cici mwâlolakwo Sulamita mwanasâmira okwo bigamba byombi?

Omuhya-mulume

Alà amagulu gâwe nka gayinjiha omu mikarabanda yâwe, wâni mwâli wa Nnahano!

Omunyunyu2 ogwêrhe! kwo guli nka ntabunganwa erhalimwo idivayi. Enda yâwe cirundo ca ngano cizonzirwe n’obwâso bwa lisi.

Amabêre3 gâwe gombi, bâna-hene babirhi, mahasha ga kashafu.

Igosi lyâwe kwo liri nka nkingi y’ihembe. Amasù gâwe kwo gali ak’enyôgero za Hesboni, aha muhango gwa Bati-Rabimi. Izulu lyâwe nka munâra gw’e Libano muzâmu oyêrekîre e Damasko.

Irhwe lyâwe kwo liyimanzire ak’entondo ya Karmeli; ensirha balilukire kwo ziri nka kaduku. Mwâmi arhonyize emihunga yâwe.

Nka wayinjiha wâni; nka wasoleha wâni!

Kwo osogorosire nka murhanda, n’amabêre gâwe nsisi za murhanda.

Nanaciderha nti narhangishonera oku murhanda, nyankekwo bihadu nka binga. Amabêre gâwe gabè nka nsisi za muzâbîbu, n’obwehe bw’omûka gwâwe buhumule nk’irehe linjà;

ebinwa byâwe bibè nk’irivayi linunu!

Omuhya

Liryâla Omuzigirwa wâni akananywa, liryâla akanabêza omu kanwa aha karhî k’amîno.

Niono ndi wa Muzigirwa wâni, n’omurhima gwâge emunda ndi guyêrekîre.

Yisha Muzigirwa wâni, yisha rhujè omu mashwa! Mwo rhwajilâla omu bishagala,

buca sêzi4 rhujè omu ishwa ly’emizâbîbu. Rhwalola erhi omuzâbîbu gukola gushabusire, erhi kuyâsa gukola gwayâsa, erhi emirhi y’engerenadi ekola yayâsa. Lyo nakuhà obuzigire bwâni ago mango.

Amandragori gohe gakola gadwîrhe gabaya, n’amalehe minjà goshi aha lusò garhuli. Amahyâhya n’amarhanzi, nkubîkirego wâshi Muzigirwa wâni.

Source notes (4)

Footnote «Sulamita», kwo kuderha: olyâla okola ogwêrhe omurhûla; shalom: orhûzize, salama, Omurhûla gwâyisha gwo bàdesire. Israheli muhyâhya âguhâbwa na Salomoni muhyâhya. -Kâni kwoshi mpu «galuka, galuka»: kuderha mpu ayishe, arhenge emwa bene. Boshi badwîrhe balinga olusiku lw’okushubira eka n’okurhenga omu bujà bw’e Babiloni. Hali n’okugalula omurhima gwâ1i guhabusire mpu gugaluke: Hoz 3, 5; 5, 15; Yer 3, 14 .
Footnote Ogwo munyunyu, Yeruzalemu oyo, «muyûbake omu karhî k’amashanja» ( Eze 5, 5; 38, 12 ), oku ntondo ezonzirwe n’orhubanda ci kwône arhali enyunda zoshi. -Eryo idivayi, buzigire obwo. -Entondo ziri emarhambi g’entondo ya Yûda, kwo zishusha nka mihuli myûmu ya ngano, (nka ntondo erikwo omushûshu). N’engano ekengeza okuyêra ecihugo câyishiyêra amango ga Masiha. Hoz 14, 6-9; Lul 72, 1 . -Obwâso bwa lisi omu rhubanda bulugibà.
Footnote Ago mabêre, zo ntondo ibirhi: Ebali na Garizîmi.
Footnote Obudufu n’esêzi, mango ga marhangulo; gayishihwa amango ga Masiha ( 1, 7; 3, 1; 5, 2 ).

BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY 4.0 · SourceEdition imported 2026-10-25.