BurhSira 17

1Nyamuzinda arhenzize omuntu omu budaka, na buzinda omu idaho amushubiza1. 2Abantu àbatwîrîre ensiku n’amango gagerêrîre, abahà obuhashe oku byoshi2 biri en’igulu. 3Nk’oku yêne ali, abahà emisî, abalema bamushushire3. 4Aha ngasi ciremwa okuyôboha omuntu, ly’omuntu akulira ensimba n’ebinyunyi. 5Bashobôla okukolêsa mahashe arhanu ga Nyakasane, nka buhashe bwa kali ndarhu, bàhâbwa okukolêsa obwenge n’obushinganyanya nka buhashe bwa kali nda, buhugûla ago mahashe gâge. 6Abalema bagwêrhe akanwa, olulimi, amasù, amarhwîri, abahà omurhima gw’oburhimanya. 7Abayunjuza bumanye n’obukengêre, abamanyîsa ehibî n’ehinja. 8Abahir’obumoleke omu murhima, mpu babone obunji bw’emikolo4 yâge. 9Anabahà okujira obukuze bw’ebisômerîne byâge, ensiku n’amango. 10Bakuze izîno lyâge limâna, baganîre obunji bw’ebi ajizire. 11Anabahè obumanye, kandi anabamanyîse irhegeko ly’akalamo. 12Ajira haguma nabo endagâno y’ensiku n’amango, abamanyîsa enkengêro5 zâge. 13amasù gâbo gabona obunji bw’irenge lyâge, amarhwîri gâbo gayumva obunene n’obwinjà bw’izù lyâge. 14Ababwîra, erhi: «Mucîlange oku bubî bwoshi», abahà amarhegeko bakulikira ngasi muguma oku wâbo.

Nyamuzinda mutwî w’emmanja

15Olugendo lwâbo kubona alubona ensiku zoshi, ntà mango lucîfulike aha arhalubone. 16Kurhenga oburhò bwâbo, enjira yâbo erhabayêrekeza oburhali bubî, ciru barhanahashaga okuhindula omurhima gwâbo guli nk’ibâle, gubè murhima gwa muntu. 17Ngasi lubaga aluhîre omurhambo wâlurhegeka, Israheli yêhe guli mwanya gwa Nyamuzinda yêne. 18Bulya ye murhanzi, amulera omu bwôrhere nkana, omu kubà amuyunjuzize bulangashane bw’obuzigire bwâge, arhacimulikiriraga. 19Ebijiro byâbo byoshi biri nk’izûba embere zâge, amasù gâge garhahusa kwalola olugendo lwâbo. 20Obulyâlya bwâbo burhacifulisiri amasù gâge, ebyâha byâbo byoshi biri embere za Nyamuzinda. 21Cikwône Nyakasane abà mwinjà, ayishi n’eciremwa câge, Arhabiherêrekeza erhi kubilîkirira, ci kulanga abilanga. 22Okuhâna kw’obuzigire kuli kubîka kw’omuntu, kunalange ecijiro cinjà nka mbonyi y’isù. 23Olusiku Nyamuzinda abahemba ho luciri, abavangulire omugisho gw’oluhembo lwâbo. 24Abacîyunjuzize anabahè omurhima gw’okugaluka, arhûlirize abacîzigulusire.

Mucîyunjuze

25Ogaluke emunda Nyamuzinda ali, oleke ebyâha byâwe, omushenge bwinjà, oleke okumugayîsa. 26Oshubire Ow’Enyanya, oleke obulyâlya, oshomhe lwoshi lwoshi obulenzi. 27Bulya ndigi wankajikuza Nyamuzinda ekuzimu, akabà abazîne barhamukuzizi, bamuhà irenge lyâge? 28Obukuze burhaba emw’emifù nk’oku burhaba emw’abarhahali, ozîne agwêrhe n’amagala ye Nyamuzinda. 29Nêci, obwonjo bwa Nyamuzinda bubà bunji, olukogo lwâge oku bantu bayêrekîre emund’ali. 30bulya omuntu arhankabà na byoshi, mwene-omuntu arhali karhafà. 31Bici bimoleka kulusha izûba? Kurhahanga lirhafulikwa n’ecitù. Omubiri n’omukò maligo byaka­nakola. 32Nyamuzinda ye lolà ngasi buhashe buli enyanya emalunga, abantu boshi bunabà budaka na luvù.